Read Malay, North Moluccan Markus 14 Bible Online

Markus 14 - Malay, North Moluccan bible

Markus 14

¹ Tinggal dua hari lagi orang agama Yahudi mo biking dong pe hari raya Paska. Hari raya itu, dorang inga waktu Tuhan Allah kase bebas pa dorang pe orang tua dulu-dulu dari bangsa Mesir yang jaja pa dorang, deng dorang lagi biking hari raya Roti Tara Pake Ragi. Turus waktu itu, orang Yahudi pe imam-imam kapala deng guru-guru agama yang ahli lima kitab Musa baku ator la mo tangka pa Yesus deng cara sambunyi-sambunyi kong bunu pa Dia.

²Dorang baku bilang, “Jang tangka pa Dia di hari raya, jang sampe orang banya yang suka pa Dia mo biking kaco.”

³ Waktu Yesus di kampong Betania, Dia basingga pa Simon pe ruma. Simon ini dulu perna dapa saki lepra. Waktu Yesus sementara dudu makang, ada parampuang satu datang bawa minya wangi narwastu asli yang mahal dalam botol batu puti satu. Parampuang itu buka tampa minya itu pe panutu, turus dia siram minya itu palang-palang pa Yesus pe kapala.

⁴Tapi babarapa orang yang lia itu, tara sanang kong dorang baku bilang, “Minya wangi pe mahal bagitu kong dia kase halebiru tu?

⁵Kalu jual, dia pe harga sama deng orang karja pe gaji satu taong. Kong doi itu bole kase barbage pa orang-orang miskin.” Turus dorang mara pa parampuang itu.

⁶Pe lia itu, Yesus bilang pa orang-orang itu, “Bikiapa kong ngoni mara pa dia? Kase biar suda. Dia so biking barang yang bae pa Kita.

⁷ Orang-orang miskin salalu ada, jadi tempo apa saja ngoni bole bantu pa dorang. Tapi Kita ini tara sama-sama deng ngoni turus-turus.

⁸Parampuang ini so biking apa yang dia bisa biking. Dia so siram minya wangi pa Kita pe badan, sama deng dia so kase siap Kita pe mayat waktu Kita mo dapa kubur nanti.

⁹Inga bae-bae yang Kita bilang ini, di mana saja orang-orang kase tau Kabar Bae dari Tuhan Allah di seluru dunia, pasti dorang mo carita apa yang parampuang ini so biking pa Kita sampe orang-orang akan inga pa dia turus.”

¹⁰Ada satu dari Yesus pe dua blas murit, dia pe nama Yudas Iskariot. Dia pigi pa imam-imam kapala la mo kase tau pa dorang, dia mo serakan Yesus pa dorang.

¹¹Waktu dorang dengar Yudas pe rencana itu, dorang sanang skali kong dong janji pa dia mo kase doi. Abis itu, Yudas cari kesempatan yang pas la mo serakan Yesus pa dorang.

¹²Di hari pertama waktu dorang biking hari raya Roti Tara Pake Ragi, waktu itu dorang musti potong domba Paska. Jadi Yesus pe murit-murit datang pa Dia kong batanya, “Guru, di mana Guru mau torang kase sadia makanang hari raya Paska[22] untuk torang makang sama-sama?”

¹³Pe dengar itu, Yesus suru pa Dia pe murit dua orang. Dia bilang bagini, “Ngoni ka sana di kota Yerusalem, di sana ngoni akan baku dapa deng laki-laki satu yang ada pikul tampayang yang ada isi aer. Ngoni iko pa dia.

¹⁴Sampe di ruma mana yang dia maso, ngoni bilang pa tuang ruma itu, ‘Torang pe Guru suru tanya, di mana tampa yang Guru mo pake makang makanang hari raya Paska sama-sama deng Dia pe murit-murit?’

¹⁵Di situ tuang ruma itu akan kase tunju pa ngoni tampa satu yang basar di sabla atas deng samua alat so ada di situ. Ngoni kase siap suda makanang hari raya di situ.”

¹⁶Abis dengar Yesus bilang bagitu, Dia pe murit dua orang itu pigi. Pe sampe di kota, dorang dapa sama persis deng samua yang Yesus so bilang pa dorang itu. Turus dorang kase siap makanang hari raya Paska.

¹⁷Waktu so malam, Yesus datang ka tampa itu sama-sama deng Dia pe murit dua blas orang.

¹⁸ Bagitu dorang sementara dudu makang, Yesus bilang bagini, “Inga bae-bae yang Kita bilang ini. Dari ngoni yang dudu makang deng Kita ini, ada satu orang yang akan mo bahianat pa Kita.”

¹⁹Pe dengar itu, dorang pe hati jadi sedi kong satu-satu bilang pa Dia, “Bukang kita, to?”

²⁰Turus Yesus bilang pa dorang, “Orang itu satu dari ngoni dua blas orang ini, dia yang colo roti satu mangko deng Kita.

²¹Memang Anak Manusia yang dari sorga akan mati sama deng yang Tuhan Allah so tentukan dulu. Nabi-nabi so tulis bagitu di Kitab Suci. Tapi cilaka orang yang bahianat pa Anak Manusia, dia akan dapa hukuman yang barát. Orang itu lebe bae dia tara usa lahir di dunia ini.”

²²Waktu Yesus deng Dia pe murit-murit sementara makang, Yesus ambe roti kong bilang tarimakasi pa Tuhan Allah. Abis itu, Dia pela-pela roti itu kong Dia kase pa dorang, Dia bilang, “Roti ini Kita pe badan, ambe suda.”

²³Abis itu, Dia ambe cawan kong bilang tarimakasi pa Tuhan Allah. Turus, Dia kase pa dorang kong dorang samua minum dari cawan itu.

²⁴ Dia bilang pa dorang, “Ini Kita pe dara. Waktu Kita mati, Kita pe dara akan tatumpa untuk kase sah Tuhan Allah pe janji pa manusia. Kong Kita pe dara itu tatumpa untuk tebus banya orang pe dosa.

²⁵Dengar bae-bae yang Kita bilang ini, dari sini kasana, Kita so tara akan minum anggur lagi. Tapi nanti waktu Tuhan Allah Berkuasa sebagai Raja pa Dia pe umat, baru Kita minum lagi anggur yang baru.”

²⁶Abis itu, Yesus deng Dia pe murit-murit manyanyi lagu pujian untuk Tuhan Allah, kong dorang pigi di Bukit Zaitun.

²⁷ Turus Yesus bilang pa dorang, “Ngoni samua pe percaya pa Kita akan tagoyang sampe ngoni lari kase tinggal pa Kita. Barang, Tuhan Allah so perna bilang di Kitab Suci bagini, ‘Kita akan bunu pa gembala, kong domba-domba yang dia jaga akan talamburang kasana-kamari.’

²⁸ Itu pe maksut, Kita akan mati, tapi waktu Kita hidup ulang, Kita akan sampe kamuka dari ngoni di daera Galilea la tong baku dapa di sana.”

²⁹Turus Petrus bilang pa Yesus, “Biar dorang samua pe percaya tagoyang sampe lari kase tinggal pa Guru, tapi kita tara akan.”

³⁰Turus Yesus bilang pa dia, “Dengar bae-bae yang Kita bilang pa ngana, malam ini suda, sebelum ayam bakuku dua kali, ngana so manyangkal tiga kali, bilang ngana tara kanal pa Kita.”

³¹Tapi Petrus bakaras kong bilang bagini, “Kalu Guru mati, kita lagi iko mati, tapi kita tara akan manyangkal pa Guru.” Kong Yesus pe murit-murit yang laeng me bilang bagitu.

³²Abis itu, Yesus deng Dia pe murit-murit pigi di kobong zaitun satu yang dia pe nama Getsemani. Turus Yesus bilang pa dorang, “Ngoni dudu di sini dulu e, Kita mo berdoa.”

³³Tapi Dia bawa pa Petrus, Yakobus deng Yohanes iko pa Dia. Waktu itu, Dia mulai rasa tako skali deng totofore.

³⁴Kong Dia bilang pa dong tiga, “Kita pe hati susa skali, rasa-rasa sama deng mo mati. Ngoni di sini dulu e, kong bajaga-jaga.”

³⁵Abis itu, Yesus bajalang ka sana sadiki, turus Dia berlutut sampe Dia pe muka kanal tana, kong Dia berdoa. Dia minta kalu bole, Dia tara usa dapa penderitaan yang Tuhan Allah so tentukan untuk Dia.

³⁶Dia bilang bagini, “Papa[23] e, ya Bapa, Kita tau samua Bapa bisa biking, tarada yang tara bisa. Jadi Kita minta Bapa kase jao samua penderitaan ini dari Kita, tapi jang iko Kita pe mau, iko saja Bapa pe mau.”

³⁷Abis berdoa, Yesus bale ka sana pa dorang, kong Dia dapa lia dorang tiga ada tasono. Turus Dia kase bangun pa dorang deng Dia bilang pa Petrus, “Simon, ngana tidor? Ngana tara mampo batahang barang satu jam untuk bajaga-jaga?

³⁸Bajaga-jaga deng berdoa suda, supaya jang ngoni tagoda biking dosa, karna biar ngoni pe hati suka mo iko pa Kita, tapi ngoni pe badan tara mampo.”

³⁹Abis itu, Dia pigi lagi kong berdoa, minta sama deng yang tadi lagi.

⁴⁰Abis berdoa, Yesus bale ulang ka sana pa dorang tiga, kong Dia dapa lia dorang ada tasono lagi, barang dorang so manganto skali. Bagitu dorang bangun, dong so tara tau mo bilang apa pa Yesus.

⁴¹Abis itu, Dia pigi berdoa lagi yang ketiga kali. Bagitu Dia bale ka sana pa dorang, Dia bilang pa dorang, “Ngoni masi tidor deng istrahat lagi? So bole suda. Skarang so sampe dia pe waktu, coba ngoni lia, Anak Manusia yang dari sorga mo dapa serakan pa orang-orang berdosa.

⁴²Badiri suda la torang pigi. Orang yang mo bahianat pa Kita so dekat.”

⁴³Waktu Yesus masi bicara, kage satu dari Yesus pe dua blas murit yang pe nama Yudas itu datang. Dia datang sama-sama deng satu rombongan, ada yang bawa parang deng ada lagi yang bawa kayu panggal. Orang-orang itu dapa suru dari imam-imam kapala, guru-guru agama Yahudi yang ahli lima kitab Musa deng tua-tua Yahudi.

⁴⁴Yudas yang bahianat pa Yesus so kase kode memang pa rombongan itu, dia bilang bagini, “Orang yang kita ciom nanti, Dia itu suda yang ngoni musti tangka. Ngoni tangka kong bawa pa Dia. Jaga bae-bae pa Dia, jang sampe Dia lari.”

⁴⁵Jadi bagitu rombongan itu sampe di situ, Yudas langsung badekat pa Yesus kong bilang, “Guru,” turus dia ciom pa Yesus.

⁴⁶Kong orang-orang yang datang sama-sama deng Yudas itu badekat, turus tangka pa Yesus.

⁴⁷Tapi satu orang yang ada sama-sama deng Yesus di situ, dia cabu dia pe parang kong potong imam basar pe orang karja pe talinga sampe putus.

⁴⁸Turus Yesus bilang pa dorang, “Ngoni sangka Kita ini orang jahat, sampe ngoni datang bawa parang deng kayu panggal la mo tangka pa Kita?

⁴⁹ Padahal tiap hari Kita ada pa ngoni pe tenga-tenga waktu Kita kase tau Tuhan Allah pe Kabar Bae di Ruma Ibada Pusat, bikiapa kong ngoni tara tangka pa Kita di situ? Tapi biar suda, itu memang musti jadi, karna samua itu so tatulis memang di Kitab Suci.”

⁵⁰Kong Yesus pe murit samua lari kase tinggal pa Dia.

⁵¹Di situ ada ana muda satu yang cuma babungkus deng kaeng iko-iko pa Yesus, kong dorang mo tangka pa dia.

⁵²Tapi ana muda itu lapas dia pe kaeng kong lari talanjang.

⁵³Abis itu, dorang bawa pa Yesus pigi di imam basar pe ruma. Di situ, samua imam-imam kapala, tua-tua Yahudi deng guru-guru agama Yahudi yang ahli lima kitab Musa, dorang bakumpul di situ.

⁵⁴Waktu Yesus dapa bawa di situ, Petrus iko-iko dari jao, sampe di imam basar pe kintal ruma, kong dudu barahu di dekat api sama-sama deng penjaga-penjaga yang ada di situ.

⁵⁵Di situ, imam-imam kapala deng samua pemimpin Mahkama Agama dorang cari orang-orang yang basaksi tara butul la kase bukti Yesus pe sala, supaya dorang mo hukum mati pa Dia. Tapi dorang tara dapa.

⁵⁶Ada banya orang yang datang untuk basaksi yang tara butul tentang Yesus, tapi yang dorang kase tau itu baku beda-beda satu deng yang laeng.

⁵⁷Ada babarapa orang yang badiri kong kase tau yang tara butul tentang Yesus, dong bilang,

⁵⁸ “Torang dengar Orang ini perna bilang, Dia akan kase rubu Ruma Ibada Pusat yang manusia kase badiri, kong dalam tiga hari Dia akan kase badiri yang laeng, yang bukang manusia biking.”

⁵⁹Tapi samua yang dorang kase tau itu me baku beda-beda satu deng yang laeng.

⁶⁰Abis itu, imam basar badiri di kumpulan Mahkama Agama pe tenga-tenga, kong tanya pa Yesus, “Banya orang so bilang Ngana pe sala, kong ngana tara babela Ngana pe diri?”

⁶¹Tapi Yesus cuma badiam, Dia tara bilang apa-apa. Kong imam basar itu tanya ulang pa Dia, “Apa butul Ngana ini Mesias, Raja yang Tuhan Allah janji dari dulu? Kong apa butul Ngana me Tuhan Allah yang torang puji pe Anak?”

⁶² Turus Yesus jawab, “Butul, Dia itu Kita suda. Ngoni akan lia Anak Manusia yang dari sorga dudu di tampa yang terhormat pa Tuhan Allah Yang Paling Berkuasa pe sabla kanan, kong mo datang di tenga-tenga awan di langit.”

⁶³Pe dengar Yesus bilang bagitu, imam basar itu mara skali sampe dia robe dia pe juba kong dia bilang bagini, “Ce, Orang ini so biking diri sama deng Tuhan Allah!

⁶⁴ Jadi, torang so tara perlu cari saksi lagi! Ngoni sandiri so dengar, to? Skarang menurut ngoni bagimana?” Turus samua yang ada di Mahkama Agama itu setuju, Yesus musti dapa hukuman mati.

⁶⁵Kong babarapa dari dorang maju kong luda pa Yesus. Dorang ika Dia pe mata pake kaeng, baru dorang pukul pa Dia, kong dorang tanya, “Kalu Ngana butul-butul orang yang bawa Tuhan Allah pe pasáng, coba Ngana bilang, sapa yang pukul pa Ngana!” Penjaga-penjaga di situ me pukul pa Dia.

⁶⁶Waktu itu, Petrus masi ada di imam basar itu pe kintal ruma, kong imam basar pe pembantu parampuang satu datang.

⁶⁷Turus, waktu parampuang itu lia Petrus ada barahu, dia haga Petrus pe muka kong bilang bagini, “Ngana lagi jaga sama-sama deng Yesus, orang Nazaret itu, to?”

⁶⁸Tapi Petrus manyangkal, bilang tara kanal pa Yesus. Dia bilang bagini, “Kita tara mangarti ngana pe maksut apa bilang bagitu.” Abis itu, Petrus ka sana di teras kong badiam di situ. [Waktu itu suda, ayam bakuku.]

⁶⁹Di situ, pembantu parampuang itu dapa lia pa Petrus lagi, kong dia bilang pa orang-orang yang ada di situ, “Orang ini me jaga baku bawa deng dong Yesus.”

⁷⁰Tapi Petrus manyangkal lagi. Pe tara lama, orang-orang yang ada di situ bilang lagi pa Petrus, “Tara sala suda, ngana pasti satu dari dorang, to? Apalagi ngana ini orang Galilea!”

⁷¹Turus Petrus mulai babasumpa, “Demi Tuhan, kita tara kanal Orang yang ngoni bilang-bilang ini!”

⁷²Kong waktu itu suda, langsung ayam bakuku yang kedua kali. Di situ, Petrus langsung dapa inga yang Yesus so perna bilang pa dia, sebelum ayam bakuku dua kali, dia so manyangkal tiga kali, bilang dia tara kanal pa Yesus. Kong Petrus manyasal, dia manangis sampe tahek-hek.