Read Malay, North Moluccan 1 Korintus 12 Bible Online

1 Korintus 12 - Malay, North Moluccan bible

1 Korintus 12

¹Sudara-sudara, skarang kita mo bicara tentang karunia-karunia yang Roh Kudus kase. Kita mau supaya ngoni mangarti bae-bae tentang karunia-karunia itu.

²Ngoni tau, dulu waktu ngoni bolong kanal pa Tuhan Allah, ngoni dapa tipu deng tapengaru sampe ngoni semba pa puji-puji yang tara bisa bicara itu.

³Karna itu, skarang kita mau ngoni tau, orang yang Tuhan Allah pe Roh ada pa dia pe diri, tara mungkin dia mo kutuk pa Yesus. Bagitu lagi, cuma orang yang ada Roh Kudus pa dia pe diri yang bisa bilang, “Yesus itu Tuhan”.

⁴ Ada macam-macam karunia yang Roh Kudus kase, tapi samua itu pe asal dari Roh Kudus yang cuma satu itu saja.

⁵Kong ada macam-macam cara untuk layani pa Tuhan, tapi Tuhan yang torang layani itu cuma satu saja.

⁶Turus, ada macam-macam karja untuk layani pa Tuhan, tapi yang kase kuasa untuk biking samua itu, pe asal cuma dari Tuhan Allah yang satu itu saja.

⁷Tiap orang tarima karunia dari Roh Kudus untuk samua orang pe bae.

⁸Pa yang satu, Roh Kudus kase karunia untuk pande bicara banya hal. Kong pa yang laeng, Roh Kudus yang sama itu kase karunia untuk mangarti banya hal, kong mampo kase tau tentang hal-hal itu.

⁹Pa yang laeng lagi, Roh Kudus yang sama itu kase karunia untuk kuat percaya pa Yesus, deng pa yang laeng, Roh Kudus yang sama itu kase karunia untuk kase sembu macam-macam panyake.

¹⁰Pa yang laeng, Roh Kudus kase karunia untuk biking mujizat, deng pa yang laeng, Roh Kudus kase karunia untuk kase turus pasáng yang Tuhan Allah kase pa dia, kong pa yang laeng, Roh Kudus kase karunia untuk tau mana pasáng dari Tuhan Allah deng mana yang bukang. Kong pa yang laeng, Roh Kudus kase karunia untuk bicara pake bahasa roh,[20] deng pa yang laeng lagi, Roh Kudus kase karunia untuk bisa kase arti bahasa roh itu.

¹¹Samua karunia ini pe asal dari Roh Kudus yang sama, kong Roh Kudus itu cuma satu saja. Roh Kudus itu kase karunia yang baku-baku beda pa tiap-tiap orang, iko Roh Kudus itu pe mau.

¹² Torang banya orang, tapi torang jadi satu, karna torang sama-sama percaya pa Yesus Kristus. Itu sama deng orang pe badan yang cuma satu, tapi ada dia pe kaki, tangan, mata, deng laeng-laeng.

¹³Barang torang ini, ada orang Yahudi, deng ada yang bukang Yahudi. Ada orang karja yang dia pe tuang so bili, deng ada orang yang bebas. Torang samua Roh Kudus biking torang jadi satu, karna torang samua dapa baptis dari Roh Kudus yang sama. Roh Kudus yang sama itu, yang so ada pa torang samua, itu sama deng torang ada minum dari mata aer yang sama.

¹⁴Ambe conto torang pe badan. Di tong pe badan, ada kaki, tangan, mata, deng laeng-laeng. Dapa lia ada banya, tapi dia pe badan cuma satu saja.

¹⁵Jadi, kaki tara bole bilang, “Kita ini bukang tangan, jadi kita tara satu deng badan.” Biar dia bicara bagitu me, dia masi tetap satu deng badan itu.

¹⁶Kong talinga me tara bole bilang, “Kita ini bukang mata, jadi kita tara satu deng badan.” Biar dia bicara bagitu me, dia masi tetap satu deng badan itu.

¹⁷Kalu misalnya satu badan itu cuma mata, kong di mana talinga untuk badengar? Deng kalu misalnya satu badan itu cuma talinga, kong di mana idong untuk baciom apa-apa?

¹⁸Tapi yang butul itu, pa torang pe badan ada kaki, tangan, mata deng laeng-laeng yang Tuhan Allah kase masing-masing ada dia pe tampa kusus, iko Tuhan Allah pe mau.

¹⁹Kalu tong pe badan itu cuma kaki sasaja, tangan sasaja, mata sasaja, itu dia pe nama bukang badan lagi, to?

²⁰Memang manusia pe badan itu ada kaki, tangan, mata deng banya yang laeng lagi, tapi dia pe badan itu cuma satu saja.

²¹Karna itu, mata tara bole bilang pa tangan, “Kita tara perlu pa ngana.” Bagitu lagi, kapala tara bole bilang pa kaki, “Kita tara perlu pa ngana.”

²²Tapi sebenarnya, bagian badan mana yang orang anggap tara penting, justru itu yang paling torang perlu.

²³Ada bagian-bagian badan yang torang kurang perhatikan, itu yang torang urus bae-bae. Kong ada lagi bagian-bagian badan yang tara pantas untuk orang mo lia, itu yang tong tutu.

²⁴Baru, apa yang ada pa torang pe badan yang biasa orang lia, itu tara perlu tong tutu. Tuhan Allah so ator torang pe badan ini bae-bae, supaya pa tong pe badan, apa yang torang anggap tara penting, itu yang tong mo perhatikan bae-bae.

²⁵Deng bagitu, torang pe badan tara akan tapisa-pisa, tapi pa tong pe bagian badan yang baku beda itu, akan bisa baku perhatikan satu deng yang laeng.

²⁶Jadi kalu kaki atau tangan saki, samua me rasa saki. Deng kalu kaki atau tangan dapa hormat, yang laeng me rasa sanang.

²⁷Bagitu lagi deng ngoni. Ngoni samua yang percaya jadi satu, sama deng Yesus Kristus pe kaki, tangan, mata deng bagian-bagian laeng lagi. Itu sama saja deng ngoni itu jadi Yesus Kristus pe satu badan anteru.

²⁸ Jadi Tuhan Allah so kase pa ngoni tiap-tiap orang di jemaat, dia pe tugas masing-masing macam bagini: pertama, ada Yesus Kristus pe utusan-utusan yang kase tau Kabar Bae pa orang-orang, dorang itu orang sebut rasul-rasul. Kedua, ada yang jaga kase turus Tuhan Allah pe pasáng, dorang itu orang sebut nabi-nabi. Ketiga, ada yang jadi guru yang kase ajar Tuhan pe ajaran. Turus, ada orang-orang yang Tuhan kase karunia untuk biking mujizat, yang laeng Dia kase karunia untuk kase sembu orang saki, yang laeng Dia kase karunia untuk tolong pa orang-orang, deng yang laeng lagi dapa karunia untuk pimpin Tuhan Allah pe jemaat. Kong ada lagi yang dapa karunia untuk bicara pake macam-macam bahasa yang Roh Kudus kase.

²⁹Jadi samua dapa karunia dari Roh Kudus tapi baku-baku beda. Tara samua jadi rasul, tara samua jadi nabi, tara samua jadi guru, tara samua bisa biking mujizat,

³⁰tara samua bisa kase sembu orang saki, tara samua bisa bicara pake bahasa roh, deng tara samua dapa karunia untuk kase arti bahasa roh itu.

³¹Tapi biar bagitu, ngoni musti berusaha dapa karunia-karunia penting dari Roh Kudus yang bisa bantu pa orang-orang. Kong skarang, kita mo kase tau pa ngoni mana yang paling penting.