Read Malay, North Moluccan Lukas 10 Bible Online

Lukas 10 - Malay, North Moluccan bible

Lukas 10

¹Abis itu, Tuhan Yesus pili tuju pulu orang dari orang-orang yang jaga iko pa Dia. Dia utus pa dorang dua-dua orang untuk pigi kamuka di kota-kota deng di tampa-tampa yang nanti Dia mo datang.

² Dia bilang pa dorang, “Orang yang so siap dengar deng mau tarima Kabar Bae dari Tuhan Allah itu banya skali, sama deng gandum pe banya di kobong yang so siap mo pete, tapi orang-orang yang mo bapete cuma sadiki. Karna itu, ngoni minta suda pa Tuhan Allah yang punya kobong itu, supaya Dia tamba orang yang mo bapete pa Dia pe kobong.

³ Skarang ngoni pigi, tapi inga bae-bae, Kita utus pa ngoni pigi di tenga-tenga orang jahat, itu sama deng domba pe ana satu ekor pigi di tenga-tenga anjing utang.

⁴ Waktu ngoni pigi, jang bawa dompet, jang bawa tas atau jang bawa sandal. Jang bacarita banya deng orang di jalang, tapi bajalang turus.

⁵Kalu ngoni maso di orang pe ruma, ngoni musti kase salam kamuka, ‘Tuhan berkati ngoni samua yang ada di ruma ini.’

⁶Kong kalu orang di ruma itu tarima pa ngoni, berkat yang ngoni minta itu akan ada pa dorang. Tapi kalu orang di ruma itu tara tarima pa ngoni, berkat yang ngoni minta itu tara jadi pa dorang.

⁷ Kalu ada orang yang so tarima pa ngoni, ngoni tinggal suda di ruma itu. Jang ngoni pinda-pinda tampa. Makang deng minum apa saja yang dong kase pa ngoni, karna sapa yang bakarja, dia pantas mo dapa upah dari dia pe karja itu.

⁸Kalu ngoni maso di satu kota ka, kampong ka, turus orang-orang di situ tarima pa ngoni, ngoni makang suda apa yang dorang kase.

⁹Turus, ngoni kase sembu pa orang-orang saki di tampa itu, deng kase tau pa orang-orang di situ, ‘So tara lama lagi Tuhan Allah mo Berkuasa sebagai Raja pa orang-orang yang percaya pa Dia.’

¹⁰ Tapi kalu ngoni maso di satu kota ka, kampong ka, kong orang-orang di situ tara tarima pa ngoni, pigi di jalang-jalang basar kong bilang kuat-kuat bagini,

¹¹‘Ngoni so tolak Tuhan pe Kabar Bae, jadi torang mo pigi suda. Abu dari ngoni pe kota yang ada pa torang pe kaki me, torang tada di sini la kase inga ngoni so sala pa Tuhan Allah. Skarang ngoni tanggung ngoni pe hukuman suda. Tapi ngoni inga ini e: so tara lama lagi Tuhan Allah mo Berkuasa sebagai Raja pa orang-orang yang percaya.’ ”

¹² Kong Yesus bilang lagi pa Dia pe murit-murit, “Inga bae-bae e, nanti di hari kiamat, waktu Tuhan mo adili pa samua orang, di hari itu orang-orang di kota yang tolak pa ngoni itu mo dapa hukuman yang paling barát. Hukuman yang dorang akan dapa itu, lebe barát dari hukuman yang kota Sodom perna dapa.”

¹³ Yesus bilang lagi, “Ee, ngoni orang-orang Khorazim deng Betsaida! Cilaka suda ngoni! Tuhan mo hukum pa ngoni barát skali karna Kita so biking mujizat-mujizat pa ngoni tapi ngoni tara mau percaya kong bertobat. Padahal kalu mujizat-mujizat itu Kita biking pa orang-orang di kota Tirus deng Sidon, biar dorang jahat, pasti dong so bertobat kong taru abu pa dong pe kapala deng pake baju karong, tanda dong manyasal dari dong pe dosa.

¹⁴Jadi, nanti di hari kiamat, waktu Tuhan mo adili pa samua orang, orang-orang Tirus deng Sidon pe hukuman akan lebe ringan dari ngoni.

¹⁵ Deng ngoni orang-orang yang tinggal di kota Kapernaum, apa ngoni pikir Tuhan mo angka pa ngoni di sorga? Tarada! Mala, Dia mo buang pa ngoni di neraka.”

¹⁶ Abis itu, Yesus babale bilang ulang pa orang-orang yang ada iko pa Dia, “Orang yang dengar pa ngoni, itu sama saja deng dia dengar pa Kita. Orang yang tolak pa ngoni, dia itu me so tolak pa Kita. Sapa tolak pa Kita, dia itu me so tolak pa Tuhan Allah yang utus pa Kita.”

¹⁷Tuju pulu orang yang Yesus utus, dong bale pa Yesus deng hati sanang, kong bilang pa Dia, “Tuhan, setang-setang me iko torang pe parenta waktu torang user pa dorang pake Tuhan pe nama.”

¹⁸Yesus bilang pa dorang, “Iyo, butul. Kita so lia Iblis, setang-setang pe raja dapa buang dari langit, dia jatu capat sama deng kilat.

¹⁹ Inga bae-bae yang Kita bilang pa ngoni. Kuasa yang Kita so kase pa ngoni itu basar, sampe ngoni me bisa injang ular bisa deng kalajengking, deng supaya ngoni bole kase kala ngoni pe musu, itu Iblis, setang-setang pe raja. Deng kuasa itu, tara ada yang bisa kase cilaka pa ngoni.

²⁰Biar bagitu me, ngoni pe hati jang talalu sanang karna setang-setang itu iko ngoni pe parenta. Tapi, ngoni musti sanang karna ngoni pe nama ada tatulis di sorga.”

²¹Waktu itu suda, Roh Kudus kuasai pa Yesus kong biking Dia pe hati sanang. Kong Dia bilang, “Kita bilang tarimakasi pa Bapa, Tuhan yang berkuasa di sorga deng di bumi. Kita bilang tarimakasi karna Bapa tara kase tau samua itu deng jelas pa orang-orang yang pande deng yang tau banya hal. Tapi pa orang-orang biasa, Bapa biking sampe dorang mangarti. Ya Bapa, itu suda yang biking Bapa pe hati sanang.

²² Samua yang ada pa Kita pe Bapa, Bapa so kase pa Kita. Tara ada satu orang yang tau sapa sebenarnya Kita Anak Allah, cuma Bapa yang tau. Kong tara ada satu orang yang tau sapa itu Bapa, cuma Kita, Anak Allah yang tau, deng orang-orang yang Kita pili untuk kanal pa Bapa.”

²³Abis itu, Yesus mangada pa Dia pe murit-murit, Dia bicara cuma pa dorang saja, Dia bilang, “Ngoni paling sanang suda, karna ngoni so lia apa yang Kita biking.

²⁴Barang, dulu banya nabi deng raja suka mo lia apa yang ngoni lia skarang ini, tapi dorang tara riki lia. Dorang me suka mo dengar apa yang ngoni dengar skarang ini, tapi dorang tara riki dengar.”

²⁵ Satu kali, ada guru agama satu yang ahli lima kitab Musa mo cari-cari Yesus pe sala. Jadi dia badiri kong batanya bagini, “Guru, kita musti biking apa supaya kita bole dapa hidup deng Tuhan Allah slama-lamanya?”

²⁶Yesus bilang, “Apa yang tatulis tentang itu di aturan-aturan dalam lima kitab Musa? Apa yang ngana baca di situ?”

²⁷ Orang itu jawab, “Ada tatulis bagini, ‘Ngoni musti butul-butul sayang pa Tuhan Allah, ngoni pe Tuhan. Ngoni musti sayang pa Dia lebe dari samua yang ngoni sayang, ngoni musti sayang pa Dia deng cara kase ngoni pe tenaga untuk biking Dia pe mau, deng ngoni lagi musti sayang pa Dia deng cara salalu inga pa Dia. Ngoni me musti sayang pa orang laeng,[26] sama deng ngoni sayang ngoni pe diri sandiri.’ ”

²⁸ Yesus bilang pa guru agama Yahudi itu, “Butul yang ngana bilang itu! Kalu ngana biking bagitu, ngana akan hidup deng Tuhan Allah slama-lamanya.”

²⁹Tapi guru agama Yahudi itu mau supaya orang tau dia pe diri itu so butul, jadi dia tanya pa Yesus lagi, “Kong orang laeng yang kita musti sayang itu sapa?”

³⁰Yesus jawab pake umpama ini, “Ada laki-laki orang Yahudi satu yang turung dari kota Yerusalem pigi di kota Yerikho. Di tenga jalang, dia baku dapa deng perampok-perampok. Dorang pukul pa dia kong dong rampas samua yang ada pa dia. Dia pe ahir kabawa, dorang kase tinggal pa dia amper mati di situ.

³¹Tara lama bagini, imam agama Yahudi satu iko jalang itu. Waktu dia lia orang yang dapa rampok itu, dia cuma lewat saja kong bajalang turus iko pinggir jalang.

³²Bagitu lagi deng satu orang agama Yahudi dari suku Lewi. Dia me iko jalang itu. Dia ini yang biasa bantu imam layani pa Tuhan Allah di Ruma Ibada Pusat. Dia dapa lia pa orang yang dapa rampok itu, tapi dia me cuma lewat lagi kong bajalang turus iko pinggir jalang.

³³Pe tara lama, ada satu orang dari daera Samaria[27] yang dari bajalang jao, iko di jalang itu lagi. Waktu dia lia pa orang yang dapa rampok itu, dia rasa kasiang.

³⁴Dia badekat pa orang itu kong kase bersi dia pe luka-luka pake anggur deng obat pake minya.[28] Turus, dia ika orang itu pe luka-luka. Abis itu, dia kase nae orang itu di dia pe keledai, kong bawa di tampa menginap. Di situ dia urus bae-bae pa orang itu.

³⁵Dia pe beso, orang Samaria itu kase doi perak dua[29] pa pemilik penginapan. Dia bilang, ‘Bapa, tolong urus orang ini bae-bae. Ini dia pe ongkos, kong kalu doi ini masi kurang, nanti kita bale, baru kita tamba.’ ”

³⁶Abis itu, Yesus batanya pa guru agama Yahudi itu, “Jadi, menurut ngoni, dari tiga orang itu, sapa yang kase tunju rasa kasiang pa orang yang dapa rampok itu?”

³⁷Guru agama Yahudi itu jawab, “Orang yang so kase tunju dia pe rasa kasiang pa dia.” Kong Yesus bilang pa dia, “Butul itu! Jadi skarang, pigi suda kong biking sama deng itu.”

³⁸ Waktu Yesus deng Dia pe murit-murit sementara bajalang mo pigi di kota Yerusalem, dorang basingga di kampong satu. Di situ, ada parampuang satu yang pe nama Marta. Dia undang Yesus pigi pa dia pe ruma.

³⁹Marta ada sudara parampuang satu, nama Maria. Waktu Yesus ada pa dorang pe ruma, Maria dudu badekat deng Tuhan kong dengar turus Dia pe ajaran.

⁴⁰Tapi Marta, dia cuma sibuk skali kase sadia makanang. Marta badekat pa Yesus kong bilang, “Tuhan, Tuhan tara peduli kita pe sudara kase biar kita bakarja sandiri? Suru dia bantu pa kita.”

⁴¹Tapi Tuhan Yesus jawab pa Marta bagini, “Marta! Marta! Ngana cuma hawater deng kase sibuk diri sandiri deng banya hal tu!

⁴²Padahal, yang penting itu cuma satu, kong Maria so pili yang bae itu, yang dia ada biking skarang. Jadi orang tara bisa ambe itu dari dia.”