Read Malay, North Moluccan Lukas 9 Bible Online

Lukas 9 - Malay, North Moluccan bible

Lukas 9

¹Yesus pangge Dia pe murit dua blas orang, kong Dia kase kekuatan deng kuasa pa dorang untuk user setang-setang deng untuk kase sembu orang yang panyake macam-macam.

²Abis itu, Yesus suru dorang pigi kase tau pa orang-orang tentang bagimana Tuhan Allah Berkuasa sebagai Raja pa Dia pe umat deng Dia suru dong pigi kase sembu pa orang-orang yang saki.

³ Waktu dorang bolong pigi, Yesus pasáng pa dorang, “Jang bawa apa-apa di jalang. Jang bawa tongkat, tas, makanang, doi atau baju baganti.

⁴Kalu ada yang so tarima pa ngoni di dorang pe ruma, tinggal suda di situ sampe ngoni bapinda dari kota itu.

⁵ Kalu tarada yang tarima pa ngoni, ngoni kaluar dari dorang pe kota itu, kong abu yang ada pa ngoni pe kaki me ngoni kase tada di situ, la kase inga dorang so sala pa Tuhan Allah.”

⁶Abis itu, Yesus pe murit-murit bajalang bakuliling di kampong-kampong untuk kase tau Kabar Bae dari Tuhan Allah deng kase sembu orang-orang saki di mana-mana.

⁷ Waktu itu, Herodes[23] yang jadi raja di daera Galilea. Dia dengar tentang samua yang Yesus biking. Dia penasaran, barang ada orang yang bilang kata, Yesus itu Yohanes Pembaptis yang dulu mati tapi so hidup ulang.

⁸Ada laeng lagi yang bilang, Yesus itu nabi Elia dulu-dulu yang datang ulang. Turus ada lagi yang bilang, Yesus itu satu dari nabi dulu-dulu yang so hidup ulang.

⁹Kong raja Herodes bilang, “Tempo hari kita so parenta potong Yohanes pe kapala, kong sapa lagi Orang ini? Kita so dengar tentang mujizat-mujizat yang Yesus biking.” Kong Herodes berusaha la mo baku dapa langsung deng Yesus.

¹⁰Yesus pe murit-murit yang Dia utus itu, skarang so bale. Dorang carita pa Yesus samua yang dorang so biking. Abis itu, Yesus bawa pa dorang di tampa yang sunyi dekat kota yang pe nama Betsaida la dorang tasandiri di situ.

¹¹Tapi orang banya dapa tau tampa yang Yesus deng Dia pe murit-murit pigi. Jadi dong pigi iko pa Dia. Yesus tarima bae-bae pa dorang kong mangajar pa dorang tentang bagimana Tuhan Allah Berkuasa sebagai Raja pa orang-orang yang percaya pa Dia, deng Dia me kase sembu pa orang-orang saki.

¹²Waktu so mo malam, Yesus pe murit-murit dua blas orang itu datang pa Dia kong bilang, “Guru, tampa ini sunyi deng jao dari kampong. Lebe bae suru suda orang-orang banya itu pigi cari makanang deng cari tampa untuk tidor di kampong-kampong yang paling dekat dari sini.”

¹³Tapi Yesus bilang pa Dia pe murit-murit, “Ngoni yang musti kase makang pa dorang!” Dia pe murit-murit bilang, “Guru, yang ada pa torang cuma roti lima deng ikang dua. Apa torang musti pigi bili makanang lagi la kase makang pa dorang samua ini?”

¹⁴Yesus pe murit-murit bilang bagitu karna orang di situ pe banya kira-kira lima ribu, itu cuma hitung laki-laki saja. Kong Yesus bilang pa Dia pe murit-murit, “Suru orang banya itu dudu bakelompok-kelompok. Satu kelompok kira-kira lima pulu orang.”

¹⁵Kong murit-murit biking apa yang Yesus suru. Dorang suru samua orang itu dudu.

¹⁶Waktu dong so dudu, Yesus ambe roti lima deng ikang dua itu. Dia mangada di langit, kong dia bilang tarimakasi pa Tuhan Allah. Turus, Dia pela-pela roti itu kong kase pa Dia pe murit-murit la dong barbage pa orang banya itu.

¹⁷Kong dorang samua makang sampe kanyang. Abis makang, Yesus pe murit-murit kumpul makanang yang talebe. Dia pe banya ada dua blas karanjang.

¹⁸Satu kali, Yesus berdoa sandiri. Dia pe murit-murit me ada di situ dekat deng Dia. Abis berdoa, Yesus batanya pa Dia pe murit-murit, “Yang ngoni dengar, orang-orang jaga bilang Kita ini sapa?”

¹⁹ Dorang jawab, “Ada yang bilang, Guru itu Yohanes Pembaptis yang so hidup ulang. Ada yang bilang, Guru itu nabi Elia yang datang turung dari sorga. Ada lagi yang bilang, Guru itu satu dari nabi-nabi dulu yang hidup ulang.”

²⁰ Turus Dia tanya lagi pa dorang, “Kong kalu menurut ngoni, Kita ini sapa?” Petrus jawab, “Guru itu Mesias suda, Raja yang Tuhan Allah janji mo kase slamat pa manusia.”

²¹Abis itu Yesus larang karas pa Dia pe murit-murit supaya dong jang kase tau pa sapa-sapa, Dia itu Mesias.

²²Abis itu Yesus bilang lagi, “Anak Manusia yang dari sorga musti dapa banya siksa, kong dapa tolak dari tua-tua Yahudi, imam-imam kapala deng guru-guru agama Yahudi yang ahli lima kitab Musa. Dia mo dapa bunu, tapi di hari ketiga Tuhan Allah mo kase hidup ulang pa Dia.”

²³ Yesus bilang pa dorang samua, “Sapa yang mo iko pa Kita, dia tara bole iko dia pe mau. Tiap hari dia musti siap menderita sampe mati karna iko pa Kita, itu sama deng dia pikul dia pe salib untuk iko pa Kita.

²⁴ Karna sapa yang hidup cuma untuk dia pe diri sandiri, dia itu akan mati tapisa deng Tuhan Allah slama-lamanya. Tapi orang yang tara iko dia pe mau sandiri karna dia iko pa Kita, dia itu akan dapa hidup deng Tuhan Allah slama-lamanya.

²⁵Tarada dia pe untung to, kalu satu orang dapa samua harta di dunia ini, tapi dia mati tapisa deng Tuhan Allah slama-lamanya.

²⁶Karna sapa yang malu mangaku dia iko pa Kita deng iko Kita pe ajaran, nanti waktu Kita Anak Manusia datang ulang, Kita me akan malu mangaku dia iko pa Kita. Waktu itu Kita datang deng Kita pe kuasa yang luar biasa deng Kita pe Bapa pe kuasa yang luar biasa deng malaekat-malaekat yang kudus.

²⁷Dengar bae-bae yang Kita bilang pa ngoni. Dari antara ngoni yang ada di sini, ada yang tara akan mati sebelum dorang lia Tuhan Allah Berkuasa sebagai Raja.”

²⁸ Kira-kira delapan hari abis Yesus bilang bagitu, Dia pangge pa Petrus, Yohanes deng Yakobus pigi nae di gunung satu la berdoa di sana.

²⁹Waktu Yesus sementara berdoa, Dia pe muka dapa lia beruba jadi laeng deng Dia pe baju jadi puti mangkilat.

³⁰Kage-kage, ada dua orang bacarita deng Dia. Dorang itu nabi Musa deng nabi Elia yang hidup dulu-dulu.

³¹Dorang dua lagi bacahaya luar biasa. Dorang bicara tentang Yesus yang mo mati iko Tuhan Allah pe rencana, kong itu mo jadi di Yerusalem.

³²Waktu dorang tiga babicara itu, Petrus deng tamang dua ada tasono. Waktu dorang takage, dorang dapa lia Yesus bacahaya luar biasa deng nabi dua orang yang badiri dekat Dia.

³³Waktu nabi Musa deng nabi Elia so mo kase tinggal pa Yesus, Petrus bilang pa Yesus, “Guru, torang sanang skali ada di sini. Lebe bae torang tiga kase badiri tenda kacil tiga: satu untuk Guru, satu untuk nabi Musa, deng satu untuk nabi Elia.” Tapi Petrus asal bicara saja, dia tara sadar.

³⁴Sementara Petrus bicara, awan turung tutu pa dorang, kong dorang jadi tako.

³⁵ Dorang dengar suara dari dalam awan itu bagini, “Ini Kita pe Anak yang Kita so pili. Dengar suda pa Dia!”

³⁶Bagitu suara itu so tara dapa dengar lagi, dong Petrus lia cuma tinggal Yesus sandiri saja. Kong mulai waktu itu, murit tiga orang itu tara carita pa sapa-sapa apa yang dorang lia tadi.

³⁷Dia pe beso, waktu Yesus deng Dia pe murit tiga itu so turung dari gunung, orang banya datang pa Yesus.

³⁸Kage ada satu orang di situ yang bicara kuat-kuat bagini, “Guru, tolong lia kita pe ana ka! Kasiang, kita pe ana cuma satu ini.

³⁹Dia kemasukan setang. Tiap kali dia kemasukan, dia bataria kuat-kuat deng setang biking sampe dia tatakancing kong gabu-gabu me kaluar dari dia pe mulu. Setang itu biking siksa pa dia turus deng amper-amper tara mau kase tinggal pa dia.

⁴⁰Kita so minta tolong pa Bapa Guru pe murit-murit supaya dorang user setang itu dari kita pe ana, tapi dorang tara mampo.”

⁴¹Kong Yesus bilang, “Bukang maeng ngoni orang-orang skarang ini yang tara percaya deng yang sesat! Barapa lama lagi Kita musti tinggal sama-sama deng ngoni? Deng sampe barapa lama lagi Kita musti basabar deng ngoni? Bawa suda ana itu kamari!”

⁴²Waktu ana itu bajalang ka sana pa Yesus, setang banting pa dia di tana kong biking dia takancing. Tapi Yesus parenta deng karas pa setang itu la kaluar dari ana itu, kong ana itu sembu. Abis itu, Yesus kase ana itu pa dia pe papa.

⁴³Samua orang yang ada di situ jadi herang lia Tuhan Allah pe kuasa yang basar itu. Waktu orang-orang masi herang-herang karna lia samua mujizat yang Yesus biking itu, Yesus bilang pa Dia pe murit-murit,

⁴⁴“Dengar deng perhatikan bae-bae yang Kita bilang ini. Nanti Anak Manusia yang dari sorga mo dapa serakan pa orang-orang.”

⁴⁵Tapi Yesus pe murit-murit tara mangarti apa yang Dia bilang. Tuhan Allah bolong biking dorang mangarti itu, supaya dorang bolong tau dia pe arti. Dorang me tako batanya pa Yesus, apa yang Dia bilang itu pe arti.

⁴⁶ Satu kali, Yesus pe murit-murit baku malawang tentang sapa yang jadi orang yang paling hebat dari dorang samua.

⁴⁷Tapi Yesus tau dong pe hati, jadi Dia ambe ana kacil satu kong taru pa Dia pe sabla.

⁴⁸ Turus, Dia bilang pa dorang, “Sapa yang tarima pa orang biasa-biasa saja sama deng ana kacil ini karna orang itu percaya pa Kita, itu sama deng dia so tarima pa Kita. Deng sapa yang tarima pa Kita, dia me tarima pa Tuhan Allah yang utus pa Kita. Karna sapa yang anggap dia pe diri biasa-biasa saja dari antara ngoni, dia itu suda yang Tuhan Allah anggap paling hebat.”

⁴⁹Abis itu, Yohanes bilang pa Yesus, “Guru, torang lia ada satu orang user setang pake Guru pe nama. Turus torang larang pa dia, barang dia itu bukang torang pe tamang.”

⁵⁰Tapi Yesus bilang pa dorang, “Jang larang pa dia! Karna orang yang tara malawang pa torang, dia itu torang pe tamang.”

⁵¹Yesus pe waktu untuk taangka di sorga so dekat, jadi Dia ambe keputusan, musti pigi di kota Yerusalem.

⁵²Dia suru babarapa orang pigi kamuka. Dorang kamuka pigi di kampong satu di daera Samaria, mo kase siap samua untuk Yesus.

⁵³Tapi orang-orang di kampong itu tara mau tarima pa Yesus karna dong tau Dia mo pigi di Yerusalem.

⁵⁴ Waktu Yesus pe murit Yakobus deng Yohanes dapa dengar hal itu, dong bilang pa Yesus, “Tuhan[24], lebe bae tong minta api dari sorga la bakar abis pa dorang suda!”

⁵⁵Tapi Yesus babale haga pa dorang dua kong togor pa dorang karna dong bicara bagitu.

⁵⁶Abis itu dorang pigi di kampong laeng.

⁵⁷Waktu Yesus deng Dia pe murit-murit sementara bajalang, ada satu orang yang bilang pa Yesus bagini, “Guru, kita mo iko sama-sama deng Guru ka mana saja Guru mo pigi.”

⁵⁸Yesus bilang pa dia pake umpama bagini, “Anjing utang ada dia pe tampa batidor. Bagitu lagi deng burung, ada dia pe sarang. Tapi Anak Manusia yang dari sorga, tara ada tampa untuk baistrahat.”

⁵⁹Abis itu Yesus bilang pa orang yang laeng lagi, “Mari iko pa Kita.” Tapi orang itu jawab pa Dia, “Bapa, kase ijin kita kubur dulu pa kita pe papa. Abis itu, baru kita datang iko pa Bapa.”[25]

⁶⁰Tapi Yesus bilang pa dia, “Orang yang tara percaya pa Kita, sama deng orang yang so mati. Kase biar suda orang yang tara percaya itu urus dorang pe penguburan sandiri. Tapi ngana, ngana pigi kong kase tau kabar tentang Tuhan Allah Berkuasa sebagai Raja pa orang-orang yang percaya pe hidup.”

⁶¹ Ada satu orang lagi yang bilang, “Bapa, kita mo iko pa Bapa, tapi kase ijin kita pulang babilang dulu pa kita pe keluarga. Abis itu baru kita datang iko pa Bapa.”

⁶²Yesus bilang pa dia, “Orang yang sementara bapacol tapi salalu balia ka balakang, dia pe karja jadi tara butul. Bagitu lagi deng orang yang mau jadi Tuhan Allah pe umat yang Dia Berkuasa sebagai Raja, orang itu so tara bole inga hal-hal laeng lagi.”