Read Malay, North Moluccan 2 Korintus 5 Bible Online

2 Korintus 5 - Malay, North Moluccan bible

2 Korintus 5

¹Torang pe badan di dunia ini sama deng ruma yang tong tinggal tara lama. Jadi torang tau, waktu torang orang percaya mati, itu sama deng tong pe tampa tinggal itu ancor, kong Tuhan Allah nanti kase pa torang tampa tinggal yang baru supaya bole tinggal di sorga. Tampa tinggal itu bukang ruma yang manusia biking, tapi badan yang baru, yang hidup deng Tuhan Allah slama-lamanya.

²Selama torang masi hidup di dunia ini, torang mengelu karna sengsara, kong tong rindu mo dapa badan yang baru di sorga.

³Barang, deng torang dapa badan yang baru itu, itu sama deng tong kase lapas tong pe pakeang lama la pake pakeang baru, biar torang tara talanjang.

⁴Memang selama torang hidup deng tong pe badan di dunia ini, torang mengelu karna banya sengsara. Tapi biar torang mengelu, itu bukang berarti torang ingin capat mati la torang lapas tong pe badan yang skarang, tapi torang mau supaya torang ganti tong pe badan yang lama deng badan yang baru di sorga.

⁵Tuhan Allah sandiri yang so kase siap tong pe badan yang baru itu untuk hidup di sorga. Kong Dia lagi yang so kase Roh Kudus pa torang di dunia ini, supaya jadi tanda, pasti torang mo dapa badan yang baru itu.

⁶Kong karna torang tau Tuhan Allah akan kase pa torang badan yang baru, tong pe hati salalu kuat. Torang tau, tong pe badan di dunia ini sama deng ruma yang torang tinggal sementara. Jadi, selama torang masi di dunia ini, torang bolong bisa tinggal sama-sama deng Tuhan di sorga.

⁷Tapi, waktu torang masi hidup di dunia ini, torang hidup iko tong pe percaya pa Yesus Kristus saja, bukang iko apa yang torang dapa lia, karna torang bolong dapa lia samua yang Tuhan Allah so janji mo kase pa torang.

⁸Jadi torang pe hati tetap kuat, kong torang lebe suka kase tinggal tong pe badan di dunia ini, la tinggal deng Tuhan di sorga.

⁹Kong karna torang lebe suka tinggal deng Tuhan Yesus, biar torang masi hidup di dunia ini ka, so hidup deng Tuhan Yesus di sorga ka, torang salalu berusaha skali kase sanang Tuhan Allah pe hati.

¹⁰ Torang mo kase sanang Tuhan Allah pe hati, karna nanti torang samua musti mangada pa Yesus Kristus untuk dapa adili, supaya tiap orang mo dapa apa yang pantas dia dapa. Yang pantas dia dapa itu iko apa yang dia biking waktu dia tinggal di dunia ini, bae atau jahat.

¹¹Karna torang tau Tuhan mo adili pa torang, jadi deng rasa tako pa Tuhan, torang berusaha kase yakin orang supaya dorang me jadi percaya pa Tuhan Yesus. Tuhan Allah tau torang pe dalam hati, kong kita harap ngoni me tau itu lagi.

¹²Torang tulis bagini pa ngoni, torang tara maksut mo puji diri lagi. Tapi kita bilang yang bae yang torang biking itu supaya ngoni rasa sanang deng torang, deng supaya ngoni ada alasan untuk kase jawaban pa orang-orang yang kase sala pa torang, dorang itu yang cuma lia orang pe muka tapi tara lia sampe di hati.

¹³Barang, ada yang bilang torang sama deng orang yang tara waras waktu kase tau Kabar Bae tentang Yesus Kristus. Tapi tara apa, yang penting torang biking apa yang Tuhan Allah mau la Dia dapa puji. Kong ada lagi yang bilang torang waras waktu kase tau Kabar Bae tentang Yesus Kristus, itu me bae, karna yang torang biking itu untuk ngoni pe bae.

¹⁴Torang biking samua itu karna Yesus Kristus pe sayang ada pa torang samua. Barang torang tau, Yesus Kristus so mati karna torang samua pe dosa, kong karna itu, bole bilang torang ini sama deng orang yang so mati sama-sama deng Dia.

¹⁵Yesus Kristus so mati untuk samua orang, supaya orang-orang percaya yang masi hidup di dunia ini, tara hidup lagi untuk kase sanang dong pe diri sandiri, tapi supaya dorang bole hidup untuk kase sanang pa Yesus Kristus, yang so mati deng hidup ulang untuk dorang.

¹⁶Jadi karna torang tau Yesus Kristus pe sayang pa samua orang itu, torang tara nilai orang pake manusia pe pikiran lagi. Memang dulu waktu torang bolong percaya Tuhan itu, torang nilai pa Yesus Kristus pake manusia pe pikiran, tapi skarang tara bagitu lagi.

¹⁷Karna itu, sapa saja yang so percaya pa Yesus Kristus, dia itu so jadi manusia baru. Dia pe sifat dulu-dulu yang tara bae itu so ilang. Samua so jadi baru.

¹⁸Samua itu, Tuhan Allah yang biking. Jadi waktu Yesus Kristus mati di kayu salib, Dia kase bae-bae ulang torang manusia pe hubungan deng Tuhan Allah. Kong Dia lagi yang kase percaya pa torang untuk bantu pa orang-orang la dorang jadi percaya pa Dia supaya dorang me pe hubungan deng Tuhan Allah jadi bae-bae ulang.

¹⁹Kong Kabar Bae yang torang kase tau itu bagini: waktu Yesus Kristus mati di kayu salib, Tuhan Allah buka jalang la torang manusia pe hubungan bole bae-bae ulang deng Dia. Kong samua orang pe dosa-dosa, Dia so tara hitung lagi untuk Dia hukum. Deng Dia kase tugas pa torang la bantu orang jadi percaya pa Dia, supaya dorang pe hubungan jadi bae-bae ulang deng Tuhan Allah.

²⁰Jadi torang biking tong pe tugas itu, Yesus Kristus yang utus pa torang. Torang kase tau tentang Dia, itu sama deng Tuhan Allah sandiri yang bicara pa ngoni pake torang pe kata-kata. Deng Yesus Kristus pe kuasa, tong dua minta supaya ngoni kase ngoni pe diri suda pa Tuhan Allah la Dia biking ngoni pe hubungan jadi bae-bae ulang deng Dia.

²¹Yesus Kristus tara perna biking dosa, tapi Tuhan Allah so kase hukuman pa Dia untuk ganti pa torang yang berdosa, supaya torang yang percaya pa Yesus Kristus, Tuhan Allah biking torang jadi orang yang tara sala pa Dia pe muka.