Read Malay, North Moluccan Kisah Para Rasul 26 Bible Online

Kisah Para Rasul 26 - Malay, North Moluccan bible

Kisah Para Rasul 26

¹Kong raja Agripa bilang pa Paulus, “Skarang, ngana so bole babela ngana pe diri.” Turus Paulus angka tangan la dia mo babela dia pe diri, kong dia bilang,

²“Raja Agripa yang kita hormati! Kita sanang skali, karna hari ini kita bisa badiri pa bapa pe muka untuk babela kita pe diri dari samua yang orang Yahudi tudu pa kita.

³Apalagi bapa me tau skali torang orang Yahudi pe aturan-aturan deng masala-masala di antara torang. Jadi kita mohon, bapa dengar bae-bae kita pe penjelasan ini.

⁴ Samua orang Yahudi tau bagimana kita pe hidup di kita pe kampong dulu waktu kita masi muda, sampe kita tinggal di tenga-tenga kita pe bangsa di kota Yerusalem ini.

⁵ Dorang tau, kita ini so lama iko aliran Farisi, aliran yang paling pegang kuat torang agama Yahudi pe aturan. Kong kalu dorang mau, dong bisa basaksi pa bapa pe muka.

⁶Skarang, kita musti mangada di pengadilan ini, barang kita percaya deng yakin pa Tuhan Allah pe janji yang Dia kase pa torang pe orang tua dulu-dulu.

⁷Kong janji itu, torang dua blas suku Israel ada tunggu-tunggu. Sementara batunggu janji itu, siang malam torang salalu semba deng hati yang sunggu-sunggu pa Tuhan Allah. Ya, raja Agripa, sampe orang Yahudi bilang kita sala, itu karna kita percaya deng yakin janji itu.

⁸Jadi, skarang kita mo batanya pa orang-orang Yahudi yang ada di sini, bikiapa kong ngoni anggap, tara mungkin Tuhan Allah kase hidup ulang pa orang yang so mati?

⁹ Dulu, kita me bapikir, tara mungkin Yesus orang Nazaret itu hidup ulang, jadi kita kira Dia pe ajaran itu sesat. Karna itu, kita biking apa saja untuk tantang Yesus pe nama, sampe kita me siksa pa orang-orang yang percaya pa Dia.

¹⁰Di Yerusalem, kita perna biking bagitu. Kita dapa surat kuasa dari imam-imam kapala untuk tangka pa orang-orang yang so jadi Tuhan Allah pe umat kong kase maso pa dorang di penjara. Waktu dorang itu dapa urus, kita me setuju dorang dapa hukuman mati.

¹¹Banya kali kita cari pa dorang di ruma-ruma ibada agama Yahudi. Kita siksa deng paksa pa dorang supaya dorang manyangkal pa Yesus. Kita tara suka skali deng ajaran itu, jadi kita salalu cari pa orang-orang yang percaya pa Yesus itu, sampe di kota-kota di luar torang orang Yahudi pe daera.”

¹² Paulus bilang lagi bagini, “Satu kali, deng maksut mo tangka pa orang-orang yang percaya pa Yesus itu, kita pigi di kota Damsyik. Kita pigi bawa surat kuasa dari imam-imam kapala.

¹³Tapi raja Agripa, waktu torang bajalang sampe tenga hari, kage-kage kita lia ada cahaya tarang skali dari langit. Cahaya itu lebe tarang dari matahari. Cahaya itu kanal kase kuliling pa kita deng pa orang-orang yang ada sama-sama bajalang deng kita.

¹⁴Kong torang samua jatu di tana. Turus kita dengar ada suara yang bilang pa kita pake bahasa Ibrani,[49] bagini, ‘Saulus, Saulus, bikiapa kong ngana siksa pa Kita? Ngana kase sengsara ngana pe diri sandiri saja karna malawang pa Kita yang berkuasa pa ngana.’

¹⁵Kong kita bilang, ‘Sapa ini kong?’ Kong Tuhan bilang, ‘Kita ini Yesus, yang ngana jaga siksa.

¹⁶Skarang, ngana badiri suda. Kita kase tunju Kita pe diri pa ngana karna Kita pili pa ngana untuk biking apa yang Kita suru. Ngana akan kase carita apa yang Kita so kase tunju pa ngana skarang, deng yang akan Kita mo kase lia pa ngana.

¹⁷Nanti orang-orang Yahudi deng orang-orang bukang Yahudi mo siksa pa ngana, tapi Kita mo kase slamat pa ngana dari dorang. Skarang, Kita kase utus ngana pigi pa dorang.

¹⁸Ngana ka sana untuk buka dorang pe pikiran supaya dorang tara hidup lagi di galap tapi hidup di tarang, supaya dorang talapas dari Iblis, setang-setang pe raja pe kuasa, kong Tuhan Allah pe kuasa mo ada sama-sama deng dorang. Kong karna dorang so percaya pa Kita, dorang pe dosa-dosa mo dapa ampun deng dorang mo dapa samua yang Tuhan Allah janji mo kase pa orang-orang yang Dia so biking jadi Dia pe umat.’

¹⁹Jadi raja Agripa, mulai dari Tuhan Yesus kase tunju Dia pe diri pa kita, kita tara perna malawang yang Dia parenta pa kita.

²⁰ Kita pi kase tau kamuka pa orang-orang Yahudi di Damsyik supaya dorang bertobat kong bale pa Tuhan Allah. Deng dorang musti biking hal-hal yang bae untuk kase tunju dorang butul-butul so bertobat. Abis itu, kita pi kase tau di kota Yerusalem sampe deng di samua tampa laeng di daera Yudea. Kita me ada kase tau samua itu pa orang-orang yang bukang Yahudi.

²¹Jadi, karna kita biking samua itu sampe orang-orang agama Yahudi tangka pa kita. Dorang tangka pa kita di Ruma Ibada Pusat kong coba mo bunu pa kita.

²²Tapi Tuhan Allah salalu tolong pa kita, jadi kita masi bisa hidup sampe hari ini. Skarang kita badiri di sini, kita basaksi tentang Yesus pa ngoni samua, biar pejabat atau orang biasa. Samua yang kita bilang tentang Yesus so jadi sama deng yang Tuhan Allah bilang dulu pa nabi Musa deng nabi-nabi laeng.

²³ Dorang so kase tau tentang Mesias, Raja yang Tuhan Allah janji mo kase slamat pa manusia. Dorang bilang, Dia musti tanggung siksa banya kong mati, tapi Dia itu yang pertama akan hidup ulang supaya Dia bole kase tau Kabar Bae pa orang Yahudi deng pa orang yang bukang Yahudi la dorang bisa dapa slamat. Itu sama deng Dia kase tarang di dorang pe hati.”

²⁴Waktu Paulus masi babela dia pe diri, gubernur Festus potong Paulus pe bicara. Dia bicara kuat-kuat bagini, “So gila ngana, Paulus! Ngana so talalu banya balajar jadi ngana pe pikiran me so tara butul.”

²⁵Tapi Paulus bilang, “Bapa gubernur Festus yang kita hormati. Kita tara gila! Kita masi waras! Samua yang kita bilang itu butul deng maso akal.

²⁶Raja Agripa sandiri tau samua yang kita bilang itu, jadi kita barani bicara tarang-tarang pa raja pe muka. Samua itu jadi di orang banya pe muka, jadi kita yakin tarada satu yang raja tara tau.

²⁷Raja Agripa percaya to, apa yang nabi-nabi so perna bilang? Kita tau, raja Agripa percaya itu.”

²⁸Kong raja Agripa bilang pa Paulus, “Paulus, ngana kira gampang mo biking kita percaya kong jadi orang Kristen deng waktu yang pe singkat ini?”

²⁹Kong Paulus bilang pa raja bagini, “Kita berdoa pa Tuhan Allah, capat atau lama, bukang cuma raja Agripa yang mo percaya pa Yesus, tapi samua orang yang ada di sini deng yang ada dengar kita bilang tadi, ngoni akan jadi sama deng kita. Tapi bukang mo jadi tahanan sama deng kita skarang ini.”

³⁰Pe abis Paulus bicara bagitu, raja Agripa, Bernike, gubernur Festus deng orang-orang yang ada dudu sama-sama deng dorang itu badiri.

³¹Waktu dorang bajalang kaluar, dorang baku bilang bagini, “Orang itu tara biking kajahatan apa-apa yang biking dia musti maso penjara, apalagi sampe mo dapa hukuman mati.”

³²Kong raja Agripa bilang pa gubernur Festus, “Sebenarnya orang ini so bisa bebas kalu dia tara minta raja basar Roma urus lagi dia pe perkara.”