Read Malay, North Moluccan Kisah Para Rasul 28 Bible Online

Kisah Para Rasul 28 - Malay, North Moluccan bible

Kisah Para Rasul 28

¹Bagitu torang samua so sampe di pante deng slamat, baru torang tau pulo itu pe nama Malta.

²Orang-orang di situ bae skali pa torang. Waktu itu, so mulai ujang deng dingin skali. Jadi, dorang biking api kong pangge pa torang ka sana barahu.

³Paulus me pigi cari kayu. Waktu dia taru kayu-kayu itu di api, tau-tau di dalam kayu itu ada ular bisa satu ekor. Ular itu kaluar karna rasa panas, kong dia gigi Paulus pe tangan deng tara mau balapas.

⁴Waktu orang-orang pulo itu lia ular masi tagantong di Paulus pe tangan, dorang baku bilang, “Orang ini pasti so perna bunu orang. Jadi biar dia slamat di laut tapi tetap dia dapa dia pe katula dari tong pe puji-puji sampe dia tara bisa hidup lagi.”

⁵Kong Paulus kase kabas ular itu di api, tapi Paulus tara apa-apa.

⁶Padahal, orang-orang yang lia ular gigi pa Paulus itu, dorang bapikir, tara lama lagi Paulus pe tangan mo bangka atau tiba-tiba dia mo mati. Tapi abis batunggu lama, dorang lia Paulus tara apa-apa, jadi dorang kira Paulus itu tuang tana.

⁷Tara jao dari situ, ada pemimpin pulo pe ruma deng pe tana yang basar. Pemimpin di situ pe nama Publius. Dia kamari pangge pa torang kong dia urus pa torang deng bae-bae selama tiga hari.

⁸Waktu itu, Publius pe papa ada baguling di tampa tidor, barang dia damang deng buang-buang aer. Paulus maso lia pa Publius pe papa. Turus, Paulus taru dia pe tangan di atas pa bapa itu kong dia berdoa pa Tuhan. Pe abis berdoa, bapa itu langsung sembu.

⁹Bagitu orang-orang saki laeng yang ada di pulo itu dengar, Publius pe papa so sembu, dorang datang pa Paulus, kong dorang lagi dapa kase sembu.

¹⁰Orang-orang di situ dorang hormati skali pa torang. Waktu torang so mo barangkat me, dorang kase sadia samua yang torang perlu di perjalanan.

¹¹Torang tinggal di pulo Malta itu tiga bulan. Di situ, ada kapal satu dari kota Aleksandria yang selama musim omba deng dingin, kapal itu balabu di situ. Di kapal itu pe muka ada lambang ‘Dewa Kambar Kastor deng Poluks’.[52] Torang nae kapal itu, kong balayar.

¹²Dari situ, torang balayar sampe di kota Sirakusa di pulo Sisilia. Di situ torang tinggal selama tiga hari.

¹³Dari situ, torang balayar iko di pinggir-pinggir pante di pulo itu sampe di kota Regium. Dia pe beso, angin selatan batiop kuat. Karna itu, kapal jadi laju skali, kong di hari kedua, torang so sampe di kota Putioli.

¹⁴Di situ, torang turung kong baku dapa deng orang-orang yang percaya pa Tuhan Yesus. Dorang bamohon pa torang la tinggal deng dorang sama-sama selama tuju hari. Abis itu, torang bajalang kaki pigi di kota Roma.

¹⁵Orang-orang di kota Roma yang percaya pa Tuhan Yesus so dengar torang mo ka sana. Jadi dorang jemput pa torang. Ada yang jemput di kota yang pe nama Pasar Apius. Kong yang laeng jemput pa torang di kota satu yang pe nama Tiga Penginapan. Waktu Paulus lia pa dorang, dia bilang tarimakasi banya pa Tuhan Allah, kong dia pe hati lebe tamba kuat.

¹⁶Pe sampe di kota Roma, Paulus tara dapa tahang di penjara, tapi dia dapa ijin tinggal di ruma satu, deng ada tentara satu yang jaga pa dia.

¹⁷Pe hari yang ketiga Paulus di kota Roma, dia suru pangge pa pemimpin-pemimpin agama Yahudi yang ada di situ bakumpul di ruma yang dia tinggal. Waktu dorang so takumpul, dia bilang bagini, “Sudara-sudara! Kita ada di kota Roma ini, barang torang pe sudara-sudara orang Yahudi yang ada di Yerusalem tangka pa kita kong dorang serakan kita pa pemerinta Roma. Padahal kita tara biking sala apa-apa pa torang pe bangsa, deng kita tara langgar torang pe orang tua dulu-dulu pe aturan.

¹⁸Pemerinta Roma so perna urus pa kita di Yudea, tapi tara dapa kita pe sala yang bole biking kita dapa hukuman mati. Jadi dorang mau kase bebas pa kita.

¹⁹ Tapi orang-orang Yahudi di sana tara tarima bae kita bebas, jadi terpaksa kita minta pa raja basar Roma yang urus kita pe perkara. Kita minta bagitu, itu bukang karna kita mo kase sala pa torang pe sudara-sudara yang satu bangsa.

²⁰Karna itu, kita minta mo baku dapa deng bapa-bapa di sini la kita kase tau, samua yang dorang kase sala pa kita itu tara butul. Kita dapa ika bagini, barang kita percaya deng yakin pa Mesias, Raja yang Tuhan Allah janji mo kase slamat pa torang orang Israel.”

²¹Dorang bilang pa Paulus, “Sampe skarang torang bolong tarima surat dari Yudea yang kase tau tentang ngana pe perkara, deng torang pe tamang-tamang yang pulang dari Yerusalem me tara carita ngana pe nama busu.

²²Jadi skarang, torang mo dengar sandiri dari ngana tentang aliran Nasrani, yang torang tau di mana-mana orang-orang tara suka.”

²³Abis itu, dorang tentukan satu hari lagi la mo baku dapa ulang deng Paulus. Pas hari itu, banya skali orang datang pa Paulus pe tampa tinggal. Pagi sampe sore, Paulus kase tau deng basaksi pa dorang tentang Tuhan Allah Berkuasa sebagai Raja pa Dia pe umat. Paulus me pake ayat-ayat yang ada di lima kitab Musa deng ayat-ayat di nabi-nabi laeng pe kitab supaya dorang mangarti kong percaya pa Yesus.[53]

²⁴Dari apa yang Paulus bilang itu, ada orang-orang di situ yang percaya, tapi ada yang tara percaya.

²⁵Jadi, dorang mulai baku malawang sampe ada yang mau kaluar dari Paulus pe tampa tinggal. Kong sebelum dorang kaluar, Paulus bilang lagi bagini, “Butul suda yang Roh Kudus kase tau pa torang pe orang tua dulu-dulu, itu so tatulis di kitab nabi Yesaya bagini,

²⁶ ‘Pigi suda pa orang-orang bangsa Israel kong bilang pa dorang bagini, biar ngoni dengar ulang-ulang, tapi ngoni tetap tara mangarti. Biar ngoni lia ulang-ulang, tapi ngoni tara tau dia pe arti.

²⁷Karna orang-orang bangsa ini karas kapala. Dorang pe talinga tara mau badengar, deng dorang pe mata me dorang tutu kuat-kuat, supaya jang dorang lia deng dong pe mata, jang dorang dengar deng dong pe talinga, deng jang dorang mangarti deng dong pe hati. Jadi dorang tara mau bertobat, kong Kita tara akan kase slamat pa dorang.’ ”

²⁸Abis itu, Paulus bilang lagi, “Jadi sudara-sudara, ngoni musti tau, orang-orang yang bukang Yahudi itu mo dapa slamat dari Tuhan Allah, barang dorang mau dengar deng tarima Kabar Bae dari Tuhan Allah ini yang biking dorang slamat.” [

²⁹Pe abis Paulus bilang bagitu, orang-orang Yahudi itu pulang. Tapi dorang pe pendapat memang tara baku maso.]

³⁰Di kota Roma, Paulus tinggal selama dua taong di ruma yang dia sewa. Deng sanang hati dia tarima pa samua orang yang datang pa dia.

³¹Paulus kase tau pa dorang tentang bagimana Tuhan Allah Berkuasa sebagai Raja pa Dia pe umat. Dia me kase ajar pa dorang tentang Tuhan Yesus Kristus. Dia bicara turus tarang deng barani, kong tarada yang larang pa dia.