Read Malay, North Moluccan Lukas 19 Bible Online

Lukas 19 - Malay, North Moluccan bible

Lukas 19

¹Yesus maso di kota Yerikho kong bajalang turus mo lewat kota itu.

²Di kota itu, ada satu orang yang pe nama Zakheus. Dia itu tukang tagi pajak pe kapala. Dia orang kaya.

³Dia berusaha lia pa Yesus tapi tara bisa, barang ada banya orang deng karna dia pe badan pende.

⁴Jadi dia lari lebe kamuka dari orang banya itu kong dia nae di pohong ara supaya dapa lia pa Yesus yang mo lewat di situ.

⁵Waktu Yesus sampe di tampa itu, Dia lia ka atas kong bilang, “Zakheus, capat turung suda, karna hari ini Kita musti tinggal di ngana pe ruma.”

⁶Pe dengar itu, langsung Zakheus capat-capat turung dari pohong ara itu kong dia tarima pa Yesus di dia pe ruma deng hati sanang.

⁷Waktu samua orang lia itu, dorang mulai bafeto, dorang bilang, “Cis, Yesus itu pigi batamu di orang berdosa pe ruma tu!”

⁸Tapi Zakheus badiri kong bilang pa Tuhan Yesus, “Bapa, Kita mo kase stenga dari kita punya pa orang yang tarada apa-apa. Deng kalu ada orang yang kita so perna kase ruci, kita mo kase pulang pa dorang ampa kali lipa.”

⁹Turus Yesus bilang pa dia, “Hari ini, Tuhan Allah so kase slamat dari dosa-dosa pa ngoni yang tinggal di ruma ini, karna ngana so kase tunju, ngana ini butul-butul Abraham pe turunan.

¹⁰Kita bilang bagitu, karna Anak Manusia yang dari sorga datang untuk mo cari pa orang-orang yang jao dari Tuhan Allah deng kase slamat pa dorang.”

¹¹Yesus so dekat di kota Yerusalem.[43] Karna itu, orang banya kira kata, Tuhan Allah so langsung mo Berkuasa sebagai Raja pa Dia pe umat sama deng Dia janji dulu. Karna Yesus tau itu, waktu dorang masi dengar pa Dia, Yesus tamba Dia pe carita satu pake umpama.

¹²Yesus bilang, “Ada raja pe turunan satu, dia pigi di daera satu yang jao skali karna dia mo dapa lantik jadi raja. Kalu dia so dapa lantik, baru dia mo bale ulang pa dia pe daera.

¹³Waktu dia mo pigi, dia pangge dia pe orang karja spulu orang kong kase doi mas[44] pa dorang satu-satu, kong dia bilang bagini, ‘Ngoni pake ini untuk badagang sampe kita bale kamari.’

¹⁴Tapi orang-orang yang tinggal satu daera deng dia itu, dorang binci pa dia. Jadi, waktu dia so barangkat, dong kirim dong pe utusan untuk bilang bagini, ‘Torang tara mau orang ini jadi torang pe raja.’

¹⁵Tapi biar bagitu, dia tetap dapa lantik jadi raja, kong waktu dia bale ulang pa dia pe daera, dia suru pangge dia pe orang-orang karja yang dia so kase doi pa dorang itu. Dia mo cek dorang pe untung dari dong pe badagang itu.

¹⁶Orang karja yang pertama datang pa dia kong bilang, ‘Bapa, doi mas satu yang bapa kase pa kita itu, skarang so tatamba spulu doi mas.’

¹⁷Kong raja bilang pa dia pe orang karja itu bagini, ‘Ngana pe karja bagus skali, ngana orang karja yang bae. Ngana so setia deng hal yang kacil skali. Karna itu, skarang kita angka pa ngana kase ngana kuasa untuk bapimpin spulu kota.’

¹⁸Abis itu, orang karja yang kedua datang kong dia bilang, ‘Bapa, doi mas satu yang bapa kase pa kita itu, skarang so tatamba lima doi mas.’

¹⁹Kong raja itu bilang pa dia pe orang karja itu, ‘Kalu bagitu, Kita kase kuasa pa ngana untuk bapimpin lima kota.’

²⁰Turus orang karja yang laeng datang kong bilang, ‘Bapa, ini bapa pe doi mas yang bapa ada kase pa kita. Kita simpang dalam lengso.

²¹Kita biking bagitu, karna kita tau bapa itu orang karas jadi kita tako. Kalu bapa suru orang cari untung deng bapa pe doi, bapa harap dia mo dapa untung banya. Kong kalu bapa suru orang batanam, bapa harap dorang bapanen banya.’

²²Kong raja itu bilang pa dia pe orang karja itu, ‘He, ngana orang karja yang jahat! Kita mo hukum pa ngana sama deng apa yang ngana ada bilang. Ngana tau kita ini orang karas: kita jaga ambe barang yang bukang kita punya, deng jaga pete hasil kobong yang kita tara tanam.

²³Kalu bagitu, bikiapa kong kita pe doi itu ngana tara simpang di bank supaya waktu kita pulang, kita bisa ambe doi mas itu deng dia pe bunga.’

²⁴Kong raja itu bilang pa orang-orang yang ada badiri di situ, ‘Ambe suda doi mas satu itu dari dia, kong kase pa orang karja yang dapa doi mas spulu itu.’

²⁵Tapi orang-orang di situ bilang pa raja, ‘Raja, bikiapa kong bagitu? Dia itu so punya doi mas spulu.’

²⁶ Raja itu bilang pa dorang bagini, ‘Kita kase inga pa ngoni e, orang yang rajin urus apa yang ada kase percaya pa dia, dia akan lebe dapa kase percaya lagi. Tapi orang yang pamalas urus apa yang ada kase percaya pa dia, apa yang ada pa dia biar cuma sadiki me, akan dapa ambe dari dia.

²⁷Tapi skarang, samua kita pe musu yang tara suka kita dapa lantik jadi dorang pe raja, tangka pa dorang kong bawa kamari, turus bunu suda pa dorang di kita pe muka-muka!’ ”

²⁸Pe abis Yesus carita umpama itu, Dia bajalang kamuka dari orang banya pigi ka atas di kota Yerusalem.

²⁹Waktu so dekat kampong Betfage deng kampong Betania, dua kampong yang ada di atas Bukit Zaitun, Yesus suru Dia pe murit dua orang,

³⁰deng pasáng bagini, “Ngoni pigi suda di kampong yang ada di muka itu. Bagitu ngoni maso di situ, ngoni akan dapa keledai paranggang satu ekor yang ada ika. Keledai itu bolong perna ada orang yang nae. Ngoni kase lapas keledai itu kong bawa kamari e.

³¹Deng kalu ada orang yang tanya bikiapa kong ngoni kase lapas pa dia, ngoni bilang bagini, ‘Tuhan mo pake keledai ini kong.’ ”

³²Turus dong dua itu pigi. Dorang dapa samua sama deng yang Yesus ada bilang pa dorang.

³³Kong waktu dorang sementara kase lapas keledai itu, turus orang yang punya keledai itu bilang bagini, “Bikiapa kong ngoni kase lapas keledai itu?”

³⁴Dorang jawab, “Tuhan mo pake keledai ini kong.”

³⁵Turus dorang bawa keledai itu pa Yesus. Dorang kase alas keledai itu deng dong pe juba, kong kase nae pa Yesus di atas keledai itu.

³⁶Waktu Yesus lewat di jalang deng keledai itu, banya orang yang kase alas dorang pe juba di jalang untuk sambut pa Dia.

³⁷Waktu Dia so mo maso di kota Yerusalem, pas di jalang yang taturung dari Bukit Zaitun, samua orang yang jaga iko pa Yesus, dorang mulai basimore deng hati sanang puji pa Tuhan Allah. Dorang biking bagitu karna samua mujizat yang dorang so lia.

³⁸ Dorang bilang, “Puji pa Dia yang Tuhan Allah so utus datang kamari sebagai Raja! Skarang Tuhan Allah di sorga deng manusia di dunia so baku dame. Mari torang puji deng hormat pa Tuhan Allah yang Paling Tinggi!”

³⁹Tapi ada babarapa orang Yahudi dari aliran Farisi yang ada di orang banya itu, dorang bilang bagini pa Yesus, “Guru, togor pa dorang yang jaga iko pa Guru itu supaya dong badiam.”

⁴⁰Yesus jawab, “Kita bilang pa ngoni, kalu dorang badiam, batu-batu ini yang akan bataria basimore puji pa Tuhan.”

⁴¹Waktu Yesus so dekat deng kota Yerusalem, Dia lia kota itu kong Dia manangis.

⁴²Dia bilang, “Ado, kasiang, ngoni orang-orang Yerusalem! Kita paling harap suda, ngoni so mangarti apa yang ngoni musti biking supaya ngoni bole dapa dame. Tapi skarang so terlambat, itu so tasambunyi dari ngoni.

⁴³Karna nanti akan ada dia pe waktu, ngoni pe musu datang, dong mo biking benteng kase kuliling ngoni pe kota. Kong dorang akan kepung pa ngoni deng biking sampe ngoni me so tara bole kaluar dari situ.

⁴⁴Dorang mo kase ancor ngoni pe kota Yerusalem kong dorang mo bunu pa ngoni orang-orang yang ada tinggal di situ. Deng tara ada satu batu yang dong akan kase biar tasusun pa dia pe tampa. Ngoni pe kota akan ancor bagitu, karna ngoni tara tarima waktu Tuhan Allah datang pa ngoni untuk kase slamat pa ngoni.”

⁴⁵Yesus maso di Ruma Ibada Pusat pe kompleks, kong Dia mulai user samua orang yang bajual di situ.

⁴⁶ Yesus bilang pa dorang, “Di Kitab Suci ada tatulis bagini, ‘Kita pe Ruma akan jadi tampa berdoa.’ Tapi ngoni biking jadi tukang tipu pe tampa basambunyi.”

⁴⁷ Tiap hari Yesus mangajar di Ruma Ibada Pusat pe kompleks. Orang-orang Yahudi pe imam-imam kapala, guru-guru agama Yahudi yang ahli lima kitab Musa, deng pemimpin-pemimpin laeng berusaha la mo bunu pa Dia,

⁴⁸tapi dorang tara tau bagimana dia pe cara mo bunu pa Dia, karna samua orang yang tinggal di kota itu so suka skali dengar Yesus pe ajaran.