Read Malay, North Moluccan Lukas 11 Bible Online

Lukas 11 - Malay, North Moluccan bible

Lukas 11

¹Satu kali, Yesus ada berdoa di tampa satu. Bagitu abis berdoa, ada murit satu bilang pa Yesus bagini, “Guru, Yohanes ada kase ajar dia pe murit-murit berdoa. Jadi, torang me minta Guru kase ajar pa torang berdoa.”

²Kong Yesus bilang pa dorang, “Kalu ngoni berdoa, ngoni berdoa bagini: ‘Bapa, samua puji deng hormat pa Bapa, karna Bapa itu kudus. Torang minta Bapa datang la Berkuasa sebagai Raja pa torang pe hidup.

³Kase pa torang makanang yang cukup tiap hari.

⁴Deng kase ampun torang pe dosa, karna torang me kase ampun tiap orang yang sala pa torang, kong jang kase biar torang tagoda biking barang yang jahat.’ ”

⁵Yesus kase turus Dia pe ajaran tentang doa bagini, “Umpama, ada satu dari ngoni, waktu tenga malam pigi pa dia pe tamang pe ruma kong bilang, ‘Sudara, tolong kase pinjam ngana pe roti tiga pa kita ka,

⁶karna kita ada tamu dari jao yang baru sampe di ruma, tapi kita tarada apa-apa mo kase pa dia.’

⁷Masa orang itu mo jawab, ‘Jang ganggu pa kita, kita so kunci pintu, barang kita deng kita pe ana-ana so tidor. Jadi kita tara akan bangun kong mo bantu pa ngana.’

⁸Ee, dengar Kita mo bilang pa ngoni: dia pe tamang di ruma itu kaapa tara mau bangun mo bantu pa dia pe tamang yang ada datang itu. Tapi kalu dia pe tamang itu baminta turus-turus tara pake malu, dia pe ahir kabawa, dia pe tamang dalam ruma itu me akan bangun kong bantu apa yang dia perlu.

⁹Sama deng itu, Kita bilang pa ngoni: minta suda pa Tuhan Allah apa yang ngoni perlu, nanti Dia akan kase apa yang ngoni minta itu. Cari suda pa Tuhan Allah apa yang ngoni perlu, nanti ngoni akan dapa itu dari Dia. Toki suda Tuhan Allah pe pintu, nanti Dia akan buka pintu untuk tolong pa ngoni.

¹⁰Karna tiap orang yang minta pa Tuhan Allah, dia akan dapa. Tiap orang yang cari dia pe perlu pa Tuhan Allah, dia akan dapa. Deng tiap orang yang toki Tuhan Allah pe pintu, Tuhan Allah akan buka pintu untuk tolong pa dia.

¹¹Ngoni yang so jadi papa, tara mungkin ngoni pe ana minta ikang kong ngoni kase ular pa dia,

¹²atau kase kalajengking kalu dia pe ana minta tolor? Tara mungkin, to?

¹³Jadi biar ngoni pe hati tara bae, tapi ngoni tau bagimana kase barang yang bae pa ngoni pe ana-ana. Apalagi ngoni pe Bapa yang di sorga! Dia pasti mo kase Roh Kudus pa orang-orang yang minta pa Dia.”

¹⁴Satu kali, ada orang yang jadi mou gara-gara dia ada kemasukan setang, kong Yesus user setang dari orang itu pe badan. Waktu Yesus so user setang itu kaluar, orang yang mou itu mulai bisa bicara. Kong banya orang yang bakumpul di situ dong herang skali.

¹⁵ Tapi ada di antara dorang baku bilang bagini, “Pasti Dia pake Beelzebul, setang-setang pe raja pe kuasa, sampe Dia bisa user setang itu.”

¹⁶ Turus ada lagi yang laeng mo cari-cari Yesus pe sala, jadi dong minta supaya Yesus biking mujizat, la kata, dong tau butul-butul Yesus itu dari Tuhan Allah.

¹⁷Tapi Yesus tau dorang pe pikiran, kong Dia kase umpama satu bagini, “Kalu dalam satu kerajaan baku malawang kong tapisa-pisa, pasti kerajaan itu akan ancor. Kong kalu dalam satu ruma tangga baku malawang kong tapisa-pisa, so pasti lagi akan ancor.

¹⁸Bagitu lagi kalu Iblis user dia pe ana bua setang-setang, dorang itu so pasti mo tapisa-pisa, deng Iblis pe kerajaan tara mungkin mo batahang, to? Kita kase conto bagitu, karna ngoni bilang kata, Kita user setang pake kuasa dari Beelzebul.

¹⁹Kalu butul bagitu, orang-orang yang iko pa ngoni orang Farisi, dorang itu user setang pake sapa pe kuasa? Kalu ngoni bilang dorang me pake Iblis pe kuasa, dorang sandiri akan bilang yang ngoni tudu pa dorang deng pa Kita itu sala!

²⁰Tapi Kita, kalu Kita user setang-setang pake Tuhan Allah pe kuasa, itu berarti Tuhan Allah so Berkuasa sebagai Raja pa ngoni pe tenga-tenga.

²¹Ambe conto bagini, kalu ada satu orang yang kuat[30] kong pake senjata lengkap bajaga dia pe ruma sandiri, tantu samua dia pe barang akan aman.

²²Tapi kalu ada satu orang yang lebe kuat dari dia datang serang kong kase kala pa dia, orang yang lebe kuat itu akan ambe samua orang itu pe senjata yang dia harap bisa kase aman pa dia. Abis itu, orang yang lebe kuat itu mo rampas dia pe barang-barang samua kong mo kase barbage pa orang yang lebe kuat itu pe tamang-tamang.

²³ Orang yang tara iko pa Kita, dia musu pa Kita. Kong orang yang tara tolong pa Kita la kumpul orang-orang supaya percaya pa Kita, dia itu yang biking orang-orang jao dari Kita.”

²⁴Yesus bilang lagi, “Kalu setang kaluar dari satu orang, dia pigi bakuliling di tampa-tampa sunyi la mo cari tampa baistrahat, tapi dia tara dapa, jadi setang itu bapikir bagini, ‘Lebe bae kita bale pa orang yang kita so perna tinggal dulu.’

²⁵Waktu dia bale pa orang itu, dia lia orang itu pe hati kosong, macam deng ruma kosong satu yang so sapu bersi kong so taator bae-bae.

²⁶Kong setang itu pigi pangge dia pe tamang tuju yang lebe jahat dari dia. Abis itu, dorang sama-sama maso pa orang itu kong tinggal di situ. Dia pe ahir kabawa, orang itu pe keadaan so lebe soe dari yang pertama.”

²⁷Waktu Yesus masi bicara pa orang banya, ada parampuang satu basuara kuat-kuat pa Yesus, “Yang paling sanang itu Bapa pe mama suda. Dia yang so kase lahir deng yang so kase basar pa Bapa.”

²⁸Tapi Yesus bilang pa dia, “Lebe sanang lagi orang yang suka badengar Tuhan Allah pe firman kong iko itu!”

²⁹ Waktu orang tatamba banya kuliling pa Yesus, turus Dia bilang, “Orang-orang yang hidup skarang ini, dorang jahat. Dorang minta Kita kase tunju mujizat satu la jadi bukti, Kita dari Tuhan Allah. Tapi Kita tara akan kase tunju mujizat apa-apa pa dorang, kacuali Kita cuma kase inga pa dorang mujizat yang perna jadi pa nabi Yunus dulu.

³⁰ Barang, dulu waktu nabi Yunus ada di dalam ikang basar pe puru, turus Tuhan Allah kase kaluar pa dia, itu satu bukti pa orang Niniwe, Tuhan Allah yang utus pa dia. Bagitu lagi deng Anak Manusia yang dari sorga, ada yang mo jadi pa Anak Manusia supaya jadi bukti pa orang-orang skarang ini.

³¹ Nanti di waktu Tuhan mo adili pa samua orang, raja parampuang yang dari selatan mo hidup ulang sama-sama deng ngoni orang-orang skarang ini, kong dia akan kase sala pa ngoni la ngoni dapa hukum. Barang, dulu waktu dia dengar kabar tentang raja Salomo pe hikmat, biar dia jao skali me dia pigi supaya dia bole dengar raja Salomo pe ajaran. Tapi skarang ini di sini, ada Orang yang lebe penting dari raja Salomo yang bawa ajaran pa ngoni, tapi ngoni tara mo dengar tu!

³² Nanti di waktu Tuhan mo adili pa samua orang, orang-orang Niniwe dulu akan hidup ulang sama-sama deng ngoni orang-orang skarang ini, kong dorang akan kase sala pa ngoni. Barang, orang-orang Niniwe itu bertobat waktu Yunus kase tau Tuhan Allah pe pasáng pa dorang. Tapi skarang ini di sini, ada Orang yang lebe penting dari nabi Yunus, kong ngoni tara mo dengar la bertobat tu!”

³³ Yesus bilang satu umpama lagi bagini, “Tarada orang yang pasang lampu kong taru di bawa kolong ruma atau kase tutu deng satu barang la dia pe cahaya tara kaluar. Tapi, pasti dia taru di dia pe tampa supaya samua orang yang maso di ruma bisa lia lampu pe cahaya.

³⁴ Ngoni pe mata sama deng lampu yang kase tarang ngoni pe diri. Jadi kalu ngoni pe mata lia deng jelas, ngoni pe hidup lagi iko tarang. Tapi kalu ngoni pe mata tara lia deng jelas, ngoni pe hidup lagi jadi galap.

³⁵Karna itu, ngoni musti jaga bae-bae, jang sampe tarang yang ada di ngoni pe hidup itu jadi galap.

³⁶Kalu ngoni samua pe hidup ini tarang deng tara ada bagian yang galap biar cuma sadiki, pasti ngoni pe hidup akan tarang skali sama deng lampu pe cahaya yang ada kase tarang pa ngoni.”

³⁷Waktu Yesus abis bicara, ada satu orang Yahudi dari aliran Farisi datang kong undang pa Yesus la makang pa dia pe ruma. Jadi Yesus pigi kong makang di situ.

³⁸Pas mo makang, Yesus tara kase bersi tangan pake cara kusus iko agama Yahudi pe aturan. Jadi orang dari aliran Farisi itu herang karna dorang pe aliran itu pegang kuat agama Yahudi pe aturan.

³⁹Tapi Tuhan Yesus bilang pa dia bagini, “Memang ngoni orang-orang Farisi. Dari luar, dapa lia ngoni rajin biking aturan agama, padahal di ngoni pe hati, ngoni ingin rampas orang laeng pe barang deng ngoni jahat skali. Itu sama deng orang yang jaga kase bersi galas deng piring cuma di luar, padahal bagian dalam kotor skali.

⁴⁰Pe bodo skali ngoni ini! Tuhan Allah itu suda yang biking ngoni pe badan, deng Dia itu me yang biking ngoni pe hati.

⁴¹Karna itu, ngoni kase suda apa yang ada pa ngoni deng hati yang bae untuk tolong orang-orang miskin, la deng bagitu ngoni mo biking ngoni pe diri deng hati jadi butul-butul bersi.

⁴² Cilaka suda ngoni orang-orang dari aliran Farisi! Ngoni rajin skali kase perpuluhan sampe ngoni pe rampa-rampa makanang yang paling kacil me ngoni kase dia pe perpuluhan pa Tuhan Allah. Padahal ngoni tara adil pa orang deng tara sayang pa Tuhan Allah. Bagus kalu ngoni kase perpuluhan pa Tuhan Allah, deng ngoni me musti biking yang adil pa orang deng sayang pa Tuhan Allah lagi.

⁴³Cilaka suda ngoni orang-orang dari aliran Farisi! Kalu di ruma ibada, ngoni suka dudu di tampa yang paling muka, kong kalu di tampa umum, ngoni suka orang hormati pa ngoni.

⁴⁴Cilaka suda ngoni! Barang, ngoni pe kalakuang dari luar dapa lia bagus tapi dari dalam ngoni pe hati busu. Ngoni itu so sama deng kubur yang tarada tanda apa-apa pa dia pe di atas, jadi orang yang bajalang di situ, dorang tara tau ada barang busu di dalam.”

⁴⁵Kong ada guru agama Yahudi satu yang ahli lima kitab Musa, bilang bagini pa Yesus, “Bapa Guru, deng Bapa pe kata-kata tadi itu, itu sama deng Bapa so hina lagi pa torang.”

⁴⁶Tapi Yesus babale bilang pa dia, “Ee, ngoni guru-guru agama Yahudi yang ahli lima kitab Musa, ngoni me cilaka! Karna ngoni biking banya aturan agama deng barát skali, baru suru orang-orang iko itu. Padahal ngoni sandiri tara biking itu deng tara bantu orang biar sadiki la iko aturan-aturan itu.

⁴⁷Cilaka suda ngoni! Barang, ngoni so biking bagus kubur-kubur untuk nabi-nabi dulu, padahal ngoni pe orang tua dulu-dulu tara iko pa dorang, kong so bunu lagi pa dorang.

⁴⁸Jadi deng ngoni biking bagus kubur-kubur itu, itu pe arti, ngoni setuju deng ngoni pe orang tua dulu-dulu yang bunu pa nabi-nabi itu. Barang, dorang memang yang bunu pa nabi-nabi itu, kong ngoni ambe bagian di situ deng cara biking bagus nabi-nabi itu pe kubur.

⁴⁹Samua itu jadi, karna Tuhan Allah yang paling tau, dulu Dia perna bilang bagini, ‘Kita mo utus Kita pe nabi-nabi deng utusan-utusan pigi kase turus Kita pe pasáng pa orang-orang Israel, kong orang-orang Israel itu yang mo bunu pa dorang sebagian, deng ada laeng lagi dorang mo siksa.’

⁵⁰Jadi deng bagitu, Tuhan Allah mo hukum pa ngoni orang-orang yang hidup skarang ini, gara-gara samua nabi yang so dapa bunu mulai dari waktu Tuhan Allah ada biking dunia ini,

⁵¹ mulai dari Habel sampe nabi Zakharia, yang dapa bunu di Ruma Ibada Pusat, antara tampa yang jaga bakar binatang korban persembahan deng Ruang Paling Suci. Dengar bae-bae yang Kita bilang ini: orang-orang skarang ini yang akan mo dapa hukum dari samua yang so jadi itu.

⁵²Cilaka suda ngoni guru-guru agama Yahudi yang ahli lima kitab Musa! Ngoni tau cara mo iko pa Tuhan tapi ngoni sandiri tara iko itu. Ngoni me jaga halangi pa orang laeng yang mo iko pa Tuhan. Itu sama deng ngoni ada pegang kunci pintu tapi ngoni cuma simpang kunci itu.”

⁵³Abis bilang bagitu, Yesus pigi kase tinggal tampa itu. Kong mulai waktu itu, guru-guru agama Yahudi yang ahli lima kitab Musa deng orang-orang dari aliran Farisi mulai cari-cari hal deng Yesus. Dorang pancing-pancing tanya pa Yesus la Dia angka suara tentang banya hal.

⁵⁴Dorang biking bagitu la mo cari Dia pe sala dari Dia pe bicara itu.