Read Malay, North Moluccan Filipi 3 Bible Online

Filipi 3 - Malay, North Moluccan bible

Filipi 3

¹Sudara-sudara, ada lagi yang kita mo bilang pa ngoni: ngoni sanang suda karna ngoni so percaya pa Tuhan. Kita tara rasa barát untuk kase tau ulang apa yang kita so perna tulis, karna kita mo jaga pa ngoni supaya tara ada yang mo biking ngoni iko ajaran yang tara butul.

²Ngoni musti ati-ati deng orang-orang yang bawa ajaran yang tara butul, dorang yang bilang kata, kalu ngoni mo jadi Tuhan Allah pe umat, ngoni musti dapa sunat dulu. Padahal, deng dorang paksa pa ngoni bagitu, dorang jahat sama deng anjing-anjing. Dorang itu sama saja deng orang yang tara percaya.

³Ngoni musti ati-ati deng dorang, karna bukang dorang, tapi torang ini suda yang jadi Tuhan Allah pe umat, torang yang semba pa Dia pake Dia pe Roh pe kuasa yang ada di torang pe hati. Torang sama skali tara percaya sama deng dorang yang pikir kata, dorang bole jadi orang yang butul pa Tuhan Allah pe muka karna apa yang manusia biking, macam deng sunat itu. Tapi torang puji pa Kristus Yesus saja, barang cuma karna Dia, torang bole slamat.

⁴Dulu, kita lagi pikir sala, sama deng dorang yang bilang kata, manusia bisa jadi Tuhan Allah pe umat asal dapa sunat.[4] Padahal tara bagitu. Jadi, kalu ada orang yang pikir kata, dia ada alasan untuk taru harap di apa yang manusia biking, apalagi kita.

⁵ Kita ini dapa sunat waktu kita pe umur delapan hari iko aturan di lima kitab Musa. Kita ini dari bangsa Israel yang orang jaga bilang lagi orang Ibrani. Jadi kita ini butul-butul orang Ibrani asli dari suku Benyamin. Kita ini lagi dari aliran Farisi yang pegang kuat aturan-aturan di lima kitab Musa.

⁶ Mala, dari samua orang Farisi itu, kita ini yang paling smangat siksa pa orang-orang yang percaya pa Yesus Kristus, karna kita kira kata, dorang tara percaya pa Tuhan Allah deng butul, deng kata, kalu kita siksa pa dorang, kita hormati pa Tuhan Allah. Kong kalu bicara tentang iko aturan-aturan di lima kitab Musa, tarada yang bisa lawan pa kita, barang kita iko deng butul-butul samua aturan di lima kitab Musa itu.

⁷Tapi, samua-samua yang dulu kita anggap bawa untung pa kita itu, skarang kita anggap so tara untung, karna cuma pa Yesus Kristus saja kita pe tampa baharap skarang.

⁸Mala, samua-samua itu, skarang kita anggap tarada dia pe guna, barang kita skarang so bole butul-butul kanal pa Kristus Yesus kita pe Tuhan, kong itu lebe bagus lagi. Jadi karna Dia, kita kase tinggal samua-samua itu, kita anggap sama deng sampa, supaya kita bole kanal pa Yesus Kristus,

⁹deng bole hidup satu hati deng Dia. Tuhan Allah biking kita jadi orang yang tara sala pa Dia pe muka, bukang karna kita berusaha iko aturan-aturan di lima kitab Musa, tapi itu cuma karna kita percaya pa Yesus Kristus. Jadi, cuma deng percaya saja pa Yesus Kristus, kita jadi orang yang tara sala pa Tuhan Allah pe muka.

¹⁰Skarang, yang kita paling ingin itu, kita mo kanal butul-butul pa Yesus Kristus, deng mo rasa kuasa yang kase hidup ulang pa Dia waktu Dia mati. Kita so siap menderita deng mati karna kase tau Kabar Bae tentang Yesus Kristus, sama deng dulu Dia me perna menderita deng mati.

¹¹Deng bagitu, kalu kita mati, kita percaya Dia mo kase hidup ulang pa kita.

¹²Kita tara perna anggap kita ini so mampo hidup sama deng Yesus Kristus, atau kita ini so sempurna. Tarada kasiang! Tapi kita berusaha turus supaya kita bole hidup sama deng itu, karna Kristus Yesus so pili pa kita jadi Dia punya waktu kita percaya pa Dia.

¹³Sudara-sudara, kita sandiri me tara anggap kita pe hidup so sama deng Yesus Kristus, tapi ini yang kita jaga biking: kita so tara inga-inga apa yang kita so perna biking, tapi kita berusaha karas maju turus, sama deng orang yang ada iko lomba lari yang berusaha karas supaya dia bisa sampe di garis finis.

¹⁴Jadi kita berusaha turus supaya kita bole biking kita pe tujuan untuk hidup sama deng Kristus Yesus. Itu sama deng orang yang iko lomba lari, yang berusaha lari turus sampe garis finis supaya bole mo dapa hadia. Hadia yang kita mo dapa itu, hidup deng Tuhan Allah slama-lamanya. Kong Tuhan Allah pangge pa kita untuk dapa hidup itu, karna kita so percaya pa Kristus Yesus.

¹⁵Jadi mari suda, torang yang so butul-butul percaya pa Tuhan Yesus, torang samua musti hidup sama deng yang kita so bilang itu. Tapi kalu ada dari ngoni yang pikir laeng dari apa yang kita so bilang itu, nanti Tuhan Allah sandiri yang tolong pa dorang untuk biking dorang mangarti.

¹⁶Tapi yang penting itu, torang hidup iko turus apa yang Tuhan Allah so kase tunju pa torang sampe skarang.

¹⁷ Sudara-sudara, kita minta pa ngoni supaya ngoni iko kita pe cara hidup. Kong perhatikan lagi orang-orang yang pe cara hidup sama deng torang tiga[5] pe cara hidup, la ngoni lagi bole iko bagitu.

¹⁸Kita suru ngoni iko tong pe cara hidup, barang banya orang bilang kata, dong percaya pa Yesus Kristus, padahal pa dorang pe hidup kantara dong tara tarima ajaran yang bilang, Yesus Kristus mati di kayu salib untuk kase ampun manusia pe dosa-dosa. Kita so bilang ulang-ulang pa ngoni tentang hal itu, turus skarang deng mamanangis kita bilang ulang pa ngoni.

¹⁹Orang-orang yang pe hidup macam bagitu, mo tapisa deng Tuhan Allah slama-lamanya. Orang-orang itu tara iko Tuhan pe mau, mala dorang cuma biking puas dong pe diri sandiri, sampe itu suda yang jadi paling penting pa dorang pe hidup. Dorang biking hal-hal yang sebenarnya biking dong malu, tapi dong pikir dong hebat, dong suka orang puji dong biking bagitu, kong dorang cuma pikir dunia pe mau saja.

²⁰Tapi torang ini orang-orang yang so tahitung di sorga, beda deng dorang. Kong dari situ, Tuhan Yesus Kristus yang torang tunggu-tunggu akan datang ulang. Dia itu yang kase slamat pa manusia.

²¹Nanti waktu Dia datang, Dia mo ruba torang pe badan yang bisa ancor ini, jadi sama deng Dia pe badan yang luar biasa. Dia biking bagitu, karna Dia ada kuasa untuk biking samua-samua tundu iko Dia pe mau.