Read Malay, North Moluccan Kisah Para Rasul 15 Bible Online

Kisah Para Rasul 15 - Malay, North Moluccan bible

Kisah Para Rasul 15

¹ Waktu Paulus deng Barnabas masi di kota Antiokhia, ada babarapa orang Yahudi yang percaya pa Yesus yang datang dari Yudea ka sana di Antiokhia. Dorang mangajar pa orang-orang percaya yang bukang Yahudi. Dorang bilang bagini, “Kalu ngoni tara dapa sunat iko aturan di lima kitab Musa, ngoni tara dapa slamat.”

²Pe dengar itu, Paulus deng Barnabas tara setuju kong malawang karas dorang pe ajaran itu. Dia pe ahir kabawa, orang-orang yang percaya di Antiokhia ambe keputusan la suru pa Paulus, Barnabas deng orang-orang percaya yang laeng, pigi di jemaat di Yerusalem. Di Yerusalem, dorang mo baku dapa deng Yesus pe utusan-utusan yang orang sebut rasul-rasul, deng pa penatua-penatua, supaya dorang samua bicara tentang masala itu.

³Jemaat di Antiokhia antar pa dorang sampe di luar kota. Turus, dorang Paulus bajalang iko daera Fenisia deng daera Samaria. Di daera-daera itu, dorang kase carita pa orang-orang percaya tentang orang-orang bukang Yahudi di tampa laeng yang so bertobat kong jadi percaya pa Tuhan. Waktu orang-orang percaya di situ dengar kabar itu, dorang pe hati sanang skali.

⁴Pe sampe di kota Yerusalem, rasul-rasul, penatua-penatua deng samua jemaat tarima deng bae pa dorang dua. Di situ, dorang dua kase carita samua yang Tuhan Allah so bantu dong dua biking.

⁵Tapi di situ ada babarapa orang percaya dari aliran fanatik yang pe nama Farisi. Dorang datang kong bilang bagini, “Orang-orang bukang Yahudi yang so jadi percaya pa Yesus, dorang lagi musti dapa sunat deng iko aturan-aturan di lima kitab Musa sama deng torang orang Yahudi.”

⁶Turus, rasul-rasul deng penatua-penatua bakumpul untuk biking rapat la mo bicara masala itu.

⁷ Pe abis dorang bicara lama tentang masala itu, Petrus badiri kong bilang pa dorang, “Ee sudara-sudara, ngoni tau babarapa taong lalu, Tuhan Allah so pili pa kita dari antara torang ini la kita mo kase tau Kabar Bae tentang Yesus Kristus pa orang-orang bukang Yahudi, supaya dorang me bole jadi percaya.

⁸ Tuhan Allah yang tau manusia pe hati, kong Dia yang kase Roh Kudus pa dorang orang-orang yang bukang Yahudi, sama deng Dia kase pa torang orang Yahudi, supaya torang tau Dia me tarima pa dorang.

⁹Tuhan Allah me tara pili-pili antara torang deng dorang, jadi Dia biking bersi dorang pe hati, karna dorang so percaya pa Yesus.

¹⁰Jadi, kalu so bagitu, bikiapa kong ngoni mo coba pa Tuhan Allah la lia kalu Dia mo mara ka tarada? Ngoni mo paksa pa orang-orang bukang Yahudi yang so percaya itu supaya iko aturan-aturan di lima kitab Musa. Padahal, torang pe orang tua dulu-dulu deng torang sandiri lagi me tara mampo iko aturan-aturan itu.

¹¹Jadi ngoni tara bole biking bagitu. Mala, torang orang Yahudi tau, torang dapa slamat dari dosa-dosa, cuma karna Tuhan Yesus pe bae yang cuma-cuma pa torang, sama deng Dia pe bae pa dorang orang-orang bukang Yahudi lagi.”

¹²Pe dengar bagitu, samua orang langsung badiam. Turus, dorang dengar Paulus deng Barnabas kase carita tentang samua mujizat deng tanda-tanda yang Tuhan Allah kase untuk dorang biking waktu dorang kase tau Kabar Bae pa orang-orang bukang Yahudi.

¹³Bagitu Barnabas deng Paulus abis bicara, Yakobus turus bilang, “Ee sudara-sudara, dengar pa kita!

¹⁴Simon Petrus so kase carita bagimana Tuhan Allah pertama kase tunju Dia pe bae pa orang-orang yang bukang Yahudi. Dia pili pa orang-orang dari bangsa yang bukang Yahudi untuk jadi Dia pe umat sandiri.

¹⁵Samua itu so jadi sama deng Tuhan Allah bilang pa Dia pe nabi-nabi, bagini:

¹⁶ ‘Daud deng dia pe ana cucu so tara jadi raja lagi, tapi Kita mo bale la mo angka Daud pe ana cucu satu supaya jadi Raja lagi. Itu bole kase sama deng ruma satu yang so rata deng tana, kong orang kase badiri ulang.

¹⁷Kita biking bagitu supaya samua orang cari pa Kita, Tuhan, deng samua suku bangsa bukang Yahudi yang Kita pili bole jadi Kita pe umat sandiri.’ Itu suda yang Tuhan Allah bilang, kong Dia yang biking samua ini.

¹⁸Samua itu Dia so kase tau dari dulu.”

¹⁹Yakobus kase turus dia pe bicara, “Tuhan Allah so bilang bagitu, jadi menurut kita, torang tara bole biking susa pa orang-orang bukang Yahudi yang so bertobat kong percaya pa Tuhan Allah. Jang torang suru dorang iko samua torang pe aturan agama Yahudi yang barát itu.

²⁰ Tapi lebe bae torang tulis surat pa dorang, supaya minta dong iko aturan-aturan ini saja: jang dorang makang makanang yang so kase pa orang pe puji-puji, jang makang daging dari binatang yang mati dapa ramas di leher, deng jang makang dara.[24] Dorang me tara bole baseks sabarang.

²¹Barang, dari dulu orang so kase tau di mana-mana aturan-aturan di lima kitab Musa. Kong sampe skarang aturan itu jaga kase baca di tiap hari Sabat di ruma-ruma ibada agama Yahudi, di samua kampong deng kota.”

²²Abis Yakobus bicara itu, Yesus pe utusan-utusan yang orang sebut rasul-rasul, deng penatua-penatua, sama-sama deng samua orang percaya di situ, ambe keputusan la mo utus babarapa orang dari dorang pigi di kota Antiokhia sama-sama deng Paulus deng Barnabas. Dorang pili pa Yudas yang orang jaga pangge Barsabas, deng pa Silas. Dorang dua itu, ada nama bae di orang-orang yang percaya.

²³Kong rasul-rasul deng penatua-penatua kase titip surat pa dorang dua untuk orang-orang yang percaya di kota Antiokhia, daera Siria deng daera Kilikia. Surat itu pe isi bagini, “Salam pa sudara-sudara yang percaya dari bangsa-bangsa yang bukang Yahudi. Torang rasul-rasul deng penatua-penatua di Yerusalem ada kirim surat ini pa ngoni.

²⁴Torang tulis surat ini, barang torang dengar ada babarapa orang dari torang pe jemaat di Yerusalem yang so pigi pa ngoni. Kong dorang kase ajar pa ngoni deng dong pe ajaran sandiri yang biking bingung deng biking ngoni pe hati tara tenang. Padahal torang tara perna suru orang-orang itu pigi pa ngoni.

²⁵Karna itu, torang ambe keputusan pili babarapa orang kong utus pa dorang pigi pa ngoni. Dorang mo pigi sama-sama deng Paulus deng Barnabas yang torang sayang.

²⁶Paulus deng Barnabas ini yang orang coba bunu pa dorang, gara-gara dorang kase tau tentang Yesus Kristus, torang pe Tuhan.

²⁷Jadi, torang ambe keputusan untuk utus pa Yudas deng Silas supaya nanti dorang dua yang kase tau langsung pa ngoni surat ini pe isi.

²⁸Roh Kudus so bicara pa torang, deng torang lagi setuju, torang tara mau tamba kase barát pa ngoni sampe suru ngoni iko samua aturan di lima kitab Musa. Jadi yang torang mo minta pa ngoni cuma ini:

²⁹ngoni tara bole makang makanang yang so kase pa orang pe puji-puji, tara bole makang binatang yang mati karna dapa ramas di leher, deng tara bole makang dara. Ngoni me tara bole baseks sabarang. Kalu ngoni iko samua aturan itu, itu pe arti, ngoni so biking yang bae. Sampe di sini dulu torang pe surat.”

³⁰Abis biking surat itu, Yudas deng Silas basiloloa kong pigi di kota Antiokhia. Di situ, dorang pangge samua orang percaya bakumpul. Kong Yudas deng Silas kase surat itu pa dorang.

³¹Waktu orang-orang percaya di situ abis baca surat itu, dorang jadi sanang karna surat itu kase kuat dong pe hati.

³²Yudas deng Silas itu nabi yang jaga kase turus Tuhan Allah pe pasáng. Dorang dua banya kase nasehat pa orang-orang percaya di kota Antiokhia untuk kase kuat dorang pe hati deng untuk biking dorang pe percaya lebe tamba kuat.

³³Dorang dua tinggal sadiki lama di situ. Abis itu, orang-orang percaya di kota Antiokhia lapas deng bae-bae pa dorang supaya dorang bale ulang di jemaat Yerusalem yang so utus pa dorang di Antiokhia. [

³⁴Tapi Silas ambe keputusan tetap tinggal di Antiokhia.]

³⁵Paulus deng Barnabas me tinggal sadiki lama di Antiokhia. Dorang dua deng babarapa orang laeng me mangajar deng kase tau Tuhan pe Firman di situ.

³⁶Waktu Paulus deng Barnabas so sadiki lama di Antiokhia, Paulus bilang pa Barnabas, “Lebe bae torang pi lia ulang pa tong pe sudara-sudara yang percaya di tiap kota, di tampa-tampa yang torang so perna kase tau Tuhan pe Firman, untuk mo lia dorang pe keadaan.”

³⁷Barnabas suka mo bawa lagi pa Yohanes yang dorang jaga pangge Markus.

³⁸ Tapi Paulus tara setuju. Barang, Markus perna berenti karja kase tau Kabar Bae deng dorang, kong kase tinggal pa dong di daera Pamfilia.

³⁹Gara-gara itu, Paulus deng Barnabas baku malawang, sampe dong baku pisa. Barnabas bawa pa Markus balayar di pulo Siprus.

⁴⁰Tapi Paulus pili pa Silas. Kong waktu dong dua so mo pigi, sudara-sudara yang percaya di Antiokhia berdoa la Tuhan jaga deng kase Dia pe bae pa dorang.

⁴¹Turus dorang barangkat bakuliling di daera Siria deng di daera Kilikia, kong di tampa-tampa itu dorang dua kase kuat jemaat-jemaat pe percaya.