Read Malay, North Moluccan Lukas 20 Bible Online

Lukas 20 - Malay, North Moluccan bible

Lukas 20

¹Satu kali bagini, Yesus mangajar di Ruma Ibada Pusat pe kompleks. Dia ada kase tau pa dorang Kabar Bae dari Tuhan Allah. Waktu Yesus sementara mangajar, imam-imam kapala, guru-guru agama Yahudi yang ahli lima kitab Musa, deng tua-tua Yahudi datang di situ.

²Dorang tanya pa Yesus, “Coba Ngana kase tau, samua yang Ngana biking itu, Ngana dapa hak dari mana? Kong sapa yang kase hak itu pa Ngana?”

³Yesus bilang pa dorang, “Kita lagi mo batanya pa ngoni. Coba ngoni bilang pa Kita,

⁴sapa yang kase hak pa Yohanes untuk baptis orang? Tuhan Allah, ka manusia?”

⁵Pe dengar bagitu, dorang baku bilang bagini, “Kalu torang bilang, ‘Tuhan Allah yang kase hak’, Dia akan mo bilang pa torang, ‘Bikiapa kong ngoni tara percaya pa Yohanes?’

⁶Tapi kalu torang bilang, ‘Manusia yang kase hak’, samua orang ini akan lempar kase mati pa torang deng batu, karna dorang percaya, Yohanes ini nabi yang jaga kase turus Tuhan Allah pe pasáng.”

⁷Jadi dorang bilang pa Yesus, “Torang tara tau sapa yang kase hak pa Yohanes.”

⁸Kong Yesus bilang pa dorang, “Kalu bagitu, Kita me tara kase tau pa ngoni, sapa yang kase hak pa Kita biking samua itu.”

⁹ Yesus kase carita umpama satu pa orang banya itu bagini, “Ada satu orang babiking kobong anggur.[45] Turus, dia baku ator deng orang yang mo bakarja di kobong itu la urus dia pe kobong. Abis itu, dia sandiri pigi di daera laeng kong tinggal lama di sana.

¹⁰Waktu so musim bapete anggur, dia suru dia pe orang karja satu pigi pa orang-orang yang jaga kobong itu, supaya dorang kase dia pe bagian dari kobong pe hasil. Tapi dorang cuma pukul pa dia, kong suru dia pulang tara bawa apa-apa.

¹¹Abis itu, tuang kobong itu suru dia pe orang karja yang laeng lagi. Tapi dia me dapa pukul, deng dapa kase malu, kong dia dapa suru pulang tara bawa apa-apa.

¹²Turus, tuang kobong itu suru dia pe orang karja yang ketiga, tapi pa dia me dorang pukul sampe luka-luka, kong kase lempar kaluar dari kobong itu.

¹³Kong tuang kobong itu bilang bagini, ‘Kita musti biking apa e? Lebe bae kita suru kita pe ana sandiri, yang kita sayang. Pasti dorang hormati pa dia.’

¹⁴Tapi waktu orang-orang yang jaga kobong itu dapa lia pa tuang kobong itu pe ana, dong baku ator, deng dong bilang, ‘Dia ini suda yang nanti jadi waris untuk kobong ini. Jadi, mari torang bunu pa dia, la kobong ini mo jadi torang punya.’

¹⁵Turus dorang hela kase kaluar pa dia dari kobong itu kong bunu pa dia.” Pe abis carita umpama itu, Yesus tanya pa dorang, “Skarang, tuang kobong itu mo biking apa pa dorang?

¹⁶Pasti dia mo datang kong bunu pa dorang. Abis itu, dia kase pa orang-orang laeng untuk jaga dia pe kobong itu.” Pe dengar Yesus bilang bagitu, dorang mangarti Dia pe maksut kong dorang itu bilang, “Jangan! Jang sampe jadi bagitu!”

¹⁷ Tapi Yesus haga pa dorang kong bilang, “Biar ngoni bilang jangan, tapi bagimana deng arti yang so tatulis di Kitab Suci ini? ‘Batu yang tukang-tukang bangunan so tara pake, itu so jadi batu fandasi yang paling penting.’[46]

¹⁸Sapa yang jatu di atas batu itu, dia akan ancor. Deng sapa yang tatindis deng batu itu, dia akan lebe ancor.”

¹⁹Guru-guru agama Yahudi yang ahli lima kitab Musa deng imam-imam kapala, dorang mangarti umpama yang Yesus bilang-bilang tadi tentang orang-orang yang dapa suru jaga kobong itu, Dia pe maksut itu pa dorang. Karna itu, dorang berusaha la mo tangka pa Yesus tapi dorang tako pa orang banya yang ada di situ.

²⁰Guru-guru agama Yahudi yang ahli lima kitab Musa, deng imam-imam kapala, dorang cari cara la mo tangka pa Yesus, jadi dorang perhatikan pa Dia turus. Kong dorang suru babarapa orang jadi mata-mata. Dorang itu bafoya jadi orang bae, supaya dorang bisa cari Yesus pe sala. Dorang harap Dia bisa bicara sala la dorang bisa lapor di gubernur yang punya kuasa mo adili orang.

²¹Jadi dorang mulai tanya pa Yesus bagini, “Guru, torang tau samua yang Guru bilang deng kase ajar itu butul. Guru me tara suka cari muka pa orang-orang. Mala Guru kase ajar yang butul tentang bagimana hidup iko Tuhan Allah pe mau.

²²Jadi skarang, torang mo tanya pa Guru, kalu iko torang pe aturan agama, bole ka tarada torang bayar pajak pa raja basar Roma?”[47]

²³Tapi Yesus dapa tau dong pe akal, jadi Dia bilang pa dorang bagini,

²⁴“Coba kase tunju pa Kita doi yang ngoni jaga pake babayar pajak.[48] Sapa pe gambar deng sapa pe nama di situ?” Dorang jawab, “Raja basar Roma pe nama deng pe gambar!”

²⁵Turus Yesus bilang pa dorang, “Kalu bagitu, kase suda pa raja apa yang ngoni musti kase pa dia, deng kase suda pa Tuhan Allah apa yang ngoni musti kase pa Tuhan Allah!”

²⁶Pe dengar apa yang Yesus bilang itu, dorang jadi herang kong dong tabadiam. Barang, dorang tara bisa dapa Dia pe sala di orang banya itu pe muka.

²⁷ Abis itu, ada babarapa orang agama Yahudi dari aliran Saduki datang pa Yesus. Aliran ini tara percaya, orang mati akan hidup ulang. Jadi dorang tanya pa Yesus bagini,

²⁸ “Guru, dulu nabi Musa kase parenta, laki-laki sapa saja yang so kawing kong mati tarada ana, dia pe sudara laki-laki musti kawing deng dia pe janda itu supaya sudara yang mati itu ada turunan.

²⁹Tapi perna jadi bagini: ada tuju orang laki-laki basudara. Yang tua kawing deng parampuang satu kong mati tarada ana.

³⁰Kong parampuang itu kawing lagi deng sudara yang kedua, tapi dia me mati tarada ana,

³¹bagitu lagi deng yang ketiga, deng bagitu turus sampe pa dia pe ade yang ketuju. Dorang samua mati tarada ana.

³²Dia pe ahir kabawa, parampuang itu me mati.

³³Jadi, skarang torang mo tanya, nanti di hari kiamat, waktu Tuhan kase hidup ulang pa samua orang, yang mana sebenarnya dari dorang tuju itu yang jadi parampuang itu pe laki? Barang, ade kaka tuju orang itu samua so kawing deng dia!”

³⁴Kong Yesus bilang pa dorang, “Orang-orang yang masi hidup di dunia ini kawing.

³⁵Tapi orang-orang yang Tuhan Allah anggap pantas untuk hidup di sorga, dorang itu nanti Dia mo kase hidup ulang, deng dorang itu so tara kawing lagi.

³⁶Barang, dorang so hidup sama deng malaekat-malaekat deng dong so tara mati lagi. Dorang itu so jadi Tuhan Allah pe ana-ana karna Dia so kase hidup ulang pa dorang.

³⁷ Kong tentang orang mati yang hidup ulang, nabi Musa so kase tau itu waktu dia ada di pinggir rumpu baduri yang manyala. Waktu itu, Tuhan Allah bilang pa nabi Musa bagini, ‘Kita ini suda Tuhan Allah yang Abraham, Ishak, deng Yakub jaga semba.’

³⁸Waktu Tuhan Allah bilang bagitu, Abraham, Ishak, deng Yakub so mati. Tapi biar dorang so mati, dorang so hidup ulang deng Tuhan Allah. Deng bagitu, jelas, Tuhan Allah itu bukang orang mati pe Tuhan, tapi orang hidup pe Tuhan.”

³⁹Pe dengar itu, babarapa guru agama Yahudi yang ahli lima kitab Musa bilang bagini, “Guru, Guru pe jawaban itu butul skali.”

⁴⁰Mulai dari situ, dorang so tara barani lagi mo batanya apa-apa pa Yesus.

⁴¹Yesus bilang pa dorang bagini, “Yang orang jaga bilang, Mesias, Raja yang Tuhan Allah janji, Dia itu raja Daud pe turunan. Tapi apa memang Dia itu cuma raja Daud pe turunan?

⁴² Karna raja Daud sandiri perna bilang Tuhan Allah pe janji tentang Mesias itu di kitab Mazmur bagini, ‘Tuhan Allah ada bilang pa kita pe Tuhan bagini, Dudu suda di tampa yang terhormat, pa Kita pe sabla kanan,

⁴³sampe Kita kase kala Ngana pe musu-musu samua.’

⁴⁴Jadi, kalu raja Daud sandiri saja bilang Mesias itu dia pe Tuhan, bagimana lagi torang mo bilang Mesias itu cuma raja Daud pe turunan?”[49]

⁴⁵Waktu orang banya masi dengar Yesus pe bicara, Yesus bilang pa Dia pe murit-murit,

⁴⁶ “Ngoni musti ati-ati deng guru-guru agama Yahudi yang ahli lima kitab Musa. Dorang itu kalu bajalang, suka pake juba panjang yang kase tunju dorang orang penting, deng dorang paling suka orang hormati di orang banya pe muka. Kalu di ruma ibada deng di acara-acara pesta, dorang itu paling suka dudu di muka di tampa paling terhormat.

⁴⁷Dorang me suka biking bodo pa janda-janda la ambe dong pe ruma. Baru dorang kalu berdoa kase panjang-panjang supaya orang tau dorang itu orang bae. Dorang ini pasti mo dapa hukuman yang paling barát.”