Read Malay, North Moluccan Kisah Para Rasul 13 Bible Online

Kisah Para Rasul 13 - Malay, North Moluccan bible

Kisah Para Rasul 13

¹Di jemaat yang ada di kota Antiokhia itu, ada babarapa orang yang Tuhan Allah pake untuk jaga kase turus Dia pe pasáng deng untuk jaga mangajar tentang Yesus pa orang-orang. Dorang itu: Barnabas, Simeon (yang orang jaga pangge Niger),[23] Lukius (orang Kirene), Menahem (yang dapa piara dari kacil sama-sama deng raja Herodes), deng Saulus.

²Satu kali, waktu dorang berdoa pa Tuhan Allah deng bapuasa, Roh Kudus bicara pa dorang, “Kita so pili pa Barnabas deng Saulus untuk biking tugas yang Kita mo kase pa dorang. Jadi, kase dorang kusus pa Kita.”

³Pe abis dong bapuasa deng berdoa, dorang taru dorang pe tangan pa Barnabas deng Saulus kong kase berdoa pa dong dua. Abis itu, dorang utus pa Barnabas deng Saulus untuk biking tugas yang Tuhan Allah suru.

⁴Abis itu, Barnabas deng Saulus biking dorang pe tugas yang Roh Kudus suru pa dorang dua. Dorang pigi di kota Seleukia, kong dari situ dorang balayar ka sana di pulo Siprus.

⁵Pe sampe di kota Salamis di pulo Siprus, dorang dua kase tau Tuhan Allah pe Kabar Bae tentang Yesus Kristus di ruma-ruma ibada agama Yahudi. Waktu itu, Yohanes yang orang jaga pangge Markus iko supaya bantu-bantu pa dorang.

⁶Abis itu, dorang bakuliling di samua tampa di pulo itu sampe di kota Pafos. Di situ, dorang baku dapa deng orang Yahudi satu, dia pe nama Baryesus. Dia itu tukang tiop-tiop. Orang bilang kata, dia itu yang jaga kase turus Tuhan Allah pe pasáng, padahal dia foya.

⁷Dia batamang deng gubernur di pulo itu, dia pe nama Sergius Paulus. Gubernur itu pande skali. Dia pangge pa Barnabas deng Saulus, barang dia suka mo dengar Tuhan Allah pe firman.

⁸Baryesus pe nama dalam bahasa Yunani, Elimas, yang pe arti tukang tiop-tiop. Baryesus malawang pa Barnabas deng Saulus, dia berusaha la gubernur itu tara percaya pa Yesus.

⁹Tapi Roh Kudus kuasai pa Saulus yang dorang jaga pangge Paulus. Turus Paulus haga pa dia

¹⁰kong bilang, “Woe Iblis pe ana! Ngana memang tukang foya deng jahat. Ngana tukang malawang samua yang butul. Tuhan Allah pe rencana mo kase slamat pa manusia, tapi ngana salalu berusaha kase putar rencana itu.

¹¹Skarang, Tuhan hukum pa ngana. Ngana jadi buta suda, kong sampe babarapa hari ngana tara mo dapa lia cahaya matahari.” Waktu itu suda, Baryesus langsung buta, sama deng awan tutu pa dia sampe dia lia cuma galap saja. Dia baraba-raba cari orang yang mo pegang dia pe tangan la tunda pa dia.

¹²Waktu gubernur dapa lia itu, dia jadi percaya pa Tuhan. Dia me taherang-herang deng ajaran tentang Tuhan itu.

¹³Paulus deng dia pe tamang-tamang balayar dari kota Pafos di pulo Siprus, pigi di kota Perga pe sabla di daera Pamfilia. Di situ, Yohanes kase tinggal pa dorang kong pulang di Yerusalem.

¹⁴Kong dari Perga, Paulus deng dia pe tamang-tamang bajalang turus sampe di kota Antiokhia di daera Pisidia. Waktu hari Sabat, dorang maso di ruma ibada agama Yahudi kong dorang dudu di situ.

¹⁵Di situ, ada orang yang baca lima kitab Musa deng kitab nabi-nabi. Pe abis babaca, pemimpin-pemimpin ruma ibada itu suru orang bilang pa Paulus deng pa Barnabas, “Bapa-bapa, kalu ada yang ngoni ingin bilang untuk kase kuat torang pe percaya, bicara suda skarang!”

¹⁶Pe dengar itu, Paulus badiri. Dia kase kode pake dia pe tangan pa orang-orang yang ada di situ la dorang badiam. Turus dia bilang pa dorang, “Sudara-sudara orang Israel deng orang-orang laeng yang jaga semba pa Tuhan Allah, coba ngoni dengar dulu pa kita!

¹⁷ Torang orang Israel pe Tuhan Allah so pili torang pe orang tua dulu-dulu, kong dorang jadi bangsa yang basar waktu dorang di tana Mesir, yang bukang dorang pe negri. Abis itu, Tuhan Allah deng Dia pe kuasa yang basar bawa pa dorang kaluar dari tana Mesir itu.

¹⁸ Abis itu, dorang hidup di padang gurun selama ampa pulu taong. Di situ, dorang pe kalakuang tara iko Tuhan Allah pe mau, tapi Tuhan Allah tetap sabar pa dorang.

¹⁹ Tuhan Allah tolong pa dorang untuk kase abis tuju suku bangsa yang ada di tana Kanaan. Abis itu, Dia kase bage-bage tana itu pa torang pe orang tua dulu-dulu jadi dorang punya.

²⁰ Dorang pigi di Mesir sampe bale ulang di Kanaan, dia pe lama ampa ratus lima pulu taong. Abis itu, Tuhan Allah kase pemimpin-pemimpin pa torang pe orang tua dulu-dulu itu. Dorang itu yang kalu ada masala, dorang urus perkara. Dorang itu yang jaga pimpin pa torang pe orang tua dulu-dulu sampe Tuhan Allah pili pa nabi Samuel untuk kase turus Tuhan Allah pe pasáng pa orang-orang.

²¹ Biar bagitu me, torang pe orang tua dulu-dulu minta satu orang pa Tuhan Allah la orang itu jadi dorang pe raja. Kong Tuhan Allah kase pa dorang satu orang raja, raja itu dia pe nama Saul. Dia itu Kish pe ana dari suku Benyamin. Kong Saul jadi raja dia pe lama ampa pulu taong.

²² Abis itu, Tuhan Allah kase berenti pa Saul jadi raja. Turus Dia pili pa Daud jadi raja la mo ganti pa Saul. Tentang Daud ini Tuhan Allah so perna bilang, ‘Kita so perhatikan pa Daud, Isai pe ana itu. Dia jaga biking Kita pe hati jadi sanang, deng dia jaga biking samua Kita pe mau.’

²³Sudara-sudara yang percaya, dari Daud pe turunan itu suda, Tuhan Allah so pili satu Orang untuk torang orang Israel yang akan kase slamat pa manusia, sama deng Tuhan Allah janji dari dulu. Dia itu suda Yesus.

²⁴ Kong waktu Yesus bolong datang, ada satu orang yang pe nama Yohanes, dia pigi kase tau pa samua orang bangsa Israel, dorang musti bertobat kong kase dong pe diri untuk dapa baptis.

²⁵ Waktu Yohanes pe tugas so mo abis, dia bilang pa orang-orang bagini, ‘Ngoni pikir kita ini sapa? Kita bukang Orang yang Tuhan Allah janji mo kase slamat pa torang orang Israel yang ngoni tunggu-tunggu. Tapi, abis kita, baru Dia mo datang. Mo maruku buka Dia pe sandal pe tali me, kita tara pantas.’

²⁶Sudara-sudara orang Israel, Abraham pe turunan, deng ngoni yang bukang Yahudi tapi jaga semba pa Tuhan Allah, pa torang samua ini, Tuhan Allah so kase tau Dia mo kase slamat pa manusia dari dosa-dosa.

²⁷Tapi waktu Yesus datang, torang pe tamang-tamang orang Israel yang tinggal di Yerusalem deng dong pe pemimpin-pemimpin tara mangarti sapa Dia. Dorang tara mangarti pasáng yang Tuhan Allah bilang dari dulu pake Dia pe nabi-nabi tentang Orang yang Tuhan Allah janji la mo kase slamat pa torang. Padahal, kata-kata ini yang torang baca tiap hari Sabat. Kong karna dorang tara mangarti, dorang hukum mati pa Dia. Tapi deng dong hukum mati pa Dia, apa yang Tuhan Allah bilang pa nabi-nabi dulu di Kitab Suci itu, so jadi.

²⁸ Biar torang pe pemimpin-pemimpin tara dapa alasan mo kase hukuman mati pa Yesus, dorang minta pa Pilatus supaya kase hukuman mati pa Dia.

²⁹Turus, dorang biking samua yang nabi-nabi so bilang dari dulu tentang Dia. Dorang bunu pa Dia baru dorang kase turung pa Dia dari salib kong dong kubur pa Dia.

³⁰Tapi Tuhan Allah kase hidup ulang pa Dia.

³¹ Kong selama babarapa hari, Yesus kase tunju Dia pe diri pa Dia pe murit-murit yang perna iko pa Dia dari daera Galilea sampe di kota Yerusalem. Dorang itu suda yang skarang jaga kase tau pa orang Israel, samua yang dorang lia deng dengar yang Dia biking.

³²Jadi, skarang ini torang dua mo kase tau Kabar Bae tentang Yesus Kristus pa ngoni. Kabar Bae itu, yang Tuhan Allah janji pa torang pe orang tua dulu-dulu.

³³ Janji itu Tuhan Allah so biking pa torang, dorang pe ana cucu, deng cara so kase hidup ulang pa Yesus. Itu sama deng yang tatulis di kitab Mazmur, di situ Tuhan Allah bilang bagini tentang Yesus, ‘Ngana Kita pe Ana, hari ini Kita so jadi Ngana pe Papa.’

³⁴ Deng waktu Yesus so mati, Tuhan Allah so kase hidup ulang pa Dia. Jadi Dia tara akan mati lagi, sama deng yang Tuhan Allah perna bilang bagini, ‘Kita pe janji pa raja Daud itu, janji yang kudus, kong pasti mo jadi pa ngoni ini.’

³⁵ Bagitu lagi deng tulisan laeng di Mazmur yang nabi Daud tulis bagini, ‘Tuhan tara akan kase biar Dia pe Orang Kudus pe badan jadi busu di dalam kubur.’

³⁶Biar raja Daud yang tulis itu, tapi dia tara maksut itu dia pe diri. Karna waktu raja Daud hidup, dia biking samua yang Tuhan Allah suru pa dia, abis itu dia mati. Dorang kubur pa dia di dia pe orang tua dulu-dulu pe sabla. Dia pe mayat me so busu.

³⁷Tapi waktu Yesus mati, Dia pe mayat tara busu di kubur, karna Tuhan Allah so kase hidup ulang pa Dia.

³⁸Jadi sudara-sudara, torang kase tau pa ngoni, karna Yesus so mati di kayu salib deng so hidup ulang, ngoni pe dosa-dosa so dapa ampun.

³⁹Jadi sapa yang percaya pa Yesus, orang itu so jadi tara sala pa Tuhan Allah pe muka. Tapi kalu torang cuma iko aturan-aturan di lima kitab Musa, torang tara bisa jadi orang yang butul pa Tuhan Allah pe muka.

⁴⁰Jadi skarang, ngoni musti bae-bae, supaya apa yang Tuhan Allah bilang dulu itu pa Dia pe nabi-nabi, tara mo jadi pa ngoni. Bagini yang Tuhan Allah bilang,

⁴¹ ‘Woe ngoni orang-orang yang jaga pandang enteng, perhatikan bae-bae. Kita mo biking hal-hal yang luar biasa, yang biking ngoni jadi herang skali. Tapi biar bagitu, ngoni akan mati, karna ngoni tara mau percaya, biar orang kase carita pa ngoni lagi. Ngoni cuma mo inga-inga soal itu kong mati.’ ”

⁴²Abis bicara bagitu, Paulus deng Barnabas bajalang kaluar dari ruma ibada itu. Tapi orang-orang di situ minta pa dorang bale ulang minggu muka la mo bicara hal-hal itu lagi.

⁴³Abis itu, orang-orang kaluar dari ruma ibada kong ada banya orang yang iko pa Paulus deng Barnabas. Dorang itu orang-orang Yahudi deng orang-orang bukang Yahudi yang so maso agama Yahudi. Paulus deng Barnabas kase nasehat pa dorang supaya dong tetap percaya pa Tuhan Allah yang so kase Dia pe bae pa dorang sampe dong bole slamat dari dosa.

⁴⁴Dia pe minggu muka pas hari Sabat, amper samua orang yang ada di kota Antiokhia datang bakumpul untuk dengar Tuhan Allah pe firman dari Paulus deng Barnabas.

⁴⁵Tapi waktu orang-orang Yahudi lia orang banya itu, dorang jadi mangiri pa Paulus deng Barnabas. Kong dorang mulai bahina deng malawang samua yang Paulus jaga bilang.

⁴⁶Tapi Paulus deng Barnabas barani skali mangada pa orang-orang itu kong bilang, “Memang Tuhan Allah yang suru la torang kase tau kamuka Tuhan Allah pe firman pa orang-orang Yahudi. Tapi ngoni tara mau percaya, jadi deng bagitu, ngoni so nilai ngoni pe diri tara pantas mo dapa hidup deng Tuhan Allah slama-lamanya. Jadi, skarang torang mo pigi pa orang-orang yang bukang Yahudi supaya mo kase tau Tuhan Allah pe firman itu.

⁴⁷ Barang, Tuhan Allah parenta pa torang bagini, ‘Kita so pili pa ngana jadi sama deng lampu yang biking tarang pa orang-orang bukang Yahudi, supaya samua orang di dunia ini bisa tau tentang slamat yang Kita kase pa manusia.’ ”

⁴⁸Waktu orang-orang bukang Yahudi dengar Paulus bilang bagitu, dorang sanang skali. Turus, dorang puji deng hormat pa Tuhan karna Tuhan pe ajaran itu. Abis itu, samua orang yang Tuhan Allah so pili mo dapa hidup deng Dia slama-lamanya, dorang itu jadi percaya.

⁴⁹Waktu itu, Kabar Bae tentang Yesus tasiar di samua tampa di daera itu.

⁵⁰Tapi orang-orang Yahudi malawang pa Tuhan pe Firman. Dorang pengaru pa pejabat-pejabat di kota itu deng pa parampuang-parampuang kaya yang baibada supaya dorang siksa pa Paulus deng Barnabas kong user pa dorang dari daera itu.

⁵¹ Tapi Paulus deng Barnabas kase tinggal saja kota itu. Abu yang di dorang pe kaki me dorang tada kase tinggal, supaya kase inga pa orang-orang di situ, dorang so sala pa Tuhan Allah. Abis itu, dorang dua pigi di Ikonium.

⁵²Tapi orang-orang percaya yang ada di kota Antiokhia sanang skali kong Roh Kudus kuasai pa dorang.