Read Malay, North Moluccan Lukas 12 Bible Online

Lukas 12 - Malay, North Moluccan bible

Lukas 12

¹ Waktu itu, ada orang deng ribu yang datang bakumpul pa Yesus. Dorang datang baku-baku gepe sampe dorang baku-baku injang. Kong waktu itu suda, Yesus mulai mangajar. Pertama Dia mangajar pa Dia pe murit-murit, Dia bilang, “Ngoni ati-ati deng orang-orang dari aliran Farisi, jang sampe ngoni iko dorang pe kalakuang. Dorang kase tunju pa orang, dorang itu jaga iko pa Tuhan Allah, tapi sebenarnya dorang munafik. Dorang orang Farisi pe hidup kase pengaru basar pa orang, itu sama deng ragi sadiki yang torang campur di adonan la adonan itu nae.

² Tapi apa yang skarang ada tasambunyi, nanti orang mo dapa tau, deng samua rahasia akan tabongkar.

³Jadi, apa yang ngoni ada baku bilang di tampa yang tasambunyi, itu akan mo dapa tau deng jelas di orang banya pe muka. Deng apa yang ngoni ada baku bisi di dalam kamar, itu akan mo dapa kase tau dari atas ruma la orang banya dengar.”

⁴Yesus bilang lagi, “Ngoni, Kita pe tamang, dengar bae-bae yang Kita bilang ini, jang ngoni tako pa manusia. Karna manusia cuma mampo bunu ngoni pe badan, tapi dorang tara bisa pele ngoni pigi di sorga.

⁵Skarang, Kita mo kase tunju pa ngoni sapa yang musti ngoni tako. Ngoni musti tako cuma pa Tuhan Allah saja yang ada kuasa untuk bunu ngoni pe badan deng ada kuasa lagi untuk hukum ngoni di neraka. Jadi, Kita bilang pa ngoni, ngoni musti tako saja pa Dia!

⁶Coba ngoni pikir, burung pipit lima ekor yang orang jual, dia pe harga mura skali.[31] Tapi biar bagitu, tara ada satu ekor yang Tuhan Allah mo lupa.

⁷Apalagi ngoni, ngoni tara usa tako, karna ngoni lebe berharga dari burung-burung pipit itu, sampe ngoni pe rambu di kapala me Tuhan tau pe banya.”

⁸Turus Yesus bilang lagi, “Dengar ini bae-bae, sapa yang mangaku percaya pa Kita di orang banya pe muka, nanti Kita Anak Manusia me akan mangaku, Kita kanal pa dia di Tuhan Allah pe malaekat-malaekat pe muka.

⁹Tapi sapa yang manyangkal pa Kita di orang banya pe muka, nanti Kita me akan manyangkal dia di Tuhan Allah pe malaekat-malaekat pe muka.

¹⁰ Kong kalu ada orang yang bilang apa-apa yang malawang pa Anak Manusia yang dari sorga, dia masi mo dapa ampun. Tapi sapa yang hina pa Roh Kudus, dia tara akan mo dapa ampun.

¹¹ Kong kalu ada orang bawa pa ngoni untuk mo adili, biar itu di ruma ibada agama Yahudi, atau di pemerinta-pemerinta, ngoni tara usa tako tentang apa yang ngoni musti bilang atau bagimana ngoni mo babela ngoni pe diri.

¹²Karna di waktu itu suda, Roh Kudus akan kase tau pa ngoni apa yang ngoni musti bilang.”

¹³Kong ada satu orang dari antara orang banya itu bilang pa Yesus bagini, “Bapa Guru, bilang ka pa kita pe sudara, la dia bagi tong dua pe waris.”

¹⁴Tapi Yesus bilang pa dia, “Ee sudara, sapa yang tunju pa Kita jadi hakim atau orang yang tukang barbage ngoni dua pe waris?”

¹⁵Kong Yesus bicara pa orang banya yang ada di situ, “Ati-ati deng jaga diri bae-bae, jang sampe ngoni tara puas deng apa yang ngoni punya. Karna manusia pe hidup itu bukang cuma dari harta saja biar dia kaya skali lagi.”

¹⁶Turus, Yesus kase carita umpama satu pa dorang, “Ada orang kaya satu yang dia pe kobong pe hasil banya skali sampe dia pe gudang me so sasa.

¹⁷Kong dia babilang dalam hati bagini, ‘Kita so tarada tampa lagi untuk simpang kita pe hasil kobong kong dia pe hasil sisa yang laeng kita mo taru di mana? Apa yang musti kita biking?’

¹⁸Turus dia bapikir lagi, ‘Ini yang kita mo biking: kita mo bongkar gudang-gudang, kong kita mo biking yang lebe basar lagi. Di situ kita bisa simpang samua hasil kobong deng kita pe barang-barang yang laeng.

¹⁹Abis itu, kita mo bilang pa kita pe diri sandiri: kita mo sante-sante saja. Kita so simpang makanang banya deng barang-barang laeng yang bisa kita pake deng taong-taong. Jadi kita tinggal makang, minum deng hidup sanang-sanang saja.’

²⁰Tapi Tuhan Allah bilang pa dia, ‘Woe, ngana ini bodo. Malam ini suda ngana akan mati. Kong harta yang ngana so simpang banya-banya itu mo jadi orang laeng punya.’

²¹Bagitu yang akan mo jadi pa orang yang cuma tau kumpul harta untuk dia pe diri sandiri saja. Dia tara peduli deng Tuhan Allah pe mau, dia itu sama deng orang yang tarada arti apa-apa pa Tuhan Allah pe muka.”

²²Turus, Yesus bilang pa Dia pe murit-murit bagini, “Karna itu, Kita bilang pa ngoni: tara usa ngoni hawater deng ngoni pe hidup, apa yang ngoni mo makang. Ngoni me tara usa hawater deng ngoni pe badan, apa yang ngoni mo pake.

²³Karna ngoni pe hidup itu lebe penting dari apa yang ngoni mo makang. Deng ngoni pe badan itu lebe penting dari baju yang ngoni mo pake.

²⁴Coba ngoni perhatikan burung-burung gagak. Burung-burung itu tara baambur bibit, tara bapete apa-apa, deng tara punya gudang atau lumbung untuk basimpang makanang, tapi Tuhan Allah kase makang pa dorang. Apalagi ngoni! Ngoni lebe berharga dari burung-burung itu!

²⁵Kalu ngoni hawater deng ngoni pe hidup hari-hari, apa ngoni bisa kase panjang sadiki ngoni pe umur? Tara bisa, to?

²⁶Jadi kalu ngoni saja tara mampo biking hal kacil sama deng mo tamba ngoni pe umur biar sadiki, lebe bae ngoni tara usa hawater tentang hal-hal yang laeng macam deng ngoni pe makang deng minum.

²⁷ Coba perhatikan bagimana bunga-bunga itu batumbu. Bunga-bunga itu tara bakarja, deng tara biking banang untuk jadi baju. Tapi dengar bae-bae yang Kita bilang pa ngoni, raja Salomo yang kaya deng hebat itu me, dia pe baju tara lebe bagus dari bunga-bunga itu pe bagus.

²⁸Rumpu di kobong saja Tuhan Allah piara deng biking bagus, padahal rumpu itu cuma ada hari ini, deng beso so dapa bakar. Apalagi ngoni manusia, pasti Tuhan akan piara pa ngoni deng biking bagus ngoni pe hidup. Jadi bikiapa kong ngoni kurang percaya pa Dia?

²⁹Jadi, tara usa suda ngoni hawater deng pikir-pikir tentang apa yang ngoni mo makang atau apa yang ngoni mo minum.

³⁰Karna cuma orang-orang yang tara percaya pa Tuhan Allah saja yang hawater tentang samua itu, tapi ngoni, ngoni tara perlu hawater, karna ngoni pe Bapa tau ngoni perlu samua itu.

³¹Yang paling penting, ngoni cari suda pa Tuhan Allah supaya Dia yang Berkuasa sebagai Raja pa ngoni pe hidup. Deng bagitu, Tuhan Allah akan kase samua yang ngoni perlu.”

³²Yesus bilang lagi, “Ngoni yang iko pa Kita cuma sadiki, sama deng domba-domba satu kelompok kacil. Tapi biar bagitu me jang ngoni tako! Karna ngoni pe Bapa sanang skali ngoni mo sama-sama deng Dia Berkuasa sebagai Raja.

³³Jual suda ngoni pe harta kong kase dia pe doi untuk orang-orang miskin! Kalu ngoni biking bagitu, itu sama deng ngoni ada kumpul harta di sorga yang tara akan mo abis-abis. Karna di sorga tara ada papancuri yang mo ambe harta itu deng tarada gai yang mo kase rusak harta itu.

³⁴Kita bilang bagitu karna di mana ngoni pe harta ada, di situ lagi ngoni pe hati.”

³⁵ Kong Yesus bilang lagi, “Ngoni musti salalu siap untuk biking Tuhan Allah pe mau, sama deng orang di siang hari so siap pake baju karja waktu mo pigi karja, deng sama deng orang di malam hari ada pasang lampu la siap mo bakarja malam.

³⁶ Ngoni me musti siap sama deng orang-orang karja yang ada tunggu-tunggu dorang pe tuang mo pulang dari pesta kawing. Kalu dorang pe tuang itu pulang so malam kong batoki pintu, dorang so siap langsung mo buka pintu la mo sambut pa dia.

³⁷Orang-orang karja itu paling sanang skali karna waktu dorang pe tuang pulang, dong pe tuang dapa riki dorang masi bajaga tunggu pa dia. Kita mo bilang pa ngoni: dorang itu paling sanang skali karna dong pe tuang akan pake baju karja kong siap-siap layani pa dorang. Turus dia mo suru dia pe orang-orang karja itu dudu la makang, kong nanti dia sandiri yang mo layani pa dorang.

³⁸Kong kalu tuang itu datang waktu tenga malam atau amper siang, kong dia dapa riki dorang masi siap batunggu macam bagitu, dorang itu pasti paling sanang skali.

³⁹ Tapi ngoni me musti inga bae-bae umpama satu ini: kalu tuang ruma tau jam barapa papancuri mo datang, tantu dia tara mo kase biar dia pe ruma papancuri mo maso.

⁴⁰Bagitu lagi deng ngoni, ngoni musti salalu siap, karna Anak Manusia yang dari sorga akan datang ulang di waktu yang ngoni tara sangka-sangka.”

⁴¹Abis itu, Petrus batanya pa Yesus, “Tuhan, umpama yang tadi tu untuk sapa? Untuk torang saja ka untuk samua orang?”

⁴²Kong Tuhan Yesus jawab pa dorang pake umpama bagini, “Kalu ada orang karja yang pande deng setia pa dia pe tuang, dia pe tuang mo angka pa dia jadi kapala untuk kase makang pa samua dia pe orang karja yang laeng pas pa dia pe waktu.

⁴³Orang karja itu akan paling sanang skali kalu dia pe tuang datang, kong dapa riki dia sementara biking dia pe tugas itu bae-bae.

⁴⁴Inga bae-bae yang Kita bilang ini, pasti dia pe tuang mo angka pa dia kong kase percaya pa dia untuk awasi samua dia pe tuang pe barang.

⁴⁵Tapi kalu orang karja itu jahat, dia akan babilang di dia pe dalam hati bagini, ‘Kita pe tuang masi lama baru pulang.’ Kong dia mulai pukul pa orang-orang karja laki-laki deng parampuang, turus dia makang deng minum sampe mabo.

⁴⁶Tapi nanti di hari yang dia tara sangka-sangka, deng di waktu yang dia tara tau, kage-kage dia pe tuang pulang. Turus dia pe tuang mo hukum pa dia deng hukuman yang barát. Dia dapa hukuman mati. Kong dia pe nasib sama deng orang-orang yang tara setia pa Tuhan Allah.

⁴⁷Orang karja yang tau dia pe tuang pe mau kong tara basiap-siap atau tara biking apa yang dia pe tuang mau, dia itu mo dapa pukul hebat dari dia pe tuang.

⁴⁸Tapi orang karja yang tara tau dia pe tuang pe mau kong biking yang sala sampe musti dapa pukul, dia itu cuma mo dapa pukul sadiki. Karna sapa yang Tuhan Allah so kase banya kemampuan, nanti Tuhan Allah mo tuntut lebe dari yang laeng. Kong sapa yang Tuhan Allah so kase percaya banya, Tuhan Allah mo minta tanggung jawab lebe basar lagi pa dorang.”

⁴⁹Yesus bilang lagi, “Kita datang di dunia ini, itu yang biking sampe orang yang percaya pa Kita deng orang yang tara percaya pa Kita baku malawang. Itu sama deng Kita ada lempar api di bumi, kong Kita harap api itu so manyala.

⁵⁰ Tapi masi ada lagi sengsara yang akan Kita mo dapa, kong Kita pe hati tara tenang sebelum sengsara itu Kita dapa.

⁵¹Apa ngoni kira Kita datang di dunia ini supaya orang-orang mo baku bae samua? Tarada! Tapi karna Kita datang, orang-orang yang tara percaya mo baku malawang deng orang-orang yang percaya pa Kita.

⁵²Dari skarang so mulai, kalu ada lima orang dalam satu ruma, tiga lawan dua, atau dua lawan tiga.

⁵³ Dorang baku malawang satu deng yang laeng. Papa deng ana laki-laki baku malawang. Mama deng ana parampuang baku malawang. Mama mantu deng ana mantu baku malawang.”

⁵⁴ Turus Yesus bilang pa orang banya, “Kalu ngoni lia awan so tabal deng baitam di sabla barat, ngoni langsung bilang, ‘Hari ini mo ujang’, deng memang butul ujang turung.

⁵⁵Kong kalu ngoni rasa angin selatan so batiop, ngoni bilang, ‘Ini tanda, hari ini mo panas skali’, deng memang butul panas skali.

⁵⁶Ngoni memang munafik! Ngoni ini bole tau cuaca cuma deng lia tanda-tanda di langit deng di dunia. Tapi bikiapa kong ngoni tara mangarti yang Tuhan Allah biking skarang ini?”

⁵⁷ Yesus bilang lagi, “Kalu ngoni ada masala, ngoni sandiri yang musti ambe keputusan yang butul.

⁵⁸Kalu ada yang bilang ngoni sala, kong dong mo bawa pa ngoni di pengadilan, lebe bae ngoni baku dame suda deng dia waktu masi di tenga jalang. Karna kalu tara bagitu, dia mo bawa paksa pa ngoni mangada pa hakim. Turus hakim akan serakan pa ngoni di petugas penjara, kong dia mo kase maso pa ngoni di penjara.

⁵⁹Inga bae-bae, ngoni tara akan kaluar dari penjara itu sebelum ngoni bayar lunas samua biaya sidang yang hakim suru bayar.”