Read Malay, North Moluccan 2 Korintus 12 Bible Online

2 Korintus 12 - Malay, North Moluccan bible

2 Korintus 12

¹Biar tarada guna puji diri, tapi kita mo puji kita pe diri lagi. Kita mo carita kita pe penglihatan deng barang yang laeng yang hebat yang Tuhan Yesus so kase tunju langsung pa kita.

²Ada satu orang percaya yang kita kanal.[9] Ampa blas taong yang lalu, kage-kage dia taangka ka atas di sorga, di tingkat yang ketiga. Tapi kita tara tau, dia taangka deng dia pe badan, atau cuma dia pe roh yang taangka, itu cuma Tuhan Allah saja yang tau.

³Sama deng kita so bilang: kita tau tentang orang itu, tapi kita tara tau dia taangka ka atas di sorga deng badan langsung, atau tarada. Kalu itu, cuma Tuhan Allah saja yang tau.

⁴Pokonya, kage-kage dia taangka di Tuhan Allah pe tampa yang paling bagus, tampa itu pe nama Firdaus.[10] Di tampa itu dia dengar hal-hal luar biasa yang tara mungkin manusia bisa kase jelas deng kata-kata, deng yang memang manusia tara bole kase tau.

⁵Jadi kita mo puji orang itu karna apa yang dia lia, tapi kita tara puji kita pe diri, kita cuma puji diri tentang apa yang kita tara mampo biking.

⁶Sebenarnya kalu kita mo puji diri, bisa saja, tapi kita tara mau puji diri sama deng orang bodo. Karna yang kita carita tentang orang yang taangka ka atas itu, kita ini suda, kong itu butul. Tapi biar bagitu me kita tara puji diri apa-apa, karna kita tara mau orang anggap kita lebe hebat dari apa yang dong lia kita biking deng apa yang dong dengar kita bilang.

⁷Jadi supaya kita tara jadi sombong deng penglihatan-penglihatan yang hebat itu, Tuhan Allah kase biar setang, Iblis pe ana bua kase sengsara pa kita deng panyake satu. Panyake itu bole kase sama deng duri yang tabiar pa kita pe dalam badan, kong panyake itu biking kita menderita supaya kita jang jadi sombong.

⁸Tentang panyake itu, so tiga kali kita minta deng sunggu-sunggu pa Tuhan, supaya Dia kase sembu pa kita.

⁹Tapi Dia bilang pa kita bagini, “Kita tara kase sembu pa ngana, tapi Kita akan tetap kase tunju Kita pe bae pa ngana. Itu so cukup. Karna waktu ngana rasa tara kuat, di situ Kita pe kuasa akan bakarja sempurna pa ngana pe hidup.” Jadi karna itu, kita lebe suka puji diri untuk bilang apa-apa yang kita tara mampo biking, karna waktu kita tara kuat, Yesus Kristus pe kuasa ada sama-sama deng kita.

¹⁰Jadi, kita sanang saja, biar lagi kita rasa kita tara kuat, dapa siksa, menderita, dapa aniaya deng sengsara. Barang waktu kita tara kuat, waktu itu suda, Yesus Kristus biking kita mampo hadapi samua itu.

¹¹Kita so puji kita pe diri sandiri tadi, sama deng orang bodo. Tapi kita bagitu karna ngoni yang paksa. Sebenarnya ngoni musti puji pa kita karna biar lagi orang bilang kita ini tara arti apa-apa, tapi kita ini butul Yesus Kristus pe utusan. Kalu utusan-utusan yang orang bilang kata, dorang itu hebat, dorang tara lebe hebat dari kita.

¹²Waktu kita masi sama-sama deng ngoni, kita so kase bukti, kita ini memang Yesus Kristus pe utusan, karna kita biking mujizat-mujizat, deng tanda-tanda laeng yang kase tunju Tuhan Allah pe kuasa sampe orang-orang jadi herang. Kong samua yang kita biking itu, kita biking deng sabar.

¹³Tapi cuma satu hal yang kita tara biking pa ngoni pe jemaat yang utusan laeng ada biking itu, kita tara minta ngoni tanggung kita pe perlu hari-hari. Apa kita pe perlu hari-hari musti jadi beban pa ngoni la jadi bukti kita me Tuhan Yesus pe utusan? Kong apa kita musti minta maaf pa ngoni karna itu? Tarada to?

¹⁴Dengar e! Skarang ini, kita ada rencana mo pigi lia pa ngoni untuk yang ketiga kali. Tapi kita tara mau jadi beban pa ngoni, barang kita datang untuk bantu pa ngoni, bukang untuk cari apa yang ada pa ngoni. Yang penting, kita mau ngoni sunggu-sunggu percaya pa Yesus Kristus. Kita ini sama deng ngoni pe orang tua. Jadi, kita pe perlu hari-hari bukang ana-ana yang musti tanggung, tapi orang tua yang musti tanggung ana-ana pe perlu hari-hari.

¹⁵Kita suka pake samua yang ada pa kita untuk bantu pa ngoni, mala kita pe hidup sandiri me kita kase korban supaya bisa bantu pa ngoni. Kita sayang skali pa ngoni macam deng bagitu, kong ngoni pe sayang pa kita cuma stenga-stenga tu!

¹⁶Ngoni sandiri tau to, kita tara perna jadi beban pa ngoni. Tapi ada dari ngoni yang bilang kata, kita tipu pa ngoni la kita dapa untung.

¹⁷Apa kita perna cari untung pa ngoni waktu kita utus orang pigi pa ngoni? Tarada to?

¹⁸Memang kita so suru pa Titus untuk pigi pa ngoni, sama-sama deng tong pe sudara yang percaya satu. Jadi kita tanya pa ngoni, waktu Titus datang pa ngoni, apa dia tipu pa ngoni kong ambe untung dari ngoni? Tarada to? Kita tau tarada, karna Titus deng kita itu, torang pe hati deng kalakuang itu sama untuk bantu pa ngoni.

¹⁹Mangkali ngoni pikir, torang tulis samua ini cuma untuk mo bela tong pe diri sandiri saja. Tarada, itu bukang torang pe maksut. Sudara-sudara yang kita sayang, samua yang torang kase tau ini, tong kase tau karna tong so percaya pa Yesus Kristus, kong Tuhan Allah jadi saksi, samua itu butul. Samua yang torang kase tau deng yang tong biking pa ngoni itu, cuma untuk kase kuat ngoni pe percaya.

²⁰Kita hawater, kalu kita so datang pa ngoni nanti, ngoni bolong biking sama deng yang kita mau. Bagitu lagi deng ngoni, ngoni lia kita biking tara sama deng yang ngoni mau. Kita hawater, jang sampe kita dapa ada dari ngoni yang baku-baku malawang, baku mangiri, mara-mara, cuma pikir diri sandiri, carita busu orang pe nama, bamulu, basombong deng biking kaco.

²¹Kita hawater, kalu kita datang itu, kita dapa ngoni masi biking dosa sama deng dulu, kong ngoni bolong bertobat. Kalu bagitu, kita jadi malu pa Tuhan Allah pe muka, kong kita mo manangis karna banya dari ngoni yang pe kalakuang masi cafarune, yang baseks sabarang, deng yang masi biking hal-hal yang tara pantas untuk mo biking.