Read Malay, North Moluccan Roma 1 Bible Online

Roma 1 - Malay, North Moluccan bible

Roma 1

¹Sudara-sudara yang percaya di kota Roma. Salam dari kita Paulus. Kita ini orang yang jaga biking apa yang Kristus Yesus suru. Dia pili pa kita jadi Dia pe utusan yang orang jaga sebut rasul, deng Dia me kase tugas kusus pa kita untuk kase tau Kabar Bae dari Tuhan Allah pa orang-orang.

²Kabar Bae itu Tuhan Allah so janji dari dulu pa Dia pe nabi-nabi, kong dorang tulis itu di Kitab Suci.

³Kabar Bae itu tentang Anak Allah yang datang di dunia sebagai manusia, Dia lahir dari raja Daud pe turunan.

⁴Dia itu suda Yesus Kristus torang pe Tuhan. Torang dapa tau Dia itu Anak Allah, barang waktu Dia mati, kuasa dari Tuhan Allah pe Roh kase hidup ulang pa Dia.

⁵Kong karna Yesus Kristus itu, Tuhan Allah kase Dia pe bae pa kita sampe Dia pili pa kita jadi rasul untuk kase tau Kabar Bae tentang Yesus Kristus pa samua suku bangsa, supaya samua orang bole percaya, deng bole iko Yesus Kristus pe mau.

⁶Kong ngoni me termasuk di samua suku bangsa itu, Tuhan Allah so pili pa ngoni jadi Yesus Kristus pe umat.

⁷Kita tulis surat ini pa ngoni samua yang percaya yang tinggal di kota Roma. Ngoni Tuhan Allah sayang, deng Dia so pili pa ngoni la jadi Dia pe umat. Kita minta pa Tuhan Allah torang pe Bapa, deng pa Tuhan Yesus Kristus, supaya kase yang bae pa ngoni, deng salalu biking ngoni pe hati tetap tenang.

⁸Pertama, kita bilang tarimakasi pa Tuhan Allah karna ngoni orang-orang percaya di kota Roma. Barang ngoni pe percaya pa Yesus Kristus so kuat, sampe orang di seluru dunia so dengar tentang ngoni pe percaya itu.

⁹Kita salalu inga pa ngoni waktu kita berdoa, Tuhan Allah me tau. Dia itu yang kita semba deng hati yang sunggu-sunggu waktu kita kase tau Kabar Bae tentang Anak Allah.

¹⁰Waktu kita berdoa, kita minta pa Tuhan Allah supaya kalu itu Tuhan pe mau, Dia kase kesempatan pa kita untuk pigi pa ngoni skarang.

¹¹Barang, kita ingin skali baku dapa deng ngoni untuk kase ajar pa ngoni apa yang Roh Kudus ada ajar pa kita, supaya ngoni pe percaya lebe tamba kuat.

¹²Kita pe maksut, kalu kita ada sama-sama deng ngoni, torang bisa baku kase kuat torang pe percaya pa Yesus Kristus.

¹³ Sudara-sudara, kita mau supaya ngoni tau, so banya kali kita ingin pigi pa ngoni, tapi sampe skarang masi ada alangan. Kita mo pigi kase tau Kabar Bae supaya orang di situ yang bolong percaya mo jadi percaya, sama deng yang so jadi pa orang yang bukang Yahudi yang ada di tampa-tampa laeng.

¹⁴Kita ada beban supaya kase tau Kabar Bae itu pa samua orang: pa orang-orang yang tinggal di kota, deng pa orang-orang yang masi takablakang, pa orang-orang yang skola, deng pa orang-orang yang tara skola.

¹⁵Itu dia pe sebab, sampe kita pe hati ingin skali mo kase tau Kabar Bae tentang Yesus Kristus pa ngoni lagi yang tinggal di kota Roma.

¹⁶ Kita tara tako kase tau Kabar Bae tentang Yesus Kristus pa orang-orang, karna Kabar Bae itu ada kuasa dari Tuhan Allah yang bisa kase slamat pa samua orang yang percaya dari dosa-dosa. Kong bukang cuma orang Yahudi saja yang mo dapa slamat, tapi orang-orang yang bukang Yahudi lagi mo dapa slamat.

¹⁷ Kabar Bae itu ada kuasa dari Tuhan Allah, karna Kabar Bae itu kase tau bagimana supaya torang bole jadi orang yang tara sala pa Tuhan Allah pe muka. Dia pe cara, torang musti percaya pa Tuhan Allah, tarada cara laeng. Itu sama deng yang so tatulis di Kitab Suci bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka, kong dia yang mo hidup deng Tuhan Allah slama-lamanya.”

¹⁸Tuhan Allah yang ada di sorga mara pa manusia yang tara iko Dia pe mau deng yang jaga biking barang yang jahat. Apalagi dorang pe kajahatan itu me biking orang laeng tara iko ajaran yang butul tentang Tuhan Allah.

¹⁹Dorang tara alasan mo bela dong pe diri, karna sebenarnya dorang bisa tau ada Tuhan Allah yang berkuasa. Barang, Tuhan Allah sandiri so biking jelas pa dorang tentang sapa Dia.

²⁰Karna so dari dulu waktu Tuhan Allah biking dunia ini sampe skarang, biar manusia tara lia pa Dia, tapi manusia bole tau tentang Dia. Dorang bole tau Dia pe kuasa yang mo ada turus-turus, deng dorang me bole tau, Dia itu Tuhan. Jadi tarada alasan bilang dorang tara tau Tuhan Allah itu ada.

²¹ Dorang so tau Tuhan Allah itu ada, tapi dorang tara puji deng hormat pa Dia. Dorang me tara bilang tarimakasi pa Dia. Dorang so tara pikir tentang Dia tapi dorang cuma pikir barang yang tarada dia pe guna, deng dong pe hati so tara mangarti apa yang butul.

²²Dorang bilang kata, dorang pande, padahal sebenarnya dorang itu bodo.

²³ Dia pe ahir kabawa, dorang tara semba pa Tuhan Allah yang hebat deng yang hidup slama-lamanya. Mala dorang cuma semba pa patong yang cuma sementara saja ada di dunia ini. Patong itu pe model sama deng manusia, burung, binatang yang dia pe kaki ampa, deng binatang yang jaga maraya.

²⁴Karna dorang tara mau semba pa Tuhan Allah, Dia kase biar dorang iko dong pe mau sandiri, turus dorang iko dong pe napsu sampe biking hal-hal kotor deng dorang pe badan yang sebenarnya biking malu dong pe diri sandiri deng orang laeng.

²⁵Apa yang butul dari Tuhan Allah, dorang tara iko. Dorang so tara puji deng semba pa Tuhan Allah yang so cipta langit deng bumi, mala dorang cuma puji deng semba pa apa yang Tuhan Allah so cipta. Padahal cuma Tuhan Allah saja yang pantas dapa puji slama-lamanya. Amin.

²⁶Jadi karna dorang so tara semba lagi pa Tuhan Allah, Dia kase biar pa dorang iko dorang pe napsu tara bae yang biking malu dong pe diri sandiri. Parampuang-parampuang so tara suka pa laki-laki, mala dorang cuma baku suka deng parampuang saja.

²⁷Bagitu lagi deng laki-laki. Dorang so tara suka pa parampuang, mala dorang cuma iko dong pe napsu yang tara bae yang cuma baku suka deng laki-laki saja. Padahal apa yang dorang biking itu biking malu dong pe diri sandiri. Jadi dorang akan mo dapa hukuman yang pas iko deng apa yang dorang biking itu.

²⁸Deng karna dorang rasa dong tara perlu tau tentang Tuhan Allah, jadi Tuhan Allah kase biar dorang pe pikiran yang tara guna itu kuasai pa dorang. Dia pe ahir kabawa, dorang biking barang yang tara pantas dong biking.

²⁹Dorang pe hati ponong deng barang yang tara butul deng barang yang jahat. Dorang golojo samua-samua, cuma pikir yang jahat, mangiri, deng jadi tukang bunu. Kong dorang me jaga baku mara, deng tukang bafoya. Dorang suka orang laeng dapa cilaka deng suka bacarita tara bae tentang orang laeng.

³⁰Dorang itu jaga kase tara bae orang pe nama, binci pa Tuhan Allah, pandang enteng, sombong, suka bicara tinggi-tinggi, pintar biking barang yang jahat deng suka malawang pa orang tua.

³¹Kong dorang lagi tara mau tau apa yang butul, dorang tara setia, dorang tara sayang orang, deng dorang lagi tara rasa kasiang pa orang laeng.

³²Dorang itu so tau Tuhan Allah pe aturan yang bilang, “Orang yang jaga biking barang yang jahat itu, dorang pantas dapa hukuman mati.” Tapi biar dorang tau itu, dorang tetap biking barang yang jahat itu. Deng dorang me setuju orang laeng biking bagitu.