Read Malay, North Moluccan 2 Korintus 10 Bible Online

2 Korintus 10 - Malay, North Moluccan bible

2 Korintus 10

¹Kita Paulus, minta pa ngoni supaya ngoni dengar bae-bae yang kita mo bilang ini. Ada dari ngoni yang bilang, kita tara barani togor karas pa ngoni waktu kita ada sama-sama deng ngoni. Kata, kita cuma barani togor karas waktu torang baku jao pake surat. Tapi skarang, sama deng Yesus Kristus pe sifat yang tara sombong deng tara kasar,

²kita minta pa ngoni, jang biking sampe kita musti togor karas pa ngoni waktu torang sama-sama nanti, barang ada dari ngoni laeng yang tara dengar-dengaran pa torang. Dorang bilang kata, torang ini cuma iko manusia pe mau saja. Pa dorang-dorang itu suda yang kita mo togor karas.

³Memang torang manusia biasa, tapi kalu ada orang yang malawang Tuhan pe firman, torang tara lawan pa dorang pake manusia pe cara.

⁴Barang, torang tara lawan pake senjata dunia yang manusia pake, tapi torang pake kuasa dari Tuhan Allah yang bisa kase kala pa apa saja yang malawang Tuhan pe firman. Kuasa dari Tuhan Allah itu bole kase sama deng senjata yang tentara jaga pake untuk kase ancor dong pe musu-musu pe benteng-benteng yang kuat.

⁵ Kong deng kuasa dari Tuhan Allah itu, torang mampo lawan samua pikiran yang tara butul dari orang yang malawang Tuhan Yesus pe ajaran. Biar dorang itu pake alasan iko manusia pe pande, torang mampo kase kala samua dorang pe pikiran yang sombong yang biking orang tara percaya, sampe orang bisa butul-butul dengar-dengaran pa Yesus Kristus.

⁶Kong kalu ngoni so butul-butul dengar-dengaran pa Yesus Kristus, baru torang siap togor deng hukum pa orang di jemaat yang masi tara mau dengar-dengaran pa Dia.

⁷Sudara-sudara, inga bae-bae apa yang butul yang ngoni so tau. Ada orang di situ yang bilang kata, cuma dorang itu saja yang biking apa yang Yesus Kristus suru, tapi dorang musti inga lagi, torang lagi orang yang biking apa yang Yesus Kristus suru, sama deng dorang.

⁸Jadi kalu kita bicara banya tentang Tuhan angka pa torang untuk biking apa yang Dia suru, jang sampe ada yang anggap kita puji diri. Barang, Tuhan kase kuasa pa torang itu supaya torang pake untuk kase kuat ngoni pe percaya, bukang untuk kase ancor ngoni pe percaya.

⁹Jadi kita tara mo kase tako-tako pa ngoni deng kita pe surat-surat yang kita so kirim pa ngoni.

¹⁰Karna ada yang bilang bagini, “Jang bapusing deng Paulus. Barang dia cuma tegas deng karas di surat. Tapi kalu so baku dapa langsung, dia pe hati so lombo kong dia pe kata-kata so tara guna.”

¹¹Tapi itu tara butul. Jadi, orang yang bicara bagitu musti sadar, apa yang torang tulis di surat-surat, itu suda yang torang mo biking di ngoni pe muka.

¹²Tong tiga tara barani kase sama atau kase banding torang pe diri deng dorang yang jaga puji dong pe diri itu. Dorang itu nilai dorang pe diri pake dong pe ukuran sandiri, sampe dong pikir apa saja yang dong biking itu bae. Paling bodo suda dorang!

¹³Tapi torang tara bagitu. Torang cuma sanang deng karja yang Tuhan Allah kase pa torang untuk kase tau Kabar Bae di torang pe wilaya karja, bukang di orang laeng pe wilaya karja. Kong ngoni itu termasuk torang pe wilaya karja,

¹⁴jadi torang pe hak suda untuk kase tau Kabar Bae tentang Yesus Kristus pa ngoni, karna torang yang pertama pigi kase tau Kabar Bae tentang Yesus Kristus pa ngoni.

¹⁵Torang tara puji torang pe diri karna orang laeng pe karja yang dong biking di luar torang pe wilaya karja. Tapi torang harap, kalu nanti ngoni pe percaya so tamba kuat, karja kase tau firman yang torang biking di antara ngoni akan tatamba basar lagi, karna ngoni tara di luar wilaya karja yang Tuhan Allah kase pa torang.

¹⁶Deng kalu torang pe karja di antara ngoni tatamba basar, torang bole kase tau Kabar Bae tentang Yesus Kristus di daera-daera yang lebe jao dari ngoni pe daera, di tampa yang orang bolong perna pigi kase tau Kabar Bae itu. Kong kalu tong biking bagitu, tara ada orang yang mo bilang torang ada bapuji diri deng orang laeng pe hasil karja cuma karna torang lagi karja di dong pe wilaya karja.

¹⁷ Karna di Kitab Suci so tatulis bagini, “Sapa yang suka bapuji diri, lebe bae dia puji pa Tuhan karna apa yang Tuhan so biking.”

¹⁸Karna bukang orang yang puji diri sandiri yang biking Tuhan tarima pa dorang, tapi orang yang Tuhan Allah puji saja yang Dia tarima.