Read Malay, North Moluccan Markus 12 Bible Online

Markus 12 - Malay, North Moluccan bible

Markus 12

¹ Turus Yesus bicara lagi pa imam-imam kapala, guru-guru agama Yahudi yang ahli lima kitab Musa deng tua-tua Yahudi. Dia pake umpama bagini, “Ada satu orang babiking kobong anggur kong biking pagar kase kuliling kobong itu. Turus dia gale lobang la jadi tampa untuk baramas anggur. Kong dia biking lagi ruma kobong yang tinggi satu untuk orang bajaga kobong itu. Kong dia baku ator deng orang yang mo bakarja di kobong itu la urus dia pe kobong. Abis itu, dia pigi di daera laeng.

²Bagitu so musim bapete anggur, dia suru dia pe orang karja satu pigi pa orang-orang yang jaga kobong itu untuk minta dia pe bagian.

³Tapi dorang tangka orang karja itu kong pukul pa dia, turus suru dia pulang tara bawa apa-apa.

⁴Abis itu, tuang kobong itu suru pa dia pe orang karja laeng lagi, pigi pa orang-orang yang jaga kobong itu. Orang karja ini me dorang pukul pa dia sampe dia pe kapala pica, deng dorang kase malu pa dia.

⁵Turus dia suru dia pe orang karja yang laeng lagi pigi, tapi orang karja ini me dorang bunu. Deng banya lagi yang dia suru, tapi dorang itu ada yang dapa pukul deng ada yang dapa bunu.

⁶Skarang tinggal satu orang, dia pe ana yang paling dia sayang. Ahirnya dia suru dia pe ana itu pigi pa dorang. Dia bilang bagini, ‘Kalu kita pe ana yang ka sana, pasti dorang hormati pa dia.’

⁷Tapi orang-orang yang jaga kobong itu baku bilang bagini, ‘Dia ini suda yang nanti jadi waris untuk kobong ini. Jadi mari torang bunu pa dia la kobong ini jadi torang punya.’

⁸Turus dorang tangka kong bunu pa dia. Dia pe mayat dorang buang kaluar dari kobong itu.”

⁹Pe abis carita umpama itu, Yesus bilang pa dorang, “Skarang, tuang kobong itu mo biking apa pa dorang? Pasti Dia mo datang bunu pa orang-orang yang jaga kobong itu, kong kobong itu dia kase pa orang laeng untuk jaga.

¹⁰ Ngoni pasti so baca di Kitab Suci tentang batu yang ada kase sama deng Kita pe diri, tapi ngoni tara mangarti itu. Bagini yang so tatulis, ‘Batu yang tukang-tukang bangunan so tara pake, Tuhan Allah so biking jadi batu fandasi yang paling penting.

¹¹Tuhan Allah biking bagitu, sampe torang lia itu bagus skali.’ ”

¹²Pe dengar itu, pemimpin-pemimpin agama Yahudi jadi mangarti, orang-orang jahat di umpama itu, Yesus pe maksut itu pa dorang. Dari situ dorang berusaha mo tangka pa Dia, tapi dorang tako pa orang banya kong dorang pigi kase tinggal pa Dia.

¹³Abis itu, pemimpin-pemimpin agama Yahudi suru babarapa orang dari aliran Farisi deng orang-orang yang jaga iko pa raja Herodes, pigi batanya pa Yesus la cari Yesus pe sala.

¹⁴Dorang datang pa Yesus kong bilang bagini, “Guru, torang tau guru orang jujur, deng guru tara cari muka. Guru mangajar yang butul tentang bagimana hidup iko Tuhan Allah pe mau, barang guru tara tako pa sapa-sapa. Jadi skarang torang mo tanya, kalu mo iko tong pe aturan agama, bole ka tarada torang bayar pajak pa raja basar Roma?[18] Torang musti bayar pajak itu ka tarada?”

¹⁵Tapi Yesus tau dorang pe hati tara butul, jadi Dia bilang pa dorang bagini, “Bikiapa kong ngoni mo cari-cari Kita pe sala? Coba kase tunju pa Kita doi yang ngoni jaga pake babayar pajak.”[19]

¹⁶Turus dorang kase. Kong Dia tanya pa dorang bagini, “Sapa pe gambar deng sapa pe nama ini?” Dorang jawab, “Raja basar Roma pe gambar deng pe nama.”

¹⁷Kong Yesus bilang pa dorang, “Kase suda pa raja apa yang ngoni musti kase pa raja, deng kase suda pa Tuhan Allah apa yang ngoni musti kase pa Tuhan Allah!” Pe dengar bagitu, dorang herang skali.

¹⁸ Ada lagi babarapa orang agama Yahudi dari aliran Saduki datang pa Yesus. Aliran ini pe ajaran, orang yang so mati tara akan hidup ulang. Jadi dorang tanya pa Yesus bagini,

¹⁹ “Guru, dulu nabi Musa kase parenta, laki-laki sapa saja yang so kawing kong mati tapi tara dapa ana, dia pe sudara laki-laki musti kawing deng dia pe kaka yang mati itu pe janda, supaya sudara yang mati itu ada turunan.

²⁰Tapi perna jadi bagini: ada tuju orang laki-laki basudara. Yang tua kawing deng parampuang satu kong mati tarada ana.

²¹Turus yang kedua lagi kawing deng parampuang itu. Dia me mati tara dapa ana. Bagitu lagi deng yang ketiga.

²²Bagitu turus sampe yang ketuju me mati tara dapa ana. Samua dorang mati tapi tara dapa ana. Dia pe ahir kabawa, parampuang itu me mati.

²³Jadi, skarang torang mo tanya, nanti di hari kiamat, waktu Tuhan kase hidup ulang pa samua orang, yang mana sebenarnya dari dorang tuju itu yang jadi parampuang itu pe laki? Barang, dorang tuju itu samua so kawing deng dia.”

²⁴Yesus bilang pa dorang bagini, “Ngoni so sala skali, karna ngoni tara mangarti Kitab Suci, deng ngoni tara tau Tuhan Allah pe kuasa.

²⁵Karna nanti waktu Tuhan Allah kase hidup ulang orang yang so mati, dorang so tara kawing lagi, tapi dorang so hidup sama deng malaekat di sorga.

²⁶ Kong tentang orang mati yang hidup ulang, ngoni so baca carita yang nabi Musa tulis, to? Waktu dia ada di pinggir rumpu baduri yang manyala, Tuhan Allah bilang pa nabi Musa bagini, ‘Kita ini suda Tuhan Allah yang Abraham, Ishak deng Yakub semba.’[20]

²⁷Waktu itu, Abraham, Ishak deng Yakub so mati, tapi dorang so hidup ulang deng Tuhan Allah. Jadi, ngoni orang Saduki ini pe ajaran so sala skali, karna Tuhan Allah itu bukang orang mati pe Tuhan, tapi orang hidup pe Tuhan.”

²⁸ Waktu itu, ada guru agama satu yang ahli lima kitab Musa datang. Dia me dengar yang Yesus deng orang-orang dari aliran Saduki baku tanya jawab tadi. Dia so tau yang Yesus jawab itu butul, jadi dia badekat pa Yesus kong tanya, “Dari samua Tuhan Allah pe parenta itu, parenta mana yang paling penting?”

²⁹ Yesus bilang pa dorang bagini, “Parenta yang paling penting itu bagini: orang-orang Israel, ngoni dengar bae-bae, Tuhan Allah itu torang pe Tuhan, Dia itu cuma satu saja.

³⁰Ngoni musti butul-butul sayang pa Tuhan Allah, ngoni pe Tuhan. Ngoni musti sayang pa Dia lebe dari samua yang ngoni sayang, ngoni sayang pa Dia deng cara salalu inga pa Dia, kong sayang lagi pa Dia deng cara kase ngoni pe tenaga untuk biking Dia pe mau.

³¹ Parenta yang kedua itu bagini, ‘Ngoni musti sayang pa orang laeng sama deng ngoni sayang pa ngoni pe diri sandiri.’ Tarada parenta laeng yang lebe penting dari dua parenta ini.”

³² Abis itu, guru agama itu bilang pa Yesus, “Butul skali yang Guru bilang itu. Tuhan Allah itu memang cuma satu, tarada yang laeng, cuma Dia saja.

³³ Torang musti butul-butul sayang pa Tuhan Allah, torang pe Tuhan. Torang musti sayang pa Dia deng cara salalu inga pa Dia, deng kase torang pe tenaga untuk biking Dia pe mau. Deng, torang lagi musti sayang pa orang laeng sama deng torang sayang torang pe diri sandiri. Samua itu lebe penting dari samua binatang korban persembahan deng persembahan yang laeng.”

³⁴Yesus lia dia jawab bagus, kong Yesus bilang pa dia bagini, “Ngana ini so mo siap jadi Tuhan Allah pe umat yang Dia Berkuasa sebagai Raja.” Abis itu, so tarada satu orang lagi yang barani mo batanya pa Yesus.

³⁵Waktu Yesus masi mangajar di Ruma Ibada Pusat pe kompleks, Dia bilang bagini, “Guru-guru agama Yahudi yang ahli lima kitab Musa jaga ajar, Mesias, Raja yang Tuhan Allah janji, Dia itu raja Daud pe turunan. Apa memang Mesias itu cuma raja Daud pe turunan?

³⁶ Padahal waktu Roh Kudus kuasai pa raja Daud, raja Daud kase tau, Tuhan Allah ada bilang pa kita pe Tuhan bagini, ‘Dudu suda di tampa yang terhormat, pa Kita pe sabla kanan, sampe Kita kase kala Ngana pe musu-musu samua.’

³⁷Jadi, kalu raja Daud sandiri saja bilang Mesias itu dia pe Tuhan, bagimana lagi torang mo bilang Mesias itu cuma raja Daud pe turunan?”[21] Kong orang banya suka skali dengar yang Yesus bilang.

³⁸ Yesus kase tau lagi pa dorang, “Ngoni musti ati-ati deng guru-guru agama Yahudi yang ahli lima kitab Musa. Dorang itu kalu bajalang, suka pake juba panjang yang kase tunju dorang itu orang penting, deng dorang paling suka orang hormati di orang banya pe muka.

³⁹Kalu di ruma ibada deng di acara-acara pesta, dorang itu paling suka dudu di muka di tampa paling terhormat.

⁴⁰Dorang me suka biking bodo pa janda-janda la ambe dong pe ruma. Baru dorang kalu berdoa kase panjang-panjang, padahal cuma mo kase dengar pa orang. Dorang itu pasti mo dapa hukuman yang paling barát.”

⁴¹Abis itu, Yesus dudu mangada di kotak persembahan kong perhatikan pa orang-orang yang taru dong pe derma di situ. Dia lia ada banya orang kaya yang taru dorang pe derma banya-banya.

⁴²Kong Dia lia janda miskin satu datang taru dia pe derma, tapi dia pe derma itu cuma doi logam dua, yang dia pe nilai paling kacil.

⁴³Turus Yesus pangge pa Dia pe murit-murit kong Dia bilang bagini, “Dengar bae-bae e, pa Tuhan Allah pe muka, janda miskin ini so kase lebe banya dari samua orang yang ada kase derma di kotak persembahan itu.

⁴⁴Barang, orang-orang kaya ini, biar dorang kase doi banya, tapi dong pe doi masi sisa banya. Sedangkan janda ini, biar dia susa me, dia so kase samua dia pe doi.”