Read Malay, North Moluccan 1 Korintus 1 Bible Online

1 Korintus 1 - Malay, North Moluccan bible

1 Korintus 1

¹Salam dari kita Paulus, Kristus Yesus pe utusan yang orang sebut rasul. Kita jadi rasul, itu karna Tuhan Allah pili pa kita iko Dia pe mau. Surat ini lagi dari Sostenes, torang pe sudara yang percaya.

² Kita tulis surat ini untuk ngoni Tuhan Allah pe jemaat yang ada di kota Korintus. Dia so biking ngoni jadi Dia pe umat sandiri yang bersi dari dosa, karna ngoni so percaya pa Yesus Kristus. Dia pangge pa ngoni untuk jadi Dia pe umat, sama-sama deng samua orang percaya di sagala tampa, yang salalu semba deng puji pa Yesus Kristus, torang samua pe Tuhan.

³Kita minta pa Tuhan Allah, torang samua pe Bapa, deng pa Tuhan Yesus Kristus supaya kase yang bae pa ngoni, deng salalu biking ngoni pe hati tetap tenang.

⁴Kita salalu bilang tarimakasi pa Tuhan Allah yang kita semba, karna ngoni. Barang, Dia so kase Dia pe bae pa ngoni karna ngoni percaya pa Kristus Yesus.

⁵Deng karna ngoni pe percaya pa Dia, Dia biking ngoni kaya di hal-hal yang bagini: ngoni mampo babicara tentang Dia di orang banya pe muka, deng mangarti banya hal.

⁶Itu jadi bukti, ajaran tentang Yesus Kristus yang kita kase tau pa ngoni itu, butul.

⁷Jadi deng ngoni so tarima karunia dari Roh Kudus itu, ngoni so tara kurang karunia apa-apa lagi. Ngoni so tarima samua karunia dari Roh Kudus waktu ngoni sementara tunggu-tunggu torang pe Tuhan Yesus Kristus datang ulang.

⁸Dia lagi akan kase kuat turus ngoni pe percaya sampe Dia datang ulang, supaya di waktu itu, Dia dapa ngoni tara sala apa-apa.

⁹Tuhan Allah mo biking itu samua karna Dia itu setia. Dia yang pangge pa ngoni, supaya ngoni bole hidup satu hati deng Dia pe Anak Yesus Kristus, torang pe Tuhan.

¹⁰Sudara-sudara, karna kita ini torang pe Tuhan Yesus Kristus pe utusan, jadi kita minta pa ngoni samua supaya ngoni baku dengar satu deng yang laeng. Ngoni tara bole tapisa satu deng yang laeng, tapi ngoni musti tetap jadi satu, satu pikiran deng satu tujuan.

¹¹Kita bilang bagitu pa ngoni sudara-sudara, barang ada orang-orang di Kloe pe ruma, yang kase tau pa kita tentang ngoni. Dorang bilang, ngoni ada baku tasala.

¹² Kita pe maksut itu bagini: ada dari ngoni yang bilang, “Kita iko pa Paulus.” Yang laeng bilang, “Kita iko pa Apolos.” Kong yang laeng bilang, “Kita iko pa Petrus.”[1] Atau yang laeng bilang, “Kita iko pa Yesus Kristus.”

¹³Ee, bikiapa kong ngoni bicara bagitu? Apa Yesus Kristus ada tabagi-bagi kong? Atau jang sampe ngoni pikir kata, kita Paulus dapa salib untuk ngoni? Atau waktu ngoni baptis orang, ngoni pake kita pe nama kong? Tarada to?

¹⁴ Kita bilang tarimakasi pa Tuhan Allah, karna tara banya dari ngoni yang kita baptis, cuma Krispus deng Gayus saja.

¹⁵Untung kita tara baptis pa ngoni, supaya tarada orang yang bilang, dia iko pa kita gara-gara dia dapa baptis pake kita pe nama.

¹⁶ Oo, kita baru inga, kita ada baptis pa Stefanus deng orang-orang yang ada pa dia pe ruma. Selain dari itu, kita tara inga, apa ada orang laeng lagi yang kita baptis atau tarada.

¹⁷Barang, Yesus Kristus utus pa kita bukang untuk baptis orang, tapi Dia utus pa kita untuk kase tau Kabar Bae tentang Dia. Kong waktu kita kase tau Kabar Bae itu, kita tara pake bahasa tinggi-tinggi la orang sangka kita pande. Karna kalu kita biking bagitu, orang cuma suka dengar kita pe kata-kata, kong kita pe bicara tentang Yesus Kristus mati di kayu salib itu, jadi parcuma.

¹⁸Ada orang yang bapikir, Kabar Bae tentang Yesus mati di kayu salib untuk tebus manusia pe dosa, itu orang bodo pe carita. Dorang itu mo tapisa deng Tuhan Allah slama-lamanya. Tapi untuk torang yang so dapa slamat karna percaya Kabar Bae itu, torang tau, Kabar Bae itu ada kuasa dari Tuhan Allah untuk kase slamat pa manusia.

¹⁹ Barang, Tuhan Allah bilang di Kitab Suci bagini, “Orang-orang yang pande, Kita mo kase ilang dong pe pande itu. Deng orang-orang yang tau banya, Kita mo kase ilang yang dong tau itu.”

²⁰ Jadi, apa guna manusia pe pande? Apa guna guru-guru agama yang ahli lima kitab Musa? Deng, apa guna orang-orang yang pande bicara? Dorang pe pande itu dari dunia ini, kong Tuhan Allah so biking jadi tarada dia pe guna sama skali.

²¹Karna biar manusia pande skali, manusia tara bisa kanal Tuhan Allah deng dong pe pande. Tapi Tuhan Allah itu tau samua hal kong Dia biking rencana yang bae, sampe Dia mau kase slamat pa orang-orang yang percaya Kabar Bae itu, biar banya orang bilang kata, itu orang bodo pe carita.

²²Orang-orang Yahudi tara mo percaya kalu dorang bolong lia mujizat, yang kase tunju Tuhan Allah pe kuasa. Bagitu lagi deng orang Yunani, dorang tara mo percaya kalu torang tara pake bahasa tinggi-tinggi iko manusia pe pande.

²³Tapi torang, torang kase tau Kabar Bae tentang Yesus Kristus yang mati di kayu salib supaya orang dapa slamat dari dosa. Kabar Bae itu biking orang-orang Yahudi rasa tersinggung, sama deng batu yang biking dong pe kaki tagate. Turus, orang yang bukang Yahudi rasa Kabar Bae itu tarada guna, kata, itu cuma orang bodo pe carita.

²⁴Tapi biar bagitu, ada orang Yahudi deng orang yang bukang Yahudi yang Tuhan Allah pangge jadi Dia pe umat. Kong untuk dorang samua, Kabar Bae tentang Yesus Kristus itu yang kase tunju Tuhan Allah pe kuasa, deng Tuhan Allah pe hikmat.

²⁵Barang, biar ada orang yang anggap Yesus mati di kayu salib itu tarada dia pe guna, tapi sebenarnya, apa yang Tuhan Allah biking, itu kase tunju Tuhan Allah pe hikmat yang hebat, jao lebe hebat dari manusia pe pande. Ada lagi yang anggap Yesus mati di kayu salib itu, dia pe arti, Tuhan Allah tarada kuasa, tapi sebenarnya, apa yang Dia biking itu, kase tunju Dia pe kuasa yang lebe hebat dari manusia pe kuasa.

²⁶Sudara-sudara, coba ngoni inga ngoni pe hidup dulu waktu Tuhan Allah bolong pangge pa ngoni iko pa Dia. Waktu itu kalu manusia mo nilai, cuma sadiki ngoni yang pande, cuma sadiki ngoni yang jadi orang penting, deng cuma sadiki lagi ngoni yang dari keluarga penting.

²⁷Tapi memang itu suda Tuhan Allah pe rencana. Dia pili orang yang manusia anggap bodo jadi Dia pe umat, supaya orang yang manusia anggap pande jadi malu waktu lia Tuhan Allah tara pili pa dorang karna dong pe pande. Tuhan Allah me pili orang yang manusia anggap tara penting jadi Dia pe umat, supaya orang yang manusia anggap penting itu jadi malu waktu lia Tuhan Allah tara pili pa dorang karna dong pe jabatan.

²⁸Tuhan Allah me pili pa orang-orang yang manusia anggap tara penting, yang hina, deng yang manusia anggap tara pake-pake, jadi percaya pa Dia. Deng bagitu, orang yang manusia anggap penting jadi sadar, samua yang dorang anggap penting, tara ada arti apa-apa pa Tuhan Allah.

²⁹Tuhan Allah biking bagitu, supaya tarada orang yang basombong pa Dia pe muka kong bilang, “Tuhan Allah pili pa kita karna kita pe pande.”

³⁰Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

³¹ Jadi skarang, dari samua yang Tuhan Allah so biking untuk torang, torang jadi mangarti apa yang tatulis di Kitab Suci bagini, “Sapa yang suka makang puji, lebe bae dia puji pa Tuhan karna apa yang Tuhan so biking.”