Read Malay, North Moluccan Yohanes 3 Bible Online

Yohanes 3 - Malay, North Moluccan bible

Yohanes 3

¹Ada satu orang, dia pe nama Nikodemus. Dia itu satu pemimpin agama Yahudi dari aliran Farisi.

²Satu kali bagini, dia datang pa Yesus malam-malam, kong bilang bagini, “Guru, torang tau, Guru ini yang Tuhan Allah utus untuk kase ajar pa torang. Barang, tara ada satu orang yang bisa biking mujizat-mujizat macam deng yang Guru biking, kalu Tuhan Allah tara sama-sama deng dia.”

³Yesus bilang pa dia, “Inga bae-bae yang Kita mo bilang ini. Cuma orang yang lahir ulang, yang bisa jadi Tuhan Allah pe umat yang Dia Berkuasa sebagai Raja pa orang itu pe hidup.”

⁴Turus Nikodemus bilang pa Dia, “Masa orang tua mo bale lahir ulang? Tara mungkin dia bole mo maso ulang pa dia pe mama pe dalam puru kong lahir ulang.”

⁵Yesus bilang, “Inga bae-bae yang Kita mo bilang ini: tiap orang yang ingin jadi Tuhan Allah pe umat, dia musti lahir dari aer, deng lahir lagi dari Roh Kudus. Kalu tara bagitu, Tuhan Allah tara Berkuasa sebagai Raja pa dia pe hidup.

⁶Barang, torang manusia lahir dari torang pe orang tua, tapi cuma Roh Kudus saja yang bisa ruba pa torang jadi Tuhan Allah pe ana.

⁷Jadi, jang herang deng yang Kita ada bilang, ‘Ngoni musti lahir ulang’.

⁸Barang, lahir ulang itu bole kase sama deng angin batiop. Angin batiop ka mana saja dia suka, kong torang dapa dengar dia pe babunyi, cuma torang tara tau angin itu dari mana dia datang deng ka mana dia pigi. Bagitu lagi deng orang yang lahir dari Roh Kudus. Torang tara tau bagimana Roh Kudus bakarja di orang itu pe hati.”

⁹Kong Nikodemus tanya pa Yesus, “Bagimana kong bisa bagitu?”

¹⁰Yesus jawab, “Ee, bapa ini torang orang Israel pe guru agama to? Masa bapa tara mangarti yang Kita baru bilang tadi?

¹¹Inga bae-bae yang Kita mo bilang ini, Kita deng orang yang iko pa Kita, kase tau tentang apa yang torang so lia deng yang torang tau butul, tapi ngoni tara mo percaya.

¹²Kalu yang Kita so bilang tadi itu saja ngoni tara mau percaya, kong apalagi kalu Kita mo kase tau tentang samua yang jadi di sorga? Pasti ngoni lebe tara percaya lagi!

¹³Tara ada satu orang yang so perna nae di sorga, kacuali Anak Manusia yang turung dari sorga kong kase tau pa ngoni tentang apa yang jadi di sorga.

¹⁴ Dulu, waktu torang orang Israel pe orang tua-tua dapa gigi dari ular di padang gurun, nabi Musa biking ular satu dari tembaga kong kase nae di kayu, supaya sapa yang dapa gigi dari ular, kong balia di ular tembaga itu, dia bole tetap hidup. Jadi bagitu lagi deng Anak Manusia yang dari sorga mo dapa angka di kayu salib,

¹⁵supaya sapa saja yang percaya pa Anak Manusia bole mo dapa hidup deng Tuhan Allah slama-lamanya.

¹⁶Memang Tuhan Allah paling sayang skali pa samua orang di dunia ini, sampe Dia kase Dia pe Anak yang cuma satu untuk tebus manusia pe dosa-dosa, supaya sapa saja yang percaya pa Dia pe Anak tara mo dapa hukuman tapisa deng Tuhan Allah, tapi mo dapa hidup deng Dia slama-lamanya.

¹⁷Barang, Tuhan Allah utus pa Dia pe Anak datang di dunia ini bukang untuk hukum pa orang karna dorang pe dosa, tapi supaya kase slamat pa orang-orang di dunia ini.

¹⁸Sapa saja yang percaya pa Anak Allah, orang itu tara mo dapa hukum. Tapi sapa saja yang tara percaya pa Anak Allah, Tuhan Allah so kase sadia dia pe hukuman, karna dia tara percaya pa Anak Allah yang cuma satu ini.

¹⁹Tuhan Allah so sadia hukuman itu karna bagini: Anak Allah datang di dunia ini untuk kase tarang manusia pe hati, tapi manusia lebe suka galap daripada tarang, karna manusia pe kalakuang jahat.

²⁰Barang, sapa saja yang suka biking barang yang jahat, dia binci tarang kong tara mau datang di tarang itu, supaya dia pe kalakuang-kalakuang yang jahat itu tara dapa lia.

²¹Tapi sapa saja yang biking barang yang butul, dia akan datang pa tarang itu, supaya orang bisa lia deng jelas Tuhan Allah yang bantu pa dia sampe dia pe kalakuang iko Tuhan Allah pe mau.”

²²Abis itu, Yesus deng Dia pe murit-murit pigi di daera Yudea. Dia tinggal sama-sama deng dorang di sana kong baptis orang di situ.

²³Waktu Yesus masi di daera Yudea itu, Yohanes me ada baptis orang tapi di kampong Ainon, dekat Salim, barang banya aer di situ. Banya orang datang di situ untuk dapa baptis.

²⁴ Waktu itu Yohanes bolong dapa kase maso di dalam penjara.

²⁵Satu kali bagini, Yohanes pe murit babarapa orang baku malawang deng orang Yahudi yang laeng tentang cara agama Yahudi kase bersi dorang pe diri dari dosa.

²⁶Turus Yohanes pe murit-murit itu datang pa Yohanes kong balapor tentang Yesus, “Guru, guru masi inga to, pa Orang yang sama-sama deng guru di kali Yordan pe sabla? Guru perna kase tau tentang Dia. Coba lia pa Dia, Dia me ada baptis orang kong pe banya skali orang yang so datang pa Dia.”

²⁷Yohanes jawab pa dorang, “Biar suda, tara apa-apa. Manusia cuma mampo biking apa yang Tuhan Allah kase pa dorang.

²⁸ Ngoni sandiri so dengar apa yang kita bilang tuhari. Kita kase tau, kita ini bukang Mesias, Raja yang Tuhan Allah janji mo kase slamat pa manusia, tapi kita datang kamuka dari Dia untuk buka jalang supaya orang tarima pa Dia.

²⁹Skarang Dia so ada, jadi kita sanang skali. Dia itu sama deng pengantin laki-laki, kong kita ini sama deng Dia pe tamang. Pengantin laki-laki itu yang penting, karna pengantin parampuang itu dia punya. Tapi pengantin laki-laki pe tamang tara penting, dia cuma badiri dekat pa dia kong badengar pa dia. Dia sanang skali dengar pengantin laki-laki pe suara. Bagitu lagi deng kita, kita sanang skali dengar lebe banya orang ada iko pa Dia.

³⁰Dia musti jadi lebe tamba penting dari kita, kong kita musti lebe hari lebe tamba tara penting.”

³¹Yesus pe asal dari sorga, jadi Dia lebe hebat dari samua yang ada di dunia ini. Tapi manusia pe asal dari dunia, jadi dia cuma tau mo babicara tentang apa yang jadi di dunia ini. Yesus tara bagitu, karna Dia datang dari sorga, jadi Dia lebe dari samua.

³²Dia kase tau tentang apa yang Dia ada lia deng yang Dia ada dengar, tapi tara ada orang yang percaya deng apa yang Dia kase tau itu.

³³Tapi sapa yang percaya deng apa yang Dia kase tau itu, orang itu setuju, samua yang Tuhan Allah bilang itu butul.

³⁴Barang, Dia yang Tuhan Allah utus, Dia itu yang kase tau Tuhan Allah pe kata-kata, karna Tuhan Allah kase Dia pe Roh pa Dia tara abis-abis.

³⁵ Bapa sayang pa Dia pe Anak, kong so kase samua-samua yang ada untuk Dia pe Anak kuasai.

³⁶Jadi, sapa yang percaya pa Dia pe Anak itu, dia mo dapa hidup deng Tuhan Allah slama-lamanya, kong sapa yang tara iko Anak itu pe mau, dia tara mo dapa hidup deng Tuhan Allah slama-lamanya, tapi Tuhan Allah pe hukuman ada pa dia slama-lamanya.