Read Malay, North Moluccan Roma 2 Bible Online

Roma 2 - Malay, North Moluccan bible

Roma 2

¹ Sudara-sudara, memang Tuhan Allah mo hukum pa samua orang yang jaga biking barang yang jahat macam tadi itu. Tapi ngoni me biking barang yang jahat itu, jadi ngoni tara ada alasan kase sala pa dorang. Karna kalu ngoni bilang dorang pantas Tuhan Allah hukum, itu sama saja deng ngoni so hukum ngoni pe diri sandiri.

²Torang tau, Tuhan Allah pe hukuman pa orang-orang yang biking barang yang jahat itu memang butul.

³Jadi ngoni yang jaga kase sala pa orang laeng, jang ngoni pikir ngoni mo dapa bebas dari Tuhan Allah pe hukuman, karna ngoni me jaga biking barang yang jahat.

⁴Ngoni so tau Tuhan Allah pe hati itu bae skali, Dia itu sabar deng Dia pe sayang itu tara abis-abis. Tapi jang ngoni pandang enteng kong bilang kata, ngoni so butul jadi tara usa suda ngoni bertobat. Pasti ngoni so tau, Tuhan Allah pe sabar deng pe bae pa ngoni itu ada dia pe maksut, Dia mau supaya ngoni bertobat.

⁵Tapi ngoni ini kapala batu, ngoni tara mau bertobat. Karna itu, ngoni sandiri yang biking ngoni pe hukuman lebe tamba barát di hari kiamat. Di waktu itu, Tuhan Allah mo kase tunju Dia pe mara deng mo kase hukuman yang adil pa samua orang.

⁶ Di hari kiamat itu, Tuhan Allah mo balas pa tiap-tiap orang iko apa yang orang itu so biking.

⁷Ada orang yang biking barang yang bae turus, karna dorang suka dapa puji deng hormat dari Tuhan Allah, deng dorang suka hidup deng Tuhan Allah slama-lamanya. Jadi pa dorang itu, Tuhan Allah mo kase hidup deng Dia slama-lamanya.

⁸Tapi ada lagi orang-orang yang cuma pikir dong pe diri sandiri saja. Dorang tara mau iko Tuhan Allah pe ajaran, dorang cuma iko dong pe mau sandiri yang suka biking jahat. Tuhan Allah mo mara skali, kong hukum pa dorang.

⁹Tuhan Allah akan kase hukuman pa samua orang yang suka biking barang yang jahat, sampe dorang sengsara deng menderita skali. Kong bukang cuma orang Yahudi saja, tapi orang-orang bukang Yahudi lagi me mo dapa hukuman.

¹⁰Tapi samua orang yang biking barang yang bae, nanti Tuhan Allah mo puji deng hormat pa dorang, deng Dia salalu biking dorang pe hati tetap tenang, bukang cuma pa orang-orang Yahudi saja, tapi pa orang-orang bukang Yahudi lagi.

¹¹ Barang, Tuhan Allah tara pili-pili orang.

¹²Orang-orang Yahudi itu so ada aturan di lima kitab Musa, jadi kalu dorang langgar aturan itu, itu berarti, dorang biking dosa, kong Tuhan Allah mo hukum pa dorang. Tapi kalu orang-orang yang bukang Yahudi, biar dorang tara tau aturan di lima kitab Musa, Tuhan Allah tetap anggap dorang berdosa kalu dorang biking sala. Dia mo hukum pa dorang bukang karna dorang tara iko aturan di lima kitab Musa, tapi karna dorang biking sala. Kong dorang itu akan tapisa deng Dia slama-lamanya.

¹³Karna bukang orang-orang yang dengar aturan di lima kitab Musa yang Tuhan Allah bilang dorang itu orang butul, tapi orang-orang yang biking aturan itu.

¹⁴Orang-orang yang bukang Yahudi tara tau aturan di lima kitab Musa. Tapi kalu dorang sandiri iko apa yang butul sama deng yang so tatulis di lima kitab Musa, itu pe arti, Tuhan Allah pe aturan ada di dalam dorang pe hati.

¹⁵Deng bagitu, dari dorang pe kalakuang itu torang dapa lia jelas, di dorang pe dalam hati sama deng so ada Tuhan Allah pe aturan yang ada di lima kitab Musa. Kong dorang tau mana yang sala deng mana yang butul. Jadi laeng kali, dorang pe hati kase sala pa dorang pe diri sandiri, tapi laeng kali di dorang pe hati, dorang anggap dorang pe diri itu butul.

¹⁶Kong kalu so hari kiamat, Kristus Yesus pake kuasa dari Tuhan Allah untuk mo adili pa manusia iko apa yang dorang biking, sampe barang yang tasambunyi di dorang pe dalam hati me, Dia mo adili samua. Itu yang kita jaga kase ajar pa orang-orang waktu kita kase tau Kabar Bae tentang Yesus Kristus di mana-mana.

¹⁷Torang orang Yahudi, torang ini orang-orang yang Tuhan Allah pili kakamuka jadi Dia pe umat, deng yang Tuhan Allah so kase aturan di lima kitab Musa. Karna itu, ada dari torang yang jadi sombong, gara-gara dorang pikir dorang itu pe hubungan yang lebe dekat deng Tuhan Allah.

¹⁸Kong torang orang Yahudi, torang tau Tuhan Allah pe mau yang musti torang biking. Torang tau mana yang butul karna torang so balajar dari aturan yang ada di lima kitab Musa.

¹⁹Deng torang lagi bole kase ajar pa orang laeng tentang ajaran yang butul, sama deng orang yang kase tunju jalang pa orang buta, kong sama lagi deng orang yang kase tarang pa orang yang hidup di galap.

²⁰Turus, torang orang Yahudi me tau torang bole kase ajar pa orang yang tara tau apa-apa. Torang me bole jadi guru pa orang yang bolong tau aturan, sama deng guru ajar ana kacil yang bolong tau aturan. Torang tau bagitu karna torang so tau samua aturan yang butul, aturan itu ada di lima kitab Musa.

²¹Jadi, karna torang jaga kase tau apa yang butul pa orang laeng, torang sandiri me musti balajar dari apa yang torang so kase ajar pa dorang. Torang ajar, “Jang pancuri,” tapi bikiapa kong ada dari torang yang suka pancuri?

²²Torang jaga kase tau, “Jang baku suka deng orang pe laki atau orang pe bini,” bikiapa kong ada dari torang yang baku suka deng orang pe laki atau orang pe bini? Kong torang bilang, torang orang Yahudi tara suka pa orang pe puji-puji yang dong jaga semba-semba, tapi bikiapa kong ada dari torang yang suka pancuri barang-barang dari tampa yang dong jaga semba-semba itu?

²³Torang bangga skali jadi orang Yahudi karna torang yang kakamuka tarima aturan di lima kitab Musa. Tapi, bikiapa ada dari torang yang biking Tuhan Allah pe nama jadi tara bae deng cara torang langgar aturan?

²⁴ Itu sama deng yang so tatulis di Kitab Suci bagini, “Gara-gara ngoni orang-orang Yahudi pe kajahatan sampe orang-orang bukang Yahudi kase tara bae Tuhan Allah pe nama.”

²⁵Torang orang Yahudi, torang dapa sunat supaya jadi tanda, Tuhan Allah pili pa torang jadi Dia pe umat. Kalu torang biking aturan di lima kitab Musa, sunat itu ada arti torang itu butul-butul Tuhan Allah punya. Tapi kalu torang tara iko aturan di lima kitab Musa, sunat itu jadi tarada arti.

²⁶Jadi kalu ada orang yang bukang Yahudi yang tara dapa sunat tapi dia iko aturan di lima kitab Musa, yang pasti Tuhan Allah tarima pa dia sama deng orang Yahudi yang so dapa sunat, to?

²⁷Deng kalu orang yang bukang Yahudi dari lahir so iko aturan di lima kitab Musa, dia jadi kase tunju, torang orang Yahudi itu sala. Barang torang itu tau aturan yang so tatulis di lima kitab Musa deng torang me so dapa sunat, tapi torang sandiri yang langgar aturan itu.

²⁸Barang, torang orang Yahudi yang butul-butul itu, bukang cuma karna torang lahir dari torang pe orang tua yang Yahudi, deng bukang cuma karna tong so dapa sunat.

²⁹ Tapi kalu torang jadi orang Yahudi yang butul-butul itu, torang dapa sunat itu bukang cuma karna iko aturan sunat, tapi karna torang so kase tong pe diri butul-butul pa Tuhan Allah kong Roh Kudus bakarja pa tong pe dalam hati sampe torang pe hidup beruba. Torang itu mo dapa puji bukang dari manusia tapi dari Tuhan Allah.