Read Malay, North Moluccan Lukas 15 Bible Online

Lukas 15 - Malay, North Moluccan bible

Lukas 15

¹ Satu kali sama deng biasa, ada banya tukang tagi pajak deng orang-orang laeng yang orang anggap berdosa, dorang datang pa Yesus untuk dengar Dia pe ajaran.

²Di situ ada lagi orang-orang Yahudi dari aliran fanatik yang pe nama Farisi, deng guru-guru agama Yahudi yang ahli lima kitab Musa. Waktu dorang lia Yesus di situ, dorang bafeto bagini, “Cis, Orang ini batamang deng orang-orang berdosa, baru makang sama-sama deng dorang.”

³Pe dengar dorang bicara bagitu, Yesus ajar pa dorang pake umpama bagini,

⁴“Kalu dari ngoni ini ada yang punya domba saratus ekor, kong ada satu yang ilang, tantu dia akan kase tinggal dulu domba yang sembilan pulu sembilan itu di lapangan rumpu, baru dia pigi cari domba satu yang ilang itu sampe dapa.

⁵Bagitu dia dapa domba satu yang ilang itu, dia sanang skali. Jadi dia ambe kong dia sompong, turus dia bawa pulang.

⁶Pe sampe di ruma, dia pangge dia pe tamang-tamang deng birman-birman, kong bilang pa dorang, ‘Kita pe domba yang ilang kita so dapa ulang. Jadi mari basanang-sanang deng kita!’

⁷Kita bilang pe ngoni e, umpama itu pe arti bagini, Tuhan Allah deng malaekat di sorga akan sanang skali kalu ada satu orang berdosa yang bertobat. Dorang lebe sanang, kalu satu orang berdosa yang bertobat daripada sembilan pulu sembilan orang yang so rasa diri butul kong tara perlu bertobat.”

⁸Yesus bilang umpama satu lagi bagini, “Ada parampuang satu yang punya doi perak spulu.[33] Satu kali, dia pe doi perak satu tu ilang. Jadi apa yang dia biking? Pasti parampuang itu kase manyala lampu, turus dia sapu dia pe ruma kong cari bae-bae dia pe doi yang ilang itu sampe dapa.

⁹Kalu dia so dapa dia pe doi itu, dia pangge dia pe tamang-tamang deng dia pe birman-birman turus bilang pa dorang bagini, ‘Kita pe doi yang ilang kita so dapa ulang, jadi mari basanang-sanang deng kita!’

¹⁰Kita bilang pa ngoni, di sorga me bagitu, Tuhan Allah pe malaekat-malaekat sanang skali kalu ada satu orang yang berdosa kong dia bertobat.”

¹¹Yesus bilang lagi, “Ada bapa satu yang pe ana laki-laki dua.

¹²Yang bongso bilang pa dia pe papa, ‘Papa, barbage suda tong pe harta la kita ambe kita pe bagian!’ Kong dia pe papa bagi dong pe harta pa dia pe ana dua itu.

¹³Pe babarapa hari bagini, ana yang bongso itu jual dia pe bagian samua, kong pigi di daera yang jao. Di sana, dia kase halebiru dia pe doi, kong hidup deng kalakuang yang tara butul.

¹⁴Waktu dia pe doi samua so abis, daera yang dia tinggal pas ada kelaparan yang hebat, sampe dia so mulai sengsara.

¹⁵Kong dia pigi cari karja pa satu orang yang tinggal di daera itu. Orang itu suru dia jaga babi di kobong.

¹⁶Karna lapar skali, deng karna tarada satu orang yang kase pa dia makanang, dia ingin skali makang babi pe makanang.[34]

¹⁷Lama-lama dia sadar deng dia pe keadaan, kong dia bilang bagini, ‘Kita pe papa pe orang karja di ruma dong pe makanang talebe-lebe, tapi kita di sini amper mati lapar.

¹⁸Lebe bae kita kase tinggal tampa ini kong pulang suda pa kita pe papa. Kita akan bilang pa papa, “Papa, kita so berdosa pa Tuhan Allah di sorga deng pa papa lagi.

¹⁹Kita tara pantas lagi dapa bilang kita ini papa pe ana. Lebe bae, kita jadi papa pe orang karja saja.” ’

²⁰Turus dia kase tinggal tampa itu kong pulang pa dia pe papa. Waktu dia masi jao dari ruma, dia pe papa so lia pa dia. Kong dia pe papa rasa kasiang skali pa dia, turus lari ka sana kong polo deng ciom pa dia.

²¹Kong ana itu bilang pa dia pe papa, ‘Papa, kita so berdosa skali pa Tuhan Allah yang di sorga deng pa papa. Kita tara pantas lagi dapa bilang kita ini papa pe ana.’

²²Tapi dia pe papa pangge pa orang-orang karja kong bilang pa dorang, ‘Capat suda bawa kamari juba yang paling bagus kong kase pake pa dia. Kong kase pake lagi cincin pa dia pe jari deng sandal pa dia pe kaki.

²³Abis itu, potong sapi paranggang satu yang bagumu kong momasa. Mari torang makang sama-sama, deng abis itu, baronggeng.

²⁴Barang kita pe ana ini sama deng so mati tapi skarang so hidup ulang. Dia so ilang, tapi kita so dapa ulang.’ Kong dorang mulai bapesta.

²⁵Waktu itu, ana yang tua masi di kobong. Waktu dia pulang dari kobong kong so dekat ruma, dia dengar ada bunyi musik deng orang-orang yang baronggeng pe suara.

²⁶Dia pangge pa orang karja satu kong tanya, ‘Ada acara apa di ruma?’

²⁷Orang karja itu jawab, ‘Tuang pe ade so pulang! Kong tuang pe papa so suru potong sapi paranggang yang gumu, barang tuang pe ade yang ilang so dapa ulang deng slamat.’

²⁸Pe dengar bagitu, ana yang tua itu mara. Dia tara mau maso di ruma. Turus dia pe papa kaluar buju pa dia supaya maso.

²⁹Tapi dia bilang pa dia pe papa, ‘Papa, deng taong-taong kita karja karas untuk papa. Kita tara perna langgar papa pe parenta. Tapi biar bagitu, papa tara perna kase kita kambing paranggang biar satu ekor la kita baacara deng kita pe tamang-tamang.

³⁰Tapi papa pe ana itu so kase halebiru papa pe doi deng parampuang-parampuang tara bae. Kong skarang waktu dia pulang, papa potong sapi paranggang gumu untuk dia tu!’

³¹Kong dia pe papa bilang pa dia, ‘Ana e, ngana salalu tinggal sama-sama deng papa. Jadi samua yang papa punya, itu me ngana punya lagi.

³²Ngana pe ade sama deng orang yang so mati tapi so hidup ulang. Dia so ilang, tapi skarang torang so dapa ulang. Jadi skarang, pantas torang biking acara deng hati sanang.’ ”