Read Malay, North Moluccan Matius 28 Bible Online

Matius 28 - Malay, North Moluccan bible

Matius 28

¹Waktu so lewat hari Sabat, hari yang orang agama Yahudi tara bole bakarja, pas hari Minggu masi pagi-pagi skali, Maria orang Magdala deng Maria yang laeng pigi lia Yesus pe kubur.

²Kage-kage ada tana goyang kuat skali karna Tuhan Allah pe malaekat satu turung dari sorga. Malaekat itu guling batu yang kase tutu pintu kubur goa itu, kong dia dudu di atas batu itu.

³Dia pe muka basinar sama deng kilat, kong dia pe baju paling puti sama deng salju.

⁴Tentara-tentara yang bajaga di situ jadi tako skali sampe totofore, turus dorang jatu ka bawa, tara bagará sama deng orang mati.

⁵Kong malaekat itu bilang pa parampuang-parampuang itu, “Jang ngoni tako! Kita tau ngoni cari pa Yesus yang dapa salib itu.

⁶Dia tara ada di sini. Dia so hidup ulang, sama deng yang Dia perna bilang dulu. Mari maso la lia tampa yang dorang taru Dia pe mayat.

⁷Skarang, ngoni capat-capat bale suda, kong kase tau pa Dia pe murit-murit, bilang, ‘Yesus yang mati itu so hidup ulang. Kong Dia so kamuka di daera Galilea. Di sana ngoni akan lia pa Dia.’ Jadi inga e, samua yang kita bilang ini!”

⁸Jadi, parampuang-parampuang itu langsung kase tinggal kubur itu. Dorang tako tapi dorang me rasa sanang skali. Dorang lari capat-capat la mo kase tau samua itu pa Yesus pe murit-murit.

⁹Kage-kage di tenga jalang, Yesus datang kong kase salam pa dorang. Turus dorang badekat pa Yesus, polo Dia pe kaki, kong semba pa Dia.

¹⁰Kong Yesus bilang pa dorang, “Jang tako. Ka sana kase tau pa Kita pe sudara-sudara yang percaya, bilang Kita so hidup ulang. Kong Kita mo kamuka ka sana di Galilea, di sana baru dong mo lia pa Kita.”

¹¹Waktu parampuang-parampuang itu masi di tenga jalang, tentara-tentara yang jaga Yesus pe kubur pigi di kota Yerusalem. Di sana tentara-tentara itu kase tau pa agama Yahudi pe imam-imam kapala tentang samua yang so jadi.

¹²Turus imam-imam kapala deng tua-tua Yahudi bakumpul deng baku ator. Kong dorang sepakat kase doi tutu mulu yang banya skali pa tentara-tentara itu.

¹³Kong dorang bilang pa tentara-tentara itu, “Bagini: kalu orang tanya, ngoni bilang saja, ‘Malam-malam, waktu tong tasono, Yesus pe murit-murit pancuri Dia pe mayat.’

¹⁴Kong kalu gubernur Pilatus dengar itu, jang ngoni tako, nanti torang yang bicara pa dia supaya ngoni tara dapa hukuman.”

¹⁵Abis itu, tentara-tentara ambe doi itu kong dorang biking sama deng yang ada suru pa dorang. Jadi sampe skarang, orang Yahudi jaga carita, Yesus pe murit-murit yang pancuri Yesus pe mayat.

¹⁶ Yesus pe murit seblas orang itu pigi di daera Galilea, di gunung satu yang Yesus suru dong ka sana.

¹⁷Sampe di sana, dorang lia pa Yesus kong dong semba pa Dia, tapi ada babarapa orang dari dorang yang masi bolong percaya itu butul-butul Yesus.

¹⁸Yesus badekat pa dorang kong bilang, “Kita so tarima samua kuasa di sorga deng di bumi.

¹⁹ Karna itu, ngoni pigi suda kong biking samua bangsa jadi Kita pe murit. Ngoni baptis pa dorang dalam nama Bapa, Anak deng Roh Kudus.

²⁰Kong ngoni ajar pa dorang supaya dorang biking samua parenta yang Kita so perna ajar pa ngoni. Ngoni inga bae-bae e, Kita salalu sama-sama deng ngoni turus sampe ahir jaman.”