Read Malay, North Moluccan Kisah Para Rasul 7 Bible Online

Kisah Para Rasul 7 - Malay, North Moluccan bible

Kisah Para Rasul 7

¹Kong imam basar tanya pa Stefanus, “Butul yang dong tudu pa ngana itu?”

² Stefanus bilang, “Bapa-bapa deng sudara-sudara, coba ngoni dengar dulu. Ngoni masi inga, to? Dulu, torang pe orang tua dulu-dulu Abraham tinggal di daera Mesopotamia, sebelum dia tinggal di kota Haran. Di situ, Tuhan Allah yang luar biasa, kase tunju Dia pe diri pa Abraham,

³kong bilang, ‘Abraham, kase tinggal suda ngana pe daera ini deng ngana pe sudara-sudara, kong pigi suda tinggal di satu tampa yang Kita mo kase tunju pa ngana.’

⁴Jadi, Abraham kaluar dari orang Kasdim pe tampa tinggal di daera Mesopotamia itu, kong pigi tinggal di kota Haran. Kong waktu Abraham pe papa so mati, Tuhan Allah suru pa Abraham bapinda dari kota Haran itu, pigi di tampa yang torang tinggal skarang ini.

⁵ Waktu itu, Tuhan Allah bolong kase tana pa Abraham biar cuma satu jingkal. Tapi Tuhan Allah janji nanti mo kase tana ini pa Abraham deng pa dia pe ana cucu. Padahal waktu itu Abraham bolong ada ana.

⁶ Ini yang Tuhan Allah bilang, ‘Ngana pe turunan mo tinggal pa orang laeng pe daera. Kong orang-orang di daera itu mo biking dorang jadi orang karja yang karja paksa deng mo dapa siksa, pe lama ampa ratus taong.

⁷Tapi Kita mo hukum pa bangsa yang biking sampe dorang karja paksa itu. Abis itu, ngana pe turunan itu akan kaluar dari daera itu, kong dorang mo semba pa Kita di tampa ini.’

⁸ Abis Tuhan Allah bilang bagitu, Dia kase sah Dia pe janji deng Abraham itu deng cara dorang orang Yahudi yang laki-laki musti dapa sunat.[13] Jadi waktu Abraham so dapa ana Ishak, dia kase sunat ana itu waktu ana itu pe umur delapan hari. Bagitu lagi waktu Ishak dapa ana Yakub, dia me biking bagitu. Kong Yakub me biking bagitu pa dia pe ana dua blas orang, yang jadi torang orang Yahudi pe orang tua dulu-dulu.

⁹ Kong torang pe orang tua dulu-dulu itu mangiri pa Yusuf, padahal dia itu dorang pe ade sandiri. Jadi, dorang jual pa dia pa orang yang bawa pa dia di Mesir. Tapi Tuhan Allah tara perna kase tinggal pa Yusuf.

¹⁰Dia kase Dia pe bae pa Yusuf kong kase lapas samua Yusuf pe sengsara. Tuhan Allah biking dia pande deng tau ator samua, sampe raja Mesir me sayang pa dia. Karna itu, raja Mesir angka pa dia jadi pemimpin untuk satu tana Mesir deng di raja pe istana.

¹¹Tara lama bagini, ada kelaparan di samua tana Mesir deng tana Kanaan. Kelaparan itu hebat skali, sampe orang-orang me so sengsara bae-bae. Kong torang pe orang tua dulu-dulu me so tara dapa makanang.

¹²Waktu Yakub dengar ada gandum di Mesir, dia suru dia pe ana-ana pigi ka sana. Itu pertama kali dorang pigi di Mesir.

¹³ Abis itu, dorang pulang. Kong waktu dorang pigi yang kedua kali mo bili gandum di Mesir, Yusuf kase kanal dia pe diri pa dia pe sudara-sudara. Waktu itu suda, baru raja Mesir dapa tau tentang Yusuf pe keluarga.

¹⁴Turus, Yusuf suru pi ambe pa dia pe papa Yakub deng dia pe keluarga samua la dong tinggal di Mesir. Dorang samua itu ada tuju pulu lima orang.

¹⁵Jadi, Yakub pigi tinggal di tana Mesir. Dia deng Dia pe ana-ana tinggal di situ sampe mati. Dorang itu torang pe orang tua dulu-dulu.

¹⁶So lama skali, baru dorang pe tulang-tulang dapa kase pulang di Kanaan, di kampong Sikhem, di kubur goa yang Abraham bili dari Hemor pe ana-ana, pake perak.

¹⁷ Tapi, so mo sampe dia pe waktu Tuhan Allah mo kase bebas pa torang pe orang tua dulu-dulu dari tana Mesir, sama deng Dia so perna janji pa Abraham. Kong waktu itu, dorang so lebe tatamba banya,

¹⁸sampe ada raja satu yang baru mulai berkuasa di tana Mesir. Raja itu tara tau Yusuf pe bae pa orang Mesir dulu.

¹⁹Kong dia jaga kase foya pa torang pe orang tua dulu-dulu deng jaga siksa pa dorang. Dia me paksa pa dorang supaya buang dong pe ana kacil yang mera-mera la mati.

²⁰Pas waktu itu suda, Musa lahir, kong dia itu paling bagus pa Tuhan Allah pe muka. Musa pe keluarga piara sambunyi-sambunyi pa dia pa dorang pe ruma, pe lama tiga bulan.

²¹Dia pe ahir kabawa, terpaksa dorang buang[14] pa dia, barang dorang so tara bisa kase sambunyi lagi pa dia. Tapi raja Mesir pe ana parampuang ambe pa dia, kong piara pa dia sama deng dia pe ana sandiri.

²²Di situ, Musa dapa kase ajar orang Mesir pe ajaran samua. Karna itu, dia jadi pande bicara deng samua dia bisa biking.

²³Satu kali, waktu Musa pe umur so ampa pulu taong, dia ingin kaluar dari istana la pigi lia pa dia pe sudara-sudara, orang-orang Israel.

²⁴Waktu dia ka sana, dia dapa lia dia pe sudara satu orang Israel dapa siksa dari orang Mesir satu. Turus dia badekat mo tolong pa dia pe sudara itu, kong bunu pa orang Mesir itu.

²⁵Dia sangka dia pe sudara-sudara mo mangarti, Tuhan Allah pake pa dia untuk mo kase bebas pa dorang orang Israel dari dorang pe sengsara di Mesir itu. Tapi ternyata dorang tara mangarti.

²⁶Dia pe beso, Musa dapa lia orang Israel dua orang baku pukul. Kong dia badekat ka sana mo kase dame pa dong dua, dia bilang, ‘Woe! Bikiapa kong ngoni dua baku pukul? Ngoni dua kan basudara!’

²⁷Tapi orang yang pukul kamuka pa dia pe tamang itu tola pa Musa, kong bilang, ‘Sapa yang angka pa ngana jadi torang pe pemimpin? Sapa yang tunju pa ngana jadi torang pe tukang urus perkara?

²⁸Bikiapa! Ngana mo bunu pa kita sama deng kalamaring ngana bunu pa orang Mesir itu?’

²⁹ Pe dengar dia bilang bagitu, Musa langsung kase tinggal tana Mesir itu kong pigi di tana Midian. Di situ, dia kawing kong dapa ana dua, samua laki-laki.

³⁰Satu kali, waktu Musa so tinggal di situ ampa pulu taong, malaekat satu kase tunju dia pe diri pa Musa di gunung Sinai di padang gurun. Malaekat itu kase tunju dia pe diri dari tenga-tenga api yang manyala di pohong kacil yang baduri.

³¹Musa jadi herang waktu lia bagitu, kong dia pigi badekat di situ la mo perhatikan rumpu yang baduri itu. Kage-kage Tuhan Allah pe suara bilang bagini,

³²‘Kita ini suda Tuhan Allah yang ngana pe orang tua dulu-dulu, Abraham, Ishak deng Yakub, jaga semba.’ Pe dengar suara itu, Musa langsung totofore kong so tara barani balia di situ lagi.

³³Abis itu, Tuhan Allah bilang lagi pa dia, ‘Lapas ngana pe sandal, karna tana yang ngana ada injang itu tana yang suci.

³⁴Kita so perhatikan Kita pe umat yang ada sengsara di Mesir sana, deng Kita so dengar dorang bataria stenga mati. Kong Kita turung kamari mo kase bebas pa dorang. Mari suda, Kita mo utus pa ngana la ngana bale ulang di Mesir kong kase bebas pa dorang dari sana.’

³⁵Musa ini suda yang dulu orang-orang Israel tara tarima pa dia deng dorang bilang pa dia, ‘Sapa yang angka pa ngana jadi torang pe pemimpin? Sapa yang tunju pa ngana jadi torang pe tukang urus perkara?’ Padahal, Tuhan Allah sandiri yang utus pa Musa pake Dia pe malaekat yang kase tunju dia pe diri pa Musa dari dalam rumpu yang baduri. Di situ, Tuhan Allah utus pa Musa jadi orang Israel pe pemimpin la kase bebas pa orang Israel dari tana Mesir.

³⁶ Musa itu lagi yang bawa pa orang Israel kaluar dari tana Mesir. Dia biking mujizat-mujizat deng tanda-tanda yang kase tunju Tuhan Allah pe kuasa waktu dorang di Mesir, di Laut Mera deng di padang gurun, selama ampa pulu taong.

³⁷ Musa ini lagi yang bilang pa orang-orang Israel bagini, ‘Tuhan Allah mo utus Nabi satu pa ngoni yang mo kase turus Tuhan Allah pe pasáng, sama deng Dia so utus pa kita jadi nabi. Orang itu satu dari torang orang Israel pe turunan.’

³⁸ Musa ini suda yang ada bajalang sama-sama deng torang pe orang tua dulu-dulu di padang gurun. Waktu di gunung Sinai, ada malaekat yang bicara deng dia, kong dia yang kase sampe malaekat pe bicara itu pa torang pe orang tua dulu-dulu. Dia kase tau pa dorang, Tuhan Allah pe firman yang bisa biking sampe torang hidup deng Tuhan Allah slama-lamanya.

³⁹Tapi torang pe orang tua dulu-dulu tara mau dengar deng tara tarima pa Musa. Mala dalam dorang pe hati dorang suka mo bale ulang di Mesir.

⁴⁰ Kong dorang me bilang pa Harun bagini, ‘Bapa, Musa ini yang bawa pa torang kaluar dari tana Mesir, tapi skarang torang so tara tau dia pe keadaan bagimana. Jadi, biking suda patong-patong la torang semba. Nanti patong-patong itu yang mo pimpin pa torang.’

⁴¹Jadi waktu itu suda, dorang biking patong satu yang dia pe model sama deng sapi pe ana. Turus, dorang potong binatang kong biking korban persembahan pa patong itu. Abis itu, dorang rame-rame biking pesta untuk patong yang dorang so biking sandiri.

⁴² Pe lia itu, Tuhan Allah so tara mester pa dorang lagi, kong kase biar dorang semba bintang-bintang di langit. Samua itu jadi, sama deng yang nabi-nabi so tulis memang di Kitab Suci bagini, ‘Ee, orang-orang Israel! Selama ampa pulu taong ngoni tinggal di padang gurun itu, ngoni tara perna kase binatang korban persembahan pa Kita.

⁴³Mala ngoni cuma bawa ngoni pe puji-puji Molokh pe tenda kacil yang ada isi dia pe patong, ngoni me bawa patong bintang dari ngoni pe puji-puji Refan. Patong-patong itu yang ngoni biking untuk ngoni semba. Jadi, Kita mo buang pa ngoni di tampa yang jao skali di kota Babel pe sabla.’ ”

⁴⁴ Kong Stefanus bilang lagi, “Waktu torang pe orang tua dulu-dulu ada di padang gurun, dorang ada bawa Tenda satu yang basar, tampa yang Tuhan Allah jaga datang pa dorang. Tenda itu nabi Musa biking iko model yang Tuhan Allah so kase tunju pa dia.

⁴⁵Kong waktu dorang so mati di padang gurun, dorang pe ana-ana bawa maso Tenda itu kamari di Kanaan. Dorang biking bagitu, waktu Yosua pimpin pa dorang untuk rampas tana ini dari bangsa-bangsa laeng. Bangsa-bangsa itu Tuhan Allah user dari torang pe orang tua dulu-dulu pe muka. Kong Tenda itu dorang masi pake turus sampe Daud jadi raja.

⁴⁶ Daud itu, Tuhan Allah sayang, jadi Daud minta ijin pa Tuhan Allah la mo biking Ruma satu untuk Tuhan Allah yang Yakub jaga semba.

⁴⁷Tapi bukang Daud, nanti dia pe ana yang pe nama Salomo yang dapa biking Ruma itu.

⁴⁸Padahal, Tuhan Allah yang Paling Tinggi tara tinggal di ruma yang manusia biking. Dulu, ada nabi yang kase tau yang Tuhan Allah so bilang, bagini,

⁴⁹ ‘Kita pe kursi raja ada di langit, kong Kita pe tampa kaki ada di bumi. Jadi ruma apa yang ngoni bisa biking untuk Kita tinggal? Tara ada tampa yang pantas untuk kita baistrahat.

⁵⁰Barang, samua yang ada di dunia ini, Kita yang biking!’ ”

⁵¹ Kong Stefanus bilang lagi pa pemimpin-pemimpin Yahudi itu bagini, “Ngoni ini memang kapala batu! Ngoni pe hati so sama deng orang yang tara kanal pa Tuhan Allah, kong ngoni tara mau dengar-dengaran pa Dia. Ngoni salalu malawang pa Roh Kudus, sama deng ngoni pe orang tua dulu-dulu.[15]

⁵²Coba ngoni bilang, nabi mana yang ngoni pe orang tua dulu-dulu tara perna siksa? Mala dorang bunu pa nabi-nabi yang kase tau Yesus, Orang yang butul itu mo datang. Kong ngoni me sama saja deng dorang. Ngoni tau Dia so datang, tapi ngoni bahianat deng bunu pa Dia.

⁵³Deng ngoni bunu pa Dia itu, ngoni so langgar aturan-aturan di lima kitab Musa yang malaekat-malaekat so kase tau pa torang!”

⁵⁴Waktu kumpulan Mahkama Agama Yahudi dengar itu samua, dorang jadi hati saki kong mara skali pa Stefanus.

⁵⁵Tapi Stefanus yang Roh Kudus kuasai, dia bahaga ka atas di langit, kong dia lia Tuhan Allah pe kuasa yang luar biasa. Dia me lia Yesus badiri di tampa yang terhormat pa Tuhan Allah pe sabla kanan.

⁵⁶Turus Stefanus bilang bagini, “Coba lia! Kita lia sorga tabuka deng Anak Manusia badiri di tampa yang terhormat pa Tuhan Allah pe sabla kanan.”

⁵⁷Pe dengar bagitu, orang-orang yang ada di situ dorang bataria deng tutu dong pe talinga, turus dorang koroyo pa Stefanus.

⁵⁸Dorang hela pa dia kase kaluar dari kota, kong dorang lempar pa dia deng batu. Orang-orang yang jadi saksi di situ buka dong pe juba, kong taru di ana muda satu pe muka, dia pe nama Saulus.

⁵⁹Sementara dorang ada lempar pa Stefanus, Stefanus berdoa bagini, “Tuhan Yesus, tarima suda pa kita.”

⁶⁰Turus, dia berlutut kong babilang pa Tuhan deng suara yang kuat bagini, “Tuhan, jang hukum pa dorang, gara-gara dorang biking dosa ini!” Abis bilang bagitu, langsung Stefanus putus napas.