Read Malay, North Moluccan Yohanes 9 Bible Online

Yohanes 9 - Malay, North Moluccan bible

Yohanes 9

¹Waktu Yesus sementara bajalang, Dia lia satu orang yang so buta dari lahir.

²Turus, Yesus pe murit-murit batanya pa Yesus, “Guru, bikiapa kong orang ini lahir buta? Dia buta karna dia pe dosa sandiri atau gara-gara dia pe orang tua pe dosa?”

³Yesus jawab, “Dia buta, bukang karna dia pe dosa deng bukang lagi gara-gara dia pe orang tua pe dosa, tapi supaya orang-orang dapa lia Tuhan Allah pe kuasa yang bakarja pa dia pe hidup.

⁴Tuhan Allah yang utus pa Kita ada kase tugas yang torang musti biking. Torang musti biking tugas itu skarang, karna ada dia pe waktu nanti torang tara bisa biking tugas lagi. Itu bole kase sama deng kalu masi siang, orang masi bole bakarja, tapi kalu so malam, so tarada orang yang bisa bakarja lagi.

⁵ Jadi selama Kita masi ada di dalam dunia, Kita ini tarang dunia yang kase tarang manusia pe hati.”

⁶Abis Yesus bilang bagitu, Dia buang luda di tana, kong kase campur Dia pe luda itu deng tana sadiki sampe tana itu jadi pece. Abis itu, Dia kase goso pece itu pa orang buta itu pe mata.

⁷Kong Dia bilang pa orang buta itu, “Pigi suda, kong cuci ngana pe muka di kolam Siloam.” (Siloam itu pe arti, ‘Yang dapa utus’.) Pe dengar itu, orang itu pigi cuci dia pe muka di situ. Kong waktu dia mo bale pa dia pe ruma, dia so bisa dapa lia.

⁸Turus dia pe birman-birman deng orang-orang yang tau dulu dia itu tukang minta-minta, dorang baku bilang, “Dia itu ka, yang tuhari jaga dudu minta-minta?”

⁹Ada yang laeng bilang, “Butul! Dia itu suda!” Kong ada lagi yang bilang, “Bukang dia. Itu orang laeng yang pe muka persis sama deng dia.” Tapi orang yang tuhari buta itu bilang, “Ini kita suda.”

¹⁰Kong dorang tanya pa dia, “Bagimana sampe ngana pe mata skarang so bole dapa lia?”

¹¹Dia jawab, “Orang yang pe nama Yesus itu, Dia baluda di tana kong biking pece, abis itu Dia kase goso pece itu pa Kita pe mata. Turus, Dia suru kita pigi di kolam Siloam la kita cuci muka di situ. Kong kita pigi. Pe abis cuci muka, kita so bole dapa lia.”

¹²Kong dorang bilang pa dia, “Kong di mana Dia skarang?” Orang itu jawab, “Kita tara tau.”

¹³Kong dorang bawa orang yang tuhari buta itu pa orang-orang Yahudi dari aliran fanatik yang pe nama Farisi.

¹⁴Waktu Yesus kase sembu pa orang buta itu, itu pas di hari Sabat, hari yang orang agama Yahudi tara bole bakarja.

¹⁵Jadi, orang-orang dari aliran Farisi itu batanya ulang pa orang yang so sembu itu, bagimana sampe dia pe mata bole dapa lia. Turus dia jawab, “Ada Orang yang goso pece pa kita pe mata. Abis itu, kita cuci kita pe muka, kong kita so bole dapa lia.”

¹⁶Kong ada dari dorang yang aliran Farisi itu bilang, “Orang yang kase sembu pa orang ini, tara mungkin Tuhan Allah yang utus, barang Dia tara iko aturan agama tentang hari Sabat.” Tapi yang laeng bilang, “Kalu Dia orang berdosa, tara mungkin dia bisa biking mujizat macam bagitu.” Kong dorang deng dorang baku malawang tara abis-abis.

¹⁷Jadi dorang batanya ulang pa orang yang dulu buta itu, “Ngana ini yang Dia so kase sembu ngana pe mata to? Jadi menurut ngana, Dia itu sapa?” Dia jawab pa dorang, “Dia itu Nabi yang jaga kase turus Tuhan Allah pe pasáng pa orang-orang.”

¹⁸Tapi dorang itu tetap tara percaya orang itu perna buta kong skarang so dapa lia. Jadi dorang pangge dia pe papa deng mama,

¹⁹kong dong tanya, “Dia ini ngoni pe ana to? Ngoni bilang kata, dia lahir buta, tapi bagimana kong skarang dia so bisa dapa lia?”

²⁰Kong dia pe papa deng mama jawab, “Memang butul, dia ini torang pe ana. Dia so buta dari lahir.

²¹Tapi bagimana sampe dia so dapa lia skarang, itu torang tara tau, deng sapa yang biking sampe dia bisa dapa lia, itu me torang tara tau. Coba bapa-bapa tanya sandiri suda pa dia. Dia itu so basar, jadi dia bisa jawab sandiri.”

²²Dia pe orang tua bilang bagitu, karna dorang tako pa pemimpin-pemimpin agama Yahudi. Barang, pemimpin-pemimpin agama Yahudi itu so baku ator, kalu ada orang yang mangaku Yesus itu Mesias, Raja yang Tuhan Allah janji mo kase slamat pa manusia, orang itu dapa larang maso di ruma ibada agama Yahudi.

²³Itu yang biking sampe dia pe orang tua bilang, “Dia itu so basar, tanya sandiri suda pa dia.”

²⁴Jadi dorang pangge ulang pa orang yang perna buta itu kong bilang pa dia, “Ee! Ngana musti basumpa pa Tuhan Allah pe muka, yang ngana mo bilang ini butul. Barang, torang tau Yesus itu orang berdosa.”

²⁵Orang yang dulu buta itu jawab, “Orang itu berdosa ka tarada, kita tara tau. Tapi yang kita tau, tempo hari kita buta, tapi skarang kita so bisa dapa lia.”

²⁶Kong dorang batanya lagi pa dia, “Apa yang Dia biking pa ngana kong? Bagimana sampe ngana pe mata bisa dapa lia?”

²⁷Orang itu jawab pa dorang, “Tadi to, kita so bilang, tapi ngoni tara mau percaya. Bikiapa kong ngoni mo dengar ulang? Kaapa ngoni lagi mau jadi Dia pe murit?”

²⁸Kong dorang hina pa dia bagini, “Ee, ngana itu yang jadi Orang itu pe murit, tapi torang ini nabi Musa pe murit-murit.

²⁹Torang tau, Tuhan Allah so bicara pa nabi Musa, tapi tentang Orang itu, torang tara tau Dia itu datang dari mana.”

³⁰Kong orang itu kase jawab pa dorang, “Paling ane suda ngoni ini. Masa ngoni tara tau dari mana Dia datang, padahal Dia so kase sembu kita pe mata sampe kita so bisa dapa lia.

³¹Torang tau, Tuhan Allah tara dengar orang berdosa pe doa, tapi Dia cuma dengar pa sapa saja yang hormati pa Dia, deng yang hidup biking apa yang Dia mau.

³²Dari pertama Tuhan Allah biking dunia sampe skarang ini, bolong perna torang dengar ada orang yang kase sembu pa orang yang buta dari lahir sama deng kita ini.

³³Jadi kalu Orang yang kase sembu pa kita itu tara datang dari Tuhan Allah, Dia pasti tara bisa biking apa-apa!”

³⁴Kong dorang bilang pa dia, “Ee, ngana ini so berdosa memang dari ngana lahir, kong masa ngana mo ajar pa torang lagi?” Kong mulai waktu itu suda, dorang larang pa dia maso di ruma ibada agama Yahudi.

³⁵Yesus dapa dengar, orang yang dulu buta itu so dapa larang maso lagi di ruma ibada agama Yahudi. Kong Yesus pigi baku dapa deng orang itu, turus bilang pa dia, “Ngana percaya pa Anak Manusia yang dari sorga?”

³⁶Dia bale batanya, “Bapa, Dia itu sapa? Tolong bilang pa kita supaya kita bole percaya pa Dia.”

³⁷Yesus bilang pa orang itu, “Ngana bukang cuma ada lia pa Dia, tapi ngana me so bicara deng Dia skarang. Anak Manusia itu, Kita suda.”

³⁸Orang itu bilang pa Yesus, “Tuhan, kita percaya.” Turus dia berlutut semba pa Yesus.

³⁹Kong Yesus bilang, “Kita datang di dunia ini supaya kase tunju sapa yang butul deng sapa yang sala. Orang yang bolong kanal pa Tuhan Allah, Kita kase kanal Tuhan Allah pa dorang supaya dorang jadi sama deng orang buta yang bole dapa lia. Kong orang yang bilang kata, dong sandiri so kanal Tuhan Allah, dorang akan jadi sama deng orang buta.”

⁴⁰Pe dengar Yesus bilang bagitu, babarapa orang Yahudi dari aliran Farisi bilang pa Dia, “Jadi menurut Bapa, torang ini me buta lagi?”

⁴¹Yesus jawab pa dorang, “Kalu ngoni buta, itu berarti ngoni tara tau apa yang butul, jadi waktu ngoni biking dosa, ngoni tara tau ngoni ada biking dosa. Tapi ngoni bilang kata, ngoni mangarti yang butul, kong ngoni tetap biking dosa, jadi Tuhan Allah bilang ngoni masi tetap ada dosa.”