Read Malay, North Moluccan Efesus 5 Bible Online

Efesus 5 - Malay, North Moluccan bible

Efesus 5

¹Sudara-sudara, ngoni itu Tuhan Allah pe ana-ana yang Dia sayang. Jadi, ngoni musti berusaha iko Tuhan Allah pe sifat.

² Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

³Ngoni itu Tuhan Allah pe umat, jadi jang ngoni baseks sabarang, jang biking hal-hal yang cafarune, deng jang ingin orang pe barang jadi ngoni punya. Samua itu biar cuma sebut saja me jangan, karna itu tara pantas untuk orang-orang yang so jadi Tuhan Allah pe umat.

⁴Bagitu lagi, ngoni tara bole bilang kata-kata yang kotor, deng kata-kata yang tarada dia pe guna. Ngoni me jang basangaja deng kata-kata yang kurang ajar. Barang, samua kata-kata itu tara pantas untuk ngoni yang so percaya pa Yesus Kristus mo bilang. Tapi yang paling bae yang ngoni musti biking itu, ngoni bilang tarimakasi suda pa Tuhan Allah.

⁵Ngoni inga suda ini bae-bae: orang yang baseks sabarang, yang biking hal-hal yang cafarune, deng yang ingin orang pe barang jadi dia punya, tara ada yang akan jadi Tuhan Allah deng Yesus Kristus pe umat yang Dia Berkuasa sebagai Raja pa dorang pe hidup, barang dorang lebe kase penting hal-hal itu daripada Tuhan.

⁶Jang ngoni dapa kase bodo dari orang-orang yang bilang kata, hal-hal itu bukang dosa. Barang, Tuhan Allah pasti mo hukum pa orang-orang yang biking hal-hal itu, karna dorang tara dengar-dengaran pa Tuhan Allah.

⁷Karna itu, jang ngoni iko pa orang yang pe kalakuang macam bagitu.

⁸Memang dulu, ngoni pe kalakuang me tara bae, sama deng orang-orang yang hidup dalam galap. Tapi skarang, karna ngoni so percaya pa Tuhan, itu sama deng ngoni so hidup dalam tarang. Jadi ngoni pe hidup musti bae-bae sama deng ana-ana tarang.

⁹Karna orang yang hidup dalam tarang, dorang itu biking barang yang bae, yang butul, deng yang adil.

¹⁰Deng ngoni lagi musti berusaha cari tau apa saja yang biking Tuhan Allah pe hati sanang.

¹¹Jang ngoni iko orang yang hidup dalam galap pe kalakuang. Dorang pe kalakuang itu tara ada dia pe guna. Tapi lebe bae ngoni musti bilang suda yang dong biking itu sala.

¹²Barang, apa yang dorang biking deng sambunyi-sambunyi itu, tara bae skali, sampe biar cuma sebut saja me torang so rasa malu.

¹³Tapi waktu torang togor pa orang-orang yang biking sala, kong dorang dengar deng tau itu sala, itu sama deng torang ada pasang lampu di galap supaya bole dapa lia deng jelas.

¹⁴Itu dia pe sebab sampe ada orang yang bilang bagini, “Ee ngoni yang masi tidor, bangun suda, ngoni ini sama deng orang yang so mati, ngoni musti hidup ulang. Barang, Yesus Kristus mo kase tarang ngoni pe hati.”

¹⁵Jadi perhatikan bae-bae ngoni pe cara hidup, jang jadi sama deng orang yang tara tau apa-apa. Tapi ngoni musti hidup sama deng orang yang tau mana yang bae deng mana yang jahat.

¹⁶ Skarang ini so paling banya kajahatan, karna itu ngoni pake suda bae-bae waktu yang ada untuk biking barang yang bae.

¹⁷Jang ngoni sama deng orang yang bodo, tapi ngoni berusaha suda supaya ngoni mangarti bae-bae Tuhan pe mau.

¹⁸Jang ngoni bamabo, karna itu yang biking ngoni tara bisa kuasai ngoni pe diri, sampe ngoni biking banya macam barang yang tara bae. Tapi lebe bae ngoni kase ngoni pe diri untuk Roh Kudus kuasai.

¹⁹ Deng ngoni baku kase kuat suda ngoni pe hati satu deng yang laeng pake lagu-lagu mazmur, lagu-lagu yang puji pa Tuhan, deng lagi lagu-lagu laeng yang Roh Kudus kase langsung pa ngoni. Ngoni manyanyi puji pa Tuhan suda deng hati yang sunggu-sunggu, jang cuma di mulu saja.

²⁰Kong dalam sagala hal, ngoni musti salalu bilang tarimakasi banya pa Tuhan Allah torang pe Bapa, karna samua yang torang pe Tuhan Yesus Kristus so biking.

²¹Ngoni musti hidup baku-baku dengar satu deng yang laeng. Kalu ngoni biking bagitu, ngoni so hormati pa Yesus Kristus.

²² Ngoni bini-bini, ngoni musti dengar-dengaran pa ngoni pe laki, sama deng ngoni dengar-dengaran pa Tuhan,

²³karna laki itu bini pe pemimpin, sama deng Yesus Kristus jadi kapala untuk pimpin jemaat. Kong jemaat itu bole kase sama deng Yesus Kristus pe badan, karna Yesus Kristus yang kase slamat pa jemaat dari dosa-dosa.

²⁴Jadi sama deng jemaat dengar-dengaran pa Yesus Kristus, bagitu lagi deng bini-bini musti dengar-dengaran pa dorang pe laki dalam sagala hal.

²⁵ Ngoni laki-laki yang so kawing, ngoni musti sayang pa ngoni pe bini sama deng Yesus Kristus sayang pa Dia pe jemaat, sampe Dia serakan Dia pe diri mati untuk jemaat itu.

²⁶Yesus Kristus mati, supaya torang Dia pe jemaat bole jadi Dia pe umat yang bersi dari dosa karna torang so dengar Dia pe firman deng torang so dapa baptis.

²⁷Jadi, torang yang so jadi Dia pe jemaat bole jadi Tuhan pe umat yang bersi dari dosa, kong tarada orang yang mo kase sala pa torang. Torang tarada dosa apa-apa sampe waktu Tuhan Yesus datang ulang jemput pa torang, jadi torang bole badiri pa Dia pe muka.

²⁸Bagitu lagi deng ngoni laki-laki yang so kawing, ngoni musti sayang ngoni pe bini sama deng ngoni sayang ngoni pe diri sandiri. Sapa yang sayang dia pe bini, itu sama saja deng dia sayang pa dia pe diri sandiri.

²⁹Karna tarada orang yang binci dia pe diri sandiri, mala dia akan jaga deng sayang dia pe diri sandiri, sama deng Yesus Kristus yang jaga deng sayang Dia pe jemaat.

³⁰Dia jaga deng sayang pa Dia pe jemaat karna torang ini sama deng Dia pe kaki, tangan, deng samua-samua yang ada pa Dia pe badan.

³¹ Di Kitab Suci ada tatulis bagini, “Karna itu, laki-laki akan kase tinggal dia pe papa deng mama, kong hidup satu deng dia pe bini, supaya dorang dua jadi satu.”

³²Apa yang tatulis tentang laki bini itu, itu pe arti lebe dari hubungan laki bini, kong banya orang bolong tau. Kita pe maksut tentang laki bini jadi satu itu, itu Yesus Kristus pe hubungan deng Dia pe jemaat.

³³Jadi bagini: laki musti sayang dia pe bini sama deng dia sayang pa dia pe diri sandiri. Bagitu lagi deng bini, bini musti hormati dia pe laki.