Read Malay, North Moluccan Filipi 1 Bible Online

Filipi 1 - Malay, North Moluccan bible

Filipi 1

¹ Sudara-sudara yang so jadi Tuhan Allah pe umat di kota Filipi, deng ngoni yang pimpin jemaat, deng diaken-diaken. Salam dari kita Paulus deng Timotius. Torang dua ini yang jaga biking apa yang Kristus Yesus suru.

²Torang minta pa Tuhan Allah, torang samua pe Bapa, deng pa Tuhan Yesus Kristus, supaya kase yang bae pa ngoni, deng salalu biking ngoni pe hati tetap tenang.

³Tiap kali kita inga pa ngoni, kita batarimakasi banya pa Tuhan Allah yang kita jaga semba.

⁴Kong tiap kali kita kase berdoa pa ngoni samua, kita salalu berdoa deng hati yang sanang.

⁵Barang, mulai dari pertama ngoni percaya Kabar Bae tentang Yesus Kristus sampe skarang ini, ngoni so bantu pa torang untuk kase tau lagi Kabar Bae itu pa orang-orang.

⁶Kong kita yakin, Tuhan Allah yang so mulai bakarja di ngoni pe hati, Dia itu suda yang akan turus bakarja biking yang bae pa ngoni sampe di hari Kristus Yesus datang ulang yang kedua kali.

⁷Memang tara sala kalu kita pe perasaan sanang macam bagitu pa ngoni samua, karna ngoni samua salalu ada di kita pe hati. Barang, ngoni samua so ambe bagian untuk biking tugas yang Tuhan kase pa kita waktu kita ada di dalam penjara ini, deng waktu kita di luar penjara. Ngoni bantu pa kita, waktu kita bela Kabar Bae tentang Yesus Kristus dari orang-orang yang tantang Kabar Bae itu, deng waktu kita berusaha kase yakin pa orang-orang, Kabar Bae tentang Yesus Kristus itu butul. Tugas itu Tuhan kase pa kita karna Dia pe bae.

⁸Tuhan Allah suda yang jadi kita pe saksi, kita ini paling rindu skali mo baku dapa deng ngoni, karna kita sayang pa ngoni sama deng Kristus Yesus sayang pa ngoni.

⁹Jadi ini kita pe doa untuk ngoni: kita minta pa Tuhan supaya ngoni pe sayang lebe tatamba turus pa Tuhan Allah deng pa samua orang, deng ngoni lebe tamba tau deng mangarti sagala macam hal deng butul-butul,

¹⁰sampe ngoni bole tau mo pili mana yang bae, supaya ngoni bole hidup deng hati yang bersi, kong di hari Yesus Kristus datang ulang yang kedua kali, tara ada yang bisa kase sala apa-apa pa ngoni.

¹¹Kita minta lagi supaya Yesus Kristus bakarja di ngoni pe hati la ngoni bole biking barang yang butul pa Tuhan Allah pe muka. Turus orang-orang mo puji deng hormat pa Tuhan Allah karna dorang lia yang ngoni so biking itu.

¹²Sudara-sudara, kita mau ngoni tau, samua yang so jadi pa kita di sini, biar itu susa, tapi itu suda yang biking lebe tamba banya orang yang dengar deng percaya Kabar Bae tentang Yesus Kristus,

¹³ sampe tentara-tentara yang bajaga di raja basar Roma pe istana deng samua orang laeng di kota Roma ini me so jadi tau, kita dapa kase maso di penjara ini karna kita biking apa yang Yesus Kristus suru.

¹⁴Kong gara-gara kita dapa kase maso di penjara, itu yang biking banya sudara yang percaya yang tinggal di kota ini lebe tatamba kuat percaya pa Tuhan, sampe dorang lagi lebe barani kase tau Kabar Bae tentang Yesus Kristus deng tara tako-tako lagi.

¹⁵Memang butul, ada babarapa orang yang jaga kase tau ajaran tentang Yesus Kristus karna dorang mangiri pa kita, deng dorang cuma suka orang dengar dong pe ajaran saja. Tapi, ada lagi yang jaga kase tau ajaran tentang Yesus Kristus karna dong pe tujuan bae.

¹⁶Dorang yang kase tau ajaran tentang Yesus Kristus deng tujuan bae ini, dorang biking bagitu karna dorang sayang pa Tuhan Allah deng pa kita, deng karna dong tau, Tuhan Allah yang utus pa kita untuk bela Kabar Bae tentang Yesus Kristus supaya orang bole tau Kabar Bae itu butul.

¹⁷Tapi dorang yang pe maksut tara bae itu, dorang kase tau tentang Yesus Kristus, cuma supaya lebe banya orang dengar pa dorang. Dorang kira kata, deng dong biking bagitu, kita lebe tamba sengsara di dalam penjara.

¹⁸Tapi kita tara pusing deng itu! Karna biar dorang kase tau ajaran tentang Yesus Kristus itu deng maksut yang butul ka, tarada ka, itu tara penting. Yang penting itu, ajaran tentang Yesus Kristus bisa tasiar turus. Kong itu yang biking kita pe hati sanang. Deng memang, kita akan tetap rasa sanang turus,

¹⁹barang kita tau, kita akan slamat[1] dari sengsara ini, karna ngoni pe doa deng karna Yesus Kristus pe Roh mo tolong pa kita.

²⁰Kong yang butul-butul kita ingin deng harap itu, kita barani biking apa saja yang Yesus Kristus suru pa kita, sama deng yang kita so biking dari dulu, supaya kita tara biking apa-apa yang biking malu kita pe diri. Yang penting itu Yesus Kristus dapa puji deng hormat dalam kita pe hidup, waktu kita masi hidup atau kita so mati.

²¹Barang, untuk kita, kita hidup cuma untuk Yesus Kristus supaya Dia dapa puji, kong kalu kita mati, itu lagi untuk kita pe bae, karna kita bole mo sama-sama deng Yesus Kristus di sorga.

²²Tapi kalu kita hidup turus di dunia ini, itu kita pe kesempatan untuk biking turus tugas yang Tuhan Yesus kase pa kita supaya lebe banya orang yang percaya pa Dia. Jadi kita bingung, kita tara tau mo pili yang mana.

²³Kita ini sama deng ada mangada dua pilihan. Kita suka mo kase tinggal dunia ini supaya bisa tinggal sama-sama deng Yesus Kristus di sorga, karna itu memang yang paling bae.

²⁴Tapi lebe bae kita tinggal turus di dunia ini, karna ngoni masi perlu pa kita.

²⁵Kita tau ngoni masi perlu pa kita untuk bantu pa ngoni, jadi kita yakin kita akan tetap tinggal deng ngoni samua supaya kita bole mo bantu kase kuat ngoni pe percaya, deng lagi supaya ngoni pe hati bole tamba sanang karna ngoni pe percaya itu.

²⁶Karna itu, nanti kalu kita so bebas kong bale ulang pa ngoni, ngoni mo lebe tamba sanang deng lebe sunggu-sunggu lagi puji pa Kristus Yesus.

²⁷Jadi yang penting skarang, ngoni musti hidup deng cara yang pantas untuk orang-orang yang so percaya Kabar Bae tentang Yesus Kristus, supaya nanti kalu kita pigi lia pa ngoni, atau kalu kita bolong sempat pigi pa ngoni, kita bole dengar, ngoni samua tetap kuat percaya deng satu hati, deng ngoni me sama-sama bakarja karas kase tau Kabar Bae itu pa orang-orang supaya dorang lagi bole jadi percaya.

²⁸Ngoni tara usa tako pa orang-orang yang lawan pa ngoni. Kalu dorang lia ngoni tara tako, itu kase tunju dorang itu akan dapa hukuman tapisa deng Tuhan Allah slama-lamanya, kong itu lagi kase tunju, ngoni yang percaya itu akan dapa slamat dari Tuhan Allah.

²⁹Jang ngoni tako, karna Tuhan Allah kase Dia pe bae pa ngoni bukang supaya ngoni percaya pa Yesus Kristus saja, tapi Dia me ator supaya ngoni dapa siksa dari orang yang tara percaya, kong deng bagitu, Yesus Kristus dapa puji.

³⁰ Memang skarang ini, ngoni so dapa siksa dari orang yang tara suka Kabar Bae itu, kong itu sama deng siksa yang ngoni perna lia pa kita dulu, deng yang skarang ngoni dengar so jadi pa kita.