Read Malay, North Moluccan Lukas 4 Bible Online

Lukas 4 - Malay, North Moluccan bible

Lukas 4

¹Waktu Yesus di kali Yordan itu, Roh Kudus so kuasai pa Dia. Turus Roh Kudus bawa pa Dia di padang gurun, tampa yang jao dari kampong.

²Yesus tinggal di sana ampa pulu hari. Di situ, Iblis, setang-setang pe raja goda pa Yesus. Selama Yesus ada di situ, Dia tara makang apa-apa sampe Dia lapar skali.

³Kong Iblis bilang pa Yesus bagini, “Ngana ini Anak Allah, to? Kalu bagitu, Ngana parenta suda batu ini jadi roti!”

⁴ Yesus tara mau kong bilang pa dia, “Di Kitab Suci ada tatulis bagini, ‘Manusia hidup bukang cuma dari roti[4] saja.’ ”

⁵Abis itu, Iblis bawa pa Yesus di tampa satu yang tinggi. Di situ deng capat skali dia kase lia pa Yesus samua kerajaan di dunia.

⁶Turus Iblis bilang pa Yesus, “Samua kerajaan itu pe kekuasaan deng kekayaan kita mo kase pa Ngana! Karna samua itu so jadi kita punya, kong kita bisa kase pa sapa saja yang kita mau.

⁷Jadi, kalu Ngana berlutut semba pa kita, kita mo kase samua itu jadi Ngana punya.”

⁸ Tapi Yesus bilang pa dia, “Di Kitab Suci ada tatulis bagini, ‘Ngoni musti semba pa Tuhan Allah. Dia itu ngoni pe Tuhan, deng cuma pa Dia saja yang ngoni musti dengar-dengaran.’ ”

⁹Abis itu, Iblis bawa pa Yesus di kota Yerusalem, kong taru pa Yesus di tampa yang paling tinggi di atas Ruma Ibada Pusat. Turus, dia bilang pa Yesus bagini, “Ngana ini Anak Allah, to? Kalu bagitu, Ngana bajatu dari sini ka bawa suda!

¹⁰ Ngana akan tara apa-apa, karna di Kitab Suci ada tatulis tentang Ngana bagini, ‘Tuhan Allah mo suru Dia pe malaekat-malaekat la jaga pa Ngana.

¹¹Dorang mo dafo pa Ngana waktu Ngana jatu, supaya Ngana pe kaki tara kanal di batu.’ ”

¹² Tapi Yesus tara mau kong Dia bilang bagini, “Ada tatulis di Kitab Suci, ‘Jang ngoni coba-coba pa Tuhan Allah, ngoni pe Tuhan.’ ”

¹³Waktu Iblis so abis goda pa Yesus deng macam-macam cara, dia kase tinggal pa Yesus, deng dia tunggu kesempatan laeng yang pas untuk coba goda lagi pa Dia.

¹⁴Abis itu, Yesus bale ulang di daera Galilea. Roh Kudus pe kuasa ada pa Dia, kong kabar tentang Dia tasiar pa samua orang di daera itu.

¹⁵Dia mangajar di ruma-ruma ibada agama Yahudi, kong samua orang hormati pa Dia.

¹⁶Satu kali, Yesus pigi di kampong Nazaret. Dari kacil sampe basar Dia di kampong itu. Kong pas hari Sabat, Dia maso di ruma ibada agama Yahudi, sama deng Dia pe biasa. Dia badiri di muka la mo baca Kitab Suci.

¹⁷Turus, ada yang kase pa Yesus kitab nabi Yesaya. Dia buka kitab yang tagulung itu, kong Dia dapa tulisan bagini,

¹⁸ “Tuhan Allah pe Roh ada pa Kita. Barang Dia so pili pa Kita untuk kase tau Kabar Bae pa orang-orang susa. Dia so utus pa Kita

¹⁹untuk kase tau pa orang-orang bagini: orang yang dapa tahang di penjara mo bebas. Orang buta bole dapa lia lagi. Kong Dia suru pa Kita kase bebas pa samua orang yang orang laeng ada tindas, deng mo kase tau, Tuhan Allah pe waktu mo tolong pa orang-orang so sampe.”

²⁰Abis baca, Yesus gulung ulang kitab itu kong kase pa petugas di situ, baru Dia dudu. Samua orang yang ada di ruma ibada itu haga pa Yesus turus.

²¹Kong Yesus bilang pa dorang, “Samua yang ngoni dengar yang kita so baca di Kitab Suci, hari ini samua so jadi.”

²²Kong samua orang di situ yang dengar apa yang Dia bilang, kase iyo deng jadi herang deng Dia pe kata-kata pe bagus. Tapi abis itu dorang bilang bagini, “Dia itu cuma Yusuf pe Anak, to?”

²³Turus Yesus bilang pa dorang, “Mangkali ngoni mo bilang bahasa satu pa Kita bagini, ‘Woe dokter, kase sembu ngana pe diri sandiri dulu.’ Ngoni bilang bagitu karna ngoni mo suru Kita biking mujizat di Kita pe kampong sandiri ini, sama deng Kita so biking di kampong Kapernaum.

²⁴ Ngoni inga bae-bae yang Kita mo bilang ini. Nabi yang jaga kase turus Tuhan Allah pe pasáng sama deng Kita, tarada yang dapa hargai di dia pe kampong sandiri.

²⁵ Kong yang Kita bilang pa ngoni itu butul, dia pe conto bagini: dulu, jaman nabi Elia, ujang tara turung selama tiga taong anam bulan, sampe ada kelaparan basar di samua daera di Israel. Waktu itu di Israel ada banya ibu janda.

²⁶Tapi biar bagitu me, nabi Elia tara dapa suru pigi pa dorang yang satu bangsa deng dia, mala Tuhan utus dia pigi pa ibu janda satu yang bukang dari orang Israel pe turunan. Janda itu tinggal di Sarfat, di daera Sidon.

²⁷ Bagitu lagi waktu jaman nabi Elisa dulu. Di Israel ada banya orang yang dapa panyake lepra. Tapi tarada satu orang di Israel yang Tuhan kase bae. Tuhan Allah cuma kase bae pa satu orang yang bukang orang Israel, dia orang Siria. Orang itu pe nama Naaman.”

²⁸Waktu dorang samua yang ada di ruma ibada itu dengar Yesus bicara bagitu, dong mara skali pa Yesus.

²⁹Dorang samua badiri kong user pa Yesus. Dorang bawa pa Yesus di pinggir jurang di luar kota. Kota itu memang dong ada biking di atas gunung. Dorang bawa pa Dia di pinggir jurang itu la mo tola pa Dia ka bawa.

³⁰Tapi Yesus cuma bajalang kaluar dari orang banya pe tenga-tenga itu kong pigi kase tinggal pa dorang di situ.

³¹Abis itu, Yesus pigi di kota Kapernaum di daera Galilea. Tiap hari Sabat, Dia mangajar di ruma ibada agama Yahudi.

³² Orang-orang di situ yang dengar Dia pe ajaran jadi herang, barang Dia mangajar deng kuasa yang basar.

³³Di ruma ibada itu, ada orang satu yang kemasukan setang, kong dia bataria,

³⁴“Ee Yesus orang Nazaret! Jang iko campur deng torang pe urusan. Jang kase mati pa torang. Kita tau Ngana sapa. Ngana ini Orang Suci dari Tuhan Allah.”

³⁵Tapi Yesus togor deng suara karas pa setang yang ada pa orang itu, “Badiam! Kaluar ngana dari dia!” Setang itu banting orang itu di orang banya pe muka. Abis banting, setang itu kaluar dari orang itu, tapi orang itu tara apa-apa.

³⁶Pe lia itu, samua orang yang ada di situ jadi herang kong baku bilang bagini, “Bukang maeng Dia pe kata-kata, hebat skali! Dia pake Dia pe kuasa untuk user setang-setang kaluar dari orang kong dong langsung kaluar!”

³⁷Kong carita tentang apa yang Yesus biking itu, tasiar di samua tampa di daera itu.

³⁸Waktu dorang kaluar dari ruma ibada itu, Yesus pigi pa Simon pe ruma. Simon pe mama mantu ada damang tinggi. Jadi, dong minta Yesus kase sembu pa dia.

³⁹Turus, Yesus pigi pa Simon pe mama mantu kong badiri pa dia pe pinggir, kong Dia user[5] damang itu. Waktu itu suda, Simon pe mama mantu langsung sembu kong dia bangun, turus layani dorang makang.

⁴⁰Waktu matahari so mulai maso,[6] orang-orang datang bawa dorang pe orang-orang saki pa Yesus. Orang-orang yang saki itu pe panyake macam-macam. Turus, Yesus taru Dia pe tangan pa dorang masing-masing yang saki itu kong kase sembu pa dorang.

⁴¹Di situ me ada babarapa orang yang kemasukan setang. Yesus parenta setang-setang itu kaluar dari orang-orang itu. Setang-setang kaluar babataria bagini, “Ngana ini Anak Allah.” Tapi Yesus togor deng karas pa dorang, Dia me larang dong bicara, barang setang-setang itu tau, Yesus itu Mesias, Raja yang Tuhan Allah janji mo kase slamat pa manusia.

⁴²Dia pe beso pagi, Yesus kase tinggal kota itu kong pigi di satu tampa yang sunyi. Tapi banya orang cari turus pa Dia. Waktu dong baku dapa deng Dia, dong berusaha tahang pa Dia la jang Dia kase tinggal pa dorang.

⁴³Tapi Yesus bilang pa dorang, “Kita ini me musti pigi di kota-kota laeng supaya Kita bole kase tau lagi Kabar Bae tentang Tuhan Allah mo Berkuasa sebagai Raja pa orang-orang yang percaya pa Dia, karna Kita dapa utus di dunia ini untuk kase tau Kabar Bae itu.”

⁴⁴Dari situ, Yesus pigi kase tau Kabar Bae di ruma-ruma ibada agama Yahudi di daera Yudea.