Read Malay, North Moluccan Kisah Para Rasul 5 Bible Online

Kisah Para Rasul 5 - Malay, North Moluccan bible

Kisah Para Rasul 5

¹Ada laki-laki satu, dia pe nama Ananias. Dia pe bini pe nama Safira. Dorang dua jual dong pe tana.

²Kong doi dari hasil jual tana itu, ada yang Ananias so tahang, kong dia pe bini me tau itu, baru dia pe sisa dia kase pa Yesus pe utusan-utusan yang orang sebut rasul-rasul.

³Kong Petrus bilang, “Ananias, bikiapa kong ngana kase biar Iblis, setang-setang pe raja kuasai ngana pe hati, sampe ngana so bafoya pa Roh Kudus? Doi hasil jual tana itu ada yang ngana so tahang, to? Tapi ngana bilang kata, so kase samua pa torang.

⁴Bagini Ananias, tana itu ngana tara jual me tetap ngana punya. Deng biar ngana jual me, doi tana itu tetap ngana pe hak. Ngana mo pake bili apa saja tersera pa ngana. Tapi, bikiapa kong ngana ada rencana yang tara bae di ngana pe hati? Ngana bukang bafoya pa manusia saja tapi ngana bafoya pa Tuhan Allah.”

⁵Waktu Ananias dengar Petrus bilang bagitu, Ananias langsung tabanting di tana kong mati. Samua orang yang dengar kejadian itu jadi tako skali.

⁶Turus babarapa orang muda datang di situ, kong dorang bungkus Ananias pe mayat deng kaeng. Abis itu, dorang pikul kong pigi kubur pa dia.

⁷Kira-kira so lewat tiga jam, dia pe bini Safira datang, tapi dia tara tau apa yang so jadi pa Ananias.

⁸Kong Petrus bilang pa dia, “Coba ngana kase tau pa kita, butul tana itu pe harga bagini?” Safira bilang, “Butul, dia pe harga itu suda.”

⁹Petrus bilang pa dia, “Bikiapa kong ngoni dua satu hati mo coba Tuhan pe Roh? Coba ngana lia! Orang-orang yang baru kubur ngana pe laki itu so badiri di muka pintu. Dorang me mo bawa pa ngana la mo kubur.”

¹⁰Waktu itu suda, Safira langsung tabanting kong mati di Petrus pe muka. Waktu orang-orang muda itu bale kong maso di ruma itu, dorang lia Safira so mati. Jadi, dorang pikul pa dia lagi kong pigi kubur kase baku dekat deng dia pe laki.

¹¹Pe dengar kejadian itu, samua orang yang percaya pa Yesus deng orang laeng yang ada di kota itu, jadi tako skali.

¹²Waktu itu lagi, Yesus pe rasul-rasul biking banya mujizat deng tanda-tanda yang kase tunju Tuhan Allah pe kuasa di orang banya pe muka. Samua orang percaya, dorang satu hati bakumpul di Ruma Ibada Pusat pe teras, yang pe nama, ‘Teras Salomo’.

¹³Kong, orang-orang laeng tara ada yang barani bagabung deng dorang. Tapi dorang hormati skali pa orang-orang percaya deng pa rasul-rasul itu.

¹⁴Deng tiap hari orang yang percaya pa Tuhan Yesus lebe tatamba banya, laki-laki deng parampuang.

¹⁵Jadi, dorang bawa orang-orang saki di jalang basar kong kase tidor pa dong di tikar, supaya kalu Petrus lewat, biar cuma dia pe bayangan saja kanal pa dorang, dorang jadi sembu.

¹⁶Deng ada lagi banya orang dari kota-kota yang dekat Yerusalem, dong bawa orang-orang saki deng orang-orang yang kemasukan setang. Kong samua orang itu dapa kase sembu.

¹⁷Waktu itu, agama Yahudi pe imam basar deng samua orang agama Yahudi dari aliran Saduki yang ada deng dia, dorang mangiri karna apa yang rasul-rasul biking.

¹⁸Jadi, dorang tangka pa rasul-rasul itu, turus kase maso pa dorang di penjara.[9]

¹⁹Tapi dia pe malam itu saja, Tuhan pe malaekat satu datang kong buka penjara pe pintu-pintu, turus bawa pa dorang kaluar. Dia bilang,

²⁰“Ngoni pigi suda ka sana di Ruma Ibada Pusat pe kompleks, kong kase ajar pa orang-orang Kabar Bae tentang Yesus Kristus yang bole biking dorang hidup deng Tuhan Allah slama-lamanya.”

²¹Dorang dengar parenta itu, turus pe amper siang dong maso di Ruma Ibada Pusat pe kompleks, turus dorang kase tau Kabar Bae di situ. Waktu itu me, imam basar deng orang Yahudi laeng yang sama-sama deng dia, pangge pa agama Yahudi pe kumpulan yang paling tinggi yang pe nama Mahkama Agama.[10] Dorang bakumpul kong suru ambe pa rasul-rasul itu dari penjara.

²²Tapi waktu orang-orang yang dapa suru itu sampe di penjara, dorang lia rasul-rasul itu so tarada di situ. Kong dorang bale kase tau pa kumpulan Mahkama Agama.

²³Dorang bilang bagini, “Waktu torang sampe di penjara, torang lia, penjara ada takunci bae-bae deng orang-orang yang bajaga me ada di muka pintu. Tapi waktu torang buka penjara pe pintu itu, torang lia so tara orang di dalam.”

²⁴Pe dengar laporan itu, kapala penjaga Ruma Ibada Pusat deng imam-imam kapala jadi bingung deng apa yang jadi pa rasul-rasul itu kong dorang tako apa yang mo jadi lagi nanti.

²⁵Tapi ada satu orang datang kase tau pa dorang, “Ee bapa-bapa, coba ngoni lia, orang-orang yang ngoni kase maso di penjara itu, skarang ini dorang ada di Ruma Ibada Pusat pe kompleks, deng dorang ada mangajar pa orang banya di situ!”

²⁶Pe dengar orang lapor bagitu, kapala penjaga deng dia pe ana bua pigi di Ruma Ibada Pusat, kong ambe ulang pa rasul-rasul itu deng bae-bae. Dorang ambe bae-bae, karna dong tako pa orang banya yang sanang pa rasul-rasul itu. Jang sampe orang banya yang sanang itu mo lempar pa dorang deng batu.

²⁷Dorang bawa ulang pa rasul-rasul itu kong kase mangada pa kumpulan Mahkama Agama. Turus, imam basar urus pa dorang.

²⁸ Dia bilang, “Torang so larang karas pa ngoni to, jang mangajar lagi tentang Orang itu. Tapi ngoni tetap biking turus, sampe samua orang di Yerusalem so dengar ngoni pe ajaran itu. Baru ngoni kase sala lagi pa torang, bilang kata, gara-gara torang sampe Orang itu mati.”

²⁹Tapi Petrus deng rasul-rasul yang laeng bilang, “Torang musti lebe dengar pa Tuhan Allah, bukang pa manusia!

³⁰Tuhan Allah yang torang samua pe orang tua dulu-dulu jaga semba, Dia itu yang so kase hidup ulang pa Yesus yang ngoni bunu di kayu salib.

³¹Yesus itu suda yang Tuhan Allah so angka kong taru di tampa yang terhormat pa Tuhan Allah pe sabla kanan. Skarang Yesus so jadi Pemimpin deng yang kase slamat pa torang orang Israel, supaya torang bertobat kong iko pa Tuhan Allah, deng bagitu Tuhan Allah mo kase ampun pa torang.

³²Torang ini yang jadi saksi tentang samua itu, barang torang so lia deng torang pe mata kapala sandiri. Roh Kudus me tau samua itu butul. Roh Kudus itu yang Tuhan Allah so kase pa samua orang yang dengar-dengaran pa Dia.”

³³Pe dengar Petrus puji pa Yesus deng tudu dorang yang bunu pa Yesus, kumpulan Mahkama Agama itu mara skali, sampe dong biking rencana untuk bunu pa rasul-rasul itu.

³⁴Tapi ada satu orang dari aliran Farisi di Mahkama Agama itu, dia pe nama Gamaliel. Dia ini guru agama Yahudi yang ahli lima kitab Musa, deng orang-orang hormati pa dia. Dia badiri, turus suru orang-orang kase kaluar rabu-rabu pa rasul-rasul dari situ.

³⁵Abis itu, Gamaliel bilang pa dia pe tamang-tamang di Mahkama Agama itu, “Sudara-sudara orang Israel, ngoni musti pikir bae-bae apa yang ngoni mo biking pa orang-orang ini!

³⁶Barang, coba torang inga dulu: perna ada satu orang dia pe nama Teudas, dia datang kong biking diri sama deng orang penting, sampe kira-kira ada ampa ratus orang yang iko pa dia. Tapi dia dapa bunu kong orang-orang itu samua lari talamburang sampe so tarada sama skali.

³⁷Abis Teudas, ada satu lagi dia pe nama Yudas. Dia itu orang Galilea. Dia tara setuju deng sensus yang pemerinta Roma ada biking. Jadi, dia pangge banya orang jadi dia pe ana bua la marontak pa pemerinta Roma. Tapi dia pe ahir kabawa, dia lagi dapa bunu kong dia pe ana bua talamburang kasana-kamari.

³⁸Jadi skarang sudara-sudara, kita kase nasehat, lebe bae torang jang biking apa-apa pa orang-orang ini. Kase biar suda pa dorang. Barang, kalu dorang pe ajaran itu cuma dari manusia, pasti mo ilang sandiri.

³⁹Tapi kalu ajaran itu memang butul dari Tuhan Allah, ngoni tara mampo kase berenti pa dorang, mala dia pe ahir kabawa nanti ngoni sandiri yang baku malawang deng Tuhan Allah.” Pe dengar bagitu, anggota-anggota Mahkama Agama itu tarima samua yang Gamaliel bilang.

⁴⁰Turus, dorang pangge pa rasul-rasul itu kong dong cuma suru pukul pa dorang deng tali. Dorang me larang pa rasul-rasul itu, supaya jang kase ajar tentang Yesus pa orang-orang. Abis itu, dorang kase bebas pa rasul-rasul itu.

⁴¹Pe kaluar dari Mahkama Agama pe tampa urus perkara, rasul-rasul itu sanang skali karna Tuhan Allah anggap dorang pantas dapa siksa karna iko pa Tuhan Yesus.

⁴²Tiap hari dorang mangajar di Ruma Ibada Pusat pe kompleks deng di orang-orang pe ruma. Dorang kase tau Kabar Bae tentang Yesus itu Mesias suda, Raja yang Tuhan Allah janji mo kase slamat pa manusia.