Read Malay, North Moluccan Yohanes 15 Bible Online

Yohanes 15 - Malay, North Moluccan bible

Yohanes 15

¹Yesus bilang pa Dia pe murit-murit umpama satu bagini, “Kita ini bole kase sama deng pohong anggur yang butul, kong Kita pe Bapa sama deng orang yang punya kobong anggur itu.

²Kong Kita pe umat sama deng anggur pe cabang-cabang. Cabang-cabang yang babua, Dia potong sadiki supaya bersi kong lebe banya babua lagi, baru cabang-cabang yang tara babua, Dia potong kong buang.

³Ngoni yang percaya pa Kita ini memang so bersi karna ngoni so percaya Kita pe kata-kata.

⁴Jadi Kita minta pa ngoni ini, ngoni hidup satu hati deng Kita turus, deng Kita lagi akan hidup satu hati turus deng ngoni. Barang, ngoni tara dapa biking yang bae kalu ngoni tara satu hati deng Kita. Itu sama deng anggur pe cabang yang tara akan babua kalu dia tapisa dari anggur pe pohong.

⁵Kita ini sama deng pohong anggur kong ngoni ini sama deng pohong anggur pe cabang-cabang. Jadi, sama deng pohong deng cabang yang jadi satu, bagitu lagi deng ngoni, kalu ngoni hidup satu hati deng Kita, Kita lagi hidup satu hati deng ngoni, turus ngoni bole biking yang bae yang kase sanang Tuhan Allah pe hati. Karna kalu ngoni tara satu hati deng Kita, ngoni ini tara mampo biking yang bae untuk kase sanang pa Tuhan Allah.

⁶Sapa saja yang hidup tara satu hati deng Kita, Tuhan Allah mo buang pa dia sama deng cabang yang tara babua yang so kiring, kong dong kumpul cabang itu, turus dong bakar.

⁷Kalu ngoni hidup satu hati deng Kita turus, deng Kita pe kata-kata ada di ngoni pe hati, apa saja yang ngoni minta, ngoni akan dapa.

⁸Kalu ngoni jaga biking yang bae sama deng cabang yang babua banya, itu kase tunju ngoni ini butul-butul Kita pe murit-murit, turus deng orang-orang lia ngoni pe cara hidup yang bae itu, dorang mo puji deng hormat pa Kita pe Bapa.”

⁹Yesus bilang lagi, “Kita sayang pa ngoni, sama deng Kita pe Bapa sayang pa Kita. Jadi, ngoni hidup satu hati turus suda deng Kita, supaya ngoni bole rasa Kita pe sayang itu.

¹⁰Kalu ngoni biking Kita pe parenta, ngoni mo rasa turus Kita pe sayang, sama deng Kita biking Kita pe Bapa pe parenta, kong Kita bole rasa turus Dia pe sayang.

¹¹Kita bilang samua itu pa ngoni, supaya sanang yang ada pa Kita, ngoni lagi bole rasa, deng bagitu ngoni pe hati mo sanang luar biasa.

¹² Ini Kita pe parenta: ngoni musti baku-baku sayang sama deng Kita so sayang pa ngoni.

¹³Sayang yang paling basar itu, kalu orang siap mati untuk dia pe tamang-tamang supaya dia pe tamang-tamang bole hidup.

¹⁴Ngoni itu memang Kita pe tamang bae, kalu ngoni jaga biking Kita pe parenta.

¹⁵Kita tara sebut ngoni ini orang karja lagi, karna orang karja itu tara tau apa yang dia pe tuang biking. Tapi Kita bilang ngoni ini Kita pe tamang, karna samua yang Kita so dengar dari Kita pe Bapa, Kita so kase tau pa ngoni.

¹⁶Bukang ngoni yang pili pa Kita, tapi Kita yang pili pa ngoni jadi Kita pe murit. Kita so kase tugas pa ngoni, supaya ngoni pigi untuk biking hal-hal bae yang dia pe hasil mo ada turus. Deng bagitu, apa saja yang ngoni minta pa Kita pe Bapa pake Kita pe nama, Dia mo kase itu pa ngoni.

¹⁷Jadi, Kita bilang ulang Kita pe parenta pa ngoni: ngoni ini musti baku-baku sayang.”

¹⁸Yesus bilang lagi, “Kalu orang-orang di dunia ini yang tara percaya pa Kita binci pa ngoni, ngoni musti inga e, dorang so kamuka binci pa Kita.

¹⁹Kalu misalnya ngoni ini sama deng dorang, pasti dorang sayang pa ngoni sama deng ngoni jadi dorang pe ana-ana. Tapi ngoni ini beda deng dorang. Kita pili pa ngoni supaya ngoni beda deng dorang, jadi dorang binci pa ngoni.

²⁰ Ngoni musti inga apa yang Kita so bilang pa ngoni, ‘orang karja tara lebe penting dari dia pe tuang’. Kalu orang-orang so siksa pa Kita di dunia ini, dorang lagi pasti akan siksa pa ngoni. Tapi kalu orang-orang biking Kita pe ajaran, dorang lagi mo biking ajaran yang ngoni ada kase ajar.

²¹Dorang mo siksa pa ngoni karna ngoni ada iko pa Kita, deng karna dorang tara kanal butul pa Tuhan Allah yang so utus pa Kita.

²²Kalu Kita tara datang di dunia ini untuk kase tau Tuhan Allah pe ajaran pa dorang, pasti Tuhan Allah tara bilang dorang itu berdosa, barang dorang tara tau dorang pe sala. Tapi skarang Kita so datang di dunia ini kong so kase tau ajaran itu, jadi dorang so tarada alasan mo bilang dorang itu tara berdosa, barang dorang so tau.

²³Sapa saja yang binci pa Kita, dia binci lagi pa Kita pe Bapa.

²⁴Kalu misalnya Kita tara biking mujizat-mujizat sama deng yang orang laeng tara perna biking, pasti Tuhan Allah tara bilang dorang itu berdosa kalu dorang binci pa Kita. Tapi ini, dorang so lia mujizat-mujizat yang Kita biking, tapi dorang tetap binci pa Kita deng pa Kita pe Bapa lagi.

²⁵ Tapi biar suda dorang binci pa Kita, supaya apa yang so tatulis di Kitab Suci, memang mo jadi. Bagini yang tatulis, ‘Dorang binci pa Kita tapi tara ada dia pe alasan.’

²⁶Nanti Kita mo utus Roh Kudus untuk tolong pa ngoni, Roh Kudus itu dari Tuhan Allah. Roh Kudus itu yang mo kase tau yang butul tentang Tuhan Allah deng mo kase tau pa orang-orang tentang Kita.

²⁷Kong ngoni ini lagi musti kase tau tentang Kita pa orang-orang, karna so dari dulu ngoni so sama-sama deng Kita.”