Read Malay, North Moluccan Markus 4 Bible Online

Markus 4 - Malay, North Moluccan bible

Markus 4

¹ Satu kali bagini, Yesus mangajar ulang di talaga Galilea pe pinggir. Di situ banya skali orang datang kong bakumpul pa Dia. Jadi Dia nae di parau yang ada balabu, kong dudu di situ, deng orang banya itu tetap ada di pinggir talaga.

²Di situ Yesus mangajar pa dorang tentang banya hal pake umpama. Dia bilang bagini,

³“Dengar bae-bae! Ada orang kobong satu pigi baambur bibit di kobong.

⁴Waktu dia ambur bibit itu, ada bibit yang jatu di jalang, kong burung-burung datang makang bibit itu sampe abis.

⁵Ada bibit laeng lagi yang jatu di tana yang babatu-batu, yang dia pe tana cuma sadiki. Bibit yang jatu itu capat batumbu karna dia pe tana sadiki.

⁶Tapi bagitu matahari kaluar, tanaman itu jadi layu kong kiring, karna dia pe akar tara maso jao di dalam tana.

⁷Kong ada lagi bibit yang jatu di tana yang dia pe rumpu baduri. Bagitu bibit itu batumbu, rumpu baduri me tamba basar kong gepe tanaman itu sampe mati, jadi tanaman itu tara babua.

⁸Tapi ada bibit laeng yang jatu di tana yang subur, kong batumbu, turus babua. Dia pe hasil ada yang tiga pulu kali lipa, ada yang anam pulu kali lipa, ada yang sampe saratus kali lipa.”

⁹Yesus bilang lagi, “Dengar itu bae-bae kong simpang di hati!”

¹⁰Bagitu tinggal Yesus sandiri, Dia pe murit-murit dua blas orang deng orang-orang yang iko pa Dia, tanya umpama itu pe arti.

¹¹Kong Yesus jawab, “Tuhan Allah biking ngoni bisa tau rahasia tentang bagimana Tuhan Allah Berkuasa sebagai Raja, tapi pa orang-orang laeng, hal itu Kita kase tau pake umpama,

¹² supaya apa yang Tuhan Allah perna bilang tentang dorang di Kitab Suci itu so jadi, ‘Biar dorang lia, dorang tara mangarti apa yang dorang lia. Biar dorang dengar, dorang tara mangarti apa yang dong dengar. Dorang tara mangarti jadi dorang tara bertobat deng tara dapa ampun.’ ”

¹³Abis itu, Yesus bilang pa Dia pe murit-murit deng orang-orang laeng yang iko pa Dia bagini, “Kalu ngoni tara mangarti umpama ini, bagimana ngoni mo mangarti umpama yang laeng lagi?

¹⁴Umpama tadi pe arti bagini: orang kobong yang ambur bibit itu, itu sama deng orang yang kase tau Tuhan Allah pe firman.

¹⁵Bibit yang jatu di jalang, itu sama deng orang-orang yang dengar firman. Pe abis dengar, Iblis, setang-setang pe raja langsung datang kong ambe firman itu dari dorang pe hati.

¹⁶Bibit yang jatu di tana yang babatu-batu, itu sama deng orang-orang yang dengar firman kong langsung tarima deng hati sanang.

¹⁷Tapi firman itu, dorang tara simpang bae-bae di dong pe hati, jadi tara batahang lama. Bagitu dorang dapa siksa deng menderita karna percaya firman itu, dorang langsung so tara percaya lagi pa Tuhan.

¹⁸Bibit yang jatu di tana yang ada rumpu baduri, itu sama deng orang-orang yang so dengar firman,

¹⁹tapi dorang pe hati tara tenang tentang dong pe hidup, deng dorang cuma cari harta deng keinginan-keinginan yang laeng. Jadi firman yang dorang dengar itu dorang tara biking, sampe firman itu tara bawa hasil apa-apa.

²⁰Kong bibit yang jatu di tana yang subur, itu sama deng orang-orang yang dengar firman kong tarima deng percaya. Dorang ini orang yang hidup iko Tuhan pe mau, sama deng bibit yang batumbu sampe babua. Ada yang babua tiga pulu kali lipa, ada yang anam pulu kali lipa, deng ada lagi yang saratus kali lipa.”

²¹ Abis itu Yesus bilang lagi pa dorang bagini, “Tarada orang yang pasang lampu kong tutu deng satu barang atau taru di bawa koi, la dia pe cahaya tara kaluar. Tapi pasti dia taru di dia pe tampa.

²² Itu pe arti, apa yang skarang ada tasambunyi, nanti orang mo dapa tau, deng samua rahasia akan tabongkar.

²³Jadi, dengar itu bae-bae kong simpang di hati!”

²⁴ Kong Yesus bilang lagi bagini, “Perhatikan bae-bae apa yang ngoni so dengar. Kalu ngoni inga bae-bae, Tuhan Allah mo biking la ngoni mangarti, deng Dia tamba biking sampe ngoni lebe mangarti.

²⁵ Barang, kalu orang tarima apa yang Kita bilang, nanti Tuhan Allah mo bantu dia mangarti lebe banya. Tapi orang yang tara tarima apa yang Kita bilang, apa yang dia so tau, Tuhan Allah akan ambe dari dia.”

²⁶Kong Yesus bilang lagi bagini, “Tuhan Allah Berkuasa sebagai Raja pa Dia pe umat, itu sama deng umpama ini: ada satu orang ambur bibit di tana.

²⁷Tiap malam dia tidor sampe siang baru dia bangun, kong dia so tara inga lagi bibit itu. Tapi bibit itu batumbu deng batunas sampe jadi tinggi. Orang yang tanam itu, dia tara tau bagimana sampe bibit itu bisa jadi bagitu,

²⁸karna tana itu sandiri yang kase babua, mulai dari kaluar tunas, batang, sampe babua.

²⁹ Kalu dia pe bua itu so masa, orang itu langsung potong, barang so dia pe waktu mo bapete.”

³⁰Abis itu, Yesus bilang pa dorang lagi, “Kalu Tuhan Allah Berkuasa sebagai Raja pa Dia pe umat, torang mo kase sama deng apa? Atau mo kase jelas deng umpama apa?

³¹Tuhan Allah Berkuasa sebagai Raja mulai pa sadiki orang, kong lebe hari lebe tamba banya, itu sama deng biji tanaman kacil yang ada tanam di tana. Biji itu, biji yang paling kacil di dunia.

³²Tapi kalu biji itu so tanam, dia batumbu kong jadi tanaman yang lebe basar dari samua tanaman laeng di kobong sayor, sampe dia pe cabang-cabang me jadi basar kong burung-burung di udara me bisa biking sarang di situ.”

³³Ada banya umpama sama deng itu, yang Yesus pake untuk kase tau firman pa dorang. Dia mangajar pa dorang iko apa yang dorang bisa mangarti.

³⁴Yesus jaga pake umpama, kalu mangajar pa orang laeng. Tapi kalu pa Dia pe murit-murit, Dia kase jelas umpama itu pe arti.

³⁵Pe sore itu, Yesus bilang pa Dia pe murit-murit, “Mari suda torang ka sana di sabla talaga.”

³⁶Turus, dorang kase tinggal orang banya itu kong nae satu parau deng Yesus. Turus dorang balayar, kong parau yang laeng iko pa dorang.

³⁷Tara lama, angin kancang skali deng omba datang hantam dorang pe parau sampe aer maso, kong dorang pe parau so mo tenggelam.

³⁸Waktu itu Yesus ada tidor di parau bagian balakang pake bantal. Kong Dia pe murit-murit kase bangun kong bilang pa Dia, “Guru, Guru tara peduli deng torang? Torang so mo mati ini!”

³⁹Yesus bangun kong togor pa angin deng omba itu, Dia bilang, “Badiam! Todo suda!” Turus angin deng omba itu berenti, kong talaga itu jadi todo skali.

⁴⁰Abis itu, Yesus bilang pa Dia pe murit-murit, “Bikiapa kong ngoni tako? Deng bikiapa kong ngoni masi bolong percaya pa Kita?”

⁴¹Yesus pe murit-murit so tako kong baku bilang, “Angin deng omba me iko Dia pe parenta! Orang macam apa Dia ini e?”