Read Malay, North Moluccan Yohanes 18 Bible Online

Yohanes 18 - Malay, North Moluccan bible

Yohanes 18

¹Pe abis berdoa, Yesus deng Dia pe murit-murit pigi ka sana di kali Kidron pe sabla. Di situ ada kobong satu, kong Yesus deng Dia pe murit-murit pigi di kobong itu.

²Yudas yang mo bahianat pa Yesus, dia lagi tau tampa itu, barang Yesus deng Dia pe murit-murit biasa bakumpul di situ.

³Jadi Yudas datang ka sana lagi di tampa itu. Dia bawa tentara Roma satu kompi deng babarapa orang yang bajaga Ruma Ibada Pusat. Dorang datang karna dapa suru dari orang Yahudi pe imam-imam kapala deng orang-orang dari aliran Farisi. Dorang datang bawa lentera, obor deng senjata.

⁴Tapi, Yesus so tau samua yang mo jadi pa Dia nanti. Jadi, Dia maju di muka kong bilang pa dorang, “Ngoni cari pa sapa?”

⁵Kong dorang jawab pa Dia, “Torang cari pa Yesus yang dari Nazaret.” Kong Dia bilang lagi pa dorang, “Kita ini Dia suda.” Di situ lagi ada Yudas yang mo bahianat pa Yesus, dia badiri di situ sama-sama deng rombongan itu.

⁶Waktu Yesus bilang pa dorang, “Kita ini Dia suda,” dorang baundur ka balakang kong jatu ka bawa di tana.

⁷Turus Dia tanya lagi pa dorang, “Ngoni cari pa sapa?” Kong dorang jawab, “Yesus orang Nazaret.”

⁸Turus Yesus bilang lagi pa dorang, “Kita so bilang pa ngoni, Kita ini Dia suda. Jadi kalu ngoni cari pa Kita, kase biar suda Kita pe murit-murit ini pigi dari sini.”

⁹Yesus bilang bagitu, supaya apa yang Dia perna minta pa Tuhan Allah itu bole mo jadi. Bagini yang Dia perna minta, “Samua orang yang Bapa so kase pa Kita, tara ada yang mo mati biar cuma satu orang lagi.”

¹⁰Kong Simon Petrus yang ada bawa parang kacil, dia cabu dari sarong kong potong imam basar pe orang karja pe talinga kanan sampe putus. Imam basar pe orang karja itu pe nama Malkus.

¹¹Turus Yesus bilang pa Petrus, “Kase maso suda ngana pe parang itu. Kita pe Bapa so kase tau, Kita memang musti menderita, itu sama deng Kita musti minum dari cawan yang Kita pe Bapa kase untuk Kita minum.”

¹²Jadi, tentara-tentara Roma deng dong pe komandan, deng penjaga-penjaga Ruma Ibada Pusat, dorang samua itu tangka pa Yesus kong ika pa Dia.

¹³Turus, dorang bawa Yesus pa Hanas dulu, barang Hanas itu Kayafas pe papa mantu. Kayafas itu yang jadi imam basar waktu itu.

¹⁴ Kayafas ini yang so perna kase nasehat pa pemimpin-pemimpin agama Yahudi bagini, “Lebe bae cuma satu orang yang mati untuk samua orang pe bae.”

¹⁵Simon Petrus deng Yesus pe murit satu iko-iko pa Yesus dari balakang. Murit yang satu itu baku kanal deng imam basar, jadi dia bole maso sama-sama deng Yesus di imam basar pe kintal ruma.

¹⁶Tapi Petrus cuma batunggu di luar dekat pintu pagar. Kong murit yang satu yang baku kanal deng imam basar itu, dia kaluar ulang, turus bacarita deng pembantu parampuang satu yang ada jaga pintu pagar supaya Petrus bole maso di kintal ruma. Turus murit itu bawa maso pa Petrus ka dalam sama-sama deng dia.

¹⁷Pembantu parampuang yang bajaga pintu pagar itu bilang pa Petrus, “Ee, ngana ini lagi Yesus pe murit to?” Kong Petrus jawab, “Bukang! Bukang kita.”

¹⁸Malam itu dingin, jadi imam basar pe orang-orang karja deng orang-orang yang bajaga Ruma Ibada Pusat, dorang biking api dari arang supaya bole mo badiri dekat api kong barahu di situ. Petrus lagi pigi badiri di situ sama-sama deng dorang untuk barahu.

¹⁹Waktu itu lagi di dalam, imam basar Hanas[40] mulai babatanya pa Yesus tentang Dia pe murit-murit deng tentang Dia pe ajaran lagi.

²⁰Turus Yesus jawab pa dia, “Kita salalu bicara turus tarang di orang banya pe muka. Kita kase ajar pa orang-orang di ruma-ruma ibada agama Yahudi deng di Ruma Ibada Pusat, tampa yang orang-orang agama Yahudi jaga bakumpul. Kita kase ajar pa orang-orang di tampa-tampa umum, bukang di tampa-tampa yang tasambunyi.

²¹Jadi bikiapa kong skarang bapa tanya pa Kita? Tanya suda pa orang-orang yang so dengar Kita pe ajaran. Dorang tau apa yang Kita so kase ajar itu.”

²²Waktu Yesus bilang bagitu, ada satu orang yang bajaga Ruma Ibada Pusat badiri di situ, kong dia tampeleng pa Yesus, turus dia bilang, “Pe barani skali Ngana jawab macam bagitu pa imam basar!”

²³Kong Yesus bilang pa dia, “Kalu yang Kita bilang itu sala, coba kase tunju dia pe sala di mana, tapi kalu yang Kita bilang itu butul, bikiapa kong bapa tampeleng pa Kita?”

²⁴Abis itu, Hanas suru antar pa Yesus deng Dia pe tangan yang masi taika, pigi pa imam basar Kayafas.

²⁵Waktu Yesus mangada pa imam basar Kayafas itu, Simon Petrus masi badiri di pinggir api untuk barahu. Kong orang-orang di situ bilang pa dia, “Bapa lagi Yesus pe murit to?”

²⁶Petrus manyangkal, dia bilang, “Ce, bukang kita.” Di situ, ada lagi imam basar pe orang karja satu, dia itu basudara deng orang yang Petrus potong dia pe talinga. Dia tanya pa Petrus, “Bapa lagi to, yang tadi kita lia bapa deng Dia ada sama-sama di kobong?”

²⁷Tapi Petrus manyangkal ulang, dia tara kanal pa Yesus. Kong pas waktu dia manyangkal, ayam langsung bakuku.

²⁸Waktu masi pagi-pagi skali, dorang bawa pa Yesus dari imam basar Kayafas pe kintal ruma antar di gubernur Roma pe istana. Tapi orang-orang agama Yahudi sandiri tara maso di situ karna gubernur itu bukang orang Yahudi. Barang, kalu iko agama Yahudi pe aturan, dorang mo jadi berdosa kalu ada sama-sama deng orang yang bukang agama Yahudi, kong orang agama Yahudi yang jadi najis itu sabantar so tara bole makang pa dong pe hari raya Paska.

²⁹Jadi, gubernur Pilatus kaluar dari dia pe istana supaya bole baku dapa deng dorang orang agama Yahudi, kong dia batanya, “Orang ini pe sala apa kong sampe ngoni bawa pa Dia kamari?”

³⁰Kong dorang jawab pa dia, “Kalu Orang ini tara biking yang jahat, torang tara perlu mo bawa Dia pa bapa.”

³¹Turus gubernur Pilatus bilang pa dorang, “Ngoni bawa kong urus suda pa Dia iko ngoni pe aturan agama sandiri.” Tapi orang-orang agama Yahudi itu bilang pa Pilatus, “Torang orang agama Yahudi tara ada hak mo kase hukuman mati.”

³² Deng dorang bilang bagitu, apa yang Yesus perna bilang tentang bagimana cara Dia mo mati nanti, itu mo jadi.

³³Abis itu, gubernur Pilatus maso ulang di istana kong pangge pa Yesus, turus batanya pa Dia, “Butul Bapa ini orang Yahudi pe Raja?”

³⁴Kong Yesus bilang, “Yang bapa tanya itu, bapa sandiri yang mau tau, atau ada orang laeng yang bilang pa bapa tentang Kita?”

³⁵Gubernur Pilatus jawab pa Dia, “Ii! Bapa so tau kita bukang orang Yahudi, kong Bapa tanya itu? Bapa pe orang-orang satu bangsa sandiri deng imam-imam kapala yang bawa pa Bapa kamari. Jadi coba bilang suda, Bapa so biking sala apa?”

³⁶Kong Yesus bilang pa dia, “Kita pe kerajaan bukang dari dunia ini. Barang, kalu Kita jadi Raja di dunia ini, pasti orang-orang yang jaga biking apa yang Kita suru so datang baku prang untuk bela pa Kita, supaya Kita tara dapa serakan pa pemimpin-pemimpin agama Yahudi. Tapi Kita pe kerajaan memang bukang di dunia ini.”

³⁷Turus gubernur Pilatus batanya lagi pa Yesus, “Jadi Bapa ini Raja?” Yesus jawab pa dia, “Bapa yang bilang Kita ini Raja, deng memang itu butul suda dia pe tujuan Kita lahir deng Kita datang di dunia ini, supaya Kita bole kase tau yang butul. Kong sapa yang suka yang butul, dia pasti dengar pa Kita.”

³⁸Kong gubernur Pilatus itu batanya lagi pa Yesus, “Bagimana torang bole tau yang butul itu?” Abis gubernur Pilatus batanya bagitu, dia kaluar ulang dari dia pe istana kong bilang pa orang-orang agama Yahudi di situ, “Kita so priksa Orang itu, tapi kita tara dapa Dia pe sala apa-apa, biar cuma satu lagi.

³⁹Tapi, biasa pa ngoni pe hari raya Paska, gubernur kase bebas satu orang dari penjara untuk ngoni. Jadi skarang, apa ngoni mau kita mo kase bebas ngoni orang Yahudi pe Raja Yesus ini?”

⁴⁰ Kong dorang samua bataria, “Bukang Dia! Tapi kase bebas pa Barabas suda!” Barabas itu orang jahat yang marontak pa pemerinta Roma.