Read Malay, North Moluccan Galatia 5 Bible Online

Galatia 5 - Malay, North Moluccan bible

Galatia 5

¹Sudara-sudara, torang skarang so bebas, karna Yesus Kristus so kase bebas pa torang dari aturan-aturan di lima kitab Musa la torang dapa slamat. Karna itu, torang musti tetap kuat percaya, jang kase biar torang pe diri taika deng aturan-aturan itu lagi, barang itu sama deng torang jadi aturan itu pe suru-suru.

²Dengar bae-bae yang kita Paulus mo bilang pa ngoni: kalu ngoni kase ngoni pe diri dapa sunat cuma deng maksut supaya ngoni jadi orang yang butul pa Tuhan Allah pe muka, itu so sala, kong apa yang Yesus Kristus biking di kayu salib jadi tara ada dia pe guna untuk ngoni.

³Kita kase inga ulang pa ngoni: tiap orang yang kase dia pe diri supaya dapa sunat iko aturan itu, dia itu musti iko samua aturan di lima kitab Musa.

⁴Kalu ngoni mau iko aturan-aturan di lima kitab Musa untuk jadi orang yang butul pa Tuhan Allah pe muka, itu berarti, ngoni pe hubungan deng Yesus Kristus so taputus. Karna Tuhan Allah so kase Dia pe bae pa ngoni deng cara biking ngoni jadi orang yang tara sala pa Dia pe muka. Jadi kalu ngoni sandiri mo usaha jadi orang yang butul, ngoni so tolak Dia pe bae itu.

⁵Tapi sudara-sudara, Roh Kudus bakarja di torang pe hati jadi torang percaya Tuhan Allah mo biking torang jadi orang yang tara sala pa Dia pe muka. Itu suda yang torang tunggu-tunggu.

⁶Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

⁷Dulu, pe bagus skali ngoni iko pa Tuhan Yesus, ngoni bole mo kase sama deng orang yang iko lomba lari kong ada lari bae-bae. Tapi skarang ini, ngoni so tara sama deng yang dulu lagi. Sapa yang so pengaru pa ngoni sampe ngoni so tara iko lagi ajaran yang butul?

⁸Pengaru itu bukang dari Tuhan Allah yang ada pangge pa ngoni untuk iko pa Dia.

⁹ Dorang pe pengaru yang sadiki itu bole biking banya orang jadi tara iko lagi ajaran yang butul, itu sama deng ragi sadiki yang bisa biking samua adonan jadi nae.

¹⁰Kita percaya pa Tuhan deng kita yakin skali pa Dia, ngoni tara akan tapengaru lagi untuk iko orang pe pengaru yang sala itu, yang tara sama deng yang kita ajar. Tapi orang yang jaga kase pengaru pa ngoni sampe biking ngoni tara sadar so iko yang sala, dia itu pasti mo dapa hukum dari Tuhan Allah, biar sapa lagi dia itu.

¹¹Sudara-sudara, ada orang yang bilang kata, kita ini jaga kase ajar orang musti iko aturan sunat yang ada di lima kitab Musa. Padahal, kita tara perna ajar bagitu, karna kalu kita ajar bagitu, pasti orang-orang yang sama-sama Yahudi deng kita tara siksa pa kita. Tapi yang kita kase ajar pa orang-orang itu, dorang musti percaya pa Yesus Kristus yang mati di kayu salib. Kong gara-gara kita kase ajar bagitu, ini yang jadi masala basar pa dorang sampe dorang tara mau percaya, sama deng dorang pe kaki ada tagate di batu.

¹²Orang-orang yang biking sampe ngoni jadi bingung deng dong pe ajaran itu, lebe bae dorang potong kase putus suda dong pe kemaluan sandiri!

¹³Sudara-sudara, Tuhan Allah so pangge pa ngoni iko pa Dia, deng bagitu ngoni bisa bebas dari aturan-aturan di lima kitab Musa untuk dapa slamat. Cuma jang ngoni pikir ngoni so bebas, turus ngoni bole biking kalakuang yang tara bagus iko apa saja yang ngoni suka. Bukang bagitu. Tapi yang butul yang musti biking itu, ngoni musti baku-baku layani karna ngoni baku sayang.

¹⁴ Barang, Tuhan Allah pe parenta bagini, “Ngoni musti sayang pa orang laeng sama deng ngoni sayang pa ngoni pe diri sandiri.” Kalu ngoni iko parenta itu, itu sama deng ngoni so iko samua aturan di lima kitab Musa.

¹⁵Tapi kalu ngoni cuma bakalae deng baku malawang, ngoni musti ati-ati, jang sampe ngoni sama deng binatang yang baku-baku gigi sampe baku abis.

¹⁶Kita pe maksut bagini: ngoni musti hidup iko Roh Kudus pe mau. Kalu ngoni hidup bagitu, ngoni tara akan iko manusia pe mau yang suka biking dosa.

¹⁷ Karna manusia pe mau yang suka biking dosa itu baku lawan deng Roh Kudus pe mau. Bagitu lagi deng Roh Kudus pe mau, itu baku lawan deng manusia pe mau. Kong karna dua-dua itu baku lawan, itu biking torang tara biking barang yang bae yang torang suka mo biking.

¹⁸Tapi kalu torang kase tong pe diri untuk Roh Kudus pimpin, torang tara musti iko aturan-aturan di lima kitab Musa.

¹⁹Orang-orang yang cuma iko manusia pe mau yang suka biking dosa itu dapa lia dari dorang pe kalakuang macam bagini: baseks sabarang, biking kalakuang yang cafarune, jaga iko napsu sama deng binatang,

²⁰jaga semba pa dong pe puji-puji, pake tiop-tiop, binci pa orang laeng, bakalae, mangiri pa orang-orang laeng, capat skali mara, cuma pikir diri sandiri, suka biking orang tapisa-pisa, suka baku beda pendapat sampe biking kelompok-kelompok,

²¹mangiri orang pe barang, pangmabo, babapesta kong mabo-mabo sampe biking hal sabarang, deng biking hal-hal laeng yang tara bagus lagi. Tentang samua hal yang tara bagus itu, hari ini kita kase inga ulang pa ngoni, sama deng yang kita so perna bilang pa ngoni dulu, bagini: orang yang hidup bagitu tara akan dapa bagian waktu Tuhan Allah Berkuasa sebagai Raja pa Dia pe umat.

²²Tapi orang yang Roh Kudus kuasai itu dapa lia dari dorang pe hidup macam bagini: pangsayang, hati sanang, hati tenang, pangsabar, pangbae, biking barang yang bae, setia,

²³tara kasar, deng kuasai diri sandiri. Tara ada aturan yang kase sala orang yang hidup macam bagitu.

²⁴Sapa saja yang so jadi Kristus Yesus pe umat, dia itu so tara iko manusia pe mau yang suka biking dosa deng napsu yang tara bae. Itu bole mo kase sama deng dia so kase mati sifat itu di atas kayu salib.

²⁵Roh Kudus so kuasai pa torang deng biking torang hidup deng cara yang baru, jadi mari suda torang hidup iko Roh Kudus itu pe mau turus.

²⁶Deng tara usa suda torang jadi pangbasombong, tara usa suda torang baku pancing mara, kong tara usa suda torang baku mangiri.