Read Malay, North Moluccan Roma 16 Bible Online

Roma 16 - Malay, North Moluccan bible

Roma 16

¹Deng kita pe surat ini, kita mo kase tau lagi pa ngoni tentang torang pe sudara parampuang satu yang percaya. Dia pe nama Febe, dia jaga bantu layani jemaat di kota Kengkrea.

²Nanti waktu dia pigi pa ngoni, kita minta supaya ngoni tarima pa dia deng bae-bae, barang dia so percaya pa Tuhan sama deng ngoni. Ngoni musti tarima pa dia deng bae-bae karna model bagitu yang orang-orang yang so jadi Tuhan Allah pe umat musti biking. Kong kita minta lagi, kalu dia perlu apa-apa pa ngoni, ngoni kase suda yang dia perlu, karna dia sandiri so kase bantuan pa banya orang deng pa kita lagi.

³ Kirim salam pa Priskila deng dia pe laki Akwila di sana. Dorang dua karja untuk Kristus Yesus sama-sama deng kita.

⁴Dorang dua itu perna sampe amper mati waktu kase slamat pa kita. Kita bilang tarimakasi banya pa dorang dua. Kong bukang cuma kita saja, tapi samua jemaat yang bukang Yahudi me ada bilang tarimakasi banya pa dong dua.

⁵Kirim salam lagi pa jemaat yang jaga bakumpul baibada pa dong Priskila deng Akwila pe ruma. Kirim salam lagi pa Epenetus, sudara yang percaya yang kita sayang. Dia itu yang kakamuka percaya pa Yesus Kristus di daera Asia Kecil.

⁶Kirim salam lagi pa Maria yang so karja karas untuk ngoni pe bae.

⁷Kirim salam lagi pa Andronikus deng Yunias yang satu bangsa deng kita, kong yang perna maso penjara sama-sama deng kita. Waktu kita bolong percaya pa Yesus Kristus, dorang dua itu so percaya, kong samua Tuhan Allah pe utusan yang orang sebut rasul, so kanal bae pa dorang.

⁸Kirim salam pa Ampliatus yang kita sayang. Dia yang sama-sama percaya pa Tuhan.

⁹Kirim salam lagi pa Urbanus, torang pe tamang yang karja sama-sama deng torang untuk Yesus Kristus. Kong kirim salam lagi pa Stakhis yang kita sayang.

¹⁰Kirim salam pa Apeles, yang dapa banya cobaan tapi tetap percaya pa Yesus Kristus. Kong kirim salam lagi pa orang-orang yang ada di Aristobulus pe dalam ruma.

¹¹Kirim salam pa Herodion, dia satu bangsa deng kita. Kirim salam lagi pa orang-orang yang percaya pa Tuhan yang ada di Narkisus pe dalam ruma.

¹²Kirim salam lagi pa Trifena deng Trifosa, dua sudara parampuang yang so karja karas untuk Tuhan. Kong salam lagi pa Persis, sudara parampuang yang kita sayang. Dia lagi so karja karas untuk Tuhan.

¹³ Kirim salam pa Rufus. Banya orang hormati pa dia, karna Tuhan so pili pa dia untuk biking Tuhan pe karja. Deng salam pa dia pe mama. Kita so anggap dia pe mama itu so sama deng kita pe mama sandiri.

¹⁴Kong kirim salam lagi pa Asinkritus, Flegon, Hermes, Patrobas, Hermas deng samua sudara yang percaya yang sama-sama deng dorang.

¹⁵Turus kirim salam lagi pa Filologus, Yulia, Nereus deng dia pe sudara parampuang. Deng kirim salam lagi pa Olimpas, deng lagi pa samua orang yang so jadi Tuhan Allah pe umat yang sama-sama deng dorang.

¹⁶Kalu ngoni bakumpul untuk baibada, ngoni baku kase salam[4] suda satu deng yang laeng untuk kase tunju ngoni baku sayang. Kong ada salam lagi pa ngoni dari samua Yesus Kristus pe jemaat yang ada di sini.

¹⁷Sudara-sudara, kita minta deng butul-butul pa ngoni, ati-ati pa orang yang jaga kase ajaran yang baku beda deng yang torang so ajar pa ngoni. Ati-ati karna dorang suka biking ngoni jadi tapisa-pisa deng biking ngoni jadi ragu-ragu deng ajaran yang torang so kase ajar pa ngoni. Jadi jang badekat pa dorang itu!

¹⁸Barang orang-orang yang macam bagitu, sebenarnya dorang tara karja untuk Yesus Kristus torang pe Tuhan, tapi dorang karja iko dong pe mau sandiri. Dorang buju deng kata-kata yang kase sadap di talinga pa orang yang masi bolong mangarti mana yang bae deng mana yang tara bae, sampe orang-orang me iko pa dorang pe ajaran yang tara butul.

¹⁹Sudara-sudara, samua orang so dengar kabar, ngoni iko Tuhan pe ajaran turus. Karna itu, kita sanang skali deng ngoni. Tapi kita suka supaya ngoni lebe tamba tau mana yang bae, deng tara usa suda biking barang yang jahat.

²⁰Tuhan Allah yang biking torang pe hati tetap tenang, jadi kita minta supaya Dia capat-capat mo kase ancor pa Iblis, setang-setang pe raja, kong Iblis itu mo tundu pa ngoni. Deng Kita minta pa Yesus, torang pe Tuhan supaya kase Dia pe bae pa ngoni turus.

²¹ Timotius kita pe tamang karja, ada kirim salam pa ngoni. Deng ada salam dari Lukius, Yason deng Sosipater, kita pe tamang-tamang yang sama-sama orang Yahudi.

²²Kita ini Tertius, kita yang tulis Paulus pe surat ini deng kita pe tangan sandiri iko apa yang Paulus bilang. Kita lagi pe salam pa ngoni yang so sama-sama percaya pa Tuhan.

²³ Gayus lagi ada kirim salam pa ngoni. Dia yang ada kase dia pe ruma untuk kita manumpang, deng dia lagi ada kase dia pe ruma pa jemaat la bakumpul untuk baibada. Kong Erastus, bendahara kota, deng torang pe sudara yang percaya yang pe nama Kwartus, ada kirim salam lagi pa ngoni.

²⁴[Kita minta pa Yesus Kristus, torang pe Tuhan, supaya Dia pe bae salalu ada untuk ngoni.]

²⁵Mari suda puji pa Tuhan Allah! Dia itu yang ada kuasa untuk biking ngoni pe percaya lebe tamba kuat, karna ngoni so dengar Kabar Bae tentang Yesus Kristus yang kita jaga kase tau pa orang-orang. Kabar Bae itu so lama skali, so deng ratus-ratus taong orang bolong tau,

²⁶tapi skarang baru Tuhan Allah kase tau pa torang manusia. Kabar Bae itu, Tuhan Allah so janji pa nabi-nabi dulu kong Dia suru dorang tulis itu supaya samua orang yang dari samua suku bangsa tau, kong dorang bole jadi percaya deng iko pa Yesus. Tuhan Allah itu salalu ada sampe slama-lamanya.

²⁷Cuma Dia saja yang tau samua-samua. Jadi mari torang puji deng hormat turus-turus pa Dia sampe slama-lamanya, karna apa yang Yesus Kristus so biking. Amin.