Read Malay, North Moluccan 1 Korintus 10 Bible Online

1 Korintus 10 - Malay, North Moluccan bible

1 Korintus 10

¹ Sudara-sudara, kita mo kase inga pa ngoni, waktu torang pe orang tua dulu-dulu bajalang kaluar dari tana Mesir, Tuhan Allah pake awan[14] untuk lindungi pa dorang, deng dorang samua me bole lewat Laut Mera[15] pe tenga-tenga deng slamat, karna Tuhan Allah kase kiring aer masing itu di dong pe tampa lewat.

²Waktu dorang samua sama-sama bajalang di bawa awan deng dapa lewat Laut Mera, dorang itu sama deng so dapa baptis dalam awan deng dalam laut untuk jadi orang yang iko pa nabi Musa.

³ Waktu dorang bajalang itu, dorang samua makang makanang yang sama. Makanang itu Tuhan Allah yang kase.[16]

⁴ Dorang samua me minum aer yang sama yang Tuhan Allah kase, aer itu kaluar dari batu basar satu. Batu basar itu sama deng Yesus Kristus sandiri yang ada iko sama-sama turus deng dorang.

⁵ Tapi biar bagitu me, banya dari dorang yang Tuhan Allah tara suka deng dong pe kalakuang, karna itu, dorang mati tataambur di padang gurun.

⁶ Samua yang jadi pa dorang dulu itu, jadi conto untuk kase inga pa torang, la jang torang ingin biking barang yang jahat, sama deng dorang,

⁷ deng supaya jang torang jadi orang yang jaga semba pa puji-puji, sama deng banya orang dari dorang itu jaga biking. Itu sama deng yang tatulis di Kitab Suci, “Bangsa itu, dorang dudu makang deng minum rame-rame, abis itu dorang baronggeng untuk puji dorang pe puji-puji itu.”

⁸ Torang me tara bole baseks sabarang, sama deng babarapa orang dari dorang jaga biking. Karna kalakuang itu, sampe dalam satu hari, ada dua pulu tiga ribu orang yang mati.

⁹ Torang tara bole coba Tuhan pe sabar, sama deng babarapa orang dari dorang jaga biking bagitu. Karna itu, dorang dapa gigi dari ular bisa, kong mati.

¹⁰ Deng torang lagi tara bole mengelu, sama deng babarapa orang dari dorang jaga biking. Karna itu, malaekat maut kase mati pa dorang.

¹¹Samua cilaka yang dorang dapa itu ada, supaya torang jang iko dorang pe conto, kong itu ada tulis di Kitab Suci untuk kase inga pa torang yang hidup di jaman skarang ini yang so dekat deng hari kiamat.

¹²Karna itu, sapa yang pikir dia pe percaya pa Tuhan so kuat, dia musti bae-bae la jang dia tagoda biking dosa.

¹³Tiap kali ngoni dapa coba untuk biking dosa, ngoni musti inga, samua manusia jaga dapa cobaan macam bagitu. Tapi Tuhan Allah salalu setia deng Dia pe janji pa ngoni, jadi Dia tara akan kase biar ngoni dapa cobaan yang lebe dari yang ngoni mampo tanggung. Waktu ngoni dapa cobaan, Dia akan kase jalang kaluar, supaya ngoni mampo tahang mangada cobaan itu.

¹⁴Karna itu, sudara-sudara yang kita sayang, jang coba-coba ngoni semba pa orang pe puji-puji!

¹⁵Kita ini bicara pa ngoni orang-orang yang bisa mangarti banya hal, jadi ngoni pikir suda sandiri apa yang kita bilang ini!

¹⁶ Waktu torang iko perjamuan, torang minum anggur dari cawan[17] kong bilang tarimakasi pa Tuhan. Deng torang minum anggur itu, itu pe arti, Tuhan Allah so biking torang jadi satu deng Yesus Kristus pe dara yang tatumpa di kayu salib. Kong waktu torang pela-pela roti kong makang, itu pe arti, Tuhan Allah so biking torang jadi satu deng Yesus Kristus pe badan yang tapaku di kayu salib.

¹⁷Roti itu cuma satu kong ada pela-pela, baru torang makang sama-sama dari roti itu. Jadi, biar torang banya orang tapi torang samua sama deng so jadi satu badan karna torang pe hubungan deng Yesus Kristus itu.

¹⁸ Coba ngoni pikir tentang orang Israel dulu-dulu. Waktu dorang bawa dong pe binatang la bakar jadi korban persembahan pa Tuhan Allah, dorang me bole makang daging dari persembahan itu.

¹⁹Kita bilang bagitu, jang ngoni kira kita pe maksut makanang yang orang kase makang pa dorang pe puji-puji itu, ada arti. Tarada, makanang itu deng dong pe puji-puji itu me tarada arti.

²⁰ Kita pe maksut, makanang yang orang so kase pa puji-puji, dorang tara kase itu pa Tuhan Allah, tapi pa setang-setang. Deng kita tara mau ngoni iko dorang semba pa setang-setang!

²¹Kalu ngoni minum dari cawan di Tuhan pe perjamuan deng makang dari Tuhan pe meja perjamuan, ngoni ada hubungan dekat deng Tuhan. Tapi kalu ngoni minum dari cawan yang orang pe puji-puji punya, itu pe arti, ngoni so ada hubungan dekat deng dorang lagi. Tara bole bagitu!

²² Kalu ngoni ambe bagian untuk semba pa puji-puji itu, ngoni biking Tuhan mara. Atau jang sampe ngoni pikir ngoni pe kuasa lebe kuat dari Tuhan, kong Tuhan tara mo hukum pa ngoni.

²³ Sudara-sudara, ada yang bilang bagini, “Torang bole biking apa saja yang torang mau.” Itu memang butul, tapi tara samua yang torang mo biking itu ada dia pe guna. Jadi biar lagi torang bole biking samua, tapi tara samua yang tong biking itu, biking torang pe percaya jadi lebe kuat.

²⁴Jang ada dari ngoni yang berusaha cari dia pe bae sandiri, tapi paling bagus tiap orang berusaha lagi untuk biking orang laeng pe bae.

²⁵Samua daging yang orang jual di pasar, bole ngoni makang deng hati yang tara ragu. Tara usa ngoni mo cari tau kalu daging itu orang so kase pa puji-puji ka tarada.

²⁶ Barang, ada tatulis di Kitab Suci bagini, “Dunia deng samua dia pe isi itu Tuhan punya.”

²⁷Kalu orang yang bolong percaya pa Tuhan undang ngoni makang, kong ngoni datang, makang saja apa yang dia kase. Tara perlu ngoni cari tau dulu kalu makanang itu dong so kase pa dong pe puji-puji ka tarada. Kalu ngoni tara cari tau itu, ngoni pe hati tara rasa bersala waktu makang makanang itu.

²⁸Tapi kalu ada yang bilang, “Daging itu orang so kase pa dorang pe puji-puji”, jang ngoni makang, supaya ngoni perhatikan ngoni pe tamang yang kase tau itu. Jang sampe dia pe hati rasa barát kalu ngoni makang itu.

²⁹Kita suru bagitu, bukang karna torang pe hati rasa barát makang daging itu. Tapi torang musti pikir orang itu pe hati, jang sampe dia rasa barát kalu tong makang daging itu. Tapi biar bagitu, jang sampe ada orang yang rasa tara sadap kong bilang bagini, “Bikiapa kong kita tara bisa iko kita pe mau cuma karna orang laeng pe hati rasa barát?

³⁰Kalu kita so kamuka berdoa bilang tarimakasi pa Tuhan Allah, baru kita makang makanang itu, bikiapa kong orang laeng mo kase sala pa kita karna makanang yang kita so bilang tarimakasi itu?”

³¹Yang jelas itu bagini, kalu ngoni mo makang ka, mo minum ka, atau mo biking apa saja, biking saja samua itu supaya Tuhan Allah dapa puji deng hormat.

³²Jang ngoni biking apa-apa yang biking sampe orang laeng tara jadi iko pa Tuhan, biar dia itu orang Yahudi ka, orang bukang Yahudi ka, atau biar lagi dia itu dari Tuhan Allah pe jemaat.

³³Ngoni biking suda sama deng yang kita jaga biking: di samua hal yang kita biking, kita biking samua itu bae-bae supaya samua orang sanang deng apa yang kita biking itu. Apa saja yang kita biking, itu bukang untuk kita pe bae sandiri, tapi untuk orang banya pe bae, supaya dorang me bole dapa slamat.