Read Malay, North Moluccan 2 Korintus 8 Bible Online

2 Korintus 8 - Malay, North Moluccan bible

2 Korintus 8

¹ Sudara-sudara, torang mo kase tau pa ngoni tentang Tuhan Allah pe bae yang Dia kase pa jemaat-jemaat yang ada di daera Makedonia.

²Biar jemaat-jemaat itu dapa banya penderitaan yang barát, tapi Tuhan Allah biking dorang pe hati tetap sanang skali. Deng biar lagi dorang hidup susa skali, tapi dorang pe hati bae sampe dong bisa bantu talebe-lebe pa orang laeng.

³Kita sandiri bole kase tau, dorang so bakase iko apa yang ada pa dorang. Mala so talebe-lebe lagi. Tara ada yang paksa pa dorang biking bagitu.

⁴Jemaat-jemaat di Makedonia minta itu deng sunggu-sunggu pa torang, supaya dorang lagi bisa ambe bagian kase doi sumbangan untuk bantu pa orang-orang yang so jadi Tuhan Allah pe umat yang hidup susa di kota Yerusalem.

⁵Doi sumbangan yang dorang kase itu, lebe banya dari yang torang harap dong kase. Tapi dorang so lebe kamuka kase dong pe hidup pa Tuhan Yesus, turus dorang kase lagi dong pe hidup pa torang, karna itu yang Tuhan Allah mau.

⁶Jadi, karna lia jemaat-jemaat di Makedonia pe hati bae, torang kirim lagi Titus pa ngoni untuk dia kase turus kumpul doi sumbangan yang tempo hari dia so perna suru ngoni kumpul. Dia bantu pa ngoni kumpul doi sumbangan untuk orang percaya di Yerusalem sampe samua siap.

⁷Ngoni so bagus skali suda dalam hal-hal ini: ngoni pe percaya so kuat, ngoni so bisa bicara di muka umum, ngoni so tau banya tentang Tuhan, ngoni so bantu orang deng sunggu-sunggu, deng ngoni lagi so sayang skali pa torang. Jadi, ngoni musti lebe bagus lagi bakase doi sumbangan pa orang-orang susa.

⁸Kita bicara tentang doi sumbangan itu, bukang berarti kita mo parenta pa ngoni. Tapi kita mau ngoni tau, jemaat-jemaat di daera Makedonia suka skali bantu pa orang yang perlu, supaya ngoni lagi ada smangat untuk bantu orang sama deng yang jemaat-jemaat Makedonia so biking. Karna kalu ngoni biking bagitu, orang bisa tau, ngoni itu butul-butul sayang orang.

⁹Sebenarnya kita tara perlu suru ngoni bantu pa dorang, barang ngoni so tau Yesus Kristus torang pe Tuhan pe bae yang Dia so kase pa ngoni. Biar Dia punya samua-samua yang ada, tapi karna Dia sayang pa torang, Dia kase tinggal samua itu supaya jadi manusia yang tara punya apa-apa. Dia biking bagitu la torang dapa banya yang bae dari Tuhan Allah.

¹⁰Jadi menurut kita yang ada dia pe guna untuk ngoni itu bagini: ngoni jemaat yang so kamuka pikir untuk bantu pa orang-orang percaya yang hidup susa di Yerusalem. Kong ngoni me yang kamuka kumpul doi sumbangan itu taong lalu.

¹¹Jadi kase selesai suda kumpul ngoni pe doi sumbangan itu. Dulu ngoni smangat skali kumpul doi sumbangan itu, jadi skarang ngoni musti smangat lagi bagitu untuk kase selesai kumpul, kong bakase itu iko apa yang ada pa ngoni.

¹²Karna kalu ngoni bakase deng hati yang sanang, tamba lagi yang ngoni kase itu iko apa yang ngoni mampo bakase, Tuhan akan tarima apa yang ngoni kase itu. Dia tara perna minta torang kase lebe dari apa yang ada pa torang.

¹³Kita tara maksut ngoni bakase lebe dari ngoni pe kemampuan, baru orang laeng cuma kase sadiki. Kita pe maksut, torang samua bisa bantu sama-sama pa dorang iko masing-masing torang pe kemampuan.

¹⁴Jadi skarang kalu ngoni ada lebe, ngoni bisa kase cukup pa dorang di Yerusalem pe kekurangan, supaya nanti, kalu apa yang lebe pa dorang, dong bisa kase cukup lagi ngoni pe kekurangan. Deng bagitu, torang bisa pikul sama-sama torang pe susa.

¹⁵ Itu samua jadi sama deng yang so tatulis di Kitab Suci bagini, “Orang yang dapa banya, dia tara talebe-lebe. Deng orang yang dapa sadiki, dia tara kurang apa-apa.”

¹⁶Torang bilang tarimakasi pa Tuhan Allah karna Dia yang biking sampe Titus suka bantu pa ngoni, sama deng torang suka bantu pa ngoni.

¹⁷Memang torang yang minta dia pigi pa ngoni, kong dia pigi. Tapi dia pigi bukang cuma karna torang yang suru, tapi sebenarnya dia sandiri yang so smangat skali mo pigi pa ngoni deng hati yang sunggu-sunggu.

¹⁸Kong Titus tara pigi sandiri. Torang ada utus lagi torang pe sudara satu yang percaya. Samua jemaat ada puji-puji pa sudara itu, barang dia karja karas kase tau Kabar Bae tentang Yesus Kristus.

¹⁹Bukang cuma karna itu sampe torang utus pa dia, tapi karna jemaat-jemaat yang pili pa dia untuk antar doi sumbangan pa orang-orang percaya di Yerusalem. Torang biking samua itu supaya Tuhan bole dapa puji deng hormat, deng supaya orang bole tau, torang memang suka bantu orang.

²⁰ Torang utus pa sudara satu itu la iko deng torang sama-sama untuk antar doi itu karna torang baati-ati skali, jang sampe ada orang yang mo kase sala pa torang waktu antar doi sumbangan yang banya skali ini.

²¹ Torang biking bagitu karna torang mau biking yang butul, bukang saja pa Tuhan pe muka, tapi pa manusia pe muka lagi.

²²Ada lagi sudara satu yang percaya, yang torang utus sama-sama deng dong Titus. Sudara itu so ulang-ulang torang uji dia pe karja sampe tong lia dia pe karja bagus. Kong skarang, dia so lebe berusaha lagi mo bantu pa ngoni karna dia percaya skali pa ngoni.

²³Kong tentang Titus, dia itu kita pe tamang yang bakarja sama-sama deng kita untuk bantu pa ngoni. Kong dua sudara yang percaya yang sama-sama deng Titus, dorang dua itu dapa utus dari jemaat-jemaat untuk antar doi sumbangan di Yerusalem. Apa yang dorang dua biking itu, biking Yesus Kristus dapa puji deng hormat.

²⁴Karna dorang dapa utus dari jemaat-jemaat, kita minta pa ngoni jemaat Korintus, tarima pa dong tiga kong kase tunju ngoni pe sayang pa dorang, supaya samua jemaat me bole tau, ngoni butul-butul sayang pa dorang, deng dorang me tau lagi apa yang torang jaga kase puji-puji tentang ngoni pe sayang deng jaga bantu pa orang-orang talebe-lebe, itu memang butul.