Read Malay, North Moluccan Matius 26 Bible Online

Matius 26 - Malay, North Moluccan bible

Matius 26

¹Abis Yesus kase ajar samua itu, Dia bilang pa Dia pe murit-murit,

² “Ngoni so tau to, tinggal dua hari lagi torang orang Yahudi mo biking hari raya Paska untuk inga waktu Tuhan Allah kase bebas pa torang pe orang tua dulu-dulu dari bangsa Mesir yang jaja pa dorang. Kong waktu hari raya itu, ada orang yang mo serakan pa Anak Manusia yang dari sorga untuk dapa salib.”

³Waktu itu, orang Yahudi pe imam-imam kapala deng tua-tua bakumpul di imam basar Kayafas pe istana.

⁴Di situ dorang baku ator la mo tangka pa Yesus. Dorang mo tangka pa Dia deng cara sambunyi-sambunyi, kong mo bunu pa Dia.

⁵Tapi dorang baku bilang, “Jang tangka pa Dia pas di hari raya, jang sampe orang banya yang suka pa Dia mo biking kaco.”

⁶Waktu Yesus di kampong Betania, Dia basingga pa Simon pe ruma. Simon ini dulu perna dapa saki lepra.

⁷ Waktu Yesus sementara dudu makang, ada parampuang satu datang bawa minya wangi yang mahal satu botol.[54] Kong parampuang itu siram minya itu palang-palang pa Yesus pe kapala.

⁸Tapi waktu Yesus pe murit-murit lia dia biking bagitu, dorang tara sanang. Kong dorang bilang, “Minya wangi pe mahal bagitu kong dia kase halebiru tu!

⁹Kalu jual minya wangi itu, dia pe harga mahal skali, kong dia pe doi itu bole kase pa orang-orang miskin.”

¹⁰Tapi Yesus tau dorang pe pikiran itu, kong Dia bilang pa dorang, “Bikiapa kong ngoni mara pa parampuang ini? Kase biar suda. Dia so biking barang yang bae pa Kita.

¹¹ Orang-orang miskin salalu ada pa ngoni, jadi tempo apa saja ngoni bole bantu pa dorang, tapi Kita ini tara akan salalu sama-sama deng ngoni.

¹²Barang, waktu dia siram minya wangi pa Kita pe badan, itu sama deng dia so kase siap Kita pe mayat waktu Kita mo dapa kubur nanti.

¹³Inga bae-bae yang Kita bilang ini, di mana saja orang-orang kase tau Kabar Bae dari Tuhan Allah ini di seluru dunia, pasti dorang mo carita apa yang parampuang ini so biking pa Kita, sampe orang-orang akan inga pa dia turus.”

¹⁴Ada satu dari Yesus pe dua blas murit, dia pe nama Yudas Iskariot. Dia pigi pa imam-imam kapala.

¹⁵ Pe sampe di sana, dia tanya pa dorang, “Kalu kita serakan Yesus pa ngoni, apa yang ngoni mo kase pa kita?” Kong dorang kase doi perak tiga pulu[55] pa Yudas.

¹⁶Dari situ, Yudas mulai cari kesempatan yang pas la mo serakan Yesus pa dorang.

¹⁷Di hari pertama waktu dorang biking hari raya Roti Tara Pake Ragi,[56] Yesus pe murit-murit datang pa Dia kong batanya, “Guru, di mana Guru mau torang kase sadia makanang hari raya Paska untuk torang makang sama-sama?”

¹⁸Kong Yesus bilang pa dorang, “Ngoni ka sana di kota Yerusalem, di sana ngoni akan baku dapa deng satu orang. Bilang pa orang itu bagini, ‘Guru bilang, Dia pe waktu so tara lama lagi. Jadi di torang pe hari raya Paska ini, Dia mo makang sama-sama deng Dia pe murit-murit pa bapa pe ruma.’ ”

¹⁹Abis dengar Yesus bilang bagitu, Dia pe murit-murit biking sama deng yang Dia suru pa dorang itu. Turus dorang kase siap makanang hari raya Paska itu.

²⁰Waktu so malam, Yesus dudu makang sama-sama deng Dia pe murit dua blas orang.

²¹Sementara dong makang, Yesus bilang, “Inga bae-bae yang Kita bilang ini, ada satu orang dari ngoni yang akan mo bahianat pa Kita.”

²²Pe dengar itu, dorang pe hati jadi sedi skali. Kong satu-satu bilang pa Dia, “Guru, bukang kita, to?”

²³ Yesus bilang pa dorang, “Orang itu satu dari ngoni yang colo roti satu mangko deng Kita. Dia itu suda yang mo bahianat pa Kita.

²⁴Memang Anak Manusia yang dari sorga akan mati sama deng yang Tuhan Allah so tentukan dulu. Nabi-nabi so tulis bagitu di Kitab Suci. Tapi cilaka suda orang yang bahianat pa Anak Manusia, dia akan dapa hukuman yang barát! Orang itu lebe bae dia tara usa lahir di dunia ini.”

²⁵Kong Yudas yang mo bahianat itu bilang pa Yesus, “Guru, orang yang Guru bilang itu bukang kita, to?” Kong Yesus jawab pa dia, “Ngana sandiri yang so bilang bagitu.”

²⁶Waktu Yesus deng Dia pe murit-murit sementara makang, Yesus ambe roti kong bilang tarimakasi pa Tuhan Allah. Abis itu, Dia pela-pela roti itu kong Dia kase pa dorang, Dia bilang, “Roti ini Kita pe badan, ambe kong makang suda.”

²⁷Abis itu, Yesus ambe cawan kong bilang tarimakasi pa Tuhan Allah. Turus Dia kase pa dorang kong bilang, “Ngoni samua minum anggur dari cawan ini suda.

²⁸ Barang, ini Kita pe dara. Waktu Kita mati, Kita pe dara akan tatumpa untuk kase sah Tuhan Allah pe janji pa manusia. Kong Kita pe dara yang tatumpa itu untuk tebus banya orang pe dosa.

²⁹Dengar bae-bae yang Kita bilang pa ngoni e, dari sini ka sana, Kita so tara akan minum anggur lagi. Tapi nanti waktu Tuhan Allah so Berkuasa sebagai Raja pa Dia pe umat, baru Kita minum lagi anggur yang baru sama-sama deng ngoni.”

³⁰Abis itu, Yesus deng Dia pe murit-murit manyanyi lagu pujian untuk Tuhan Allah, kong dorang pigi di Bukit Zaitun.

³¹ Waktu dorang sementara bajalang, Yesus bilang pa dorang, “Malam ini suda, ngoni samua pe percaya pa Kita akan tagoyang sampe ngoni lari kase tinggal pa Kita. Barang, Tuhan Allah so perna bilang di Kitab Suci bagini, ‘Kita akan bunu pa gembala, kong domba-domba yang dia jaga akan talamburang kasana-kamari.’

³² Itu pe maksut, Kita akan mati, tapi waktu Kita hidup ulang, Kita akan sampe kamuka dari ngoni di daera Galilea la tong baku dapa di sana.”

³³Kong Petrus bilang pa Yesus, “Biar dorang samua pe percaya tagoyang sampe lari kase tinggal pa Guru, tapi kita ini tara akan mungkin!”

³⁴Kong Yesus bilang pa Petrus, “Dengar bae-bae yang Kita bilang pa ngana e, malam ini sebelum ayam bakuku, ngana so manyangkal tiga kali, bilang ngana tara kanal pa Kita.”

³⁵Tapi Petrus bilang pa Dia bagini, “Biar lagi kita musti mati sama-sama deng Guru, kita tara akan manyangkal pa Guru.” Kong Yesus pe murit-murit yang laeng me bilang bagitu.

³⁶Abis itu, Yesus deng Dia pe murit-murit pigi di kobong zaitun satu yang dia pe nama Getsemani. Turus, Yesus bilang pa Dia pe murit-murit, “Ngoni dudu di sini dulu e, Kita mo ka sana berdoa.”

³⁷Tapi Yesus bawa pa Petrus, Yakobus deng Yohanes, Zebedeus pe ana dua orang itu, iko pa Dia. Waktu itu, Dia pe hati mulai sedi, deng totofore.

³⁸Kong Dia bilang pa dong tiga, “Kita pe hati susa skali, rasa-rasa sama deng mo mati. Ngoni di sini dulu e, bajaga-jaga deng Kita turus.”

³⁹Abis itu Yesus bajalang ka sana sadiki, turus Dia berlutut sampe Dia pe muka kanal tana, kong Dia berdoa, “Ya Bapa, kalu bole, jang Kita dapa penderitaan ini. Tapi jang iko Kita pe mau, iko saja Bapa pe mau.”

⁴⁰Abis berdoa, Yesus bale pa Dia pe murit tiga orang itu, kong Dia dapa lia dorang ada tasono. Turus Dia kase bangun pa dorang deng bilang pa Petrus, “Ee, ngana tara mampo batahang barang satu jam untuk bajaga-jaga deng Kita?

⁴¹Bajaga-jaga deng berdoa suda, supaya jang ngoni tagoda biking dosa, karna biar ngoni pe hati suka mo iko pa Kita, tapi ngoni pe badan tara mampo.”

⁴²Abis itu, Yesus pigi berdoa lagi yang kedua kali. Dia berdoa bagini, “Ya Bapa, kalu penderitaan ini memang Kita musti dapa, biar suda Bapa pe mau yang jadi!”

⁴³Abis berdoa, Yesus bale ulang ka sana pa dorang tiga, kong Dia dapa lia dorang ada tasono lagi, barang dorang so manganto skali.

⁴⁴Yesus kase tinggal pa dorang di situ lagi kong Dia ka sana berdoa yang ketiga kali. Dia pe doa sama deng yang Dia bilang tadi.

⁴⁵Abis berdoa, Dia bale ka sana pa Dia pe murit tiga orang itu. Dia kase bangun pa dorang kong bilang bagini, “Ngoni masi tidor deng istrahat lagi? Skarang so dia pe waktu, coba ngoni lia, Anak Manusia yang dari sorga mo dapa serakan pa orang-orang berdosa.

⁴⁶Badiri suda la torang pigi. Orang yang mo bahianat pa Kita so dekat.”

⁴⁷Waktu Yesus masi bicara, satu dari Yesus pe dua blas murit yang pe nama Yudas itu datang. Dia datang sama-sama deng satu rombongan basar, ada yang bawa parang deng ada lagi yang bawa kayu panggal. Orang-orang itu dapa suru dari imam-imam kapala deng tua-tua Yahudi.

⁴⁸Yudas yang bahianat pa Yesus so kase kode memang pa rombongan itu, dia bilang bagini, “Orang yang kita ciom nanti, Dia itu suda yang ngoni musti tangka.”

⁴⁹Jadi bagitu rombongan itu sampe di situ, Yudas langsung badekat pa Yesus kong bilang, “Slamat malam Guru,” turus dia ciom pa Yesus.

⁵⁰Kong Yesus bilang pa dia, “Ee tamang, biking suda apa yang ngana mo biking.” Turus orang-orang yang datang sama-sama deng Yudas badekat kong tangka pa Yesus.

⁵¹Tapi ada satu orang dari orang-orang yang jaga iko pa Yesus cabu dia pe parang kong potong imam basar pe orang karja pe talinga sampe putus.

⁵²Kong Yesus bilang pa orang itu, “Kase maso ulang suda ngana pe parang itu! Karna tiap orang yang bunu orang deng parang, dia me mo mati deng parang.

⁵³Jang ngoni lupa, Kita bisa minta pa Kita pe Bapa, la Dia langsung kirim malaekat deng ribu[57] untuk tolong pa Kita.

⁵⁴Tapi kalu Kita biking bagitu, itu pe arti, samua yang tatulis di Kitab Suci tentang Kita skarang ini, tara akan jadi.”

⁵⁵ Kong Yesus bilang pa orang banya yang datang mo tangka pa Dia, “Ngoni sangka Kita ini orang jahat, sampe ngoni datang bawa parang deng kayu panggal la mo tangka pa Kita? Padahal tiap hari Kita kase tau Tuhan Allah pe Kabar Bae di Ruma Ibada Pusat, tapi ngoni tara tangka pa Kita di situ.

⁵⁶Tapi biar suda, karna memang samua itu musti jadi, sama deng yang Tuhan Allah so bilang dari dulu pa nabi-nabi yang so tatulis di Kitab Suci.” Kong Yesus pe murit samua lari kase tinggal pa Dia.

⁵⁷Bagitu orang banya itu so tangka pa Yesus, dorang bawa pa Dia di imam basar Kayafas pe ruma. Di situ guru-guru agama Yahudi yang ahli lima kitab Musa deng tua-tua Yahudi so bakumpul.

⁵⁸Waktu Yesus dapa bawa di situ, Petrus iko-iko dari jao sampe dia maso di imam basar pe kintal ruma. Sampe di sana, dia dudu bagabung deng penjaga-penjaga yang ada di situ la mo lia apa yang mo jadi pa Yesus.

⁵⁹Di situ, imam-imam kapala deng samua pemimpin Mahkama Agama dorang cari orang-orang yang basaksi tara butul la kase bukti Yesus pe sala, supaya dorang mo hukum mati pa Dia.

⁶⁰Tapi dorang tara dapa bukti itu, biar lagi waktu itu banya orang yang datang untuk basaksi tara butul tentang Yesus. Dia pe ahir kabawa, ada dua orang yang basaksi bagini,

⁶¹ “Orang ini perna bilang, Dia akan kase rubu Ruma Ibada Pusat, kong dalam tiga hari Dia akan kase badiri ulang.”

⁶²Di situ, imam basar badiri, turus bilang pa Yesus, “Banya orang so bilang Ngana pe sala, kong Ngana tara babela Ngana pe diri?”

⁶³Tapi Yesus cuma badiam. Kong imam basar itu bilang lagi pa Dia, “Demi Tuhan Allah yang hidup, Ngana bilang kamari pa torang, apa butul Ngana itu Mesias, Raja yang Tuhan Allah janji dari dulu? Kong apa butul Ngana me Anak Allah ka bukang?”

⁶⁴ Turus Yesus jawab, “Bapa sandiri so bilang bagitu. Tapi Kita bilang pa ngoni, nanti ngoni mo lia Anak Manusia yang dari sorga dudu di tampa yang terhormat pa Tuhan Allah Yang Paling Berkuasa pe sabla kanan, kong datang di atas awan-awan di langit.”

⁶⁵ Pe dengar Yesus bilang bagitu, imam basar itu mara skali sampe dia robe dia pe juba kong bilang bagini, “Ce, orang ini so biking diri sama deng Tuhan Allah! Jadi, torang so tara perlu cari saksi lagi! Ngoni sandiri so dengar, to?

⁶⁶Skarang menurut ngoni bagimana?” Dorang jawab, “Dia musti dapa hukuman mati.”

⁶⁷ Abis itu, dorang luda Yesus pe muka kong pukul pa Dia. Ada lagi yang tampeleng pa Dia

⁶⁸deng bilang pa Dia, “Kalu Ngana butul-butul Mesias, coba Ngana bilang, sapa yang tampeleng pa Ngana!”

⁶⁹Waktu itu, Petrus ada dudu di imam basar itu pe kintal ruma. Kong ada pembantu parampuang satu datang, turus bilang pa dia, “Ngana ini lagi jaga sama-sama deng Yesus, orang Galilea itu, to?”

⁷⁰Tapi Petrus manyangkal di orang banya itu pe muka, dia bilang tara kanal pa Yesus. Dia bilang bagini, “Bukang! Kita tara mangarti ngana pe maksut apa bilang bagitu!”

⁷¹Abis itu, Petrus kaluar ka sana di pintu pagar. Di situ me ada pembantu parampuang laeng lagi yang lia pa dia, kong bilang pa orang-orang di situ, “Orang ini jaga sama-sama deng Yesus, orang Nazaret itu.”

⁷²Tapi Petrus manyangkal lagi. Dia basumpa bilang, “Demi Tuhan! Kita tara kanal pa Dia.”

⁷³Pe tara lama, orang-orang yang ada di situ badekat pa Petrus kong bilang pa dia, “Tara sala suda, ngana pasti satu dari dorang, itu dapa kantara dari ngana pe logat.”

⁷⁴Turus Petrus mulai babasumpa, “Demi Tuhan, kita tara kanal pa Dia!” Kong waktu itu suda, langsung ayam bakuku.

⁷⁵Kong Petrus dapa inga yang Yesus so perna bilang pa dia, sebelum ayam bakuku, dia so manyangkal tiga kali, bilang dia tara kanal pa Yesus. Petrus langsung kaluar kong manangis karna manyasal skali.