Read Malay, North Moluccan Kisah Para Rasul 14 Bible Online

Kisah Para Rasul 14 - Malay, North Moluccan bible

Kisah Para Rasul 14

¹Waktu Paulus deng Barnabas di kota Ikonium, dorang maso di ruma ibada agama Yahudi sama deng dorang jaga biking di daera laeng. Di situ dorang deng barani kase tau tentang Tuhan Allah pe Kabar Bae sampe banya orang Yahudi deng orang-orang yang bukang Yahudi jadi percaya pa Yesus.

²Tapi, ada babarapa orang Yahudi yang tara tarima Paulus deng Barnabas pe ajaran. Turus dorang mulai pengaru pa orang-orang yang bukang Yahudi, la dorang malawang pa orang-orang yang so percaya itu.

³Jadi Paulus deng Barnabas tinggal sadiki lama di kota itu. Deng barani dorang tetap kase tau Kabar Bae tentang Tuhan Yesus pa orang-orang. Tuhan me kase kuasa pa dorang la dong biking mujizat-mujizat deng tanda-tanda supaya orang-orang di sana bole tau, yang dorang kase tau tentang Tuhan pe bae itu butul.

⁴Tapi orang banya di kota itu so tabage dua. Ada yang iko pa orang-orang Yahudi yang tara percaya, deng ada yang iko pa dorang dua itu.

⁵Dia pe ahir kabawa, dorang orang-orang Yahudi, deng dong pe pemimpin-pemimpin, sama-sama deng orang-orang bukang Yahudi ambe keputusan la mo siksa pa Paulus deng Barnabas deng mo lempar deng batu pa dong dua itu sampe mati.

⁶Tapi Paulus deng Barnabas dapa tau rencana jahat itu. Karna itu, dorang dua pigi manyingkir di daera Likaonia. Di situ dorang pigi di kota Listra deng di kota Derbe, deng di tampa-tampa laeng di daera itu.

⁷Kong di tampa-tampa itu, dorang kase tau Kabar Bae tentang Yesus Kristus pa orang-orang.

⁸Di kota Listra, ada laki-laki satu yang tara bisa bajalang karna dia lumpu dari lahir.

⁹Dia dudu badengar Paulus mangajar. Paulus perhatikan pa dia. Turus Paulus tau dia percaya pa Yesus, jadi dia bole dapa sembu.

¹⁰Paulus bilang kuat-kuat pa orang itu, “Badiri suda!” Turus orang itu langsung badiri kong mulai bajalang kasana-kamari.

¹¹Waktu orang banya di situ lia apa yang Paulus biking itu, dorang bataria pake bahasa Likaonia, “Torang pe puji-puji so datang kamari pa torang, kong dorang pake manusia pe badan.”

¹²Pa Barnabas, dorang kase nama sama deng dong pe puji-puji pe nama, ‘Zeus’, kong pa Paulus dong kase nama sama deng dorang pe puji-puji pe nama, ‘Hermes’, karna dia juru bicara.

¹³Di luar kota itu, ada tampa untuk dong semba pa dong pe puji-puji yang pe nama Zeus. Waktu itu, Zeus pe imam datang dari sana sama-sama deng orang banya kong ada bawa sapi-sapi laki-laki deng bunga-bunga di kota pe pintu gerbang. Di situ, dorang rencana mo bakar korban biking persembahan untuk Paulus deng Barnabas.

¹⁴Tapi waktu Paulus deng Barnabas dapa tau dorang mo semba bukang pa Tuhan Allah, dorang dua robe dong pe baju la jadi tanda dorang pe hati susa lia dong biking bagitu. Turus dorang dua basusuru di orang-orang banya itu pe tenga-tenga kong bataria,

¹⁵“Ee ngoni samua, bikiapa kong ngoni biking bagini? Torang ini cuma manusia, sama deng ngoni. Torang datang kamari mo kase tau pa ngoni Kabar Bae tentang Yesus Kristus supaya ngoni bisa kase tinggal ngoni pe puji-puji yang tarada dia pe guna itu, kong percaya pa Tuhan Allah yang hidup itu. Dia itu suda yang biking langit, bumi, laut deng samua dia pe isi.

¹⁶Dulu, Tuhan Allah kase biar samua suku bangsa hidup iko dong pe mau sandiri. Dia tara biking apa-apa pa dorang.

¹⁷Tapi Tuhan Allah tetap kase tunju Dia pe bae pa samua manusia supaya dorang tau Dia itu ada. Dia itu yang kase turung ujang dari langit, deng yang kase musim-musim bapanen pa ngoni. Dia me kase makanang, deng biking ngoni pe hati sanang.”

¹⁸Biar Paulus deng Barnabas so bicara bagitu, dorang amper-amper tara dapa tahang pa orang banya yang mo bakar kase binatang korban persembahan pa dorang dua.

¹⁹Tapi waktu itu, orang-orang Yahudi dari kota Antiokhia deng Ikonium datang. Di situ, dorang kase-kase panas pa orang banya itu sampe dong iko pa dorang lempar pa Paulus deng batu. Abis itu, dorang hela pa dia bawa di luar kota, barang dorang kira dia so mati.

²⁰Tapi waktu orang-orang percaya ka sana kuliling pa dia, dia langsung badiri kong maso ulang di kota itu. Dia pe beso, dia barangkat di kota Derbe sama-sama deng Barnabas.

²¹Di Derbe, Paulus deng Barnabas kase tau Kabar Bae tentang Yesus Kristus sampe banya orang jadi percaya. Abis itu, dorang dua bale di kota Listra, turus di kota Ikonium deng di kota Antiokhia di daera Pisidia.

²²Di tampa-tampa itu, Paulus deng Barnabas kase kuat orang-orang percaya pe hati deng kase nasehat supaya dorang tetap batahang percaya pa Tuhan Yesus. Paulus deng Barnabas bilang pa dorang, “Kalu torang mau jadi Tuhan Allah pe umat yang Dia Berkuasa sebagai Raja, torang akan dapa banya sengsara.”

²³Pe abis bilang bagitu, Paulus deng Barnabas tunju penatua-penatua untuk tiap-tiap jemaat. Dorang bapuasa deng berdoa, kong serakan penatua-penatua itu pa Tuhan yang dong percaya itu supaya Dia pake pa dorang.

²⁴Abis kuliling di daera Pisidia, Paulus deng Barnabas pigi di daera Pamfilia.

²⁵Di daera Pamfilia, dorang kase tau Kabar Bae di kota Perga. Abis itu, dorang pigi di kota Atalia.

²⁶Dari Atalia, dorang pigi balayar di kota laeng yang pe nama Antiokhia di daera Siria. Tempo hari, jemaat di situ yang utus pa dorang pigi kase tau Kabar Bae. Jemaat itu suda yang serakan dorang dua pa Tuhan Allah, supaya Tuhan Allah pe bae ada turus pa dorang. Skarang dorang mo pulang di situ karna dorang so kase selesai dorang pe tugas.

²⁷Pe sampe di kota Antiokhia itu, Paulus deng Barnabas pangge jemaat samua bakumpul. Kong dorang dua kase tau samua yang Tuhan Allah so biking waktu dorang kase tau Kabar Bae tentang Yesus di dorang pe perjalanan. Dorang me carita, bagimana Tuhan Allah buka jalang supaya orang-orang bukang Yahudi jadi percaya pa Yesus.

²⁸Di Antiokhia itu, Paulus deng Barnabas tinggal lama sama-sama deng orang-orang yang percaya pa Yesus yang ada di kota itu.