Read Malay, North Moluccan Matius 24 Bible Online

Matius 24 - Malay, North Moluccan bible

Matius 24

¹Abis itu, Yesus kaluar dari Ruma Ibada Pusat. Waktu itu, Dia pe murit-murit badekat pa Dia kong kase tunju Ruma Ibada Pusat pe gedung-gedung yang bagus-bagus itu pa Yesus.

²Kong Yesus bilang pa dorang, “Ngoni lia gedung-gedung itu, to? Dengar bae-bae e, nanti ada dia pe waktu, samua itu akan dapa kase ancor sampe rata, kong tara ada satu batu lagi yang mo tasusun pa dia pe tampa.”

³Abis itu, Yesus pigi di Bukit Zaitun, kong dudu di situ. Dia pe murit-murit badekat pa Dia la cuma dorang deng Dia saja yang bacarita. Dorang bilang, “Guru, kase tau pa torang ka, tempo apa yang Guru bilang tadi itu mo jadi? Turus, dia pe tanda-tanda apa kalu Guru mo datang ulang, deng tanda-tanda hari kiamat itu bagimana e?”

⁴Yesus bilang pa dorang, “Ngoni bajaga-jaga e, jang sampe ngoni dapa tipu.

⁵Barang, banya orang akan datang pake Kita pe nama, deng dorang bilang bagini, ‘Kita ini suda Mesias, Raja yang Tuhan Allah janji mo kase slamat pa manusia!’ Tapi dorang itu cuma biking tipu banya orang la iko pa dorang.

⁶Ngoni akan dengar ada prang di satu daera atau di tampa laeng. Tapi biar bagitu, jang ngoni tako. Samua itu musti jadi, tapi itu bolong dia pe waktu dunia mo kiamat.

⁷Karna nanti, suku deng suku akan baku prang, deng satu kerajaan deng kerajaan laeng akan baku prang. Kong nanti ada lagi kelaparan deng tana goyang di mana-mana.

⁸Tapi samua itu baru dia pe awal penderitaan sebelum hari kiamat, itu sama deng penderitaan yang parampuang rasa waktu mo melahirkan.

⁹ Kong waktu itu, orang-orang yang tara percaya mo tangka pa ngoni, turus mo serakan untuk siksa deng bunu pa ngoni. Kong orang-orang dari samua suku bangsa akan binci pa ngoni karna ngoni iko pa Kita.

¹⁰Turus, banya orang yang percaya pa Kita so tara mo percaya lagi. Dorang mo baku binci deng serakan dong pe tamang la dapa siksa.

¹¹Nanti ada banya orang yang datang, bilang kata, dorang itu nabi yang kase turus Tuhan Allah pe pasáng. Padahal dorang cuma tipu la banya orang so tara percaya lagi.

¹²Kong kajahatan yang orang biking mo lebe tatamba banya, karna itu banya orang so tara sayang lagi pa orang laeng.

¹³ Tapi orang yang tetap percaya pa Kita sampe dia pe ahir hidup,[49] Tuhan Allah mo kase slamat pa dia.

¹⁴Kong nanti Kabar Bae tentang Tuhan Allah Berkuasa sebagai Raja akan tasiar di seluru dunia la samua suku dapa kesempatan untuk tarima Kabar Bae itu. Abis itu, baru dunia mo kiamat.”

¹⁵ Yesus bilang lagi, “Nanti ada satu orang yang paling malawang pa Tuhan Allah mo datang. Orang itu mo badiri di tampa yang kudus di dalam Ruma Ibada Pusat, sama deng yang Tuhan Allah so perna bilang pa nabi Daniel dulu. (Sapa yang baca ini, perhatikan bae-bae la bole mangarti dia pe arti!)

¹⁶Kalu orang yang paling malawang itu so badiri di situ, orang-orang yang ada di daera Yudea itu lebe bae lari basambunyi suda di gunung-gunung.

¹⁷ Orang yang ada di atas ruma, jang turung pigi ambe barang-barang di dalam ruma, tapi turung kong lari suda.

¹⁸Bagitu lagi deng orang yang ada di kobong, jang bale lagi di ruma ambe pakeang.

¹⁹Kong yang paling sengsara waktu itu, ibu-ibu hamil deng ibu-ibu yang masi kase toto dong pe ana.

²⁰Berdoa suda, supaya waktu ngoni samua pigi lari basambunyi di gunung, tara baku tapár deng musim ujang atau di hari Sabat, hari yang orang agama Yahudi tara bole bakarja.

²¹ Barang, hari-hari itu sengsara skali, lebe sengsara dari samua yang orang perna rasa. Mulai dari pertama Tuhan Allah cipta dunia ini sampe skarang, so tara ada sengsara yang mo jadi sama deng itu, deng itu so tara akan jadi lagi.

²²Kong, kalu Tuhan Allah tara kase pende hari-hari sengsara itu, samua orang pasti akan mati. Tapi karna Dia sayang pa orang-orang yang Dia so pili, Dia kase pende hari-hari sengsara itu.

²³Waktu itu, kalu ada orang bilang pa ngoni, ‘Coba lia! Mesias ada di sini!’ Atau dorang bilang, ‘Mesias ada di sana!’ Jang ngoni percaya apa yang dorang bilang itu.

²⁴Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa yang hebat, supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

²⁵Jadi inga bae-bae e, samua ini Kita so bilang kamuka pa ngoni sebelum itu jadi.

²⁶ Jadi, kalu ada orang yang bilang pa ngoni, ‘Coba lia, Mesias ada di padang gurun!’ Jang ngoni ka sana. Atau kalu ada yang bilang, ‘Coba lia, Mesias ada di ruang yang tasambunyi!’, itu me jang ngoni percaya.

²⁷Karna waktu Anak Manusia yang dari sorga mo datang ulang, samua orang di dunia bisa lia. Itu sama deng kilat pe cahaya yang timbul di timur dapa lia sampe di barat.

²⁸ Umpama ada binatang mati di satu tampa, samua orang jadi tau karna nanti burung-burung bakumpul makang bangke di situ.”[50]

²⁹ Yesus bilang lagi, “Bagitu hari-hari sengsara itu so abis, matahari akan jadi galap, deng bulan so tara basinar lagi. Bintang-bintang akan jatu dari langit, kong samua yang ada di langit mo jadi kaco.

³⁰ Kong waktu itu suda, akan ada tanda di langit supaya tau Anak Manusia yang dari sorga mo datang ulang. Pe lia bagitu, samua suku bangsa di bumi jadi tako deng manangis. Dorang samua akan lia pa Anak Manusia datang di atas awan-awan di langit deng samua kuasa deng cahaya yang luar biasa.

³¹Turus, trompet akan babunyi kuat skali, kong Anak Manusia mo suru pa Dia pe malaekat-malaekat kaluar untuk kumpul pa samua Dia pe umat yang Dia so pili dari samua tampa di dunia ini, dari ujung ka ujung.”

³²Yesus bilang umpama satu bagini, “Coba ngoni balajar dari pohong ara. Kalu dia pe cabang-cabang kacil so mulai baijo deng mulai batunas, ngoni tau itu tanda musim panas so dekat.

³³Bagitu lagi kalu ngoni lia hari-hari sengsara yang Kita bilang itu so mulai jadi, ngoni jadi tau, so tara lama lagi Anak Manusia mo datang ulang.

³⁴Dengar bae-bae yang Kita bilang pa ngoni ini, orang-orang yang hidup skarang ini,[51] ada yang masi hidup sampe samua itu jadi.

³⁵Langit deng bumi mo abis, tapi Kita pe kata-kata akan tetap ada sampe slama-lamanya.”

³⁶ Yesus bilang lagi, “Tarada satu orang yang tau tempo apa Anak Manusia yang dari sorga mo datang ulang. Malaekat-malaekat di sorga tara tau, Anak Manusia sandiri me tara tau, cuma Bapa di sorga saja yang tau.

³⁷ Barang, kalu Anak Manusia yang dari sorga datang ulang, itu sama deng waktu jaman nabi Nuh dulu.

³⁸Waktu itu, dorang tara tau banjir basar mo datang, jadi dong hidup sama biasa, dong makang deng minum sama biasa, deng dong kawing sama biasa. Dorang pe hidup cuma babagitu turus sampe waktu nabi Nuh maso di kapal basar.

³⁹ Kong orang-orang itu tara tau banjir basar mo datang. Nanti dorang so tenggelam, baru dorang sadar. Sama deng bagitu lagi, nanti orang-orang tara siap waktu Anak Manusia yang dari sorga so datang ulang.

⁴⁰Nanti di waktu itu, kalu ada laki-laki dua orang yang bakarja di kobong, yang satu Tuhan Allah mo angka, kong yang satu mo dapa kase tinggal.

⁴¹Kong waktu itu lagi, kalu ada parampuang dua orang bagiling gandum, yang satu Tuhan Allah mo angka, kong yang satu mo dapa kase tinggal.

⁴²Karna itu, bajaga-jaga suda, karna ngoni tara tau tempo apa ngoni pe Tuhan mo datang.

⁴³ Tapi ngoni me musti inga bae-bae umpama satu ini: kalu tuang ruma so tau tempo apa papancuri mo bapancuri pa dia pe ruma, tantu dia tara mo tidor kong mo bajaga-jaga la papancuri itu tara mo maso di dia pe ruma.

⁴⁴Bagitu lagi deng ngoni, ngoni musti salalu siap, karna Anak Manusia yang dari sorga akan datang ulang di waktu yang ngoni tara sangka-sangka.”

⁴⁵Yesus bilang lagi, “Kalu ada orang karja yang pande deng setia, dia pe tuang angka pa dia jadi kapala untuk kase makang pa dia pe orang-orang karja yang laeng pas di dia pe waktu.

⁴⁶Orang karja itu akan paling sanang skali kalu dia pe tuang datang, kong dapa riki dia sementara biking dia pe tugas itu bae-bae.

⁴⁷Inga bae-bae yang Kita bilang ini, pasti dia pe tuang mo angka pa dia kong kase percaya pa dia untuk awasi samua dia pe tuang pe barang.

⁴⁸Tapi kalu orang karja itu jahat, dia akan babilang di dia pe dalam hati bagini,

⁴⁹‘Kita pe tuang masi lama baru pulang.’ Kong dia mulai pukul pa orang-orang karja yang laeng, turus dia makang deng minum sama-sama deng pangmabo-pangmabo.

⁵⁰Tapi nanti di hari yang dia tara sangka-sangka, deng di waktu yang dia tara tau, kage-kage dia pe tuang pulang.

⁵¹Turus dia pe tuang mo hukum pa dia deng hukuman yang barát. Dia dapa hukuman mati. Kong dia pe nasib sama deng orang-orang munafik. Di situ, dorang mo manangis turus-turus sampe dong pe gigi bababunyi karna menderita skali.”