Read Malay, North Moluccan Markus 1 Bible Online

Markus 1 - Malay, North Moluccan bible

Markus 1

¹Ini Kabar Bae tentang Yesus Kristus, Anak Allah.

² Dari dulu, Kabar Bae ini so tatulis di kitab nabi Yesaya bagini, “Perhatikan e! Kita mo suru Kita pe utusan datang kamuka dari Ngana. Dia itu yang mo buka jalang untuk Ngana, supaya orang pe hati siap mo tarima pa Ngana.

³ Di padang gurun, tampa yang jao dari kampong, dia mo bicara kuat-kuat pa orang-orang yang bakumpul di situ bagini, ‘Buka jalang untuk tarima pa Tuhan, kase lurus jalang la sambut pa Dia.’ ”

⁴Tuhan pe utusan itu pe nama Yohanes Pembaptis. Dia datang di padang gurun, tampa yang jao dari kampong, kong di situ dia kase tau pa orang-orang bagini, “Bertobat suda kong iko pa Tuhan Allah, deng bagitu Tuhan Allah mo kase ampun pa ngoni. Kong kase suda ngoni pe diri la dapa baptis, itu tanda ngoni so bertobat.”

⁵Kong banya skali orang dari kota Yerusalem deng samua tampa laeng di daera Yudea datang pa Yohanes. Dorang mangaku dong pe dosa, turus Yohanes baptis pa dorang di kali Yordan.

⁶Yohanes pake juba[1] dari unta pe bulu-bulu. Dia pe ban dari binatang pe kuli. Dia pe makanang boto-boto deng madu utang.

⁷Ini lagi yang dia bilang pa orang-orang di sana, “Nanti abis kita, ada satu Orang yang mo datang, Dia pe kuasa lebe basar dari kita. Mo maruku buka Dia pe tali sandal me kita tara pantas.

⁸Kita baptis pa ngoni pake aer, tapi Dia mo baptis pa ngoni deng Roh Kudus.”

⁹Waktu Yohanes ada baptis orang, Yesus datang dari Nazaret di daera Galilea, kong Yohanes baptis pa Dia di kali Yordan.

¹⁰Bagitu Yesus kaluar dari aer, Dia lia langit tabalá, kong Roh Kudus sama deng burung pombo turung di atas pa Dia.

¹¹ Kong, dapa dengar Tuhan Allah pe suara dari sorga bagini, “Ngana ini Kita pe Anak, Kita paling sayang pa Ngana. Ngana yang biking Kita pe hati sanang.”

¹²Abis itu, Roh Kudus langsung bawa pa Yesus di padang gurun, tampa yang jao dari kampong.

¹³Yesus tinggal di padang gurun itu selama ampa pulu hari. Di situ, Iblis, setang-setang pe raja goda pa Dia. Dia tinggal di sana deng binatang-binatang liar, kong malaekat-malaekat layani pa Dia.

¹⁴Waktu Yohanes Pembaptis dapa maso di penjara, Yesus pigi di daera Galilea, kong kase tau Kabar Bae dari Tuhan Allah di sana.

¹⁵ Dia bilang bagini, “Dia pe waktu yang Tuhan Allah tentukan so sampe. Tuhan Allah so mo Berkuasa sebagai Raja pa orang-orang yang percaya pa Dia. Jadi, bertobat suda deng percaya Kabar Bae itu.”

¹⁶Satu kali bagini, Yesus bajalang iko di talaga Galilea pe pinggir. Kong Dia dapa lia dua orang ade kaka, dorang pe nama Simon deng Andreas. Dorang dua ada bajala ikang di talaga, barang dong pe karja bacari ikang.

¹⁷Kong Yesus pangge pa dorang dua, “Mari, iko pa Kita! Ngoni biasa bacari ikang, tapi Kita mo ajar pa ngoni untuk cari orang supaya dorang iko pa Kita.”

¹⁸Pe dengar itu, dorang dua langsung kase tinggal dong pe jala kong iko pa Yesus.

¹⁹Abis itu, Yesus bajalang ka sana sadiki lagi, kong Dia dapa lia pa Yakobus deng dia pe sudara Yohanes. Dorang dua ini Zebedeus pe ana-ana. Dorang dua ada kase bae-bae dong pe jala dalam parau.

²⁰Turus Yesus langsung pangge pa dorang dua, kong dorang iko pa Yesus. Jadi dorang kase tinggal dorang pe papa sama-sama deng orang-orang karja yang ada di parau.

²¹Yesus deng Dia pe murit-murit sampe di Kapernaum. Pas di hari Sabat, Yesus langsung maso di ruma ibada agama Yahudi kong mangajar di situ.

²² Orang-orang di situ yang dengar Dia pe ajaran jadi herang, karna Dia mangajar pa dorang deng kuasa, tara sama deng guru-guru agama Yahudi yang ahli lima kitab Musa.

²³Pas waktu itu, ada satu orang di ruma ibada itu kemasukan setang. Orang itu langsung bataria bagini,

²⁴“Ee, Yesus orang Nazaret! Jang iko campur deng torang pe urusan. Jang kase mati pa torang. Kita tau Ngana sapa. Ngana ini Orang Suci dari Tuhan Allah.”

²⁵Tapi Yesus togor deng suara karas pa setang yang ada dalam orang itu, “Badiam! Kaluar ngana dari dia!”

²⁶Turus setang itu biking pa orang itu sampe totofore. Waktu orang itu bataria kuat-kuat, setang itu kaluar dari orang itu.

²⁷Samua orang yang ada di situ jadi herang, sampe dorang baku bilang, “Ee, coba ngoni perhatikan bae-bae! Ini ajaran baru! Dia bicara deng kuasa, sampe setang-setang me iko Dia pe parenta.”

²⁸Dari situ, carita tentang Yesus itu capat skali tasiar sampe di samua tampa di daera Galilea.

²⁹Pe kaluar dari ruma ibada agama Yahudi itu, Yesus, Yakobus deng Yohanes langsung pigi pa Simon deng Andreas pe ruma.

³⁰Waktu itu, Simon pe mama mantu ada tidor-tidor, barang dia damang. Kong, dorang langsung kase tau dia pe keadaan pa Yesus.

³¹Turus, Yesus ka sana pa Simon pe mama mantu, pegang dia pe tangan kong kase bangun pa dia. Waktu itu suda, Simon pe mama mantu sembu kong dia layani dorang makang.

³²Waktu so mo malam, ada yang datang bawa samua orang yang saki deng yang kemasukan setang pa Yesus,

³³sampe samua orang yang ada di kota itu datang bakumpul di muka ruma itu.

³⁴Kong Yesus kase sembu banya orang yang dapa sagala macam panyake, Dia me user banya setang pa orang-orang yang kemasukan setang. Yesus tara kase bae setang-setang itu bicara, barang setang-setang itu tau sapa Yesus.

³⁵Dia pe amper siang, Yesus bangun kong kaluar dari ruma. Dia pigi di tampa sunyi kong berdoa di situ.

³⁶Tapi Simon deng dia pe tamang-tamang pigi cari pa Yesus.

³⁷Waktu dorang baku dapa deng Yesus, dorang bilang, “Guru, ada banya orang yang cari pa Guru.”

³⁸Yesus bilang, “Mari torang pigi di tampa laeng, di kota-kota yang dekat dari sini, la Kita kase tau Kabar Bae di sana lagi. Barang, Kita dapa utus di dunia ini untuk kase tau Kabar Bae itu.”

³⁹ Turus, Yesus pigi di samua tampa di daera Galilea. Dia kase tau Kabar Bae dari Tuhan Allah pa dorang di ruma-ruma ibada agama Yahudi, deng user setang-setang dari orang yang kemasukan.

⁴⁰Ada satu orang yang panyake lepra datang pa Yesus. Orang itu berlutut pa Yesus pe muka kong minta tolong bagini, “Bapa, kalu Bapa mau, Bapa bole kase sembu pa kita.”

⁴¹Yesus rasa kasiang pa orang itu. Turus Yesus taru Dia pe tangan pa orang itu, kong Dia bilang bagini, “Kita mau ngana sembu. Jadi skarang ngana sembu suda!”

⁴²Waktu itu suda, orang itu pe panyake lepra itu langsung ilang, kong dia jadi sembu.

⁴³Abis itu, Yesus langsung suru orang itu pigi. Tapi Yesus kase inga deng tegas pa dia bagini,

⁴⁴ “Inga e, jang ngana bilang pa sapa-sapa, Kita yang kase sembu pa ngana. Tapi ngana pigi pa imam, supaya dia lia ngana so sembu, deng ngana kase ngana pe binatang korban persembahan untuk Tuhan Allah, sama deng yang nabi Musa parenta. Ngana biking bagitu supaya jadi bukti pa orang-orang, ngana memang butul-butul so sembu.”

⁴⁵Tapi orang itu pigi carita di orang laeng apa yang so jadi pa dia. Jadi, Yesus so tara bisa batunju muka lagi di kota, Dia cuma bisa tinggal di tampa-tampa sunyi di luar kota. Tapi biar bagitu, orang-orang dari mana-mana tampa me datang turus pa Dia.