Read Malay, North Moluccan Lukas 17 Bible Online

Lukas 17 - Malay, North Moluccan bible

Lukas 17

¹ Yesus bilang pa Dia pe murit-murit, “Salalu saja ada godaan yang biking orang jadi berdosa sampe jadi tara percaya lagi. Tapi cilaka suda orang yang biking sampe orang laeng jadi bagitu.

²Lebe bae ika orang itu pe leher deng gantong batu basar satu pa dia, kong buang pa dia di dalam laut. Lebe bae dia mati bagitu, daripada dia biking satu dari orang yang pe percaya bolong kuat jadi berdosa.

³ Karna itu, ngoni musti ati-ati! Kalu ngoni masing-masing pe tamang yang sama-sama percaya, biking sala pa ngoni, ngoni musti togor pa dia, deng kalu dia mangaku sala, ngoni musti kase maaf pa dia.

⁴ Deng biar dia so biking sala pa ngoni satu hari tuju kali, kong tiap kali dia sala dia bula-bale turus minta maaf, ngoni me musti kase maaf pa dia.”

⁵Turus, Tuhan Yesus pe murit-murit yang orang sebut rasul itu, bilang bagini pa Tuhan Yesus, “Guru, kase tamba kuat ka torang pe percaya!”

⁶Kong Tuhan Yesus bilang pa dorang, “Kalu ngoni pe percaya itu ada, biar cuma kacil sama deng biji yang paling kacil, ngoni bole bilang pa pohong ara ini, ‘Pinda suda di laut kong tatanam di situ!’ Pasti pohong itu tapinda iko ngana pe parenta.”

⁷Yesus bilang lagi, “Ambe conto, kalu ada orang karja yang bakarja bapacol tana atau jaga dia pe tuang pe domba, kong waktu dia pulang di ruma, dia pe tuang tara mo bilang pa dia, ‘Mari suda, dudu makang deng kita di sini.’

⁸Tantu tara bagitu, to? Mala tabale, dia pe tuang akan bilang pa dia bagini, ‘Biking kita pe makanang suda. Abis itu ngana ganti baju, kong ngana layani pa kita sampe kita abis makang deng minum, baru ngana bole makang deng minum.’

⁹Tuang itu tara perlu mo bilang tarimakasi pa dia pe orang karja itu karna itu so dia pe tugas yang musti dia biking.

¹⁰Bagitu lagi deng ngoni. Kalu ngoni so biking samua yang Tuhan Allah so kase tugas pa ngoni, ngoni musti bilang bagini, ‘Torang ini cuma orang-orang karja yang tara pantas mo dapa puji. Torang cuma biking apa yang torang musti biking.’ ”

¹¹Waktu Yesus pigi di kota Yerusalem, Dia iko batas tana daera Samaria deng daera Galilea.

¹²Kong waktu Dia maso di kampong satu, ada spulu orang yang saki lepra datang baku dapa deng Dia. Dorang badiri sadiki jao dari Dia.

¹³Kong dorang bataria, “Yesus, Guru, kasiang ka pa torang!”

¹⁴ Pe lia pa dorang, Yesus bilang, “Ngoni pigi pa imam-imam, kase tunju ngoni pe diri pa dorang.”[38] Turus dorang pigi, kong masi di tenga jalang, dorang so jadi bae.

¹⁵Kong yang satu orang dari dorang itu, pas lia dia so bae, dia bale ulang kong puji-puji pa Tuhan Allah deng suara kuat-kuat.

¹⁶Turus dia berlutut di Yesus pe kaki kong bilang tarimakasi pa Yesus. Dia itu orang Samaria.

¹⁷Turus Yesus bilang, “Ada spulu orang yang Kita kase bae tadi, kong yang sembilan itu di mana?

¹⁸Bikiapa kong dorang tara bale puji pa Tuhan Allah, kong cuma satu orang ini saja yang bale kamari kong puji pa Tuhan Allah? Baru, dia ini me bukang orang agama Yahudi!”

¹⁹Turus Yesus bilang pa orang itu, “Badiri, kong pigi suda. Ngana so sembu karna ngana percaya pa Kita.”

²⁰Satu kali, ada babarapa orang Yahudi dari aliran Farisi, dong tanya pa Yesus, “Tempo apa Tuhan Allah mo Berkuasa sebagai Raja di dunia ini?” Kong Yesus bilang pa dorang, “Waktu Tuhan Allah Berkuasa sebagai Raja pa Dia pe umat, tara ada tanda-tanda lebe dulu sampe orang bisa tau.

²¹Karna itu, orang tara bole bilang: ‘Coba lia, dia ada di sini,’ atau ‘Dia ada di sana!’ Karna Tuhan Allah so Berkuasa sebagai Raja skarang ini pa ngoni pe tenga-tenga.”

²²Abis itu, Yesus bilang pa Dia pe murit-murit, “Nanti ada dia pe waktu ngoni mo ingin lia pa Anak Manusia yang dari sorga, biar cuma satu hari saja, tapi ngoni tara akan mo dapa lia.

²³Deng orang akan bilang pa ngoni, ‘Coba lia, Dia ada di sana,’ atau ‘Dia ada di sini!’ Tapi jang ngoni pigi di situ, jang iko pa dorang itu.

²⁴Karna waktu Anak Manusia yang dari sorga mo datang ulang, samua orang di dunia bisa lia. Itu sama deng kilat bapancar dari langit pe ujung yang satu sampe di ujung yang laeng.

²⁵Tapi Anak Manusia musti dapa banya siksa dulu, deng dapa tolak dari orang-orang yang hidup skarang ini, baru Dia datang ulang.

²⁶ Kong nanti, waktu Dia mo datang ulang, orang-orang pe hidup akan sama deng waktu jaman nabi Nuh dulu.

²⁷ Waktu itu, dorang tara tau banjir basar mo datang, jadi dong pe hidup sama biasa, dong makang deng minum sama biasa, deng dong kawing sama biasa. Dorang pe hidup cuma babagitu turus sampe waktu nabi Nuh maso di kapal basar. Kong banjir basar itu datang kase mati pa dorang samua.

²⁸ Bagitu lagi yang jadi deng orang-orang yang hidup waktu jaman Lot: dorang makang deng minum sama biasa, dorang babili deng bajual, dorang batanam deng biking ruma, samua sama biasa.

²⁹Tapi waktu Lot kaluar dari kota Sodom, api deng belerang turung dari langit sama deng ujang kong bakar kase mati pa dorang samua.

³⁰Bagitu me, orang-orang tara akan siap waktu Anak Manusia datang dari sorga.

³¹ Nanti di hari itu, orang yang ada di atas ruma, jang turung ambe barang-barang di dalam ruma. Bagitu lagi deng orang yang ada di kobong, jang bale lagi di ruma. Capat lari suda!

³²Inga apa yang dulu so jadi pa Lot pe bini, dia mati karna dia masi inga-inga dia pe harta di dunia waktu lari dari Sodom![39]

³³ Sapa yang hidup cuma untuk dia pe diri sandiri, dia itu akan mati tapisa deng Tuhan Allah slama-lamanya. Tapi sapa yang kase dia pe hidup karna dia iko pa Kita, dia itu akan dapa hidup deng Tuhan Allah slama-lamanya.

³⁴Kita bilang pa ngoni: waktu Anak Manusia yang dari sorga datang ulang, nanti ada dua orang yang tidor di atas koi malam itu, yang satu Tuhan Allah mo angka, kong yang satu mo dapa kase tinggal.

³⁵Kong waktu itu lagi, kalu ada parampuang dua orang bagiling gandum, yang satu Tuhan Allah mo angka, kong yang satu mo dapa kase tinggal. [

³⁶Kalu waktu itu ada dua orang bakarja di kobong, yang satu Tuhan Allah mo angka, yang satu mo dapa kase tinggal.]”

³⁷Pe dengar itu, Yesus pe murit-murit tanya, “Guru, di mana itu mo jadi?” Yesus jawab pa dorang, “Umpama ada binatang mati di satu tampa, samua orang jadi tau karna nanti burung-burung bakumpul makang bangke di situ.”[40]