Read Malay, North Moluccan Kisah Para Rasul 2 Bible Online

Kisah Para Rasul 2 - Malay, North Moluccan bible

Kisah Para Rasul 2

¹ Waktu orang Yahudi biking dorang pe sukur bapanen yang dong sebut hari raya Pentakosta,[5] samua orang yang percaya pa Yesus bakumpul di ruma satu di Yerusalem.

²Kage-kage dorang dengar ada bunyi dari langit sama deng angin ribut. Dia pe babunyi kuat skali sampe dapa dengar di samua tampa yang dong ada dudu di dalam ruma itu.

³Kong dorang dapa lia satu barang yang sama deng api, dia pe model sama deng lida-lida, turung kong berenti di atas pa dorang masing-masing.

⁴Turus, Roh Kudus kuasai pa dorang samua sampe dong mulai bicara pake bahasa-bahasa laeng yang Roh Kudus kase pa dorang.

⁵Waktu hari raya itu, banya orang agama Yahudi yang merantau di samua bangsa di dunia, datang di Yerusalem. Dorang itu yang rajin iko aturan agama Yahudi.

⁶Waktu dorang dengar babunyi yang dari langit itu, dorang datang bakumpul di ruma itu. Dorang bingung, barang dorang dengar orang-orang percaya itu bicara pake dorang pe bahasa masing-masing.

⁷Dorang samua tahaga-haga kong taherang-herang, turus dorang baku bilang, “Dorang samua yang bicara itu orang Galilea, to?

⁸Bikiapa kong torang bisa dengar dorang baku bicara pake torang pe bahasa masing-masing?

⁹Torang ini ada yang dari negara Partia, Media, Elam, deng Mesir. Ada lagi dari daera Mesopotamia, Yudea, Kapadokia, Pontus, deng Asia Kecil,

¹⁰Frigia, Pamfilia, deng dari daera-daera di Libia yang baku dekat deng kampong Kirene. Ada lagi pendatang dari kota Roma,

¹¹dari torang bangsa Yahudi deng yang bukang bangsa Yahudi tapi yang so maso agama Yahudi. Ada lagi orang Kreta deng orang Arab. Tapi torang samua dengar dorang bicara pake tong pe bahasa masing-masing, dong kase tau hal-hal luar biasa yang Tuhan Allah so biking.”

¹²Dorang samua herang deng tahaga-haga kong baku bilang, “Bikiapa kong bagini?”

¹³Tapi ada yang laeng singgung pa dorang, bilang kata, dorang itu mabo karna dong so minum anggur.

¹⁴Abis itu, Petrus deng Yesus pe seblas utusan yang laeng itu badiri. Dorang itu orang sebut rasul-rasul. Kong Petrus bicara kuat-kuat pa orang banya itu, “Ee, sudara-sudara orang Yahudi deng ngoni samua yang tinggal di Yerusalem! Dengar bae-bae, kita mo kase tau pa ngoni apa yang jadi di sini.

¹⁵Torang ini tara mabo. Ini baru jam sembilan pagi kong. Orang tara mungkin mabo jam bagini.

¹⁶Tapi apa yang jadi skarang ini, dari dulu Tuhan Allah so kase tau memang pa nabi Yoel bagini,

¹⁷ Tuhan Allah bilang, ‘Di waktu so dekat-dekat ahir jaman, Kita mo kase Kita pe Roh pa samua orang. Ngoni pe ana laki-laki deng parampuang akan kase tau pa orang-orang pasáng yang dorang dengar langsung dari Kita. Ngoni pe ana-ana muda mo dapa penglihatan-penglihatan, deng orang-orang tua me mo dapa mimpi dari Kita.

¹⁸Kong pa orang-orang yang jaga biking apa yang Kita suru, dia laki-laki ka, parampuang ka, Kita mo kase Kita pe Roh pa dorang, la dorang mo dengar langsung Kita pe pasáng kong dorang kase turus pa orang-orang.

¹⁹Kita mo biking mujizat-mujizat deng tanda-tanda yang kase tunju Kita pe kuasa di langit deng di bumi. Akan ada dara, api deng asap bagumpal-gumpal.

²⁰Matahari mo jadi galap, bulan mo jadi mera sama deng dara. Itu so jadi kamuka dulu, baru Tuhan datang ulang, untuk adili pa samua orang. Itu hari yang basar deng luar biasa.

²¹Kong sapa saja yang minta tolong pa Tuhan supaya dapa slamat, pasti dia mo slamat dari dosa.’ ”

²²Turus Petrus bilang lagi, “Ee, sudara-sudara orang Israel! Dengar bae-bae yang kita mo bilang pa ngoni ini. Tuhan Allah yang utus pa Yesus orang Nazaret itu, kong itu so jelas waktu Yesus biking mujizat-mujizat deng tanda-tanda yang kase tunju Tuhan Allah pe kuasa sampe biking orang herang. Samua itu so jadi di ngoni pe tenga-tenga, sama deng yang ngoni so tau.

²³ Tapi biar ngoni so tau itu, ngoni serakan Yesus pa orang jahat, kong dorang paku pa Dia di salib sampe mati. Tapi itu Tuhan Allah pe maksut deng rencana dari dulu, Dia yang serakan Yesus pa ngoni.

²⁴ Yesus mati, Dia dapa siksa yang paling barát tapi Tuhan Allah kase hidup ulang pa Dia. Barang, tara mungkin Yesus mati turus-turus.

²⁵ Dulu, raja Daud perna bilang tentang Yesus bagini, ‘Kita lia Tuhan salalu ada di kita pe muka, Dia itu salalu sama-sama deng kita. Jadi kita tara tako apa-apa.

²⁶Karna itu, kita pe hati sanang skali, deng kita pe mulu, kita puji-puji pa Tuhan, kong kita pe diri rasa tenang, karna kita baharap turus pa Dia.

²⁷Barang, Tuhan tara akan kase biar kita mati turus-turus, deng Tuhan tara akan kase biar Dia pe Orang Kudus pe badan jadi busu di dalam kubur.

²⁸Tuhan kase tunju jalang pa kita, supaya kita bole dapa hidup deng Tuhan slama-lamanya. Kita pe hati paling sanang skali karna Tuhan ada sama-sama deng kita turus-turus.’

²⁹Sudara-sudara, ini pasti raja Daud tara carita tentang dia pe diri sandiri. Barang, dia sandiri me so mati deng so dapa kubur, kong dia pe kubur masi ada sampe skarang di torang pe daera ini.

³⁰ Raja Daud itu nabi yang kase turus Tuhan Allah pe pasáng, jadi dia tau Tuhan Allah so bajanji pa dia deng basumpa, satu orang dari Daud pe turunan mo jadi Raja, deng pasti mo jadi.

³¹Daud me tau apa yang Tuhan Allah mo biking deng Raja itu. Jadi Daud kase tau memang, Mesias, Raja yang Tuhan Allah janji mo kase slamat pa manusia itu, Dia mati tapi Tuhan Allah tara akan kase biar Dia mati turus-turus, deng Dia pe badan tara jadi busu di dalam kubur.

³²Orang yang Daud carita, Dia itu Yesus suda. Yesus itu yang Tuhan Allah so kase hidup ulang kong torang samua so lia deng torang pe mata kapala sandiri, Dia so hidup ulang.

³³Skarang, Tuhan Allah so angka pa Dia kong kase tampa yang terhormat, pa Tuhan Allah pe sabla kanan. Tuhan Allah so kase Roh Kudus pa Yesus, sama deng Tuhan Allah so janji dari dulu. Kong Roh Kudus itu Dia so kase pa torang skarang, itu yang ngoni so dengar deng lia pa torang di sini.

³⁴ Daud tara taangka ka atas di sorga sama deng Yesus, tapi dia bilang bagini, ‘Tuhan Allah bilang pa kita pe Tuhan[6] bagini,

³⁵Dudu suda di tampa yang terhormat, pa Kita pe sabla kanan, sampe Kita kase kala Ngana pe musu-musu samua.’

³⁶Tuhan Allah so bilang bagitu, jadi ngoni samua sudara-sudara orang Israel, ngoni musti tau butul-butul, Yesus yang ngoni perna salib itu, Dia itu suda Mesias, Raja yang Tuhan Allah janji mo kase slamat pa manusia, deng Dia itu me Tuhan.”

³⁷Waktu orang banya dengar apa yang Petrus bilang itu, dorang manyasal skali kong tanya pa Petrus deng pa rasul-rasul yang laeng, “Sudara-sudara, torang so sala, jadi skarang torang musti biking apa, supaya Tuhan Allah jang hukum pa torang?”

³⁸Petrus bilang pa dorang, “Ngoni samua bertobat suda kong kase ngoni pe diri dapa baptis dalam nama Yesus Kristus, la jelas ngoni so percaya pa Dia. Kalu ngoni biking bagitu, Tuhan Allah mo kase ampun pa ngoni dari ngoni pe dosa-dosa, deng kase pa ngoni Roh Kudus.

³⁹Barang, samua itu Tuhan Allah so janji pa ngoni deng pa ngoni pe turunan, deng pa orang-orang bukang Yahudi lagi. Janji itu Tuhan Allah mo kase pa samua orang yang Dia pangge iko pa Dia.”

⁴⁰Petrus bicara banya lagi pa dorang. Dia nasehat pa dorang deng kase kuat dorang pe hati, dia bilang, “Skarang ini banya orang jahat, jadi jang ngoni iko pa dorang. Tapi ngoni musti serakan ngoni pe diri pa Tuhan Allah, supaya ngoni slamat.”

⁴¹Banya orang yang dengar Petrus pe bicara itu jadi percaya kong kase dong pe diri dapa baptis. Kong hari itu orang-orang yang percaya pa Yesus, tatamba kira-kira tiga ribu orang.

⁴²Orang-orang percaya itu jaga bakumpul sama-sama untuk baku kase kuat dorang pe percaya pa Yesus. Dorang rajin dengar ajaran tentang Yesus dari rasul-rasul. Dorang pela-pela roti kong makang sama-sama, supaya inga Tuhan Yesus pe sengsara deng kematian. Dorang me berdoa sama-sama.

⁴³Rasul-rasul biking banya mujizat deng tanda yang kase tunju Tuhan Allah pe kuasa, sampe samua orang taherang-herang kong hormati pa Tuhan Allah.

⁴⁴ Samua orang yang so percaya pa Yesus itu salalu bakumpul deng baku bawa bae-bae, kong harta apa saja yang dong punya, dorang pake sama-sama.

⁴⁵Ada dari dorang yang jual dorang pe harta, kong doi itu dong kase bage-bage iko orang-orang itu pe perlu.

⁴⁶Tiap hari, dorang bakumpul deng satu hati di Ruma Ibada Pusat pe kompleks. Dorang me makang sama-sama dari ruma yang satu pigi di ruma yang laeng deng rasa sanang deng hati yang sunggu-sunggu.

⁴⁷Dorang salalu puji pa Tuhan Allah, deng orang banya suka pa dorang. Kong tiap hari, Tuhan biking sampe orang yang percaya pa Dia tatamba turus supaya dorang dapa slamat dari dosa-dosa.