Read Malay, North Moluccan 2 Korintus 2 Bible Online

2 Korintus 2 - Malay, North Moluccan bible

2 Korintus 2

¹Jadi waktu itu, kita so ambe keputusan dalam hati, kita tara mo datang togor pa ngoni di ngoni pe muka lagi, karna kita tara mo biking ngoni pe hati sedi lagi sama deng kita datang tuhari tu.

²Karna kalu kita so kase sedi ngoni pe hati, sapa lagi yang bisa kase sanang kita pe hati? Tara ada lagi, barang kita so kase sedi ngoni yang bisa kase sanang pa kita.

³Jadi, itu dia pe sebab, tuhari kita so tulis surat pa ngoni kamuka untuk togor pa ngoni. Kita biking bagitu la ngoni ruba ngoni pe kalakuang supaya waktu kita datang ulang pa ngoni di kota Korintus, ngoni so tara akan kase sedi lagi kita pe hati. Barang ngoni yang musti biking kita pe hati sanang. Deng kita yakin, kalu kita pe hati sanang, ngoni me pasti sanang lagi.

⁴Waktu kita tulis surat yang kamuka itu pa ngoni, kita pe hati sedi, kita rasa barát sampe kita pe aer mata me malele. Kita tulis surat itu bukang untuk biking ngoni sedi, tapi supaya ngoni tau, kita sayang skali pa ngoni samua.

⁵Jadi tentang satu orang yang biking dosa di ngoni pe jemaat situ, bukang kita saja yang dia kase sedi, tapi ngoni samua. Atau paling tarada dia kase sedi babarapa orang di situ. Samua ini kita tara kase lebe-lebe.

⁶Kong pa dia yang so biking torang sedi itu, banya dari ngoni jemaat yang so hukum[1] pa dia, jadi itu so cukup suda.

⁷Jadi skarang ngoni kase ampun suda pa dia, deng hibur lagi pa dia, jang dia rasa talalu barát sampe ilang smangat hidup.

⁸Karna itu, kita minta deng sunggu-sunggu pa ngoni, supaya ngoni kase tunju ulang ngoni butul-butul sayang pa dia.

⁹Barang, di kita pe surat yang kamuka, kita suru ngoni kase hukuman pa orang yang biking sala itu. Kita pe tujuan, kita mo cari tau ngoni iko yang kita ada suru ka tarada. Kong karna ngoni so biking apa yang kita suru itu,

¹⁰jadi skarang, kita bilang pa ngoni, jang hukum lagi pa dia. Kalu ngoni kase ampun orang yang biking sala pa ngoni, kita me kase ampun pa dia. Kong kalu memang ada yang musti kita kase ampun, pasti kita kase ampun. Kita kase ampun orang itu untuk ngoni pe bae, kong Yesus Kristus yang jadi saksi kita kase ampun pa orang itu.

¹¹Torang musti kase ampun pa orang yang biking sala itu supaya Iblis tara dapa kesempatan untuk tipu pa torang, karna torang tau dia pe rencana jahat macam itu.

¹²Waktu kita sampe di kota Troas untuk kase tau Kabar Bae tentang Yesus Kristus, kita lia Tuhan so buka jalang pa kita di sana untuk kase tau Kabar Bae itu,

¹³tapi kita pe hati tara tenang, barang kita tara baku dapa deng kita pe sudara yang sama-sama percaya, yang pe nama Titus. Karna itu, kita basiloloa pa orang di sana kong kita pigi di daera Makedonia.[2]

¹⁴Tapi biar bagitu me, kita bilang tarimakasi banya pa Tuhan Allah, karna Dia salalu pimpin pa torang yang percaya pa Yesus Kristus, supaya torang bisa menang dari kuasa jahat. Tuhan Allah pake pa torang di mana-mana untuk kase tau Kabar Bae tentang Yesus Kristus, supaya orang-orang bisa kanal pa Dia. Waktu dorang dengar Kabar Bae itu, dorang jadi sanang, sama deng dong dapa ciom bobou sadap.

¹⁵Barang, waktu torang kase tau Kabar Bae tentang Yesus Kristus pa orang-orang, torang sama deng kemenyan[3] yang jadi persembahan yang bobou sadap dari Yesus Kristus untuk Tuhan Allah. Orang-orang yang akan dapa slamat dari dosa-dosa, dorang tarima Kabar Bae itu sama deng Kabar Bae itu jadi bobou sadap pa dorang. Tapi orang-orang yang akan mati tapisa deng Tuhan Allah, dorang itu tara tarima Kabar Bae itu, sama deng Kabar Bae itu jadi bobou busu pa dorang.

¹⁶Untuk orang-orang yang akan mati tapisa deng Tuhan Allah karna tara tarima Kabar Bae itu, dong anggap torang yang percaya pa Yesus Kristus macam deng bobou bangke, barang torang kase tau Tuhan Allah akan biking dorang mati tapisa dari Dia. Tapi untuk orang-orang yang mo dapa hidup deng Tuhan Allah slama-lamanya karna tarima Kabar Bae itu, dong anggap torang macam deng bobou sadap, karna torang kase tau Kabar Bae yang biking dong dapa hidup deng Tuhan Allah slama-lamanya. Kong kita mo tanya, sapa yang mampo biking tugas ini?

¹⁷Torang tara mampo biking tugas ini deng tong pe kekuatan sandiri. Barang torang tara sama deng banya orang laeng, yang kalu kase tau Tuhan Allah pe firman, cuma mo cari doi. Tapi torang, kalu torang kase tau Tuhan Allah pe firman, torang biking deng hati bersi. Tuhan Allah sandiri yang kase tugas ini pa torang deng Dia yang lia torang kase tau Tuhan Allah pe firman pa orang-orang, karna torang percaya pa Yesus Kristus.