Read Malay, North Moluccan Lukas 3 Bible Online

Lukas 3 - Malay, North Moluccan bible

Lukas 3

¹Tiberius so jadi raja basar Roma, kong waktu maso taong kelima blas, Pontius Pilatus yang jadi gubernur di daera Yudea, deng Herodes jadi raja di daera Galilea, Herodes pe sudara nama Filipus jadi raja di daera Iturea deng daera Trakhonitis, turus Lisanias jadi raja di daera Abilene.

²Yang jadi imam basar di agama Yahudi, dorang pe nama Hanas deng Kayafas. Waktu itu Tuhan Allah bicara pa Yohanes, Zakharia pe ana, di Yudea di padang gurun, tampa yang sunyi deng jao dari kampong.

³Karna itu, Yohanes pigi di samua daera dekat kali Yordan, kong kase tau pa orang-orang bagini, “Bertobat suda kong iko pa Tuhan Allah, deng bagitu Tuhan Allah mo kase ampun pa ngoni. Kong kase suda ngoni pe diri la dapa baptis, itu tanda ngoni so bertobat.”

⁴ Yohanes itu orang yang dulu Tuhan Allah bilang mo datang, kong itu ada tatulis di kitab nabi Yesaya bagini, “Nanti ada orang yang mo bicara kuat-kuat pa orang-orang yang bakumpul di padang gurun. Dia bilang, ‘Buka jalang untuk tarima pa Tuhan, kase lurus jalang la sambut pa Dia.’

⁵Tiap jurang akan dapa tutu deng tana, tiap gunung deng bukit akan dapa kase rata. Jalang yang babelok-belok akan dapa kase lurus, deng jalang yang babalobang akan dapa kase rata,

⁶deng samua orang akan mo lia bagimana Tuhan Allah kase slamat manusia dari dorang pe dosa-dosa.”

⁷ Orang banya datang pa Yohanes supaya Yohanes baptis pa dorang. Kong Yohanes bilang pa dorang, “Ee, ngoni orang-orang jahat! Ngoni pe jahat sama deng ular bisa. Jang ngoni kira kalu ngoni so datang kamari dapa baptis, ngoni bole mo dapa lolos dari Tuhan Allah pe hukuman.

⁸ Kalu ngoni butul so bertobat, ngoni musti biking hal yang bae turus supaya ada bukti ngoni itu so bertobat. Itu sama deng pohong yang subur, dia pe bua me bagus-bagus. Jang ngoni pikir ngoni so bebas dari hukuman karna ngoni Abraham pe turunan. Kita bilang pa ngoni, kalu Tuhan Allah mau, Dia bisa biking batu-batu ini jadi Abraham pe turunan.

⁹ Tuhan Allah so siap mo hukum pa samua orang yang tara iko Dia pe mau. Itu sama deng satu orang yang so siap-siap deng tamako mo potong pohong yang tara babua bagus, turus buang pohong itu di api.”

¹⁰Kong, banya orang batanya pa dia, “Apa yang torang musti biking supaya Tuhan Allah tara hukum pa torang?”

¹¹Yohanes bilang, “Sapa yang ada baju dua, satu musti kase pa orang yang tarada baju, deng sapa yang ada makanang, musti kase lagi pa orang yang tarada makanang.”

¹² Orang-orang yang tukang tagi pajak me datang pa Yohanes, minta Yohanes baptis pa dorang. Dorang tanya pa Yohanes, “Guru, apa yang torang musti biking?”

¹³Yohanes bilang bagini, “Waktu ngoni batagi pajak, jang batagi lebe dari yang pemerinta suru ngoni tagi.”

¹⁴Di situ, ada lagi tentara-tentara yang datang. Dorang tanya pa Yohanes, “Kalu torang, apa yang torang musti biking?” Kong Yohanes jawab pa dorang, “Jang ancam orang kong ambe dorang pe doi, deng jang tudu orang bilang dong sala la dong kase doi pa ngoni. Rasa puas suda deng ngoni pe gaji yang ngoni tarima.”

¹⁵Pe dengar Yohanes pe bicara, orang-orang batanya di dong pe dalam hati, “Mangkali Yohanes ini suda Mesias, Raja yang torang tunggu-tunggu deng harap-harap, yang Tuhan Allah janji mo kase slamat pa torang.”

¹⁶Tapi Yohanes bilang pa dorang samua, “Kita baptis pa ngoni deng aer, tanda ngoni so bertobat kong iko pa Tuhan Allah. Tapi nanti, ada satu Orang yang mo datang, Dia pe kuasa lebe basar dari kita. Kong mo jadi Dia pe tukang suru-suru, yang buka Dia pe tali sandal saja me, kita tara pantas. Dia itu nanti yang mo baptis pa ngoni pake Roh Kudus deng api.

¹⁷Dia mo kase pisa pa orang yang iko pa Dia deng orang yang tara iko pa Dia. Itu sama deng orang batapis gandum untuk kase pisa dari konga. Gandum yang bagus dia simpang di dia pe lumbung, tapi konga dia buang di api yang tara mati-mati.”

¹⁸Ada banya nasehat laeng lagi yang Yohanes bilang pa orang banya itu la dorang bertobat, deng supaya dorang iko Kabar Bae dari Tuhan Allah.

¹⁹ Yohanes me togor pa raja Herodes. Herodes ini berkuasa di daera Galilea. Yohanes togor pa Herodes, barang Herodes kawing deng Herodias, dia pe ipar sandiri. Yohanes me togor lagi pa Herodes, barang banya skali kajahatan laeng yang Herodes biking.

²⁰Tapi Herodes tara bertobat. Mala dia lebe tamba jahat, dia kase maso pa Yohanes di penjara.

²¹Waktu Herodes bolong kase maso pa Yohanes di penjara, Yohanes ada baptis banya orang. Termasuk Yesus, dia baptis. Waktu Yesus dapa baptis, Dia berdoa kong langit tabalá.

²² Turus, Roh Kudus datang pa Dia. Roh itu pe model sama deng burung pombo. Kong dapa dengar Tuhan Allah pe suara dari langit bagini, “Ngana ini Kita pe Anak, Kita paling sayang pa Ngana. Ngana yang biking Kita pe hati sanang.”

²³Yesus mulai biking Dia pe pelayanan waktu Dia pe umur kira-kira tiga pulu taong. Orang di sana kanal, Yesus itu Yusuf pe ana. Ini dia pe orang tua dulu-dulu pe nama-nama, rekeng dari Yusuf. Yusuf pe papa pe nama Eli.

²⁴Eli pe papa Matat, Matat pe papa Lewi, Lewi pe papa Malkhi, Malkhi pe papa Yanai, Yanai pe papa Yusuf,

²⁵Yusuf pe papa Matica, Matica pe papa Amos, Amos pe papa Nahum, Nahum pe papa Hesli, Hesli pe papa Nagai,

²⁶Nagai pe papa Maat, Maat pe papa Matica, Matica pe papa Simei, Simei pe papa Yosekh, Yosekh pe papa Yoda,

²⁷Yoda pe papa Yohanan, Yohanan pe papa Resa, Resa pe papa Zerubabel, Zerubabel pe papa Sealtiel, Sealtiel pe papa Neri,

²⁸Neri pe papa Malkhi, Malkhi pe papa Adi, Adi pe papa Kosam, Kosam pe papa Elmadam, Elmadam pe papa Er,

²⁹Er pe papa Yesua, Yesua pe papa Eliezer, Eliezer pe papa Yorim, Yorim pe papa Matat, Matat pe papa Lewi,

³⁰Lewi pe papa Simeon, Simeon pe papa Yehuda, Yehuda pe papa Yusuf, Yusuf pe papa Yonam, Yonam pe papa Elyakim.

³¹Turus Elyakim pe papa Melea, Melea pe papa Mina, Mina pe papa Matata, Matata pe papa Natan, kong Natan pe papa Daud,

³²Daud pe papa Isai, Isai pe papa Obed, Obed pe papa Boas, Boas pe papa Salmon, Salmon pe papa Nahason,

³³Nahason pe papa Aminadab, Aminadab pe papa Admin, Admin pe papa Arni, Arni pe papa Hezron, Hezron pe papa Peres, Peres pe papa Yehuda,

³⁴Yehuda pe papa Yakub, Yakub pe papa Ishak, Ishak pe papa Abraham, Abraham pe papa Terah, Terah pe papa Nahor,

³⁵Nahor pe papa Serug, Serug pe papa Rehu, Rehu pe papa Peleg, Peleg pe papa Eber, Eber pe papa Salmon,

³⁶Salmon pe papa Kenan, Kenan pe papa Arpakhsad, Arpakhsad pe papa Sem, Sem pe papa Nuh, Nuh pe papa Lamekh,

³⁷Lamekh pe papa Metusalah, Metusalah pe papa Henokh, Henokh pe papa Yared, Yared pe papa Mahalaleel, Mahalaleel pe papa Kenan,

³⁸Kenan pe papa Enos, Enos pe papa Set, Set pe papa Adam. Kong Adam itu, Tuhan Allah sandiri yang biking dia jadi Tuhan Allah pe ana.