Read Malay, North Moluccan 2 Korintus 7 Bible Online

2 Korintus 7 - Malay, North Moluccan bible

2 Korintus 7

¹Sudara-sudara yang kita sayang, karna torang so tarima Tuhan Allah pe janji-janji itu, mari suda torang kase bersi torang pe diri dari samua yang biking torang berdosa, bae itu yang ada pa tong pe hati, pikiran deng yang torang biking. Kong deng torang biking bagitu, torang yang so bersi dari dosa pa Tuhan Allah pe muka tamba hari jadi lebe tamba sempurna deng tako pa Tuhan Allah.

²Sudara-sudara, buka hati suda pa torang. Barang, torang ini tara perna biking sala pa sapa saja, tara biking rugi pa sapa saja, deng torang lagi tara cari untung, biar cuma pa satu orang lagi.

³Kita bilang bagitu, kita tara maksut mo kase sala pa ngoni, karna tadi kita so bilang to, torang sayang pa ngoni. Ngoni ada di torang pe hati selama torang hidup atau mati.

⁴Kita percaya skali pa ngoni, mala kita sanang skali deng apa yang ngoni biking. Jadi biar lagi torang banya kali dapa siksa, tapi kita pe hati tahibur deng sanang skali karna ngoni.

⁵ Waktu torang sampe di daera Makedonia, torang tara bisa tenang. Barang, apa saja yang tong biking, torang menderita: orang baku malawang deng torang, kong torang pikiran karna pikir pa ngoni.

⁶Tapi Tuhan Allah yang salalu kase kuat pa orang yang ilang smangat, Dia kirim Titus datang pa torang untuk kase kuat tong pe hati.

⁷Torang pe hati jadi kuat, bukang cuma karna Titus so datang pa torang, tapi karna ngoni so biking dia pe hati jadi kuat waktu dia sama-sama deng ngoni. Dia bilang, ngoni so ingin skali mo baku dapa deng kita, ngoni so manyasal deng apa yang ngoni biking dulu, kong ngoni smangat lagi supaya ngoni deng kita pe hubungan jadi bae-bae ulang. Samua itu biking kita pe hati tamba sanang skali.

⁸Jadi, biar lagi kita so kase sedi ngoni pe hati deng kita pe surat yang kamuka itu, tapi kita tara manyasal ada tulis surat itu, karna ada dia pe guna pa ngoni. Memang, waktu kita baru tulis surat itu, kita rasa manyasal, karna kita tau kalu ngoni baca surat itu, pasti ngoni pe hati jadi sedi, biar lagi sedi itu cuma sementara.

⁹Tapi skarang kita sanang skali, bukang karna ngoni rasa sedi, tapi karna sedi yang ngoni rasa itu biking ngoni jadi bertobat. Karna sedi yang ngoni rasa itu, sedi yang sama deng yang Tuhan Allah mau, jadi biar sadiki me kita pe surat itu tara kase rugi apa-apa pa ngoni.

¹⁰Kita bilang bagitu, barang sedi itu yang Tuhan Allah mau la biking orang bole bertobat kong dapa slamat. Jadi orang yang dapa sedi macam bagitu, dia tara akan manyasal. Tapi ada lagi sedi yang orang-orang tara percaya rasa. Sedi itu tara biking dorang jadi bertobat, kong dorang mo dapa hukum tapisa deng Tuhan Allah slama-lamanya.

¹¹Coba ngoni inga sedi yang ngoni rasa waktu baca kita pe surat yang kamuka itu. Sedi itu yang Tuhan Allah mau, karna sedi itu biking ngoni berusaha untuk biking barang yang butul, bagini: ngoni dapa smangat untuk biking Tuhan pe mau, ngoni kase bersi ngoni pe nama dari apa yang orang tudu pa ngoni, ngoni mara pa orang-orang yang biking dosa, ngoni jadi tako kalu tara butul-butul iko pa Tuhan, ngoni ingin baku dapa deng torang, deng ngoni lagi tara tako untuk hukum pa orang-orang yang biking sala. Samua yang ngoni biking itu kase tunju ngoni tara sala.

¹²Jadi waktu kita tulis surat itu, kita pe tujuan bukang cuma untuk orang yang sala, deng bukang lagi cuma untuk orang yang menderita karna orang laeng pe sala itu. Tapi kita pe tujuan supaya ngoni sandiri bole tau ngoni memang butul-butul sayang pa torang, kong Tuhan Allah tau itu butul.

¹³Samua yang ngoni so biking itu biking torang pe hati jadi kuat. Kong lebe lagi dari itu, torang sanang skali waktu tong tau, Titus me rasa sanang lagi. Dia rasa sanang karna ngoni bae-bae pa dia, itu yang biking dia pe hati tenang.

¹⁴Kita so puji-puji memang tentang ngoni pa Titus waktu dia bolong datang pa ngoni, deng ngoni memang tara kase malu pa kita. Bagitu lagi, samua yang torang so perna bilang pa ngoni itu butul, sama deng yang torang ada puji-puji pa ngoni tentang Titus itu me butul.

¹⁵Kong skarang dia lebe tamba sayang pa ngoni, barang dia inga, ngoni itu dengar-dengaran pa dia, deng ngoni tarima deng hormati skali pa dia.

¹⁶Kita sanang skali, karna dalam samua hal kita bisa percaya pa ngoni.