Read Malay, North Moluccan Lukas 6 Bible Online

Lukas 6 - Malay, North Moluccan bible

Lukas 6

¹ Satu kali, pas hari Sabat, hari yang orang agama Yahudi tara bole bakarja, Yesus deng Dia pe murit-murit bajalang iko kobong gandum. Waktu dorang sementara bajalang itu, Dia pe murit-murit pete gandum[10] sadiki, turus dorang kupas dia pe kuli deng tangan kong makang.

²Di situ, ada babarapa orang Yahudi dari aliran fanatik yang pe nama Farisi. Dorang bilang bagini, “Bikiapa kong ngoni bakarja bapete gandum di hari Sabat? Itu ngoni so langgar torang pe aturan agama!”

³ Kong Yesus bilang pa dorang, “Pasti ngoni so perna baca carita di Kitab Suci tentang raja Daud, waktu dia deng orang-orang yang iko pa dia so lapar.

⁴Raja Daud maso di Tuhan Allah pe Tenda Ibada, kong makang roti yang so jadi persembahan pa Tuhan Allah. Dia me kase roti itu pa orang-orang yang iko pa dia. Padahal roti itu, kalu iko torang pe aturan agama, cuma imam-imam saja yang bole makang.

⁵Kita bilang samua itu, karna Anak Manusia yang dari sorga ada kuasa untuk ator apa yang manusia bisa biking di hari Sabat.”

⁶Satu kali, di hari Sabat yang laeng, Yesus maso di ruma ibada agama Yahudi kong mangajar. Di situ ada satu orang yang dia pe tangan kanan mati.

⁷Di situ me ada guru-guru agama Yahudi yang ahli lima kitab Musa deng orang-orang Yahudi dari aliran fanatik yang pe nama Farisi. Dorang lia-lia turus pa Yesus, supaya kalu Dia kase sembu orang di hari Sabat, dorang bisa dapa alasan untuk kase sala pa Dia. Jadi dorang ingin tau kalu Yesus akan kase sembu orang di hari Sabat, hari yang orang agama Yahudi tara bole bakarja.

⁸Tapi Yesus tau skali dorang pe pikiran. Kong Yesus bilang pa orang yang pe tangan sabla mati itu, “Mari ngana badiri di muka sini!” Turus, orang itu ka sana badiri di muka.

⁹Abis itu, Yesus tanya pa orang-orang di situ bagini, “Kita tanya pa ngoni. Kalu iko torang orang agama Yahudi pe aturan, apa yang torang bisa biking di hari Sabat? Biking barang yang bae ka biking barang yang jahat? Kase slamat orang ka bunu orang?”

¹⁰Turus Yesus haga pa dorang samua, kong Dia bilang pa orang yang pe tangan sabla mati itu bagini, “Kase kamari ngana pe tangan!” Orang itu biking sama deng yang Yesus bilang, kong dia pe tangan jadi sembu.

¹¹Pe lia itu, orang-orang yang ahli lima kitab Musa deng orang-orang dari aliran Farisi, mara skali. Kong dorang mulai biking rencana jahat pa Yesus.

¹²Satu kali bagini, Yesus pigi di gunung satu untuk berdoa. Di situ, Dia berdoa satu malam anteru pa Tuhan Allah.

¹³Pe beso pagi, Yesus pangge pa orang-orang yang jaga iko pa Dia, kong Dia pili dua blas orang dari dorang. Dua blas orang itu yang jadi Dia pe utusan-utusan yang Dia sebut rasul-rasul. Ini dorang pe nama-nama:

¹⁴Simon (yang biasa Yesus pangge Petrus), Andreas (Simon pe sudara), Yakobus, Yohanes, Filipus, Bartolomeus,

¹⁵Matius, Tomas, Yakobus (Alfeus pe ana), Simon yang orang bilang dari Gerakan Yahudi Merdeka,[11]

¹⁶Yudas (Yakobus pe ana), deng Yudas Iskariot yang nanti mo bahianat pa Yesus.

¹⁷Abis itu, Yesus turung dari gunung sama-sama deng Dia pe murit-murit dua blas orang, kong dong berenti di tampa satu yang rata. Di situ me so ada banya orang yang jaga iko pa Dia deng banya orang laeng lagi yang datang dari daera Yudea, dari kota Yerusalem, deng dari Tirus deng Sidon, dua kota yang ada di pinggir pante.

¹⁸Dorang datang la mo dengar Yesus pe ajaran, deng lagi supaya Dia kase sembu pa dorang dari dong pe panyake, deng orang-orang yang kemasukan setang me bole jadi bae.

¹⁹Samua orang di situ berusaha mo bapegang pa Yesus, barang ada kuasa yang kaluar dari Dia pe badan yang biking dorang samua jadi sembu.

²⁰Yesus haga pa Dia pe murit-murit kong bilang bagini, “Paling sanang suda ngoni yang tarada apa-apa, karna ngoni jadi Tuhan Allah pe umat yang Dia Berkuasa sebagai Raja.

²¹Paling sanang suda ngoni yang skarang ini lapar, karna Tuhan Allah akan kase puas pa ngoni. Paling sanang suda ngoni yang skarang ini manangis, karna Tuhan Allah akan biking ngoni tatawa.

²² Paling sanang suda ngoni yang karna ngoni iko pa Anak Manusia, orang binci pa ngoni, tara tarima pa ngoni, hina pa ngoni, deng kase tara bae ngoni pe nama.

²³ Sanang suda waktu ngoni dapa itu deng basimore suda, karna Tuhan Allah so kase sadia ngoni pe upah basar di sorga. Barang, bagitu lagi yang dorang[12] pe orang tua dulu-dulu biking pa nabi-nabi yang jaga kase turus Tuhan Allah pe pasáng.”

²⁴“Tapi ngoni yang skarang ini kaya, cilaka suda ngoni, karna ngoni so rasa sanang dari ngoni pe harta.

²⁵Kong ngoni yang skarang ini kanyang, cilaka suda ngoni, karna nanti ngoni mo lapar. Kong ngoni yang skarang ini tatawa, cilaka suda ngoni, karna nanti ngoni mo sedi deng manangis.

²⁶Kong ngoni yang dapa puji dari samua orang, cilaka suda ngoni, karna itu sama deng yang jadi dulu-dulu pa nabi-nabi yang tara butul. Dorang bilang kata, dong bawa Tuhan Allah pe pasáng, padahal tarada. Ngoni pe orang tua dulu-dulu jaga puji pa dorang.”

²⁷“Tapi ngoni yang sementara dengar pa Kita skarang ini, Kita mo bilang pa ngoni bagini: ngoni musti sayang pa ngoni pe musu-musu deng biking yang bae pa orang yang binci pa ngoni.

²⁸Berdoa minta Tuhan kase yang bae pa orang yang kutuk pa ngoni, deng berdoa lagi untuk orang yang jahat pa ngoni.

²⁹Kalu ada orang yang tampeleng[13] ngoni pe pipi yang satu, ngoni kase lagi pipi yang sabla. Turus, kalu ada orang yang rampas ngoni pe juba, kase biar lagi dia ambe ngoni pe baju.

³⁰Kalu ada orang yang minta apa-apa pa ngoni, kase suda pa dia apa yang dia minta. Kong kalu ada orang yang rampas ngoni pe barang, kase biar suda, jang ngoni minta ulang lagi apa yang dia so rampas.

³¹ Kong apa saja yang bae yang ngoni suka orang biking pa ngoni, itu suda yang ngoni musti biking pa orang laeng.

³²Kita suru bagitu, karna kalu ngoni cuma sayang pa orang yang sayang pa ngoni saja, tarada dia pe untung pa Tuhan Allah pe muka. Barang, orang-orang berdosa me sayang pa orang-orang yang sayang pa dorang.

³³Kalu ngoni biking barang yang bae cuma pa orang yang jaga biking barang yang bae pa ngoni, tarada dia pe untung pa Tuhan Allah pe muka. Karna orang-orang berdosa me jaga biking barang yang bae pa orang yang bae pa dorang.

³⁴Kalu ngoni kase pinjam doi cuma pa orang yang ngoni harap bisa ganti doi itu, tarada dia pe untung pa Tuhan pe muka. Barang, orang-orang berdosa me jaga biking bagitu, supaya dorang bole tarima ulang doi itu, tarada yang kurang.

³⁵Tapi jang ngoni bagitu! Ngoni musti sayang pa ngoni pe musu-musu deng biking yang bae pa dorang. Ngoni kase pinjam apa yang ngoni punya, kong tara usa harap dong mo kase pulang pa ngoni. Kalu ngoni biking bagitu, ngoni mo dapa upah basar. Deng kalu ngoni biking bagitu, ngoni mo jadi sama deng Tuhan Allah yang Paling Tinggi pe ana-ana. Barang, Tuhan Allah bae pa samua orang, biar dorang itu jahat atau tara tau batarimakasi.

³⁶Ngoni musti kase tunju rasa kasiang pa orang-orang, sama deng torang pe Bapa di sorga yang kase tunju Dia pe rasa kasiang pa samua orang.”

³⁷Yesus bilang lagi, “Jang ngoni kase sala pa orang laeng, supaya Tuhan Allah me tara kase sala pa ngoni. Jang ngoni hukum pa orang, supaya Tuhan me tara hukum pa ngoni. Ngoni kase ampun suda pa orang laeng, supaya Tuhan me kase ampun ngoni pe dosa.

³⁸Ngoni musti suka bakase pa orang supaya Tuhan kase lagi pa ngoni. Ukuran yang bae yang Tuhan mo kase pa ngoni, itu bole mo kase sama deng orang ukur baras deng cupa sampe bombong, dia goyang-goyang supaya padat kong dia tamba lagi sampe tatumpa. Karna kalu ngoni bakase sadiki, Tuhan me akan kase sadiki pa ngoni. Tapi kalu ngoni bakase banya, Tuhan me akan kase banya pa ngoni.”

³⁹ Yesus bilang lagi satu umpama pa dorang bagini, “Tara mungkin orang buta mo kase tunju jalang pa orang buta. Nanti dua-dua akan jatu di lobang.

⁴⁰ Tarada murit yang lebe dari dia pe guru. Tapi kalu dia so selesai balajar dari dia pe guru, dia bisa jadi sama deng dia pe guru.

⁴¹Ngoni jaga perhatikan orang laeng pe sala yang kacil, tapi ngoni pe sala yang basar ngoni kase badiam. Itu sama deng ampas kayu yang kacil di ngoni pe sudara pe mata, ngoni bisa lia, padahal balak spanggal yang ada pele ngoni pe mata sandiri, ngoni tara lia.

⁴²Jadi bagimana kong ngoni bisa bilang pa ngoni pe sudara, ‘Sudara e, mari kita kase kaluar ampas kayu dari ngana pe mata,’ padahal balak spanggal di ngoni pe mata sandiri, ngoni kase biar. Ee, ngoni orang munafik, kase kaluar dulu balak spanggal dari ngoni pe mata, baru ngoni bisa lia bae-bae, supaya ngoni bisa kase kaluar ampas kayu dari ngoni pe sudara pe mata.”

⁴³Yesus bilang satu umpama lagi, “Pohong yang bagus tara mungkin babua tara bagus. Bagitu me pohong yang tara bagus, tara mungkin babua bagus.

⁴⁴ Orang bisa tau, satu pohong itu bagus ka tarada dari dia pe bua. Karna tara mungkin mo pete bua ara dari pohong rumpu baduri, deng tara mungkin mo pete bua anggur dari rumpu yang baduri.

⁴⁵Bagitu lagi deng orang yang bae. Dia pe bicara, deng yang dia biking itu bae, karna yang ada di dia pe hati itu hal-hal yang bae. Tapi orang yang jahat, dia pe bicara deng yang dia biking itu jahat, karna yang ada di dia pe hati itu hal-hal yang jahat. Barang, apa yang orang bilang itu bae atau jahat, samua itu kaluar dari orang itu pe hati.”

⁴⁶Yesus bilang lagi, “Bikiapa kong ngoni pangge pa Kita, ‘Tuhan, Tuhan’, padahal ngoni tara biking apa yang Kita bilang?

⁴⁷Orang yang datang pa Kita deng dengar yang Kita bilang kong biking itu, dia itu bole kase sama deng orang pande di umpama ini:

⁴⁸orang pande itu kase badiri ruma. Dia gale tana dolom skali, baru biking fandasi dari batu yang kuat. Turus, dia kase badiri ruma di atas fandasi itu. Kong waktu banjir datang deng bage ruma itu, ruma itu tetap kuat karna ruma itu ada kase badiri di atas fandasi yang kuat.

⁴⁹Tapi orang yang dengar apa yang Kita bilang kong dia tara biking, dia sama deng satu orang yang kase badiri ruma cuma di atas tana, tara di atas fandasi. Jadi waktu banjir datang, ruma itu langsung rubu kong rusak barát.”