Read Malay, North Moluccan Markus 11 Bible Online

Markus 11 - Malay, North Moluccan bible

Markus 11

¹Waktu Yesus deng Dia pe murit-murit so dekat kota Yerusalem, kong so sampe di kampong Betfage deng kampong Betania yang di Bukit Zaitun, Yesus suru Dia pe murit dua orang,

²deng pasáng bagini, “Ngoni pigi di kampong yang ada di muka itu. Bagitu ngoni maso di situ, ngoni akan dapa keledai paranggang satu ekor yang ada ika. Keledai itu bolong perna ada orang nae. Ngoni kase lapas keledai itu kong bawa kamari e.

³Deng kalu ada orang yang tanya, bikiapa kong ngoni biking bagitu, ngoni bilang bagini, ‘Tuhan mo pake keledai ini kong. Kalu so abis pake, langsung Dia kase pulang ulang kamari.’ ”

⁴Pe abis Yesus bilang bagitu, dorang dua pigi kong dong dapa lia keledai paranggang satu ekor itu ada ika di pinggir jalang. Kong dorang buka keledai itu pe tali.

⁵Pe lia itu, babarapa orang yang ada di situ togor pa dorang, “Ee, bikiapa kong ngoni kase lapas keledai itu?”

⁶Kong dorang bilang sama deng yang Yesus ada pasáng. Jadi orang-orang itu kase biar dorang bawa keledai itu.

⁷Turus dorang bawa keledai itu pa Yesus, kong dorang kase alas deng dong pe juba di atas keledai itu. Turus Yesus nae di atas keledai itu.

⁸Waktu Yesus lewat, ada banya orang yang kase alas dorang pe juba di jalang. Ada lagi yang taru cabang-cabang kacil yang dia pe daong masi muda, yang dorang ambe dari kobong untuk sambut pa Yesus.

⁹ Orang-orang yang bajalang pa Yesus pe muka deng yang iko dari balakang, puji pa Dia deng suara kuat, “Hosana! Puji pa Dia yang Tuhan Allah so utus datang kamari.

¹⁰Puji pa Dia ini yang mo jadi Raja, sama deng torang pe orang tua dulu-dulu raja Daud. Hosana! Puji pa Tuhan Allah yang Paling Tinggi!”

¹¹Pe sampe di Yerusalem, Yesus pigi di Ruma Ibada Pusat pe kompleks. Di situ Dia bakuliling mo lia samua yang ada. Tapi karna so malam, Dia kaluar kong pigi di Betania sama-sama deng Dia pe dua blas murit.

¹²Dia pe beso, Yesus deng Dia pe murit-murit kase tinggal kampong Betania. Di tenga jalang, Yesus rasa lapar.

¹³Dari jao Yesus dapa lia pohong ara satu yang dia pe daong banya. Yesus badekat la mo lia kalu pohong itu ada babua ka tarada. Tapi waktu Yesus sampe di situ, Dia lia pohong itu pe bua tarada, cuma dia pe daong-daong saja. Barang, waktu itu bolong dia pe musim babua.

¹⁴Turus Yesus bilang pa pohong itu, “Ngana so tara akan babua lagi, jadi so tarada orang yang akan mo makang ngana pe bua lagi!” Yesus pe murit-murit me dapa dengar yang Yesus bilang itu.[17]

¹⁵Yesus deng Dia pe murit-murit sampe di kota Yerusalem. Turus Dia maso di Ruma Ibada Pusat pe kompleks. Di situ ada orang-orang yang bajual deng babili, kong Yesus user pa dorang. Dia kase bula-bale tukang tukar doi pe meja-meja deng tukang jual burung pombo pe bangko-bangko.

¹⁶Dia me tara kase bae orang bawa barang-barang apa saja iko di Ruma Ibada Pusat pe kompleks.

¹⁷ Kong Dia mangajar pa dorang bagini, “Di Kitab Suci ada tatulis bagini, ‘Kita pe Ruma akan jadi tampa berdoa untuk samua suku bangsa.’ Tapi ngoni biking jadi tukang tipu pe tampa basambunyi!”

¹⁸Imam-imam kapala deng guru-guru agama Yahudi yang ahli lima kitab Musa dapa dengar yang Yesus biking di Ruma Ibada Pusat itu, jadi dorang cari jalang mo bunu pa Dia. Tapi dorang tako pa Dia, barang orang banya suka dengar Dia pe ajaran.

¹⁹Bagitu so mo malam, Yesus deng Dia pe murit-murit kaluar lagi dari kota Yerusalem.

²⁰Dia pe beso pagi, Yesus deng Dia pe murit-murit bajalang ulang. Di tenga jalang, dorang dapa lia pohong ara yang Yesus kutuk kalamaring itu so kiring sampe pa dia pe akar-akar.

²¹Kong Petrus dapa inga apa yang Yesus bilang kalamaring. Turus Petrus bilang pa Yesus bagini, “Guru, coba lia! Pohong ara yang Guru kutuk itu so kiring!”

²²Kong Yesus bilang pa dorang, “Ngoni musti butul-butul percaya pa Tuhan Allah.

²³ Dengar bae-bae yang Kita bilang pa ngoni, kalu ada orang yang bilang pa gunung ini, ‘Taangka kong tapinda suda di laut,’ yang dia bilang itu pasti jadi, yang penting dia pe hati tara ragu-ragu deng dia percaya, apa yang dia minta itu mo jadi.

²⁴Karna itu, inga e, kalu ngoni berdoa pa Tuhan, apa saja yang ngoni minta, ngoni musti percaya ngoni akan tarima, kong pasti ngoni mo dapa itu.

²⁵ Tapi kalu ngoni berdoa kong ngoni pe hati tara sanang pa orang yang biking sala pa ngoni, ngoni musti kase ampun pa orang itu dulu, supaya ngoni pe Bapa di sorga me akan kase ampun pa ngoni dari ngoni pe dosa-dosa.”

²⁶[Kalu ngoni tara kase ampun pa orang yang biking sala pa ngoni, pasti ngoni pe Bapa di sorga me tara mo kase ampun pa ngoni].

²⁷Yesus deng Dia pe murit-murit bale ulang di kota Yerusalem. Di sana Yesus maso di Ruma Ibada Pusat pe kompleks, kong bajalang di situ. Waktu itu, imam-imam kapala, guru-guru agama Yahudi yang ahli lima kitab Musa, deng tua-tua Yahudi datang pa Dia.

²⁸Dorang tanya pa Yesus bagini, “Samua yang Ngana so biking itu, Ngana dapa hak dari mana? Kong sapa yang kase hak itu pa Ngana?”

²⁹Kong Yesus bilang pa dorang, “Kita lagi mo batanya pa ngoni. Deng kalu ngoni bajawab pa Kita, baru Kita akan kase tau pa ngoni sapa yang kase hak pa Kita untuk biking samua itu.

³⁰Coba ngoni bilang pa Kita, sapa yang kase hak pa Yohanes untuk baptis orang? Tuhan Allah, ka manusia?”

³¹Pe dengar bagitu, dorang baku bilang bagini, “Kalu torang bilang ‘Tuhan Allah,’ Dia akan mo bilang pa torang, ‘Bikiapa kong ngoni tara percaya pa Yohanes?’

³²Tapi tara mungkin torang bilang, ‘Manusia yang kase hak.’ Torang tako orang banya ini akan mara, barang dorang anggap, Yohanes ini butul-butul nabi yang kase turus Tuhan Allah pe pasáng.”

³³Jadi dorang bilang pa Yesus, “Torang tara tau!” Kong Yesus bilang pa dorang, “Kalu bagitu, Kita me tara kase tau pa ngoni sapa yang kase hak pa Kita biking samua itu.”