Read Malay, North Moluccan Galatia 3 Bible Online

Galatia 3 - Malay, North Moluccan bible

Galatia 3

¹Ee ngoni orang-orang percaya di Galatia! Tuhari, kita so kase tau deng jelas di ngoni pe muka-muka to, Yesus Kristus mati di kayu salib untuk tebus torang pe dosa. Tapi skarang orang so kase tipu pa ngoni untuk iko dorang pe ajaran yang sala, kata, musti iko aturan-aturan di lima kitab Musa baru dapa slamat. Ngoni memang bodo!

²Coba ngoni inga! Ngoni tarima Roh Kudus itu bukang gara-gara ngoni ada biking aturan-aturan di lima kitab Musa, to? Tapi ngoni tarima Roh Kudus karna ngoni percaya pa Yesus Kristus waktu ngoni dengar Kabar Bae tentang Dia itu.

³Waktu ngoni baru percaya pa Yesus Kristus, Roh Kudus itu bakarja kong kuasai pa ngoni pe diri, tapi skarang ngoni so bale biking aturan-aturan di lima kitab Musa la mo berusaha sandiri supaya ngoni jadi orang yang butul pa Tuhan Allah pe muka. Sebenarnya jang ngoni jadi bodo macam bagitu!

⁴Waktu ngoni baru percaya pa Yesus, ngoni tahang banya siksa dari orang-orang yang tara percaya. Jadi, kalu ngoni tara percaya ajaran yang butul itu lagi, parcuma ngoni pe siksa yang ngoni dapa itu. Masa mo jadi parcuma bagitu!

⁵Tuhan Allah so kase Dia pe Roh pa ngoni deng so biking mujizat di ngoni pe tenga-tenga. Jang sampe ngoni kira kata, Dia biking samua itu karna ngoni ada iko aturan-aturan di lima kitab Musa. Tarada! Tapi Dia biking samua itu cuma karna ngoni ada dengar Kabar Bae tentang Yesus Kristus, turus ngoni jadi percaya.

⁶ Ambe conto, torang pe orang tua dulu-dulu, Abraham. Di Kitab Suci ada tatulis bagini, “Abraham percaya pa Tuhan Allah, deng karna dia pe percaya itu, Tuhan Allah tarima pa dia jadi orang yang tara sala pa Tuhan Allah pe muka.”

⁷ Jadi dari Kitab Suci itu, ngoni bole tau deng jelas, sapa yang percaya pa Tuhan Allah, dia itu so butul-butul jadi Abraham pe turunan.

⁸ Di Kitab Suci, torang bole tau, dari dulu Tuhan Allah so rencana mo biking orang-orang bukang Yahudi itu jadi orang yang tara sala pa Dia pe muka, asal dorang percaya pa Yesus Kristus. Tuhan Allah so kase tau Kabar Bae tentang Yesus Kristus itu lebe kamuka pa Abraham bagini, “Dari ngana, samua suku bangsa di dunia mo dapa berkat.”

⁹Jadi, Tuhan Allah kase berkat itu pa Abraham karna Abraham pe percaya pa Tuhan Allah. Bagitu lagi deng torang, torang mo dapa berkat jadi orang yang tara sala pa Tuhan Allah pe muka, asal torang percaya pa Yesus Kristus.

¹⁰ Tapi orang yang berusaha untuk jadi orang yang butul pa Tuhan Allah pe muka deng cara biking aturan-aturan di lima kitab Musa, dorang itu suda orang-orang yang dapa kutuk dari Tuhan Allah karna tara ada dari dorang yang mampo biking samua aturan itu. Karna di Kitab Suci tatulis bagini, “Sapa yang tara biking samua aturan di lima kitab Musa, dia itu mo dapa kutuk dari Tuhan Allah.”

¹¹ Jadi torang tau deng jelas, tara ada orang yang jadi orang yang butul pa Tuhan Allah pe muka gara-gara dia ada iko aturan-aturan di lima kitab Musa. Karna di Kitab Suci tatulis bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka kong dia yang mo hidup deng Tuhan Allah slama-lamanya.”

¹² Tapi kalu torang berusaha iko aturan-aturan di lima kitab Musa supaya jadi butul pa Tuhan Allah pe muka, itu berarti, torang bagantong pa torang pe diri sandiri untuk jadi orang yang butul pa Dia pe muka, torang tara bagantong pa torang pe percaya pa Tuhan Allah. Karna di Kitab Suci ada tatulis bagini, “Orang yang iko samua aturan di lima kitab Musa, dorang hidup cuma iko-iko aturan-aturan itu.”

¹³ Kong torang samua pantas dapa kutuk karna torang tara mampo iko samua aturan di lima kitab Musa. Tapi biar bagitu me, Yesus Kristus kase Dia pe diri mati la kase bebas pa torang dari kutuk itu, deng cara Dia kase Dia pe diri dapa kutuk mati untuk torang. Karna di Kitab Suci ada tatulis bagini, “Orang yang dapa hukum mati di kayu salib, dia itu sama deng dapa kutuk dari Tuhan Allah.”

¹⁴Yesus Kristus serakan Dia pe diri mati bagitu, supaya orang-orang yang bukang Yahudi me bole dapa berkat untuk jadi orang yang tara sala pa Tuhan Allah pe muka, sama deng Tuhan Allah janji pa Abraham deng dia pe turunan Yahudi dulu. Jadi, kalu torang percaya pa Kristus Yesus, torang samua bole tarima Roh Kudus yang Tuhan Allah so janji dari dulu itu.

¹⁵Sudara-sudara, kita mo kase conto satu dari hidup hari-hari. Kalu orang biasa biking janji, turus dorang biking sah dong pe janji itu, so tara ada lagi orang laeng yang bole mo kase batal atau bole mo tamba apa-apa di janji itu, biar lagi janji itu cuma manusia yang biking.

¹⁶ Bagitu lagi deng Tuhan Allah pe janji-janji yang Dia biking pa Abraham deng Abraham pe turunan. Di Kitab Suci itu, tara tatulis Tuhan Allah kase Dia pe janji itu pa “Abraham pe turunan-turunan” sama deng janji itu untuk banya orang, tapi ada tulis, Dia kase Dia pe janji itu cuma pa “Abraham pe turunan” saja, jadi itu pe maksut, janji itu cuma pa satu orang saja, Dia itu Yesus Kristus.

¹⁷ Kita pe maksut bagini: Tuhan Allah so lebe kamuka biking janji itu deng Abraham, kong Tuhan Allah so biking sah janji itu. Abis itu, ampa ratus tiga pulu taong brikut, baru Tuhan Allah kase aturan-aturan pa nabi Musa, itu aturan-aturan di lima kitab Musa. Jadi aturan-aturan yang muncul dari balakang itu tara bole kase batal atau hapus janji yang so ada lebe kamuka itu.

¹⁸ Karna itu, skarang jang ngoni pikir kalu orang iko aturan-aturan di lima kitab Musa turus, Tuhan Allah pasti mo kase pa dia apa yang Tuhan Allah so janji pa Abraham waktu dulu itu. Sebenarnya Tuhan Allah memang mo kase pa ngoni apa yang Dia so janji pa Abraham dulu, tapi Dia mo kase itu pa ngoni deng cuma-cuma. Jadi kalu ngoni lebe kamuka biking aturan-aturan itu supaya ngoni bole tarima apa yang Tuhan Allah janji itu, itu dia pe nama bukang janji lagi.

¹⁹Jadi karna Tuhan Allah so kamuka biking janji deng Abraham, turus Dia pe maksut apa deng biking lagi aturan-aturan di lima kitab Musa itu? Tuhan Allah tamba aturan-aturan itu supaya torang sadar, torang manusia berdosa. Kong, torang musti iko aturan-aturan itu sampe dia pe waktu Abraham pe turunan Satu yang Tuhan Allah janji itu datang. Waktu Tuhan Allah kase aturan-aturan itu, Dia pe malaekat-malaekat kase sampe pa nabi Musa, baru nabi Musa kase sampe pa orang-orang Yahudi. Deng bagitu, nabi Musa jadi orang yang sama deng jambatan antara Tuhan Allah deng manusia.

²⁰Tapi, waktu Tuhan Allah biking janji deng Abraham, Dia tara pake orang untuk jadi sama deng jambatan untuk kase sampe janji itu pa orang-orang Yahudi, tapi Dia sandiri yang bicara langsung pa Abraham.

²¹Jang sampe ngoni kira kata, aturan-aturan di lima kitab Musa itu baku lawan deng Tuhan Allah pe janji-janji pa Abraham yang so kamuka ada. Itu sama skali tara baku lawan. Kalu saja aturan-aturan itu bisa biking tong pe diri hidup deng Tuhan Allah slama-lamanya, itu berarti, torang iko aturan-aturan itu supaya torang sandiri bole berusaha biking tong pe diri jadi orang yang butul pa Tuhan Allah pe muka, tapi yang sebenarnya bukang bagitu.

²²Karna di Kitab Suci ada tatulis bagini, “Samua orang di dunia ini so sala pa Tuhan Allah pe muka karna dorang pe dosa.” Jadi karna samua manusia pe dosa itu, Tuhan Allah biking Dia pe janji deng Abraham, supaya sapa yang percaya pa Yesus Kristus, dia itu mo dapa Tuhan Allah pe janji untuk hidup deng Tuhan Allah slama-lamanya, itu yang Tuhan Allah mo kase.

²³Dulu waktu torang bolong tau untuk percaya pa Yesus Kristus, torang iko aturan-aturan di lima kitab Musa. Waktu itu, torang sama deng orang yang dapa tahang di penjara, karna torang taika skali deng aturan-aturan itu. Torang taika bagitu sampe di waktu Yesus Kristus datang kong Tuhan Allah kase jelas pa torang, torang bole percaya pa Yesus Kristus.

²⁴Jadi waktu itu, aturan-aturan di lima kitab Musa itu jadi sama deng torang pe guru yang ajar deng pimpin pa torang sampe di waktu Yesus Kristus datang di dunia. Waktu Yesus Kristus datang, sapa saja yang percaya pa Dia, Tuhan Allah biking dia jadi orang yang tara sala pa Tuhan Allah pe muka.

²⁵Jadi skarang, aturan-aturan di lima kitab Musa so tara jadi sama deng tong pe guru lagi, karna Yesus Kristus so ada, kong torang so bole percaya pa Dia untuk jadi orang yang tara sala pa Tuhan Allah pe muka.

²⁶Jadi sudara-sudara, ngoni so jadi Tuhan Allah pe ana-ana karna ngoni so percaya pa Yesus Kristus.

²⁷Ngoni so dapa baptis, itu satu tanda ngoni so percaya pa Yesus Kristus. Karna itu, ngoni so tarima Yesus Kristus pe sifat pa ngoni pe diri. Jadi tiap hari ngoni so iko Dia pe sifat, itu sama deng ngoni pe baju yang ngoni pake tiap hari.

²⁸Karna itu, samua orang yang so percaya pa Yesus Kristus so tarada beda pa Tuhan Allah pe muka. Biar ngoni itu orang Yahudi atau orang bukang Yahudi, biar ngoni orang karja yang tara bebas atau orang bebas, deng biar ngoni itu laki-laki atau parampuang, Tuhan Allah lia ngoni samua itu sama, karna ngoni itu orang-orang yang so sama-sama percaya pa Kristus Yesus.

²⁹ Kong karna ngoni itu Yesus Kristus pe umat, itu berarti, ngoni me so jadi Abraham pe turunan, deng ngoni lagi ada hak mo tarima apa yang Tuhan Allah ada janji dulu pa Abraham.