Read Malay, North Moluccan Roma 4 Bible Online

Roma 4 - Malay, North Moluccan bible

Roma 4

¹Jadi, apa yang musti torang biking supaya torang jadi orang yang tara sala pa Tuhan Allah pe muka? Torang ambe conto pa Abraham. Dia itu torang pe orang tua dulu-dulu.

²Kalu misalnya Tuhan Allah biking Abraham itu jadi orang yang tara sala karna dia biking barang yang bae, itu berarti, Abraham ada alasan mo puji dia pe diri sandiri. Tapi dia tarada alasan apa-apa mo puji dia pe diri pa Tuhan Allah pe muka.

³ Karna di Kitab Suci ada tatulis bagini, “Abraham percaya pa Tuhan Allah, deng karna dia pe percaya itu, Tuhan Allah tarima pa dia jadi orang yang tara sala pa Tuhan Allah pe muka.”

⁴Dia pe conto bagini: kalu orang yang bakarja, dia pasti dapa gaji. Deng, gaji itu bukang hadia, tapi memang itu dia pe hak yang dia dapa dari dia pe suar lala sandiri.

⁵Tapi torang tara bagitu. Torang jadi orang yang tara sala pa Tuhan Allah pe muka, bukang karna torang pe suar lala, tapi karna torang percaya pa Dia. Dia itu yang biking torang jadi orang yang tara sala pa Dia pe muka, bukang karna torang jaga biking barang yang butul, tapi karna torang pe percaya pa Dia. Dia itu yang bole biking orang yang malawang Dia pe parenta jadi orang yang tara sala pa Dia pe muka.

⁶Bagitu lagi deng raja Daud ada bilang dulu. Dia ada bilang, orang-orang yang Tuhan Allah biking dorang jadi orang yang tara sala pa Dia pe muka, dorang itu sanang skali, karna Tuhan Allah tarima pa dorang, bukang karna dorang biking barang yang bae, tapi karna dorang pe percaya.

⁷ Bagini raja Daud bilang, “Paling sanang skali dorang yang so dapa ampun dari dorang pe kalakuang yang jahat deng dari dorang pe dosa-dosa samua.

⁸Paling sanang skali dorang yang Tuhan Allah so tara inga-inga lagi dorang pe dosa-dosa.”

⁹Rasa sanang itu bukang cuma untuk orang yang dapa sunat saja, tapi untuk orang yang tara dapa sunat lagi. Barang torang so bilang tentang conto Abraham tadi, Tuhan Allah tarima pa dia jadi orang yang tara sala pa Tuhan Allah pe muka, itu karna dia pe percaya pa Tuhan Allah.

¹⁰Turus, tempo apa Tuhan Allah biking dia jadi orang yang tara sala? Apa waktu dia so dapa sunat atau waktu dia bolong dapa sunat? Yang pasti waktu dia bolong dapa sunat.

¹¹ Jadi Abraham so percaya dulu pa Tuhan Allah, baru dia dapa sunat. Kong sunat itu yang jadi tanda, Tuhan Allah so tarima pa dia jadi orang yang tara sala karna dia pe percaya pa Tuhan Allah. Deng karna dia pe percaya itu, Abraham jadi samua orang yang percaya pe papa. Biar orang-orang yang percaya itu tara sunat, Tuhan Allah tetap tarima pa dorang jadi orang yang tara sala, karna dorang pe percaya.

¹²Kong Abraham me jadi papa pa torang orang-orang Yahudi yang iko aturan sunat di lima kitab Musa. Dia jadi torang pe papa bukang karna torang dapa sunat tapi karna torang pe percaya pa Tuhan Allah sama deng Abraham pe percaya waktu dia bolong dapa sunat.

¹³ Tuhan Allah janji mo kase dunia pa Abraham deng pa dia pe turunan, bukang karna Abraham jaga iko aturan di lima kitab Musa, tapi karna Abraham percaya pa Tuhan Allah, itu sampe Tuhan Allah biking dia jadi orang yang tara sala pa Tuhan Allah pe muka.

¹⁴ Karna kalu cuma orang yang biking aturan di lima kitab Musa saja yang dapa Tuhan Allah pe janji, itu berarti, tarada dia pe guna orang percaya pa Tuhan Allah, kong, Tuhan Allah pe janji me tara jadi.

¹⁵Barang, kalu orang mo iko aturan di lima kitab Musa, dia tara mampo iko aturan itu, mala dia cuma biking Tuhan Allah mara sampe Tuhan Allah mo hukum pa dorang. Tapi kalu tarada aturan di lima kitab Musa, pasti tarada orang yang mo langgar aturan itu.

¹⁶ Jadi torang mo dapa Tuhan Allah pe janji itu cuma karna torang percaya pa Dia saja. Tuhan Allah kase Dia pe janji itu karna Dia pe bae, supaya samua Abraham pe turunan bole dapa Tuhan Allah pe janji. Kong Tuhan Allah pe janji itu bukang cuma untuk orang Yahudi saja yang jaga iko aturan di lima kitab Musa, tapi pa samua orang yang percaya sama deng Abraham. Abraham itu torang samua yang percaya pe papa.

¹⁷ Itu sama deng yang Tuhan Allah ada bilang tentang dia di Kitab Suci bagini, “Kita so pili pa ngana jadi papa untuk banya suku bangsa di dunia.” Kong Abraham percaya apa yang Tuhan Allah bilang itu. Tuhan Allah itu yang kase hidup orang yang so mati, deng Dia me yang biking dunia ini dari yang bolong ada, jadi ada, cuma deng Dia pe kata-kata saja.

¹⁸ Abraham percaya Tuhan Allah pe janji. Jadi biar dia so tua deng dia rasa so tara mungkin mo dapa ana, dia pe harapan tetap kuat deng dia percaya, dia mo jadi papa pa banya suku bangsa di dunia sama deng Tuhan Allah ada bilang, “Nanti ngana pe turunan mo jadi banya.”

¹⁹ Waktu itu, Abraham pe umur kira-kira so saratus taong, jadi dia so talalu tua mo dapa ana. Deng dia pe bini, Sara, tara bisa dapa ana. Tapi biar Abraham tau samua itu, dia pe percaya tetap kuat.

²⁰Abraham tetap percaya kong tara ragu deng Tuhan Allah pe janji. Mala dia pe percaya lebe tamba kuat, deng dalam dia pe hidup, dia salalu puji deng hormat pa Tuhan Allah.

²¹Abraham yakin skali Tuhan Allah akan biking Dia pe janji itu.

²²Kong karna Abraham pe percaya itu, sampe ada tatulis tentang dia di Kitab Suci bagini, “Tuhan Allah tarima pa dia jadi orang yang tara sala pa Tuhan Allah pe muka.”

²³Kong apa yang tatulis tentang Abraham yang Tuhan Allah tarima sama deng orang yang tara sala pa Dia pe muka, itu bukang cuma untuk dia pe diri sandiri saja.

²⁴Tapi itu ada tatulis untuk torang samua. Barang torang me Tuhan Allah tarima sama deng orang yang tara sala pa Tuhan Allah pe muka karna torang percaya pa Dia yang kase hidup ulang pa Yesus. Yesus itu torang pe Tuhan.

²⁵ Yesus itu yang so serakan Dia pe diri mati untuk torang samua karna torang pe dosa. Tapi Tuhan Allah kase hidup ulang pa Dia supaya Tuhan Allah biking torang jadi orang yang tara sala pa Dia pe muka.