Read Malay, North Moluccan Markus 3 Bible Online

Markus 3 - Malay, North Moluccan bible

Markus 3

¹Abis itu, Yesus bale ulang di ruma ibada agama Yahudi. Di situ ada satu orang yang dia pe tangan sabla mati,

²deng ada lagi orang-orang Yahudi dari aliran Farisi. Dorang lia-lia turus pa Yesus. Kalu Yesus kase sembu orang itu di hari Sabat, hari yang orang agama Yahudi tara bole bakarja itu, dorang dapa alasan untuk kase sala pa Dia.

³Yesus bilang pa orang yang dia pe tangan sabla mati itu bagini, “Mari ngana badiri di muka sini.”

⁴Kong Yesus tanya pa orang-orang yang ada di situ, “Kalu iko aturan di lima kitab Musa, mana yang torang bisa biking di hari Sabat? Biking barang yang bae ka biking barang yang jahat? Kase slamat orang ka bunu orang?” Tapi dorang cuma babadiam saja.

⁵Yesus pe hati susa karna dorang pe hati karas. Dia haga pa dorang samua deng rasa mara, kong Dia bilang pa orang yang dia pe tangan sabla mati itu, “Kase kamari ngana pe tangan.” Turus orang itu kase dia pe tangan kong dia pe tangan jadi sembu.

⁶Waktu itu suda, orang-orang Yahudi dari aliran Farisi kaluar dari ruma ibada itu kong dorang langsung baku ator deng raja Herodes pe orang-orang[4] la mo bunu pa Yesus.

⁷Yesus deng Dia pe murit-murit bapinda dari orang banya, kong pigi di talaga Galilea. Tapi orang banya dari daera Galilea iko pa Dia. Ada lagi orang-orang dari daera Yudea,

⁸kota Yerusalem, daera Idumea, deng dari daera kali Yordan pe sabla, deng sekitar kota Tirus deng kota Sidon. Dorang itu me masi iko pa Yesus, barang dorang so perna dengar apa yang Dia biking.

⁹ Pe banya orang yang datang, sampe Yesus suru pa Dia pe murit-murit kase sadia parau satu, la Dia mo nae, supaya Dia tara tadempet deng orang banya itu.

¹⁰Barang, Dia so kase sembu banya orang, jadi orang-orang yang saki me banya lagi yang datang baku-baku gepe untuk bapegang pa Dia.

¹¹Tiap kali orang-orang yang kemasukan setang dapa lia pa Yesus, dorang langsung berlutut pa Dia pe muka, kong dorang bataria, “Ngana suda Anak Allah.”

¹²Tapi Yesus larang karas pa setang-setang itu supaya jang kase tau pa orang-orang, Dia itu sapa.

¹³Abis itu, Yesus nae ka atas di gunung satu. Di situ, Dia pangge pa dorang yang Dia so pili itu kong dorang datang ka sana pa Dia.

¹⁴Dia pili dua blas orang la dorang mo sama-sama deng Dia, deng Dia mo utus pa dorang la dong kase tau Tuhan Allah pe Kabar Bae.

¹⁵Dia me kase kuasa pa dorang, la dorang bisa user setang.

¹⁶Dua blas orang yang Yesus pili itu dorang pe nama: Simon (yang Dia kase nama Petrus),

¹⁷Yakobus deng dia pe sudara Yohanes, (Zebedeus pe ana-ana. Yesus kase nama pa dorang dua, Boanerges, yang pe arti sama deng guntur),

¹⁸Andreas, Filipus, Bartolomeus, Matius, Tomas, Yakobus (Alfeus pe ana), Tadeus, Simon (dari Gerakan Yahudi Merdeka),[5] deng

¹⁹Yudas Iskariot (dia itu yang bahianat pa Yesus).

²⁰Abis itu, Yesus maso di ruma satu. Di situ, banya orang yang datang bakumpul lagi, sampe Dia deng Dia pe murit-murit me so tara bisa makang.

²¹Waktu Yesus pe keluarga dengar itu, dorang datang mo ambe pa Yesus, barang orang-orang bilang kata, Yesus so tara waras.

²² Guru-guru agama Yahudi yang ahli lima kitab Musa datang dari Yerusalem, kong bilang bagini, “Orang ini so kemasukan Beelzebul, setang-setang pe raja. Itu yang biking sampe Dia bisa user setang!”

²³Yesus pangge pa guru-guru agama Yahudi itu, kong bicara pa dorang pake umpama bagini, “Bagimana kong setang mo user setang?

²⁴Kalu dalam satu kerajaan baku malawang kong tapisa-pisa, pasti kerajaan itu akan ancor.

²⁵Kong kalu dalam satu ruma tangga baku malawang kong tapisa-pisa, so pasti lagi ruma tangga itu akan ancor.

²⁶Bagitu me deng Iblis, setang-setang pe raja. Kalu Iblis baku malawang deng dia pe ana bua setang-setang, pasti dorang mo tapisa-pisa. Turus Iblis pe kerajaan mo ancor kong abis.

²⁷Ambe conto bagini, tarada orang yang bisa maso di orang yang kuat pe ruma kong pancuri dia pe barang. Dia musti ika dulu pa orang yang kuat itu baru bisa pancuri dia pe harta.[6]

²⁸Ngoni dengar bae-bae e, samua dosa yang orang biking masi bole dapa ampun, bagitu lagi yang hina pa manusia bole dapa ampun.

²⁹ Tapi kalu orang hina pa Roh Kudus, dia tara akan dapa ampun sampe slama-lamanya, karna dia biking dosa yang tara bisa mo dapa ampun.”

³⁰Yesus bilang bagitu, barang dorang bilang kata, Dia kemasukan setang.

³¹Waktu Yesus ada mangajar, Dia pe mama deng Dia pe sudara-sudara datang. Sementara dorang badiri di luar, dong suru orang pangge pa Yesus.

³²Di ruma itu, banya skali orang ada dudu kase kuliling pa Yesus. Turus dorang bilang pa Yesus, “Bapa, Bapa pe mama deng Bapa pe sudara-sudara ada di luar, kong dorang ada berusaha baku dapa deng Bapa.”

³³Tapi Yesus bilang pa dorang, “Kita pe mama deng Kita pe sudara-sudara sapa kong?”

³⁴Yesus haga pa orang-orang yang dudu kuliling pa Dia, kong Yesus bilang bagini, “Ngoni samua ini me Kita pe mama deng Kita pe sudara-sudara!

³⁵Barang, sapa yang biking Tuhan Allah pe mau, dia itu suda Kita pe sudara-sudara deng Kita pe mama.”